1 ⴰⵡⴰⵍ ⵏ ⵙⵉⴷⵉ ⵉ ⴷⴷ-ⵢⵓⵙⵉⵏ ⵉ ⵚⴰⴼⴰⵏⵢⴰ, ⵎⵎⵉⵙ ⵏ ⴽⵓⵛⵉ, ⵎⵎⵉⵙ ⵏ ⵊⴰⴷⴰⵍⵢⴰ, ⵎⵎⵉⵙ ⵏ ⴰⵎⴰⵔⵢⴰ, ⵎⵎⵉⵙ ⵏ ⵃⵉⵥⵇⵉⵢⴰ, ⴷⴻⴳ ⵡⵓⵙⵙⴰⵏ ⵏ ⵢⵓⵛⵉⵢⴰ, ⵎⵎⵉⵙ ⵏ ⴰⵎⵓⵏ, ⴰⵊⴻⴵⵉⴷ ⵏ ⵢⴰⵀⵓⴷⴰ. ^□  

2 ⵏⴻⵛⵛ ⴰⴷ ⴽⴽⵙⴻⵖ ⵇⴰⵄ ⵎⴰⵔⵔⴰ ⵎⵉⵏ ⵉⴵⴰⵏ ⵥⴻⴳ ⵡⵓⴷⴻⵎ ⵏ ⵜⴻⵎⵎⵓⵔⵜ,

ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ.

3 ⴰⴷ ⴽⴽⵙⴻⵖ ⴱⵏⴰⴷⴻⵎ ⴷ ⵍⵎⴰⵍ,

ⴰⴷ ⴽⴽⵙⴻⵖ ⵉⵊⴹⴰⴹ ⵏ ⵓⵊⴻⵏⵏⴰ

ⴷ ⵉⵙⴻⵍⵎⴰⵏ ⵏ ⵍⴻⴱⵃⴰⵔ

ⴷ ⵜⵄⴻⵏⴽⵔⵉⴼⵉⵏ ⴰⴽ-ⴷ ⵉⵄⴻⴼⴼⴰⵏⴻⵏ,

ⵡⴰⵀ ⵏⴻⵛⵛ ⴰⴷ ⵇⴹⵉⵖ ⴱⵏⴰⴷⴻⵎ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ. ^■  

4 ⵏⴻⵛⵛ ⴰⴷ ⵙⵙⵡⵉⵥⵥⴹⴻⵖ ⵙ ⵓⴼⵓⵙ ⵉⵏⵓ ⴹⵉⴷⴷ ⵉ ⵢⴰⵀⵓⴷⴰ

ⵓ ⴹⵉⴷⴷ ⵉ ⵎⴰⵔⵔⴰ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ,

ⵏⴻⵛⵛ ⴰⴷ ⵜⴻⵃⵃⵉⵖ ⵎⵉⵏ ⵉⵇⵇⵉⵎⴻⵏ ⵥⵉ ⴱⴰⵄⵍ ⵥⴻⴳ ⵡⴻⵎⵛⴰⵏ-ⴰ

ⴰⴽ-ⴷ ⵢⵉⵙⴻⵎ ⵏ ⵉⴽⴻⵀⵀⴰⵏⴻⵏ ⵏ ⵚⵚⴰⵏⴰⵎ ^□  

5 ⴷ ⵢⴻⵏⵏⵉ ⵢⵓⴹⴰⵔⴻⵏ ⵅ ⵜⵥⴻⵖⵡⵉⵏ ⵥⵥⴰⵜ ⵉ ⵍⵄⴻⵙⴽⴰⵔ ⵏ ⵉⵊⴻⵏⵡⴰⵏ,

ⵓ ⵢⴻⵏⵏⵉ, ⴰⵎ ⵓⴹⴰⵔⴻⵏ, ⵊⵊⵓⴵⴻⵏ ⵖⴰⵔ ⵙⵉⴷⵉ,

ⵓ ⴰⵇⴰ ⵊⵊⵓⴵⴻⵏ ⵖⴰⵔ ⵎⴰⵍⴽⴰⵎ,

6 ⵓⵍⴰ ⴷ ⵢⴻⵏⵏⵉ ⴷⴷ-ⵉⵜⵜⵄⴰⵇⵇⴰⴱⴻⵏ ⵥⵉ ⴹⴻⴼⴼⴰⵔ ⵏ ⵙⵉⴷⵉ,

ⵓ ⵢⴻⵏⵏⵉ ⵡⴰⵔ ⴰⵔⴻⵥⵥⵓⵏ ⵅ ⵙⵉⴷⵉ ⵓ ⵡⴰⵔ ⵅⴰⵙ ⵜⵜⵙⵙⴻⵇⵙⵉⵏ. ^■  

7 ⵙⴻⵖⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵉⵏⵓ, ⵙⵉⴷⵉ,

ⵎⴰⵖⴰⵔ ⴰⵙⵙ ⵏ ⵙⵉⴷⵉ ⵢⵓⴷⴻⵙ.

ⵙⵉⴷⵉ ⴰⵇⴰ ⵉⵙⵙⴻⵡⵊⴻⴷ ⵉⵛⵜ ⵏ ⵜⵖⴰⵔⵚⵜ,

ⵏⴻⵜⵜⴰ ⵉⵙⵙⵇⴻⴷⴷⴻⵙ ⵉⵎⴻⵄⵔⴰⴹⴻⵏ ⵏⵏⴻⵙ.

8 ⴰⴷ ⵉⵎⵙⴰⵔ ⴷⴻⴳ ⵡⴰⵙⵙ ⵏ ⵜⵖⴰⵔⵚⵜ ⵏ ⵙⵉⴷⵉ,

ⴰⵇⴰ ⵏⴻⵛⵛ ⴰⴷ ⵄⴰⵇⴱⴻⵖ ⵍⵃⵓⴽⴽⴰⵎ ⴷ ⵉⵃⴻⵏⵊⵉⵔⴻⵏ ⵏ ⵓⵊⴻⴵⵉⴷ

ⴷ ⵎⴰⵔⵔⴰ ⵉⵏⵏⵉ ⵢⴰⵔⵔⴹⴻⵏ ⴰⵔⵔⵓⴹ ⴰⵖⵔⵉⴱ.

9 ⴷⴻⴳ ⵡⴰⵙⵙ ⵏⵏⵉ ⴰⴷ ⵄⴰⵇⴱⴻⵖ

ⵎⴰⵔⵔⴰ ⵉⵏⵏⵉ ⵉⵏⴻⴳⴳⵥⴻⵏ ⵜⴰⵏⴻⴱⴷⴰⵜ,

ⵉⵏⵏⵉ ⵉⵜⵜⵄⴻⵎⵎⴰⵔⴻⵏ ⵜⴰⴷⴷⴰⵔⵜ ⵏ ⵙⵉⴷⵉⵜⵙⴻⵏ

ⵙ ⵍⵄⵓⵏⴼ ⴷ ⵍⵖⴻⵛⵛ.

10 ⴷⴻⴳ ⵡⴰⵙⵙ ⵏⵏⵉ, ⵉⵇⵇⴰⵔ ⵙⵉⴷⵉ,

ⴰⴷ ⴷⵉⵏ ⵢⵉⵍⵉ ⵉⵊⵊ ⵏ ⵍⵃⴻⵙⵙ ⵏ ⵉⵖⵓⵢⵢⴰⵏ ⵥⵉ ⵜⴻⵡⵡⴰⵔⵜ ⵏ ⵉⵙⴻⵍⵎⴰⵏ,

ⵓⵍⴰ ⴷ ⵍⵃⴻⵙⵙ ⵏ ⵢⴻⵏⵏⵉ ⵉⵜⵜⵔⵓⵏ ⵥⵉ ⵜⴻⵏⴷⵉⵏⵜ ⵏ ⵊⴷⵉⴷ

ⴷ ⵉⵛⵜ ⵏ ⵜⴰⵔⴻⵥⵥⵉⵜ ⵜⴻⵎⵖⴰⵔ ⵥⵉ ⵜⴻⵡⵔⵉⵔⵉⵏ.

11 ⵔⵓⵎ, ⵉⵎⴻⵥⴷⴰⵖ ⵏ ⵊⵊⵉⵀⴻⵜ ⵏ ⵓⵎⴻⵀⵔⴰⵥ,

ⵎⵉⵏⵥⵉ ⵎⴰⵔⵔⴰ ⵉⵙⴻⴱⴱⴰⴱⴱⴻⵏ ⵜⵜⵡⴰⵙⴻⵖⴹⴻⵏ,

ⵎⴰⵔⵔⴰ ⵉⵏⵏⵉ ⵉⵡⴻⵥⵥⵏⴻⵏ ⵜⵎⴻⵏⵢⴰⵜ ⵜⵜⵡⴰⵇⴻⴹⵄⴻⵏ.

12 ⴷⵉ ⵍⵡⴻⵇⵜ ⵏⵏⵉ ⴰⴷ ⴱⴻⵇⵇⵛⴻⵖ ⴷⵉ ⵓⵔⵛⴰⵍⵉⵎ ⵙ ⵍⴻⵇⵏⴰⴷⴻⵍ,

ⵓ ⵏⴻⵛⵛ ⴰⴷ ⵄⴰⵇⴱⴻⵖ ⵉⵔⵢⴰⵥⴻⵏ

ⵉⵏⵏⵉ ⵉⵜⵜⵡⴰⴳⴷⴰⵔⴻⵏ ⵥⵉ ⵍⴰⵜⴰⵔ ⵏⵏⵉ ⵉⵇⵇⵉⵎⴻⵏ ⵏ ⴱⵉⵏⵓ,

ⵉⵏⵏⵉ ⵉⵇⵇⴰⵔⴻⵏ ⴷⴻⴳ ⵡⵓⵍ ⵏⵙⴻⵏ

‘ⵙⵉⴷⵉ ⵡⴰⵔ ⵉⵜⵜⴻⴳⴳ ⵍⵅⴰⵔ ⵓ ⵡⴰⵔ ⵉⵜⵜⴻⴳⴳ ⵍⵖⴰⵔ!’

13 ⴰⴳⵍⴰ ⵏⵙⴻⵏ ⴰⴷ ⵢⵉⵍⵉ ⵉ ⵜⴽⴻⵛⵛⴰⴹⵜ

ⴷ ⵜⵓⴷⵔⵉⵏ ⵏⵙⴻⵏ ⴰⴷ ⴷⴻⵡⵍⴻⵏⵜ ⴷ ⵍⵅⴰⵔⴱⴻⵜ.

ⵏⵉⵜⵏⵉ ⴰⴷ ⴱⵏⴰⵏ ⵜⵓⴷⵔⵉⵏ ⵉ ⵢⵉⵅⴻⴼ ⵏⵙⴻⵏ,

ⵎⴰⵛⴰ ⵡⴰⵔ ⴷⴰⵢⵙⴻⵏⵜ ⵥⴻⴷⴷⵖⴻⵏ ⵛⴰ,

ⵏⵉⵜⵏⵉ ⴰⴷ ⵥⵥⵓⵏ ⵜⵉⵥⴰⵢⴰⵔⵉⵏ,

ⵎⴰⵛⴰ ⵡⴰⵔ ⵙⴻⵙⵙⴻⵏ ⵥⵉ ⴱⵉⵏⵓ ⵏⵏⴻⵙ.

14 ⴰⵙⵙ ⴰⵎⴻⵇⵇⵔⴰⵏ ⵏ ⵙⵉⴷⵉ ⵢⵓⴷⴻⵙ,

ⴰⵇⴰ-ⵜ ⵢⵓⴷⴻⵙ, ⴷⴻⵖⵢⴰ ⵢⵓⵙⴰ-ⴷⴷ.

ⵍⵃⴻⵙⵙ ⵏ ⵡⴰⵙⵙ ⵏ ⵙⵉⴷⵉ!

ⴰⴷ ⵉⵙⵖⵓⵢⵢ ⴱⵓ-ⵜⴻⵖⵔⵓⴹⵜ ⴷⵉⵏ ⵙ ⵢⵉⵛⵜ ⵏ ⵜⵖⵓⵢⵢⵉⵜ ⵜⴰⵔⵥⴻⴳ.

15 ⴰⵙⵙ ⵏⵏⵉ ⴰⴷ ⵢⵉⵍⵉ ⴷ ⴰⵙⵙ ⵏ ⵓⴷⵓⵇⵇⴻⵥ ⵏ ⵓⴼⵓⴳⴻⵎ,

ⴷ ⴰⵙⵙ ⵏ ⵍⴻⵃⵚⴰⵔⴻⵜ ⴷ ⴹⴹⵉⵇⴰ,

ⴷ ⴰⵙⵙ ⵏ ⵓⵅⴰⵔⵔⴻⴱ ⴷ ⵡⴰⵔⴻⴷⴷⴻⴵ,

ⴷ ⴰⵙⵙ ⵏ ⵟⵟⵍⴰⵎ ⴷ ⵜⴰⴵⴻⵙⵜ,

ⴷ ⴰⵙⵙ ⵏ ⵉⵙⴻⵢⵏⵓⵜⴻⵏ ⴷ ⵓⵙⴻⵢⵏⵓ ⵉⴱⴱⵓⵎⴱⴻⵙ,

16 ⵉⵊⵊ ⵏ ⵡⴰⵙⵙ ⵏ ⵓⵚⵓⴹⵉ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⵓ ⵏ ⵓⵚⵓⴹⵉ ⵙ ⵡⴻⵙⵔⵓⴷⴷⴻⵃ

ⴹⵉⴷⴷ ⵉ ⵜⵏⴻⴷⴷⴰⵎ ⵉⴼⴰⵔⵢⴻⵏ

ⵓ ⴹⵉⴷⴷ ⵉ ⵚⵚⵓⵎⵄⴰⵜ ⵏⵏⵉ ⵉⴵⴰⵏ ⵖⴰⵔ ⵜⵖⴻⵎⵎⵓⵔⴰ.

17 ⵏⴻⵛⵛ ⴰⴷ ⵃⵚⴰⵔⴻⵖ ⵉⵡⴷⴰⵏ

ⵓ ⵏⵉⵜⵏⵉ ⴰⴷ ⵓⵢⵓⵔⴻⵏ ⴰⵎ ⵉⴷⴰⵔⵖⴰⵍⴻⵏ,

ⵎⵉⵏⵥⵉ ⵏⵉⵜⵏⵉ ⴳⴳⵉⵏ ⴷⴷⴻⵏⴱ ⵅ ⵙⵉⴷⵉ.

ⵉⴷⴰⵎⵎⴻⵏ ⵏⵙⴻⵏ ⴰⴷ ⵜⵜⵡⴰⵥⴻⴵⵄⴻⵏ ⴰⵎ ⵜⵄⴻⵊⵊⴰⵊⵜ,

ⴷ ⵡⴻⵢⵙⵓⵎ ⵏⵙⴻⵏ ⴰⵎ ⵉⵅⵅⴰⵏ.

18 ⵓⵍⴰ ⴷ ⵏⵏⵓⵇⴰⵔⵜ ⵏⵙⴻⵏ ⴷ ⵡⵓⵔⴻⵖ ⵏⵙⴻⵏ

ⵡⴰⵔ ⵥⴻⵎⵎⴰⵔⴻⵏ ⴰⴷ ⵜⴻⵏ ⵙⵙⵏⴻⵊⵎⴻⵏ

ⴷⴻⴳ ⵡⴰⵙⵙ ⵏ ⵓⴷⵓⵇⵇⴻⵥ ⵏ ⵓⴼⵓⴳⴻⵎ ⵏ ⵙⵉⴷⵉ.

ⵜⵉⵎⴻⵙⵙⵉ ⵏ ⵡⴰⵙⵙⴰⵎ ⵏⵏⴻⵙ ⴰⴷ ⵜⴻⵛⵛ ⵎⴰⵔⵔⴰ ⵜⴰⵎⵎⵓⵔⵜ,

ⵎⴰⵖⴰⵔ ⴷⴻⵖⵢⴰ ⵏⴻⵜⵜⴰ ⴰⴷ ⵉⵇⴹⴰ ⵎⴰⵔⵔⴰ ⵉⵎⴻⵥⴷⴰⵖ ⵏ ⵜⴻⵎⵎⵓⵔⵜ. ^■