ڒْهَارْذْ وِيسّْ ثْڒَاثَا ن إِلِيفَازْ خْ دّنْبْ ذ وذْوَاڒْ غَارْ أَربِّي
22
1 خنِّي يَارَّا-د إِلِيفَازْ، ونِّي د-يُوسِينْ زِي ثَايْمَانْ، إِنَّا: 2 مَا إِزمَّارْ بْنَاذمْ أَذْ إِنْفعْ أَربِّي؟
ونِّي إِڭِّينْ س ڒعْقڒْ إِنفّعْ مْغِيرْ إِ يِيخفْ نّسْ.
3 مَا أَقَا-ث ذ لْفَايْذَا إِ ؤُمْزمَّارْ خْ كُوڒْشِي أَقَا شكْ ثْسڭّْذذْ،
نِيغْ ذ ڒفْضڒْ مَاڒَا شكْ ثڭُّورذْ ذڭْ إِبْرِيذنْ نّكْ س ڒصْفَايثْ؟
4 مَا إِوْثِي إِ شكْ زِي سِّيبّثْ ن ثِيڭّْوُوذِي نّكْ زَّايسْ،
نِيغْ أَذْ يَاذفْ أَكِيذكْ غَارْ ثَادَّارْثْ ن شّْرعْ؟
5 مَا وَارْ ثدْجِي ثُوعفّْنَا نّكْ ذ ثَامقّْرَانْثْ،
ؤُ ڒْمُوعْصِييَّاثْ نّكْ مَا وَارْ دْجِينْثْ نْهْڒَا أَسْبذِّي؟
6 مَاغَارْ ثْحوّْسذْ دِّييّثْ زڭْ أَيْثْمَاشْ بَاطڒْ،
ؤُ ثكّْسذْ إِ ينِّي س ذْرُوسْ ن ورُّوضْ وَاهَا أَرُّوضْ نْسنْ. ▪
7 ونِّي يُوحْڒنْ وَارْ ذ أَسْ ثوْشِيذْ أَذْ إِسُو،
ونِّي إِدْجُوزنْ ثْقضْعذْ أَسْ أَغْرُومْ.
8 مَاشَا مَاڒَا ذِينْ أَرْيَازْ س ؤُغِيڒْ إِجْهذْ، خنِّي ثَامُّورْثْ أَقَا-ت إِ وَانِيثَا،
ؤُشَا أَذْ ذَايسْ إِزْذغْ شَا ن ورْيَازْ ن شَّانْ.
9 ثِيجَّاڒْ ثْسكّذْ ثنْثْ س إِفَاسّنْ خْوَانْ،
إِغَادْجنْ ن ؤُيُوجِيڒْ تّْوَاڒبْزنْ.
10 س ؤُينِّي نّْضنْثْ أَشْ ثْخشْفِينْ،
ؤُشَا ثوْضَاذْ-د خَاكْ ثِيڭّْوُوذِي.
11 نِيغْ وَارْ ثتّْوِيڒِيذْ ثَادْجسْثْ،
ذ ڒْحمْڒثْ ن وَامَانْ نِّي شكْ يذْڒِينْ؟
12 مَا وَارْ إِدْجِي أَربِّي يُوعْڒَا ذڭْ ؤُجنَّا؟
خْزَارْ إِثْرَانْ نِّي إِدْجَانْ سنّجْ قَاعْ، مَامّشْ عُودْجنْ!
13 مَاشَا ثقَّارذْ: ’مِينْ إِسّنْ أَربِّي؟
مَا إِزمَّارْ أَذْ إِحْكمْ نِيشَانْ زڭْ ؤُسيْنُو إِبُّومْبْسنْ؟
14 إِسيْنُوثنْ ذ أَڒحّفْ إِ نتَّا أَڒَامِي وَارْ إِتّْوِيڒِي،
ؤُ خْ ڒْقُوبّثْ ن ؤُجنَّا إِڭُّورْ نتَّا.‘
15 مَا ثخْسذْ أَذْ ثضْفَارضْ أَمسْرُوقْ ن وشْحَاڒْ ؤُيَا،
أَمسْرُوقْ نِّي كِّينْ يرْيَازنْ إِشُّورنْ س ڒْمُوعْصِييّثْ،
16 إِنِّي إِتّْوَاكّْسنْ أَمْ وَارْ د-يِيوِيضْ عَاذْ ڒْمِيجَاڒْ نْسنْ،
ؤُمِي ثْفيّضْ ڒْحمْڒثْ ذْسَاسْ نْسنْ،
17 إِنِّي إِنَّانْ إِ أَربِّي: ’أَڭّْوجْ خَانغْ!‘
مِينْ إِزمَّارْ ؤُمْزمَّارْ خْ كُوڒْشِي أَذْ يڭّْ عَاذْ إِ نِيثْنِي؟ ▪
18 إِوَا، وَاخَّا نتَّا إِشُّورْ ثُوذْرِينْ نْسنْ س ڒْخَارْ!
شّْوَارْ ن إِعفَّاننْ إِڭّْوجْ خَافِي. ▪
19 ژْرِينْ ث إِمْسڭَّاذنْ ؤُشَا فَارْحنْ،
أَمزْذَاڭْ إِسْثهْزَا زَّايْسنْ. ▪
20 ’أَغْرِيمْ نّغْ إِتّْوَاكحّضْ،
ؤُ مِينْ زَّايْسنْ إِقِّيمنْ ثشَّا إِ-ث ثْمسِّي.‘
21 قّنْ غَارسْ، أَذْ غَاركْ ثِيڒِي ڒْهُوذْنثْ،
س ؤُيَا أَذْ غَاركْ د-يَاسْ مِينْ إِصبْحنْ.
22 كْسِي خنِّي ثَاغُورِي زڭْ ؤُقمُّومْ نّسْ،
أڭّْ أَوَاڒنْ نّسْ ذڭْ وُوڒْ نّكْ.
23 مَاڒَا ثْذوْڒذْ-د غَارْ ؤُمْزمَّارْ خْ كُوڒْشِي، أَذْ ثْ˚تّْوَاسْبدّذْ.
سِيڭّْوجْ مِينْ وَارْ إِسڭّْذنْ خْ ثْقِيضُونِينْ نّكْ. ▪
24 سَارْسْ ؤُرغْ إِقُّورنْ ذڭْ ؤُشَاڒْ،
ؤُرغْ زِي ؤُفِيرْ جَارْ إِژْرَا ن ثْغزْرَاثِينْ.
25 خنِّي أَمْزمَّارْ خْ كُوڒْشِي أَذْ يِيڒِي ذ وُورغْ إِقُّورنْ نّكْ،
ؤُڒَا ذ إِذُورَارْ نّكْ ن نُّوقَارْثْ!
26 مَاغَارْ خنِّي أَذْ ثْفَارْحضْ زڭْ ؤُمْزمَّارْ خْ كُوڒْشِي،
ؤُ غَارْ أَربِّي أَذْ ثسّْڭعّْذذْ أَغمْپُوبْ نّكْ.
27 أَذْ أَسْ ثتَّارذْ س ثْژَادْجِيثْ يُودْجْغنْ
ؤُ نتَّا أَذْ أَشْ إِسڒْ ؤُ شكْ أَذْ ثْكمّْڒذْ لْوُوعُوذْ نّكْ.
28 مَاڒَا ثكّْسذْ أَوَاڒْ، خنِّي أَذْ أَشْ د-ثفّغْ ثْمسْڒَاشْثْ،
ؤُ ثَافَاوْثْ أَذْ ثَارغْ ذڭْ إِبْرِيذنْ نّكْ.
29 مَاڒَا شكْ سّهْوَانْ نِيثْنِي، أَذْ ثِينِيذْ: ’سْڭعّذْ أَزدْجِيفْ نّكْ!‘،
نتَّا أَذْ إِسّنْجمْ ونِّي إِسّْهكّْوَانْ ثِيطَّاوِينْ نّسْ. ▪
30 نتَّا أَذْ إِسّنْجمْ ونِّي وَارْ إِدْجِينْ بْڒَا ڒْعِيبْ،
مِينْزِي نتَّا أَذْ إِنْجمْ س ثزْذُوڭِي ن إِفَاسّنْ نّكْ!