ثَامْوَارِّيثْ ن أَيُوبْ خْ بِيلَاذْ خْ ؤُسِيثمْ نّسْ ذِي أَربِّي
19
1 يَارَّا-د أَيُوبْ، إِنَّا: 2 مشْحَاڒْ عَاذْ إِ غَا ثكّمْ ثْشضْنمْ ڒعْمَارْ إِنُو،
أَذْ أَيِي ثْڒبْزمْ س وَاوَاڒنْ؟
3 ڒخُّو عَاذْ وِيسّْ عشْرَا ن ثْوَاڒَاوِينْ تّكّْوَارمْ أَيِي،
وَارْ ثتّْسضْحِيمْ ؤُمِي ذ أَيِي د-ثْغطّْڒمْ أَوَاڒْ.
4 مَاڒَا س ثِيذتّْ ودَّارغْ،
ڭُّورْ أَذْ إِقِّيمْ ؤُودَّارْ إِنُو إِ إِخفْ إِنُو.
5 مَاڒَا س ثِيذتّْ ثخْسمْ أَذْ خَافِي ثسّْڭعّْذمْ إِخفْ نْومْ س شِّيكِي،
ؤُ أَذْ أَيِي ثسّْقنْعمْ س ڒفْضِيحثْ إِنُو، ▫
6 سّْنمْ خنِّي، أَقَا أَربِّي إِنّقْڒبْ خَافِي،
ؤُشَا إِنّضْ أَيِي-د س ثْرَاشَّا نّسْ.
7 خْزَارْ، سْغُويّغْ: ’ڒخْشُونثْ!‘، مَاشَا وَارْ خَافِي د-يَارِّي ؤُڒَا ذ إِجّْ،
تّْڒَاغِيغْ إِ ثْوِيزَا، مَاشَا ڒْحقّْ وَارْ ذِينْ إِدْجِي.
8 أَبْرِيذْ إِنُو إِقّنْ إِ-ث، أَڒَامِي وَارْ زمَّارغْ أَذْ عْذُوغْ،
ثَادْجسْثْ إِسُّو ت خْ إِمسْرَاقْ إِنُو.
9 ڒْعزّْ إِنُو إِكشّضْ إِ-ث زَّايِي،
ؤُ تَّاجْ إِ إِدْجَانْ خْ ؤُزدْجِيفْ إِنُو إِكّسْ إِ-ث.
10 نتَّا يَارْژَا أَيِي زِي مَارَّا إِغزْذِيسنْ، أَذْ تّْوَاهلّْكغْ!
إِقْڒعْ أَرَاجِي إِنُو أَمْ إِشْثْ ن ثْشجَّارْثْ. ▫
11 أَغْضَابْ نّسْ يَارْغَا ذَايِي،
ؤُشَا نتَّا إِحسّبْ أَيِي أَمْ ڒْعذْيَانْ نّسْ. ▪
12 مُوننْثْ فّْغنْثْ-د ثرْبِيحِينْ ن ڒْعسْكَارْ نّسْ،
سّْوجْذنْثْ-إِ-د أَبْرِيذْ نْسنْثْ غَارِي،
ؤُشَا قُووَّارنْثْ إِ ثْقِيضُونْثْ إِنُو.
13 أَيْثْمَا إِسِّيڭّْوجْ إِ-ثنْ خَافِي،
إِنِّي ذ أَيِي إِسّْننْ ذوْڒنْ ذ مِيدّنْ خَافِي. ▪
14 إِنِّي ذ أَيِي إِتّعْنَانْ جِّينْ أَيِي،
إِنِّي ذ أَيِي إِسّْننْ تُّونْ أَيِي.
15 إِمْسخَّارنْ ن ثَادَّارْثْ إِنُو ذ ثِييَّاوِينْ إِنُو
حسّْبنْ أَيِي ذ ڒْبَارَّانِي،
نشّْ ذ أَغْرِيبْ جَارْ ثِيطَّاوِينْ نْسنْ.
16 ڒَاغِيغْ إِ ؤُمْسخَّارْ إِنُو، مَاشَا وَارْ خَافِي د-يَارِّي،
ثُوغَا إِتّْخصَّا أَذْ ث حشّْمغْ س ؤُقمُّومْ إِنُو.
17 ڒعْوِينْ ن ثمْوَارِّيثْ ن نّفْسْ إِنُو إِسّْعِيفّْ ثَامْغَارْثْ إِنُو،
أَرْصُوضغْ إِ أَيْثْمَا.
18 عَاذْ إِحْرَامنْ إِمژْيَاننْ سّحْقَارنْ أَيِي.
مَاڒَا كَّارغْ بدّغْ، تّمْعَارَّانْ خَافِي س وَاوَاڒنْ نْسنْ. ▪
19 مَارَّا إِمّدُّوكَّاڒْ إِنُو إِعِيزّنْ شَارّْهنْ أَيِي،
إِنِّي تّخْسغْ، نّْقڒْبنْ خَافِي. ▪
20 غَارْ ثڒْمشْثْ ذ ويْسُومْ إِنُو ڒسّْقنْ إِغْسَانْ إِنُو.
نشّْ نجْمغْ أَكْ-ذ ثِيڒْمشْثْ ن ثغْمَاسْ إِنُو وَاهَا. ▪
21 حِينّمْ خَافِي، حِينّمْ خَافِي، أَ كنِّيوْ، إِمدُّوكَّاڒْ إِنُو!
مَاغَارْ أَفُوسْ ن أَربِّي إِڒْقفْ أَيِي.
22 مَايمِّي إِ ذ أَيِي ثْضَافَّارمْ أَمشْنَاوْ أَربِّي،
ؤُ مَايمِّي وَارْ تّْجِيوِينمْ أَيْسُومْ إِنُو؟
23 مْڒِي ؤُرَانْ أَوَاڒنْ إِنُو،
مْڒِي تّْوَازمّمنْ وَاوَاڒنْ إِنُو ذڭْ إِجّْ ن وذْلِيسْ!
24 مْڒِي تّْوَانقْشنْ س بْلُومَا ن وُوزَّاڒْ ؤُ س ڒخْفِيفْ،
ذِي جَّارْفْ إِ ڒبْذَا.
25 نشّْ سّْنغْ: ’أَمفْذِي إِنُو إِدَّارْ،
ؤُ نتَّا أَذْ د-إِكَّارْ ذ أَنڭَّارْ زڭْ ؤُشَاڒْ.‘
26 ؤُ أَوَارْنِي ڒَامِي إِ غَا ثتّْوَاڒْبزْ ثڒْمشْثْ إِنُو أَمُّو،
أَذْ ژَترغْ أَربِّي زِي أَرِّيمثْ إِنُو.
27 أَذْ ث ژَترغْ زَّاثِي،
ثِيطَّاوِينْ إِنُو أَذْ ث ژَترنْثْ،
وَارْ إِدْجِي مِيدّنْ.
غَارسْ إِ تّْمژْرنْثْ ثِيژَّاڒْ إِنُو غَارْ ذَاخڒْ إِنُو. ▫
28 وَاخَّا أَمنِّي كنِّيوْ أَذْ ثِينِيمْ: ’مَامّشْ إِ نْزمَّارْ أَذْ ث نضْفَارْ؟‘
مَاغَارْ أَژْوَارْ ن ثْمسْڒَاشْثْ إِتّْوَافّْ ذَايِي.
29 ڭّْوذمْ زِي سِّيفْ،
مَاغَارْ لْغَاضَابْ أَذْ د-يَاسْ خْ دّْنُوبْ ن سِّيفْ،
مَاحنْذْ أَذْ ثسّْنمْ أَقَا أَذْ يِيڒِي ڒْحُوكْمْ.