‏1 إِتّْعِيفِّي ڒعْمَارْ إِنُو زِي ثُوذَارْثْ إِنُو،

أَذْ بَارّْحغْ أَشثْشِي إِنُو أَمُّو وَاهَا بْڒَا أَمْنَاعْ،

أَذْ سِّيوْڒغْ غَارْ ثَارْزُوڭِي ن ڒعْمَارْ إِنُو.

‏2 نشّْ أَذْ إِنِيغْ إِ أَربِّي: ’وَارْ ذ أَيِي تّڭّْ ذ أَعفَّانْ،

سْشنْ أَيِي، مَايمِّي أَكِيذِي ثتّْمنْغِيذْ.

‏3 مَا غَاركْ ڒفْضڒْ أَقَا شكْ ثْحصَّارذْ،

أَقَا ثْنطَّارضْ ڒْخذْمثْ ن إِفَاسّنْ نّكْ،

أَمْ ثتّڭّذْ ثَافَاوْثْ خْ إِخَارِّيصنْ ن إِعفَّاننْ؟

‏4 مَا غَاركْ ثِيطَّاوِينْ ن بْنَاذمْ،

مَا ثتّْوَاڒِيذْ شكْ أَمْ مَامّشْ تّْوَاڒَانْ إِوْذَانْ؟ ^▫  

‏5 مَا ؤُسَّانْ نّكْ أَمْ وُوسَّانْ ن بْنَاذمْ؟

مَا إِسڭّْوُوسَا نّكْ أَمْ إِسڭّْوُوسَا ن ورْيَازْ،

‏6 أَقَا شكْ ثَارزُّوذْ أَمُّو خْ ڒْمُوعْصِييّثْ إِنُو،

ثتّْبقّْشذْ ذِي دّْنُوبْ إِنُو؟

‏7 وَاخَّا شكْ ثسّْنذْ أَقَا نشّْ وَارْ دْجِيغْ ذ أَعفَّانْ،

وَاخَّا أَمنِّي وَارْ ذِينْ ونِّي إِ غَا إِفكّنْ زڭْ ؤُفُوسْ نّكْ.

‏8 إِفَاسّنْ نّكْ خڒْقنْ أَيِي-د، ڭِّينْ أَيِي،

أَقَا تّنّْضنْ أَيِي، ؤُشَا ڒخُّو شكْ ثْصَارْضذْ أَيِي.

‏9 عْقڒْ أَقَا شكْ ثڭِّيذْ أَيِي أَمْ ثَارِّيسْثْ،

ؤُ غَارْ ؤُأَشْثْعجَّاشْثْ ثخْسذْ أَذْ أَيِي ثَارّذْ. ^▪  

‏10 مَا وَارْ ذ أَيِي ثْزدْجْعذْ أَمْ ؤُغِي،

أَمْ كِيسُو ثجِّيذْ أَيِي أَذْ شّْرغْ؟ ^▪  

‏11 س ثڒْمشْثْ ذ ويْسُومْ ثسّْيَارْضذْ أَيِي،

س إِخْسَانْ ذ إِژوْرَانْ ثمُّوذذْ أَيِي.

‏12 ثُوذَارْثْ ذ ثْمخْسِيوْثْ إِشُووَّارنْ ثوْشِيذْ أَيِي ت،

أَحطُّو نّكْ إِحْضَا بُوحْبڒْ إِنُو.

‏13 ثْخمّْڒذْ ثَا مَاشَا ذڭْ وُوڒْ نّكْ،

نشّْ سّْنغْ بلِّي أَيَا ثُوغَا-ث غَاركْ ذِي ڒْبَاڒْ.

‏14 مَاڒَا خْضِيغْ، شكْ أَذْ أَيِي ثحْضِيذْ،

وَارْ ذ أَيِي ثتّْبَارِّيذْ زِي ڒْمُوعْصِييّثْ إِنُو.

‏15 مَاڒَا ڭِّيغْ ڒْغَارْ، ؤُشْثْ خَافِي!

مَاڒَا نشّْ ذ أَمْسڭّذْ إِ دْجِيغْ، وَارْ زمَّارغْ أَذْ سّْڭعّْذغْ أَزدْجِيفْ إِنُو.

جِّيوْنغْ س ڒفْضِيحثْ، تَّاشِيغْ أَكْ-ذ ڒمْحَاينْ إِنُو.

‏16 مَاڒَا سّْڭعّْذغْ إِخفْ إِنُو، أَذْ أَيِي ثْنيْمَارذْ أَمْ وَايْرَاذْ إِزهَّارنْ،

ثسّْشَانذْ خَافِي أَشُووَّارْ ن ڒعْجبْ ن جّْهذْ نّكْ ڒبْذَا. ^▪  

‏17 مَاعْلِيكْ ؤُفِيغْ أَذْ خَافِي ثسّْبدّذْ ڒبْذَا إِشهَّاذنْ نّغْنِي،

ؤُشَا أَذْ ثَارْنِيذْ عَاذْ ذڭْ وغْضَابْ نّكْ خَافِي،

إِعسَّاسنْ إِ إِخدْجْفنْ إِجّْ إِ ونّغْنِي ڒبْذَا، وَاهْ أَذْ غَارِي تّْنذْهذْ إِجّْ ن ڒْعسْكَارْ.

‏18 مَايمِّي إِ ذ أَيِي ثجِّيذْ أَذْ د-فّْغغْ زڭْ ؤُعذِّيسْ ن يمَّا؟

مْڒِي سُّوفّْغغْ بُوحْبڒْ، وَارْ ذ أَيِي ثْژَارْ ؤُڒَا ذ إِشْثْ ن ثِيطّْ!‘ ^▪  

‏19 مَاعْلِيكْ ؤُفِيغْ أَخْمِي وَارْ إِڒِيغْ عمَّارْصْ،

مّكْسِيغْ غَارْ ونْضڒْ زڭْ ؤُعذِّيسْ ن يمَّا.

‏20 مَا وَارْ دْجِينْ وُوسَّانْ ن ثُوذَارْثْ إِنُو ؤُذْرُوسنْ؟

مْڒِي ذ أَيِي إِجَّا، أَذْ خَافِي إِنّقْڒبْ مَاحنْذْ أَذْ فَارْهغْ شْوَايْثْ عَاوذْ،

‏21 قْبڒْ إِ غَا ؤُيُورغْ، - وَارْ ذِيكّْوِيڒغْ عَاذْ - ،

غَارْ ثمُّورْثْ ن ثَادْجسْثْ ذ ثِيڒِي ن ڒْموْثْ،

‏22 غَارْ ثمُّورْثْ ذ ثَابَارْشَانْثْ أَمْ ثْمذِّيثْ،

أَمْ ثِيڒِي ن ڒْموْثْ، وَارْ ذِينْ إِتّْبِينْ وَالُو،

مَانِي ثڭَّا ثْفَاوْثْ أَمْ ثْمذِّيثْ.