1 ⵡⴰ ⴷ ⴰⵡⴰⵍ ⴷⴰⵢⴻⵙ ⵍⴰⵎⴰⵏ: ⵎⴰⵍⴰ ⵃⴻⴷ ⵉⵅⵙ ⴰⴷ ⵉⴷⵡⴻⵍ ⴷ ⴰⵎⵖⴰⵔ, ⴰⵇⴰ ⵉⵜⵜⵎⴻⵥⵔⵉ ⴷⴻⴳ ⵉⵛⵜ ⵏ ⵍⵅⴻⴷⵎⴻⵜ ⵜⴻⵛⵏⴰ. 2 ⵎⴰⵛⴰ ⵉⵜⵜⵅⴻⵚⵚⴰ ⵉ ⵓⵎⵖⴰⵔ ⴰⴷ ⵢⵉⵍⵉ ⴱⵍⴰ ⵍⵄⵉⴱ, ⴰⴷ ⵢⵉⵍⵉ ⴷ ⴰⵔⵢⴰⵥ ⵏ ⵉⵛⵜ ⵏ ⵜⴻⵎⵖⴰⵔⵜ, ⵖⴰⵔⴻⵙ ⴰⵎⴻⴽⴽⴻⵏ ⵏ ⵏⵏⴻⴼⵙ, ⴰⴷ ⵢⵉⵍⵉ ⴷ ⴰⵙⴻⵅⵅⴰⵢ, ⴰⴷ ⵉⴳⴳ ⵙ ⵓⵙⴻⵜⵜⴻⴼ, ⴰⴷ ⵢⴰⵔⴻⵃⵃⴻⴱ ⵙ ⵉⵏⴻⵡⵊⵉⵡⴻⵏ, ⵉⵥⴻⵎⵎⴰⵔ ⴰⴷ ⵉⵙⵙⴻⵍⵎⴻⴷ, ^■   3 ⵡⴰⵔ ⵉⵜⵜⵉⵍⵉ ⴷ ⴰⵎⴻⵙⵛⴰⵔ ⵏⵉⵖ ⵉⵡⵡⴻⵜ ⴷⴻⵖⵢⴰ ⵙ ⵉⴼⴰⵙⵙⴻⵏ, ⵎⴰⵛⴰ ⴰⴷ ⵢⵉⵍⵉ ⴷ ⴰⵎⵡⴰⴹⴻⵄ, ⵡⴰⵔ ⵉⵜⵜⴻⵎⵛⵓⴱⴱⵓⵛ, ⵡⴰⵔ ⵉⵜⵜⵉⵍⵉ ⴷ ⴰⵇⴻⵥⵥⴰⵥ, 4 ⴰⵇⴰ ⵏⴻⵜⵜⴰ ⵉⵙⵙⴻⴳⴳⵓⵔ ⵜⴰⵡⴰⵛⵓⵏⵜ ⵏⵏⴻⵙ ⵎⵍⵉⵃ ⵓⵛⴰ ⵉⵃⴻⴽⴽⴻⵎ ⵅ ⵜⴰⵔⵡⴰ ⵏⵏⴻⵙ ⵙ ⵎⴰⵔⵔⴰ ⵍⴻⵚⴼⴰⵢⴻⵜ. 5 ⵎⴰⵛⴰ ⵎⴰⵍⴰ ⵏⴻⵜⵜⴰ ⵡⴰⵔ ⵉⵥⴻⵎⵎⴰⵔ ⴰⴷ ⵉⵙⵙⵓⵢⵓⵔ ⵜⴰⵡⴰⵛⵓⵏⵜ ⵏⵏⴻⵙ, ⵎⴰⵎⵎⴻⵛ ⵉ ⵖⴰ ⵉⴳⴳ ⴰⴷ ⵉⵃⴹⴰ ⵜⴰⵎⴻⵙⵎⵓⵏⵜ ⵏ ⴰⵔⴻⴱⴱⵉ? 6 ⵡⴰⵔ ⵉⵜⵜⴻⵃⴷⵉⵊ ⴰⴷ ⵢⵉⵍⵉ ⴰⵎⴻⵃⴹⴰⵔ ⴷ ⵊⴷⵉⴷ ⴷⵉ ⵍ’ⵉⵎⴰⵏ, ⵃⵉⵎⴰ ⵡⴰⵔ ⵉⵜⵜⵓⴼⴼ ⵙ ⵍⴻⴼⵢⵓⵛ ⵓⵛⴰ ⴰⴷ ⵉⵡⴹⴰ ⴷⵉ ⵛⵛⵔⴻⵄ ⵏ ⵛⵛⵉⵟⴰⵏ. 7 ⵄⴰⵡⴻⴷ ⵉⵜⵜⵅⴻⵚⵚⴰ ⴰⴷ ⵖⴰⵔⴻⵙ ⵜⵉⵍⵉ ⵚⵚⵓⵎⵄⴻⵜ ⵜⴻⵛⵏⴰ ⵖⴰⵔ ⵢⴻⵏⵏⵉ ⴷⵉ ⴱⴰⵔⵔⴰ, ⵃⵉⵎⴰ ⵡⴰⵔ ⵅⴰⵙ ⵜⵜⵄⴻⵢⵢⵉⴱⴻⵏ ⵓⵛⴰ ⵡⴰⵔ ⵉⵡⴻⵟⵟⵉ ⵛⴰ ⴷⵉ ⵜⴻⵅⵛⴻⴼⵜ ⵏ ⵛⵛⵉⵟⴰⵏ.

8 ⵉⵜⵜⵅⴻⵚⵚⴰ ⵄⴰⵡⴻⴷ ⵉ ⵉⵎⵙⴻⵅⵅⴰⵔⴻⵏ ⵏ ⵜⵎⴻⵙⵎⵓⵏⵜ ⴰⴷ ⵉⵍⵉⵏ ⵙⵙⴻⴽⴽⵡⴰⵏ, ⵡⴰⵔ ⵙⵙⵉⵡⵉⵍⴻⵏ ⵛⴰ ⵙ ⵜⵏⴰⵢⴻⵏ ⵏ ⵉⵍⵙⴰⵡⴻⵏ, ⵡⴰⵔ ⵅⴻⵥⵥⴰⵔⴻⵏ ⵛⴰ ⵖⴰⵔ ⴱⵉⵏⵓ ⴰⵟⵟⴰⵙ, ⵡⴰⵔ ⴹⴻⵎⵎⵄⴻⵏ ⴷⵉ ⴰⵔⴱⴻⵃ ⵡⴰⵔ ⵉⵃⵍⵉⵏ, ^■   9 ⵉⵜⵜⵅⴻⵚⵚⴰ ⴰⵙⴻⵏ ⴰⴷ ⵟⵟⴼⴻⵏ ⴷⵉ ⵙⵙⵉⵔⵔ ⵏ ⵍ’ⵉⵎⴰⵏ ⵙ ⵜⵏⴻⴼⵙⴻⵛⵜ ⵜⴻⵚⴼⴰ. ^■  

10 ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵇⴻⴵⴱⴻⵏ ⴷ ⴰⵎⴻⵥⵡⴰⵔⵓ, ⵍⴻⵅⴷⴻⵏⵏⵉ, ⵎⴰⵍⴰ ⵉⴱⴰⵏ-ⴷⴷ ⵡⴰⵔ ⴷⴰⵢⵙⴻⵏ ⵉⵜⵜⵉⵍⵉ ⴱⵓ ⵍⵄⵉⴱ, ⴰⴷ ⵙⴻⵅⵅⴰⵔⴻⵏ.

11 ⴰⵎⵎⵓ ⵉⵜⵜⵅⴻⵚⵚⴰ ⵓⵍⴰ ⵉ ⵜⵉⵎⵖⴰⵔⵉⵏ ⴰⴷ ⴰⵔⵙⵉⵏⵜ, ⴰⴷ ⵃⴹⴰⵏⵜ ⴷⵉ ⵍⴻⵄⵇⵓⵍ ⵏⵙⴻⵏⵜ, ⴰⴷ ⴷⴰⵢⵙⴻⵏⵜ ⵜⵉⵍⵉ ⵍⵎⴰⵏⴻⵜ ⴷⵉ ⵎⴰⵔⵔⴰ, ⵡⴰⵔ ⴷ ⵜⵜⵉⵍⵉⵏⵜ ⴷ ⵜⵉⵎⵛⴻⵇⵇⴰⴼⵉⵏ.

12 ⵉⵎⵙⴻⵅⵅⴰⵔⴻⵏ ⵏ ⵜⵎⴻⵙⵎⵓⵏⵜ ⴰⴷ ⵉⵍⵉⵏ ⵙ ⵉⵛⵜ ⵏ ⵜⴻⵎⵖⴰⵔⵜ ⵡⴰⵀⴰ, ⴰⴷ ⵙⵙⵓⵢⵓⵔⴻⵏ ⵎⵍⵉⵃ ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⵜⴰⵡⴰⵛⵓⵏⵜ ⵏⵙⴻⵏ.

13 ⵎⵉⵏⵥⵉ ⵉⵏⵏⵉ ⵉⵜⵜⴻⴳⴳⴻⵏ ⵜⴰⵙⴻⵢⵢⴰⵔⵜ ⵏⵙⴻⵏ ⵎⵍⵉⵃ, ⴰⴷ ⵟⵟⴼⴻⵏ ⵉ ⵢⵉⵅⴻⴼ ⵏⵙⴻⵏ ⵉⵊⵊ ⵏ ⵡⴻⵎⵛⴰⵏ ⵉⵛⵏⴰ ⴷ ⵡⴰⵟⵟⴰⵙ ⵏ ⵜⴻⵔⵢⴰⵙⵜ ⴷⵉ ⵍ’ⵉⵎⴰⵏ ⵏ ⵢⴻⵛⵛⵓ ⵍⵎⴰⵙⵉⵃ. ^■  

14 ⵓⵔⵉⵖ ⴰⵛ-ⴷⴷ ⵎⴰⵏ ⴰⵢⴰ ⵓⵛⴰ ⵙⵙⵉⵜⵉⵎⴻⵖ ⴰⴷ ⵖⴰⵔⴻⴽ ⴷⴷ-ⴰⵙⴻⵖ ⴷⴻⵖⵢⴰ.

15 ⵎⴰⵛⴰ ⵎⴰⵍⴰ ⵄⴻⵟⵟⴰⵍⴻⵖ ⵅⴰⴽ, ⴰⴷ ⵜⴻⵙⵙⵏⴻⴷ ⵎⴰⵎⵎⴻⵛ ⵉⵜⵜⵅⴻⵚⵚⴰ ⴰⴷ ⵏⵓⵢⵓⵔ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ, ⵜⴻⵏⵏⵉ ⵉⴵⴰⵏ ⴷ ⵜⴰⵎⴻⵙⵎⵓⵏⵜ ⵏ ⴰⵔⴻⴱⴱⵉ ⵉⴷⴷⴰⵔⴻⵏ, ⴰⴱⵉⵍⴰⵔ ⴷ ⴷⵙⴰⵙ ⵏ ⵜⵉⴷⴻⵜⵜ.

16 ⵙⵙⵉⵔⵔ ⵡⴰⵏⵉⵜⴰ ⵏ ⵜⵙⴻⴳⴷⴰ ⴷ ⴰⵎⴻⵇⵇⵔⴰⵏ ⵙ ⵜⵉⴷⴻⵜⵜ!

“ⴷ ⵡⴻⵏⵏⵉ ⵉⵜⵜⵡⴰⵙⵙⴰⵔⴳⴱⴻⵏ ⴷⵉ ⴰⵔⵔⵉⵎⴻⵜ,

ⵉⵜⵜⵡⴰⵙⴻⴳⴳⴷⴻⵏ ⴷⵉ ⴰⵔⵔⵓⵃ,

ⵉⴹⵃⴰⵔⴻⵏ-ⴷⴷ ⵉ ⵍⵎⴰⵍⴰⴽⴰⵜ,

ⵉⵜⵜⵡⴰⴱⴰⵔⵔⵃⴻⵏ ⵥⵥⴰⵢⴻⵙ ⵊⴰⵔ ⵍⴻⴳⵏⵓⵙ,

ⵥⵥⴰⵢⴻⵙ ⵢⵓⵎⵏⴻⵏ ⴷⵉ ⴷⴷⵓⵏⴻⵛⵜ,

ⵉⵎⵎⴻⴽⵙⵉⵏ ⴷⴻⴳ ⵓⵄⵓⴵⵉ.” ^■