3
1 ⵓⵛⵜ ⵅ ⵜⴻⵏⴷⵉⵏⵜ ⵏ ⵉⴷⴰⵎⵎⴻⵏ! ⴰⵇⴰ-ⵜⵜ ⴷ ⴰⵅⴰⵔⵔⵉⵇ ⴷ ⵍⵄⵓⵏⴼ ⵎⴰⵔⵔⴰ,
ⵜⵓⴽⴽⴰⵔⴹⴰ ⵡⴰⵔ ⵜᵉⵜⵜⴱⴻⴷⴷⵉ ⵛⴰ. □
2 ⵍⵃⴻⵙⵙ ⵏ ⵓⵔⴻⴽⴽⵓⴹ,
ⵍⵃⴻⵙⵙ ⵏ ⵓⵇⴰⵔⵇⴻⴱ ⵏ ⵜⵊⴰⵔⵔⴰⵔⵉⵏ,
ⴰⵙⴻⵇⵍⴻⵄ ⵏ ⵉⵢⵙⴰⵏ
ⴷ ⵉⴽⴰⵔⵔⵓⵜⴻⵏ ⵉⵏⴻⵟⵟⵡⴻⵏ.
3 ⴰⵎⴻⵏⵏⴰⵢ ⵉⵏⵢⴰ,
ⵙⵙⵉⴼ ⵉⵜⵜⵡⴻⵙⵙⴻⴳ,
ⴼⵔⵉⵜⵛⴰ ⴰⵇⴰ-ⵜⵜ ⴰⵎ ⵡⴰⵙⵙⴰⵎ.
ⴰⵟⵟⴰⵙ ⴷ ⵉⵏⵏⵉ ⵉⵜⵜⵡⴰⵏⵖⴻⵏ
ⵓ ⴰⵇⴰ ⴷⵉⵏ ⴰⵄⵓⵔⵔⵉⵛ ⵏ ⵉⵎⴻⵜⵜⴰⵏ,
ⵜⵉⵔⵔⵉⵎⵉⵏ ⵡⴰⵔ ⵖⴰⵔⵙⴻⵏⵜ ⵍⵃⴻⴷ,
ⵡⴰⵀ, ⵜⵜⴻⵏⵇⵔⴰⴹⴻⵏ ⴷⵉ ⵍⵅⴻⵛⴱⴰⵜ ⵏⵙⴻⵏ.
4 ⵣⵉ ⵙⵙⵉⴱⴱⴻⵜ ⵏ ⵡⴰⵟⵟⴰⵙ ⵏ ⴼⴰⵔⵇ-ⵛⵛⵖⴻⵍ ⵏ ⵜⴻⵎⵖⴰⵔⵜ ⵍⵎⵓⵃⴻⵙⵏⴰ,
ⵏ ⵍⴰⵍⵍⴰ ⵏ ⵜⵙⴻⵃⵃⴰⵔⵜ,
ⵜⴻⵏⵏⵉ ⵉⵥⵥⵏⵓⵥⴰⵏ ⵍⴻⴳⵏⵓⵙ ⵙ ⴼⴰⵔⵇ-ⵛⵛⵖⴻⵍ ⵏⵏⴻⵙ
ⵓⵍⴰ ⴷ ⵎⴰⵔⵔⴰ ⵜⵉⵇⴻⴱⴱⴰⵍ ⵙ ⵓⵙⴻⵃⵃⴰⵔ ⵏⵏⴻⵙ,
5 ⵅⵥⴰⵔ, ⵙ ⵓⵢⴰ ⴰⴷ ⵅⴰⵎ ⵉⵍⵉⵖ,
ⴰⵎⵎⵓ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔ,
ⵓ ⵏⴻⵛⵛ ⴰⴷ ⵙⵙⴳⴻⵄⵄⴷⴻⵖ ⵜⵉⵎⵓⵡⵡⴰ ⵏ ⵡⴰⵔⵔⵓⴹ ⵏⵏⴻⵎ ⵜⵉⵡⵡⴰ ⵉ ⵓⵖⴻⵎⴱⵓⴱ ⵏⵏⴻⵎ,
ⵓ ⵏⴻⵛⵛ ⴰⴷ ⵙⵙⴻⵛⵏⴻⵖ ⵉ ⵍⴻⴳⵏⵓⵙ ⵜⵓⵄⵄⴰⵔⵢⴻⵏⵜ ⵏⵏⴻⵎ,
ⵓ ⵍⴻⴼⴹⵉⵃⴻⵜ ⵏⵏⴻⵎ ⵉ ⵜⴳⴻⵍⴷⵉⵡⵉⵏ.
6 ⵏⴻⵛⵛ ⴰⴷ ⵛⴻⵎ ⵍⴻⵇⴼⴻⵖ ⵙ ⵏⵏⵄⴰⵡⴰⵜ,
ⵓ ⴰⴷ ⵛⴻⵎ ⵙⵙⴼⴻⴹⵃⴻⵖ
ⵓ ⴰⴷ ⵛⴻⵎ ⴰⵔⵔⴻⵖ ⵉ ⵓⵙⴼⵓⵔⵔⴻⵊ.
7 ⵅⴻⵏⵏⵉ ⴰⴷ ⵉⵎⵙⴰⵔ ⴰⵇⴰ ⵎⴰⵏ ⵡⴻⵏ ⵎⴰ ⵛⴻⵎ ⵉ ⵖⴰ ⵉⵥⴰⵔⴻⵏ,
ⴰⴷ ⵥⵥⴰⵢⴻⵎ ⵢⴰⵔⵡⴻⵍ, ⴰⴷ ⵢⵉⵏⵉ “ⵜⴰⵏⴷⵉⵏⵜ ⵏ ⵏⵉⵏⵡⴰ ⵜⵅⴰⵔⵔⴻⴱ!
ⵡⵉ ⵥⵥⴰⵢⴻⵙ ⵉ ⵖⴰ ⵉⵛⴻⴹⵏⴻⵏ?”
ⵎⴰⵏⵉ ⴷ ⴰⵎ ⵉ ⵖⴰ ⵢⴰⵔⵥⵓⵖ ⵉⵏⵏⵉ ⵛⴻⵎ ⵉ ⵖⴰ ⵉⵙⵙⴼⴻⵡⵡⵊⴻⵏ?
8 ⵎⴰ ⵛⴻⵎ ⵃⵙⴻⵏ ⵥⵉ ⵏⵓ-ⴰⵎⵓⵏ
ⵏⵏⵉ ⵉⵜⵜⵖⵉⵎⴰⵏ ⵖⴰⵔ ⵉⵖⴻⵥⵔⴰⵏ,
ⴰⵎ ⴷ ⴰⵙ ⵇⴻⵡⵡⴰⵔⴻⵏ ⵡⴰⵎⴰⵏ,
ⴰⵍⴰⵎⵉ ⵍⴻⴱⵃⴰⵔ ⴷ ⴰⵛⴱⴰⵔ ⵏⵏⴻⵙ ⵏ ⵥⵥⴰⵜ,
ⴰⵇⴰ ⵍⵃⵉⴹ ⵏⵏⴻⵙ ⵉⴳⴻⵄⵄⴻⴷ ⵥⵉ ⵍⴻⴱⵃⴰⵔ.
9 ⴽⵓⵛ ⵜⵓⵖⴰ ⴷ ⵚⵚⵓⵍⵟⴰ ⵏⵏⴻⵙ
ⵓⵍⴰ ⵄⴰⵡⴻⴷ ⵎⵉⵙⵍⴰ, ⵓ ⵡⴰⵔ ⵜⵓⵖⵉ ⵖⴰⵔⴻⵙ ⴰⵏⴻⴳⴳⴰⵔ.
ⴼⵓⵟ ⴷ ⴰⵢⵜ ⵏ ⵍⵉⴱⵉⵢⴰ ⵜⵓⵖⴰ ⴰⵜⴻⵏ ⵥⴻⴳ ⵉⵎⵄⴰⵡⵏⴻⵏ ⵏⵏⴻⴽ.
10 ⵓⵍⴰ ⴷ ⵏⴻⵜⵜⴰⵜ ⵜⵓⵢⵓⵔ ⴷⵉ ⵍⵎⴻⵏⴼⴰ,
ⴷⵉ ⵜⵎⴻⵃⴱⴰⵙⵜ.
ⵓⵍⴰ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⵜⵜⵡⴰⵍⴻⴱⵥⴻⵏ ⴷⵉ ⵜⵖⴻⵎⵎⵓⵔⴰ ⵏ ⵎⴰⵔⵔⴰ ⵏ ⵜⴻⴱⵔⵉⴷⵉⵏ,
ⵓ ⵅ ⵉⵎⵛⴻⵏⵏⵄⴻⵏ ⵏⵏⴻⵙ ⵏⴹⴰⵔⴻⵏ ⵅⴰⵙⴻⵏ ⵜⴰⵇⴻⴷⴷⵓⵃⵜ
ⵓ ⵎⴰⵔⵔⴰ ⵉⵎⵖⴰⵔⴻⵏ ⵏⵏⴻⵙ ⵜⵜⵡⴰⵛⴰⵔⴼⴻⵏ ⵙ ⵙⵙⵏⴰⵙⴻⵍ.
11 ⵓⵍⴰ ⴷ ⵛⴻⵎ ⴰⴷ ⵜⴻⵙⵛⴰⵔⴻⴷ
ⴰⴷ ⵜⴻⵙⵙⵏⵓⴼⴼⴰⵔⴻⴷ ⵉⵅⴻⴼ ⵏⵏⴻⵎ.
ⵄⴰⵡⴻⴷ ⵛⴻⵎ ⴰⴷ ⵜⴰⵔⵥⵓⴷ ⵉⵊⵊ ⵏ ⵍⴱⵓⵔⵊ ⵉ ⵓⴷⵓⵔⵔⵉ ⵥⵉ ⵍⴻⵄⴷⵓ ⵏⵏⴻⵎ.
12 ⵎⴰⵔⵔⴰ ⵍⴱⴰⵔⴰⵊⴰⵜ ⵏⵏⴻⵎ ⴰⵎ ⵡⵓⵔⵜⴰⵏ
ⴰⴽ-ⴷ ⵍⴱⴰⵛⵓⵔ.
ⵎⴰⵍⴰ ⵜⵜⵡⴰⵏⵀⴻⵥⵥⴻⵏ, ⴰⴷ ⵡⴹⴰⵏ
ⴷⴻⴳ ⵓⵇⴻⵎⵎⵓⵎ ⵏ ⵡⴻⵏⵏⵉ ⵉⵅⵙⴻⵏ ⴰⴷ ⵜⴻⵏ ⵢⴻⵛⵛ.
13 ⵅⵥⴰⵔ, ⴰⵇⴰ ⴷ ⵡⴰ ⴷ ⵍⴳⴻⵏⵙ ⵏⵏⴻⵎ, ⴰⵇⴰ-ⵜ ⴷ ⵜⵉⵎⵖⴰⵔⵉⵏ.
ⵜⵜⵏⵓⵔⵥⵎⴻⵏⵜ ⵜⴻⵡⵡⵓⵔⴰ ⵏ ⵜⴻⵎⵎⵓⵔⵜ ⵏⵏⴻⵎ ⵇⴰⵄ ⵉ ⵍⴻⵄⴷⵓ,
ⵜⵉⵎⴻⵙⵙⵉ ⴰⴷ ⵜⴻⵛⵛ ⵉⵄⵓⵎⴰⴷ ⵏⵏⴻⵎ ⵏ ⵡⴻⴼⵔⴰⵢ.
14 ⴰⵢⴻⵎ ⴰⵎⴰⵏ ⵉ ⵢⵉⵅⴻⴼ ⵏⵏⴻⵎ ⵉ ⵍⴻⵃⵚⴰⵔⴻⵜ,
ⵙⴻⵎⵜⴻⵏ ⵍⴱⵓⵔⵊⴰⵜ ⵏⵏⴻⵎ,
ⴱⴻⴷⴷ ⴷⵉ ⵜⵍⴰⵅⵜ,
ⵄⴻⴼⵙ ⴷⵉ ⵜⴰⵔⵔⵉⵙⵜ,
ⵙⴻⵇⵙⴻⵃ ⵉⵥⵔⴰ ⵉⵜⵜⵡⴰⵙⵙⵓⵢⴷⴰⵏ!
15 ⵜⵉⵎⴻⵙⵙⵉ ⴰⴷ ⵛⴻⵎ ⵜⴻⵛⵛ ⴷⵉⵏ,
ⵙⵙⵉⴼ ⴰⴷ ⵛⴻⵎ ⵉⵏⴻⵖ,
ⴰⴷ ⵛⴻⵎ ⵜⴻⵛⵛ ⴰⵎ ⴱⵓ-ⵡⴻⵍⵙⴰⵃ!
ⴰⵔⵏⵉ ⴷⴻⴳ ⵉⵅⴻⴼ ⵏⵏⴻⵎ ⴰⵎ ⴱⵓ-ⵡⴻⵍⵙⴰⵃ,
ⴰⵔⵏⵉ ⴷⴻⴳ ⵢⵉⵅⴻⴼ ⵏⵏⴻⵎ ⴰⵎ ⵜⵎⵓⵔⵖⵉ.
16 ⵛⴻⴽ ⵜⴻⵙⵙⵎⴰⵔⵏⵉⴷ ⴷⴻⴳ ⵉⵙⴻⴱⴱⴰⴱⴻⵏ ⵏⵏⴻⵎ
ⴽⵜⴰⵔ ⵥⴻⴳ ⵉⵜⵔⴰⵏ ⵏ ⵓⵊⴻⵏⵏⴰ.
ⴱⵓ-ⵡⴻⵍⵙⴰⵃ ⴰⴷ ⵉⵙⵙⴰⵔⵙ ⵜⵉⵍⵎⴻⵛⵜ ⵏⵏⴻⵙ ⵓⵛⴰ ⴰⴷ ⵉⴹⵡⴰ.
17 ⵉⵄⴻⵙⵙⴰⵙⴻⵏ ⵏⵏⴻⵎ ⵏ ⴰⵔⵔⵉⵎⴻⵜ ⴰⵎ ⵢⵉⵊⵊ ⵏ ⵡⴻⵢⵍⴰⴼ ⵏ ⵜⵎⵓⵔⵖⵉ
ⵓ ⵍⵇⴻⴱⵟⴰⵏⴰⵜ ⵏⵏⴻⵎ ⴰⵎ ⵉⵅⴻⵏⴼⵓⵙⴻⵏ ⵉⵎⴻⵇⵇⵔⴰⵏⴻⵏ,
ⵉⵏⵏⵉ ⵢⴰⵔⵙⴰⵏ ⴷⵉ ⵍⴻⵃⵢⵓⴹ ⴷⴻⴳ ⵢⵉⵊⵊ ⵏ ⵡⴰⵙⵙ ⴷ ⴰⵚⴻⵎⵎⴰⴹ.
ⵍⴰⵎⵉ ⴷⴷ-ⵜⴻⵏⵇⴰⵔ ⵜⴼⵓⵛⵜ, ⵟⵟⴰⵡⴻⵏ ⵙⵙⴻⵏⵏⵉ ⴷⴻⵖⵢⴰ.
ⵡⴰⵔ ⵉⵙⵙⵉⵏ ⵃⴻⴷ ⴰⵎⵛⴰⵏ ⵏⵙⴻⵏ. ⵎⴰⵏⵉ ⵔⵓⵃⴻⵏ ⵏⵉⵜⵏⵉ?
18 ⵉⵏⵉⵞⴰⵏ ⵏⵏⴻⴽ ⵜⵜⵏⵓⴷⵓⵎⴻⵏ, ⴰⵢⴰ, ⴰⵊⴻⴵⵉⴷ ⵏ ⴰⵛⵛⵓⵔ,
ⴰⵢⵜ ⵏ ⵊⵊⴻⵀⴷ ⵏⵏⴻⴽ ⵜⵜᵉⵟⵟⵙⴻⵏ,
ⵍⴳⴻⵏⵙ ⵏⵏⴻⴽ ⴰⴷ ⵜ ⵥⴻⴵⵄⴻⵏ ⵅ ⵉⴷⵓⵔⴰⵔ,
ⵓⵛⴰ ⵓⵍⴰ ⴷ ⵉⵊⵊⴻⵏ ⵡⴰⵔ ⵜⴻⵏ ⵉⵙⵙⵎⵓⵏ ⵛⴰ.
19 ⵡⴰⵔ ⴷⵉⵏ ⴰⵙⴳⴻⵏⴼⵉ ⵉ ⵜⴰⵔⴻⵥⵥⵉⵜ ⵏⵏⴻⴽ,
ⵉⵜⵜⴻⴽⴽⴻⵙ ⴰⵛ ⵓⵢⴻⵥⵥⵉⵎ!
ⵎⴰⵔⵔⴰ ⵉⵏⵏⵉ ⵉ ⵅⴰⴽ ⵉⵙⵍⵉⵏ ⵍⴻⵅⴱⴰⵔ,
ⴰⴷ ⵛⵛⴰⵜⴻⵏ ⴷⴻⴳ ⵉⴼⴰⵙⵙⴻⵏ ⵥⵉ ⵙⵙⵉⴱⴱⴻⵜ ⵏⵏⴻⴽ,
ⵎⴰⵖⴰⵔ ⵅ ⵎⴰⵏ ⵡⴻⵏ ⵡⴰⵔ ⵉⵄⴻⴷⴷⵓ ⵛⴰ ⵍⴻⴱⴷⴰ ⵍⵖⴰⵔ ⵏⵏⴻⴽ?