‏1 خنِّي يَارَّا-د صُوفَارْ، ونِّي د-يُوسِينْ زِي نَاعْمَا، إِنَّا:

‏2 مَا أَذْ قِّيمنْ وَاطَّاسْ ن وَاوَاڒنْ بْڒَا ثَامْوَارِّيثْ،

ؤُ مَا أَذْ غَارسْ يِيڒِي إِ يِيجّْ ن بُو-ؤُقمُّومْ، ڒْحقّْ ڒبْذَا؟

‏3 مَا إِزمَّارْ ڒْهَارْذْ نّكْ أَذْ إِسّْغذْ إِوْذَانْ،

أَڒَامِي ثْزمَّارذْ أَذْ ثسْثهْزِيذْ بْڒَا مَا شكْ إِسّحْشمْ ؤُڒَا ذ إِجّْ؟

‏4 شكْ ثنِّيذْ: ’ثصْفَا ثْغُورِي إِنُو،

نشّْ أَقَا أَيِي ذ أَمزْذَاڭْ ذِي ثِيطَّاوِينْ نّكْ!‘

‏5 ؤُهْ، مْڒِي أَربِّي سِيمَانْثْ نّسْ إِسَّاوَاڒْ،

مْڒِي يَارزّمْ إِينْشِيشنْ نّسْ قِيبَاتْشْ نّكْ.

‏6 مْڒِي نتَّا ذ أَشْ إِ غَا إِسّْشنْ ثِيمسْڒَايِينْ إِخمّْڒنْ ن ثِيغِيثْ،

مَاغَارْ نِيثنْثِي سكّْوَانْثْ دُّوبلْ إِ ؤُفكِّي.

سّنْ، أَقَا أَربِّي أَذْ إِتُّو أَطَّاسْ ن ڒْمُوعْصِييّثْ نّكْ ذِي ثِيزِي نّكْ.

‏7 مَا ثْزمَّارذْ أَذْ ثَارْزُوذْ ذِي مِينْ يَارْزُو أَربِّي؟

مَا ثْزمَّارذْ أَذْ ثسّْنذْ مِينْ ثعْنَا طّْبِيعثْ ن ؤُمْزمَّارْ خْ كُوڒْشِي؟

‏8 أَقَا-ت ثُوعْڒَا خْ ؤُجنَّا! مِينْ ثخْسذْ أَذْ ذِينْ ثڭّذْ؟

ثُودْجغْ خْ ڒَاخَارْثْ! مِينْ ثْزمَّارذْ أَذْ زَّايسْ ثسّْنذْ؟

‏9 ڒعْبَارْ نّسْ ذ أَزِيرَارْ خْ ثمُّورْثْ،

ذ مِيرِيوْ خْ ڒبْحَارْ.

‏10 مَاڒَا إِعْذُو، إِبلّعْ ؤُشَا إِڒَاغَا إِ دّعْوثْ،

مَانْ ونْ إِ ث غَا إِسّْبدّنْ؟

‏11 مَاغَارْ نتَّا إِسّنْ إِغشَّاشنْ،

إِتّْوَاڒَا ڒْغشّْ بْڒَا مَا ث إِحْضَا. ^▪  

‏12 مَاشَا مَاڒَا أَپُوهَاڒِي إِزمَّارْ أَذْ يَافْ ڒفْهَامثْ،

خنِّي أَغْيُوڒْ ن ڒخْڒَا إِزمَّارْ أَذْ إِذْوڒْ ذ بْنَاذمْ. ^▪  

‏13 مَاڒَا شكْ ثْعذْڒذْ ؤُڒْ نّكْ،

خنِّي بزّعْ إِفَاسّنْ نّكْ غَارسْ.

‏14 مَاڒَا إِرْصقْ ڒْغشّْ غَارْ ؤُفُوسْ نّكْ، سَاڭّْوجْ إِ-ث،

وَارْ تّجِّي دّدْجْ أَذْ إِزْذغْ ذِي ثْقِيذُونِينْ نّكْ،

‏15 مَاغَارْ خنِّي ثْزمَّارذْ أَذْ ثسّْڭعّْذذْ ؤُذمْ نّكْ بْڒَا ڒْعِيبْ،

أَذْ ثْبدّذْ نِيشَانْ، وَارْ تّڭّْوذذْ شَا.

‏16 مَاغَارْ أَذْ ثتُّوذْ ڒغْبنْ نّكْ،

ؤُ عمَّارْصْ وَارْ ذَايسْ ثتّْخمِّيمذْ عَاذْ،

أَمْ عمَّارْصْ وَارْ ثتّْخمِّيمذْ عَاذْ غَارْ وَامَانْ إِعْدُّونْ.

‏17 أَبْرِيذْ ن ثُوذَارْثْ نّكْ أَذْ يَارْغْ

ثِيوَا خْ طّْحَا ن ؤُزِيڒْ،

وَاخَّا ذِينْ ثَادْجسْثْ، أَذْ ثِيڒِي أَمْ ثفُّوثْ. ^▪  

‏18 أَذْ ثَاشِيذْ إِخفْ نّكْ ذِي ڒَامَانْ، مِينْزِي أَقَا ذِينْ ڒَايَاسْ،

أَذْ ثخْزَارذْ ذڭْ ونّضْ، أَذْ ثطّْسذْ ذِي ڒْهُوذْنثْ. ^▪  

‏19 أَذْ ثزّْڒذْ، نْهْڒَا مَا شكْ إِسّْنخْڒعْ ؤُڒَا ذ إِجّْ،

ؤُشَا أَطَّاسْ إِ شكْ إِ غَا زَاوْڭنْ زَّاثْ إِ وُوذمْ نّكْ. ^▪  

‏20 مَاشَا ثِيطَّاوِينْ ن إِعفَّاننْ أَذْ دَّارْغْڒنْثْ،

قَاعْ ثَاروْڒَا أَذْ أَسنْ ثْودَّارْ،

أَذْ مژْرنْ أَذْ ذڒْقنْ إِ بُوحْبڒْ. ^▪