ثَامْوَارِّيثْ ن أَيُوبْ خْ بِيلْذَاذْ
9
1 يَارَّا-د أَيُوبْ، إِنَّا: 2 سّْنغْ نِيشَانْ، أَقَا أَمُّو إِ ثدْجْ،
مَاغَارْ مَامّشْ إِ غَا يِيڒِي بْنَاذمْ ذ أَمْسڭّذْ غَارْ أَربِّي؟ ▪
3 مَاڒَا نتَّا إِخْسْ أَكِيذسْ إِمْشَارّعْ،
إِڒِي نتَّا وَارْ إِزمَّارْ أَذْ خَاسْ د-يَارّْ ؤُڒَا ذ إِشْثْ ن ثْوَاڒَا خْ وَاڒفْ ن ثْوَاڒَاوِينْ.
4 نتَّا ذ أَمِيغِيسْ ن وُوڒْ ذ بُو-ثْزمَّارْ إِجهْذنْ،
مَانْ ونْ إِزمَّارنْ أَذْ إِسّقْسحْ إِخفْ نّسْ ضِيدّْ نّسْ،
ؤُشَا أَذْ إِقِّيمْ إِدَّارْ ذِي ڒَامَانْ؟
5 نتَّا ذ ونِّي إِسّْمُوطُّوينْ إِذُورَارْ أَمْ وَارْ ت تِّيشِينْ إِوْذَانْ،
ذ ونِّي ثنْ إِسّْنقْڒَابنْ ذڭْ وغْضَابْ نّسْ،
6 نتَّا ذ ونِّي إِسّنْهزَّانْ ثَامُّورْثْ زڭْ ومْشَانْ نّسْ،
ذ ونِّي إِڭِّينْ إِبِيلَارنْ نّسْ أَذْ أَرْجِيجنْ،
7 نتَّا ذ ونِّي إِتَّامَارنْ ثَافُوشْثْ أَڒَامِي وَارْ د-ثنْقِيرْ،
ذ ونِّي إِتّْشمَّاعنْ إِثْرَانْ!
8 نتَّا س يِيخفْ نّسْ وَاهَا إِتّْبزَّاعْ إِجنْوَانْ،
ؤُ نتَّا إِصُورُّوفْ ثِيوَا ن ثْعُورَارْ نْ ڒمْوَاجْ ن وَامَانْ، ▪
9 نتَّا ذ ونِّي إِڭِّينْ أَوْرَافْ ن إِثْرَانْ ن دُّوبْ أَمقّْرَانْ ذ ؤُرْيُونْ،
أَڭْرَاوْ ن سبْعَا ن إِثْرَانْ ذ إِخَامّنْ ن لْجَانُوبْ،
10 نتَّا ذ ونِّي إِڭِّينْ ثِيمسْڒَايِينْ ثِيمقّْرَانِينْ،
- وَارْ إِزمَّارْ بْنَاذمْ أَذْ ثنْثْ إِفْهمْ - ،
ؤُڒَا ذ ڒعْجَايبْ بْڒَا ڒحْسَابْ. ▪
11 خْزَارْ، نتَّا إِعدُّو خَافِي، وَارْ ث ژَترّغْ،
إِژكّْوَا، نشّْ وَارْ كِيذسْ تَّاشِيغْ.
12 خْزَارْ، مَاڒَا إِخْضفْ نتَّا، مَانْ ونْ إِ ث غَا إِمنْعنْ؟
مَانْ ونْ إِزمَّارنْ أَذْ أَسْ يِينِي: ’مِينْ ذِينْ تّڭّذْ شكْ؟‘
13 أَربِّي وَارْ إِتَّارِّي أَغْضَابْ نّسْ أَذْ د-إِذْوڒْ،
سَاذُو نّسْ ؤُضَارنْ إِمْعَاوَاننْ ن ’رَاهَابْ‘. ▫
14 مَامّشْ إِ غَا ڭّغْ أَذْ خَاسْ د-أَرّغْ،
مَامّشْ إِ غَا فَارْزغْ أَوَاڒنْ إِنُو مْلِيحْ زَّاثسْ؟
15 وَاخَّا نشّْ ذ أَمْسڭّذْ، وَارْ زمَّارغْ أَذْ خَاسْ د-أَرّغْ،
مَاشَا أَذْ زَاوْڭغْ ڒْقَاضِي إِنُو مَاحنْذْ أَذْ خَافِي إِحِينّْ،
16 مَاڒَا خَافِي د-يَارّْ ڒَامِي ڒَاغِيغْ،
وَارْ تّْغِيڒغْ أَقَا نتَّا أَذْ إِسڒْ غَارْ ثْمِيجَّا إِنُو.
17 أَقَا نتَّا إِڒبّزْ أَيِي س إِشْثْ ن ثْحَارْيَاضْثْ،
ؤُ يَارنِّي ذڭْ إِيزِّيمنْ إِنُو بَاطڒْ.
18 نتَّا وَارْ ذ أَيِي إِتّجِّي أَذْ أَرّغْ نّفْسْ،
مَاشَا إِسّْجَاوَانْ أَيِي س ثَارْزُوڭِي.
19 مَاڒَا ثقِّيمْ ثْمسْڒَاشْثْ ذِي جّهْذْ، أَقَا نتَّا إِجْهذْ قَاعْ،
مَاڒَا ذِي شّْرعْ، إِقَّارْ: ’وِي ذ أَيِي غَا إِعَارْضنْ؟‘
20 وَاخَّا نشّْ ذ أَمْسڭّذْ، عَاذْ أَقمُّومْ إِنُو أَذْ خَافِي إِحْكمْ،
وَاخَّا نشّْ بْڒَا ڒْعِيبْ، نتَّا أَذْ أَيِي إِعيّبْ.
21 وَاخَّا نشّْ بْڒَا ڒْعِيبْ إِ دْجِيغْ، وَارْ سِّينغْ مَاشَا ڒعْمَارْ إِنُو،
ثُوذَارْثْ إِنُو حسّْبغْ ت ذ وَالُو.
22 س ؤُيَا إِ غَا إِنِيغْ: ’قَاعْ ذ إِشْثْ!
أَمْ ونِّي إِدْجَانْ بْڒَا ڒْعِيبْ أَمْ ونِّي إِدْجَانْ ذ أَعفَّانْ،
نتَّا أَذْ ثنْ إِقْضَا س ثْنَاينْ إِذْسنْ!‘ ▪
23 مَاڒَا أَركُّوضْ إِنقّْ ذڭْ إِشْثْ ن ثشْثِي،
خنِّي نتَّا إِسْثهزَّا زِي ڒقْضعْ ن ڒَايَاسْ إِ إِمزْذَاڭنْ.
24 ثَامُّورْثْ أَذْ ثمّوْشْ ذڭْ ؤُفُوسْ ن ؤُعفَّانْ.
إِغمْبَابْ ن ڒْقُوضَاثْ نّسْ إِتّْڒحّفْ أَسنْ.
مَاڒَا وَارْ ث إِڭِّي نتَّا، مَانْ ونْ خنِّي؟
25 ذغْيَا خْ ونِّي إِتَّازّْڒنْ أَقَا تّْقدْجِيقنْ وُوسَّانْ إِنُو،
أَروْڒنْ غَارْ ذِينْ، وَارْ ثْوِيڒِينْ ڒْخَارْ. ▪
26 كِّينْ أَمْ ثْغَارُّوبَا ن ؤُغَانِيمْ،
أَمْ ؤُڭِيذرْ إِحوّْمنْ خْ زَّارْذثْ.
27 مَاڒَا نِّيغْ: ’أَذْ تُّوغْ أَشثْشِي إِنُو،
أَذْ بدّْڒغْ أَغمْپُوبْ إِشضْننْ إِنُو، أَذْ سّْفِيرْنِينغْ!‘،
28 أَمُّو إِ تّڭّْوذغْ زِي مَارَّا ڒحْرِيقْ إِنُو.
نشّْ سّْنغْ شكْ وَارْ زَّايِي ثتّْبَارِّيذْ.
29 نشّْ ذ أَعفَّانْ، مَايمِّي سّْحِيسِّيفغْ إِ وَالُو؟
30 مَاڒَا سِّيرْذغْ س وَامَانْ ن وذْفڒْ،
أَذْ سِّيزذْڭغْ إِفَاسّنْ إِنُو س لِّيخِييَا، ▪
31 عَاذْ أَذْ أَيِي ثْنثْيذْ ذڭْ وحْفُورْ،
أَڒْ ذ أَيِي غَا إِعِيفّْ وَارُّوضْ إِنُو.
32 مَاغَارْ نتَّا وَارْ إِدْجِي ذ بْنَاذمْ أَمْ نشّْ،
ونِّي خفْ زمَّارغْ أَذْ د-أَرّغْ،
خْمِي نتَّاوضْ غَارْ ثَادَّارْثْ ن شّْرعْ أَكْ-ذ وَايَاوْيَا. ▪
33 وَارْ ذِينْ إِدْجِي ڒْعَاذڒْ جَارْ أَنغْ،
ونِّي إِزمَّارنْ أَذْ إِسَّارْسْ أَفُوسْ نّسْ خَانغْ س ثْنَاينْ إِذْنغْ.
34 أجّْ إِ-ث أَذْ خَافِي إِكْسِي أَعْمُوذْ نّسْ،
وَارْ ذ أَيِي إِسّْنخْڒِيعْ عَاذْ ؤُهُوذِّي نّسْ، ▪
35 خنِّي أَذْ سِّيوْڒغْ نْهْڒَا مَا أَذْ زَّايسْ ڭّْوذغْ،
مَاغَارْ نشّْ وَارْ دْجِيغْ أَمُّو إِ يِيخفْ إِنُو.