ⵃⴰⴱⴰⵇⵇⵓⵇ
ⴰⵛⴻⵜⵛⵉ ⵏ ⵃⴰⴱⴰⵇⵇⵓⵇ
1
1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵏⵏⵉ ⵉⵥⵔⴰ ⵓⵏⴰⴱⵉ ⵃⴰⴱⴰⵇⵇⵓⵇ. 2 “ⴰ ⵙⵉⴷⵉ, ⴰⵍ ⵎⴻⵍⵎⵉ ⵉ ⵖⴰ ⵇⵇⵉⵎⴻⵖ ⵜⵜⵍⴰⵖⵉⵖ
ⵓ ⵛⴻⴽ ⵡⴰⵔ ⴷ ⴰⵢⵉ ⵜᵉⵜⵜⴻⵙⵍⵉⴷ,
ⴰⵍ ⵎⴻⵍⵎⵉ ⵉ ⵖⴰ ⵇⵇⵉⵎⴻⵖ ⵜⵜⵍⴰⵖⵉⵖ ‘ⵍⵄⵓⵏⴼ!’,
ⵓ ⵛⴻⴽ ⵡⴰⵔ ⴷ ⴰⵢⵉ ⵜⴻⵙⵙⴻⵏⵊⴰⵎⴻⴷ!
3 ⵎⴰⵢⴻⵎⵎⵉ ⵉ ⴷ ⴰⵢⵉ ⵜⴻⵙⵙⴻⵛⵏⴻⴷ ⵍⵎⵓⵄⵚⵉⵢⵢⴻⵜ
ⵓ ⵜᵉⵜⵜⵖⵉⵎⵉⴷ ⵜⵅⴻⵥⵥⴰⵔⴻⴷ ⵖⴰⵔ ⵍⴻⵖⴱⴻⵏ?
ⵎⴰⵖⴰⵔ ⴰⵔⴻⴷⴷⴻⴵ ⴷ ⵍⵄⵓⵏⴼ ⴰⵇⴰ ⴰⵜⴻⵏ ⴰⵔⴻⵏⴷⴰⴷ ⵉⵏⵓ,
ⵓ ⵉⵎⵙⴰⵔ ⵓⵎⵛⵓⴱⴱⴻⵛ, ⵉⴽⴽⴰⵔ-ⴷⴷ ⵓⵔⵓⴷⴷⴻⵥ.
4 ⵙ ⵓⵢⴻⵏⵏⵉ ⵉ ⵜⴻⴷⵡⴻⵍ ⵛⵛⴰⵔⵉⵄⴰ ⴱⵍⴰ ⵊⵊⴻⵀⴷ,
ⵓ ⵡⴰⵔ ⴷⴷ-ⵉⵜⵜⴻⴼⴼⴻⵖ ⵄⴻⵎⵎⴰⵔⵚ ⵍⵃⴻⵇⵇ,
ⵎⴰⵖⴰⵔ ⴰⵄⴻⴼⴼⴰⵏ ⵉⵜⵜⴻⵏⵏⴻⴹ ⵉ ⵓⵎⵙⴻⴳⴳⴻⴷ.
ⵙ ⵓⵢⴻⵏⵏⵉ ⵉ ⴷⴷ-ⵉⵜⵜⴻⴼⴼⴻⵖ ⵍⵃⴻⵇⵇ ⵉⴼⴰⵔⵖ.
ⵜⵡⴰⵔⵔⵉⵜ ⵏ ⵙⵉⴷⵉ ⵅ ⵜⵥⴰⴵⵉⵜ
5 ⵅⵥⴰⵔⴻⵎ ⵊⴰⵔ ⵍⴻⴳⵏⵓⵙ, ⵅⵥⴰⵔⴻⵎ,
ⵉⵏⵏⵓⵔⵥⴻⵎ ⵓⵇⴻⵎⵎⵓⵎ ⵙ ⵓⵜⴻⴱⵀⴻⵜ,
ⵎⴰⵖⴰⵔ ⵏⴻⵛⵛ ⴰⴷ ⴳⴳⴻⵖ ⵉⵛⵜ ⵏ ⵍⵅⴻⴷⵎⴻⵜ ⴷⴻⴳ ⵡⵓⵙⵙⴰⵏ ⵏⵡⴻⵎ
ⵉ ⵡⴰⵔ ⵜᵉⵜⵜⵉⵎⵏⴻⵎ ⵎⴰⵍⴰ ⵜⴻⵙⵍⵉⵎ ⵅⴰⵙ. ■
6 ⵎⴰⵖⴰⵔ ⵅⵥⴰⵔⴻⵎ, ⵏⴻⵛⵛ ⵙⵙⴻⴽⴽⴰⵔⴻⵖ ⵉⴽⴰⵍⴷⴰⵏⵉⵢⵢⴻⵏ,
ⵍⴳⴻⵏⵙ ⵉⵇⴻⵙⵃⴻⵏ ⵓ ⵉⵎⵇⴻⴵⵇⴻⵏ,
ⵡⴻⵏⵏⵉ ⵉⴳⴳⵓⵔⴻⵏ ⴷⵉ ⵍⴻⵡⵙⴻⵄ ⵏ ⵜⴻⵎⵎⵓⵔⵜ,
ⵃⵉⵎⴰ ⴰⴷ ⵉⵟⵟⴻⴼ ⵜⵉⵥⴻⴷⴷⵉⵖⵉⵏ ⵏⵏⵉ ⵡⴰⵔ ⵉⴵⵉⵏ ⵏⵏⴻⵙ.
7 ⵉⵙⵙⴰⴳⴳⵯⴰⴷⴻⵏ ⵓ ⵉⵙⵙⵏⴻⵅⵍⴰⵄⴻⵏ ⵉⴵⴰⵏ!
ⵍⵃⴻⵇⵇ ⵏⵏⴻⵙ ⴷ ⵓⵄⵓⴵⵉ ⵏⵏⴻⵙ ⵜⵜⴻⴼⴼⵖⴻⵏ-ⴷⴷ ⵥⵥⴰⵢⴻⵙ.
8 ⵉⵢⵙⴰⵏ ⵏⵏⴻⵙ ⴼⵙⵓⵙⴻⵏ ⵅ ⵓⵖⵉⵍⴰⵙ,
ⵏⵉⵜⵏⵉ ⵎⵎⵓⵥⵥⴰⵔⴻⵏ ⵎⴰⵀⵓ ⵓⵛⵛⴰⵏⴻⵏ ⵏ ⴵⵉⵍⴻⵜ,
ⵉⵎⵏⴰⵢⴻⵏ ⵏⵏⴻⵙ ⵜⵜⵔⴰⴱⴰⵄⴻⵏ.
ⵉⵎⵏⴰⵢⴻⵏ ⵏⵏⴻⵙ ⵜⵜⴰⵙⴻⵏ-ⴷⴷ ⵥⵉ ⵍⴰⴳⴳⵯⴰⵊ,
ⵏⵉⵜⵏⵉ ⵟⵟⴰⵡⴻⵏ ⴰⵎ ⵓⴳⵉⴷⴻⵔ ⵏⵏⵉ ⵉⵜⵜⵇⴻⴵⵇⴻⵏ ⵎⴰⵃⴻⵏⴷ ⴰⴷ ⵢⴻⵛⵛ.
9 ⴰⵇⴰ ⵏⴻⵜⵜⴰ ⵉⵜⵜⴰⵙ-ⴷⴷ, ⴰⵎⴻⵏ ⵉⴽⵎⴻⵍ, ⵉ ⵍⵄⵓⵏⴼ,
ⵉⵖⴻⵎⴱⴰⴱ ⵏⵙⴻⵏ ⵅⴻⵥⵥⴰⵔⴻⵏ ⵖⴰⵔ ⵥⵥⴰⵜ,
ⵓ ⵏⴻⵜⵜⴰ ⴰⴷ ⵉⵙⵙⵎⵓⵏ ⵉⵎⴻⵃⴱⴰⵙ ⴰⵎ ⵢⴻⵊⴷⵉ.
10 ⵏⴻⵜⵜⴰ ⴰⴷ ⵉⵇⴻⵚⵚⴰⵔ ⵅ ⵉⵊⴻⴵⵉⴷⴻⵏ
ⵓ ⵉⵏⵏⵉ ⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⴰⴷ ⵜⴻⵏ ⵢⴻⴳⴳ ⴷ ⵜⴰⴹⴻⵃⵃⴰⵛⵜ.
ⵡⴰⵀ, ⵏⴻⵜⵜⴰ ⴰⴷ ⵉⴹⵃⴻⵛ ⵅ ⵎⴰⵔⵔⴰ ⵍⴱⵓⵔⵊⴰⵜ,
ⵎⵉⵏⵥⵉ ⵏⴻⵜⵜⴰ ⴰⴷ ⵉⵙⵙⵄⵓⵔⵔⴻⵛ ⵓⵛⴰⵍ ⵓⵛⴰ ⴰⴷ ⵜⴻⵏⵜ ⵉⵟⵟⴻⴼ.
11 ⵅⴻⵏⵏⵉ ⴰⴷ ⵉⵏⵏⴻⵄⵜⴰⵔ ⴰⵎ ⵓⵚⴻⵎⵎⵉⴹ, ⵓ ⵏⴻⵜⵜⴰ ⴰⴷ ⵉⵄⴷⵓ
ⵓ ⴰⴷ ⵉⴷⵡⴻⵍ ⴷ ⴰⵎⴻⴷⵏⵓⴱ, ⵎⴰⵖⴰⵔ ⵊⵊⴻⵀⴷ ⵏⵏⴻⵙ ⵡⴰⵏⵉⵜⴰ ⴰⴷ ⵢⵉⵍⵉ ⴷ ⴰⵔⴻⴱⴱⵉ ⵏⵏⴻⵙ.
ⴰⵛⴻⵜⵛⵉ ⵡⵉⵙⵙ ⵜⵏⴰⵢⴻⵏ ⵏ ⵃⴰⴱⴰⵇⵇⵓⵇ
12 ⵣⵉ ⵎⴻⵛⵃⴰⵍ ⵓⵢⴰ ⵎⴰ ⵛⴻⴽ ⵡⴰⵔ ⵜⴻⴵⵉⴷ ⴷ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⴰⵎⵇⴻⴷⴷⴰⵙ ⵉⵏⵓ?
ⵏⴻⵛⵛⵉⵏ ⵡⴰⵔ ⵏⴻⵜⵜⵎⴻⵜⵜⵉ ⵛⴰ!
ⴰ ⵙⵉⴷⵉ, ⵛⴻⴽ ⵜⴰⵔⵔⵉⴷ ⵉ-ⵜ ⵉ ⵍⵃⵓⴽⵎ,
ⴰ ⵜⴰⵚⴹⴰⵔⵜ, ⵛⴻⴽ ⵜⴼⴰⵔⵥⴻⴷ ⵜ ⵎⴰⵃⴻⵏⴷ ⴰⴷ ⵢⵉⵍⵉ ⵉ ⵍⵄⵉⵇⴰⴱ.
13 ⵛⴻⴽ ⴷ ⴰⵎⴻⵥⴷⴰⴳ ⴰⵟⵟⴰⵙ ⵏ ⵜⵉⵟⵟⴰⵡⵉⵏ ⵃⵉⵎⴰ ⴰⴷ ⵜⵡⴰⵍⴰⵏⵜ ⵍⵖⴰⵔ.
ⵛⴻⴽ ⵡⴰⵔ ⵜⵥⴻⵎⵎⴰⵔⴻⴷ ⴰⴷ ⵜⵚⴻⵡⴹⴻⴷ ⴷⵉ ⵜⵓⵄⴻⴼⴼⵏⴰ ⵜⴻⴱⴹⴻⵍ.
ⵎⴰⵢⴻⵎⵎⵉ ⵉ ⵖⴰ ⵜⵚⴻⵡⴹⴻⴷ ⴷⴻⴳ ⵢⴻⵏⵏⵉ ⵉⵜⵜⴻⴳⴳⴻⵏ ⵙ ⵍⴻⵖⴷⴰⵔⴻⵜ?
ⵎⴰⵢⴻⵎⵎⵉ ⵉ ⵖⴰ ⵜⴻⵙⵙⴻⵖⴹⴻⴷ ⵅⵎⵉ ⵉⵚⴰⵔⵔⴻⴹ ⵓⵄⴻⴼⴼⴰⵏ
ⵉ ⵡⴻⵏⵏⵉ ⵉ ⵅⴰⵙ ⵉⵙⴻⴳⴳⴷⴻⵏ?
14 ⵎⴰⵢⴻⵎⵎⵉ ⵉ ⵜⴻⴳⴳⵉⴷ ⵉⵡⴷⴰⵏ ⴰⵎ ⵉⵙⴻⵍⵎⴰⵏ ⵏ ⵍⴻⴱⵃⴰⵔ,
ⴰⵎ ⵉⵎⵎⵓⴷⴰⵔ ⵏⵏⵉ ⵉⵜⵜⴱⵓⵄⴻⵏ ⵅ ⵜⴻⵎⵎⵓⵔⵜ ⵉ ⵡⴰⵔ ⵖⴰⵔ ⵉⴵⵉ ⵍⵃⴰⴽⴻⵎ?.
15 ⵙ ⵜⵙⴻⵏⵏⴰⵔⵜ ⵉⵙⵙⴳⴻⵄⵄⴰⴷ ⵉ-ⵜⴻⵏ-ⴷⴷ ⵎⴰⵔⵔⴰ,
ⵉⵢⴰⵔⵔⵓ ⵉ-ⵜⴻⵏ ⵙ ⵜⵔⴰⵛⵛⴰ ⵏⵏⴻⵙ,
ⵓⵛⴰ ⵉⵙⵙⵎⵓⵏ ⵉ-ⵜⴻⵏ ⴷⵉ ⵜⵔⴰⵛⵛⴰ ⵏⵏⴻⵙ ⵏ ⵓⴷⴻⵍⵍⴰⵄ.
ⵙ ⵓⵢⴻⵏⵏⵉ ⵉⴼⴰⵔⵔⴻⵃ ⵓ ⵉⵜⵜⴼⴰⵊⴰ.
16 ⵙ ⵓⵢⴻⵏⵏⵉ ⵉⵡⴻⵀⵀⴻⴱ ⵜⵉⵖⴰⵔⵚⴰ ⵉ ⵜⵔⴰⵛⵛⴰ ⵏⵏⴻⵙ,
ⵓⵛⴰ ⵉⴱⴻⵅⵅⴰⵔ ⵜⵉⵡⵀⵉⴱⵉⵏ ⵏ ⵍⴻⴱⵅⵓⵔ ⵉ ⵜⵔⴰⵛⵛⴰ ⵏ ⵓⴷⴻⵍⵍⴰⵄ ⵏⵏⴻⵙ.
ⵎⵉⵏⵥⵉ ⵥⵥⴰⵢⵙⴻⵏⵜ ⵉ ⵜⴻⴷⵡⴻⵍ ⵜⴻⵙⵖⴰⵔⵜ ⵏⵏⴻⵙ ⵜⴻⵎⵖⴰⵔ,
ⵓⵍⴰ ⴷ ⵎⴰⵛⵛⴰ ⵏⵏⴻⵙ ⴰⵇⴰ ⵜⵍⴻⴷⴷ.
17 ⵎⴰ ⵅ ⵎⴰⵏⴰⵢⴰ ⵉ ⵖⴰ ⵉⵇⵇⵉⵎ ⵉⵙⵙⴻⴽⴽⵡⴰ ⵜⵔⴰⵛⵛⴰ ⵏⵏⴻⵙ,
ⵓⵛⴰ ⴰⴷ ⵉⵇⵇⵉⵎ ⵍⴻⴱⴷⴰ ⵉⵏⴻⵇⵇ ⵍⴻⴳⵏⵓⵙ ⴱⵍⴰ ⵎⴰ ⴰⴷ ⵢⴻⵊⵊ ⵃⴻⴷ?