ⴰⵡⴻⵟⵟⵓ ⵏ ⵏⵉⵏⵡⴰ
2
1 ⵅⵥⴰⵔ, ⵅ ⵉⴷⵓⵔⴰⵔ ⵜⵜⴰⵥⵥⵍⴻⵏ ⵉⴹⴰⵔⴻⵏ ⵏ ⵡⴻⵏⵏⵉ ⴷⴷ-ⵢⵉⵡⵢⴻⵏ ⵍⴻⵅⴱⴰⵔ ⴰⵚⴻⴱⵃⴰⵏ, ⵡⴻⵏⵏⵉ ⵉⵅⴻⴱⴱⴰⵔⴻⵏ ⵙ ⵍⴻⵀⵏⴰ.
ⵄⴻⵢⵢⴻⴷ ⵍⴻⵄⵢⵓⴷⴰⵜ ⵏⵏⴻⴽ, ⴰ ⵢⴰⵀⵓⴷⴰ,
ⵙⴻⵇⴼⴻⵍ ⵍⵡⵓⵄⵓⴷ ⵏⵏⴻⴽ,
ⵎⴰⵖⴰⵔ ⵡⴻⵏⵏⵉ ⵡⴰⵔ ⵉⵙⴻⴽⴽⵡⵉⵏ ⵡⴰⵍⵓ ⵡⴰⵔ ⵉⵜⵜⵖⵉⵎⵉ ⵉⵥⴻⴽⴽⵡⵉ ⵅⴰⴽ ⵄⴰⴷ,
ⵏⴻⵜⵜⴰ ⵉⵏⵏⴻⵇⴹⴻⵄ ⵎⴰⵔⵔⴰ. ■
2 ⵉⵊⵊⴻⵏ ⵡⴻⵏⵏⵉ ⵢⵓⵥⵥⵍⴻⵏ ⵅ ⵉⵡⴷⴰⵏ ⵙ ⵍⵄⵓⵏⴼ ⵉ ⴷⴷ-ⵉⴳⴻⵄⵄⴻⴷ ⵅⴰⴽ!
ⵄⴻⵙⵙ ⵅ ⵍⴱⵓⵔⵊ,
ⵃⴹⴰ ⴰⴱⵔⵉⴷ,
ⵙⴻⵎⵃⴻⴹ ⵜⵉⵊⵄⵉⵏⵏⴰ ⵏⵏⴻⴽ,
ⴰⵔⵏⵉ ⴷⵉ ⵊⵊⵀⴻⴷ ⵏⵏⴻⴽ!
3 ⵙ ⵎⵉⵏⵥⵉ ⵙⵉⴷⵉ ⴰⴷ ⴷⴷ-ⵢⴰⵔⵔ ⵍⵄⴻⵥⵥ ⵏ ⵢⴰⵄⵇⵓⴱ,
ⴰⵇⴰ-ⵜ ⴷ ⵍⵄⴻⵥⵥ ⵏ ⵉⵙⵔⴰⵉⵍ.
ⵎⴰⵖⴰⵔ ⵉⴽⴻⵛⵛⴰⴹⴻⵏ ⴽⴻⵛⵛⴹⴻⵏ ⵜⴻⵏ,
ⵓ ⵏⵉⵜⵏⵉ ⵖⴻⴹⵍⴻⵏ ⵜⵉⵥⴻⵔⵎⵉⵏ ⵏⵙⴻⵏ. ■
4 ⵜⵛⴰⴱⴱⴰⵜ ⵏ ⵓⵙⴻⵍⵇⵉ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵥⴻⵡⵖⴻⵏⵜ,
ⵉⵔⵢⴰⵥⴻⵏ ⵉⵎⴻⵃⴹⴻⵏ ⴱⴻⴷⴷⴻⵏ ⵙⵙⵡⴻⵊⴷⴻⵏ ⵉ ⵓⵎⴻⵏⵖⵉ
ⵙ ⵡⴰⵔⵔⵓⴹ ⴰⵥⴻⴳⴳⵯⴰⵖ ⵢⵓⵥⵖⴻⵏ,
ⵖⴰⵔ ⵜⴻⵙⵙⵉⵇⵜ ⵏ ⵜⵎⴻⵙⵙⵉ ⵏ ⵡⵓⵥⵥⴰⵍ ⵏ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ,
ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵉⵙⵙⴻⵡⵊⴻⴷ ⵉⵅⴻⴼ ⵏⵏⴻⵙ
ⵓ ⵜⵉⵛⴻⵊⵊⵓⵔⴰ ⵏ ⵓⵎⴻⵔⵥⵉ ⴰⴷ ⵏⵏⵀⴻⵥⵥⴻⵏ. □
5 ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ ⵀⴰⵊⴻⵏ ⴷⴻⴳ ⵉⴱⵔⵉⴷⴻⵏ,
ⴰⵇⴰ ⵥⵥⴻⵄⵡⴰⴹⴻⵏ ⵥⵉ ⵙⵙⴰ ⵖⴰⵔ ⴷⴰ ⴷⴻⴳ ⵡⴰⵥⵥⴰⵢⴻⵏ,
ⵜⵜⵡⴰⴹⵀⴰⵔⴻⵏ ⴰⵎ ⵉⵚⴻⴼⴹⴰⵡⴻⵏ,
ⵏⵉⵜⵏⵉ ⴳⴻⵎⵎⴰⵔⴻⵏ ⴷⴰ ⴷ ⴷⵉⵀⴰ ⴰⵎ ⵡⴰⵙⵙⴰⵎⴻⵏ.
6 ⵏⴻⵜⵜⴰ ⵉⵜⵜⵅⴰⵔⵔⴻⵚ ⴷⴻⴳ ⴰⵢⵜ ⵏ ⵊⵊⴻⵀⴷ,
ⵏⵉⵜⵏⵉ ⵎⴰⵛⴰ ⵜⵜⵏⴻⵇⵔⴰⴹⴻⵏ ⴰⵎ ⴳⴳⵓⵔⴻⵏ
ⵏⵉⵜⵏⵉ ⵜⵜⴰⵥⵥⵍⴻⵏ ⵖⴰⵔ ⵍⵃⵉⴹ ⵏⵙⴻⵏ,
ⵎⴰⵏⵉ ⵉⴱⴻⴷⴷ ⵙⵙⵇⴻⴼ ⵏ ⵓⵀⵊⴰⵎ ⵉⵡⵊⴻⴷ.
7 ⵜⵉⵡⵡⵓⵔⴰ ⵏ ⵉⵖⴻⵥⵔⴰⵏ ⵏⵏⵓⵔⴻⵥⵎⴻⵏⵜ,
ⵓ ⵍⴻⵇⵚⴰⵔ ⴰⴷ ⵉⴼⵙⵉ.
8 ⴰⵇⴰ ⵜⴰⵎⴻⵙⵍⴰⵛⵜ ⵜⴱⴻⴷⴷ ⵏⵉⵛⴰⵏ!
ⵏⴻⵜⵜⴰⵜ ⴰⴷ ⵜᵉⵜⵜⵡⴰⵄⴰⵔⵔⴰ,
ⴰⴷ ⵜᵉⵜⵜⵡⴰⵙⴳⴻⵄⵄⴻⴷ,
ⵓ ⵜⵉⵙⴻⵎⵖⵉⵏ ⵏⵏⴻⵙ ⵙⵖⵓⵢⵢⵓⵏⵜ
ⴰⵎⴻⵛⵏⴰⵡ ⴰⴱⴰⵔⵔⵉ ⵏ ⵜⴻⴷⴱⵉⵔⵉⵏ,
ⴰⵎ ⵛⵛⴰⵜⴻⵏⵜ ⴷⴻⴳ ⵉⴷⵎⴰⵔⴻⵏ ⵏⵙⴻⵏⵜ. □
9 ⵏⵉⵏⵡⴰ ⴰⵎ ⵢⵉⵊⵊ ⵏ ⵓⵢⴻⵍⵎⴰⵎ ⵏ ⵡⴰⵎⴰⵏ ⵥⴻⴳ ⵡⴰⵙⵙ ⵉ ⴷⵉ ⵉⴵⴰ.
ⵍⴻⵅⵅⵓ ⵎⴰⵛⴰ ⴰⵔⴻⴽⴽⵡⴻⵍⴻⵏ ⵏⵉⵜⵏⵉ.
ⴱⴻⴷⴷⴻⵎ! ⴱⴻⴷⴷⴻⵎ!, ⵜⵜⵍⴰⵖⴰⵏ ⵏⵉⵜⵏⵉ,
ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⴷⴷ-ⵉⵜⵜⵏⴻⵇⵍⵉⴱ.
10 ⴽⴻⵛⵛⴹⴻⵎ ⵏⵏⵓⵇⴰⵔⵜ, ⴽⴻⵛⵛⴹⴻⵎ ⵓⵔⴻⵖ!
ⵡⴰⵔ ⴷⵉⵏ ⵇⴻⵟⵟⵓ ⵉ ⵍⴻⴽⵏⵓⵥ ,
ⵖⴰⵔ ⵓⵛⴻⵡⵡⴰⵔ ⵏ ⵄⵍⴰⵎ ⴽⵓⵍ ⵍⴻⵇⵛⵓⵄ.
11 ⵜⴻⵅⵡⴰ, ⵜᵉⵜⵜⵡⴰⴽⴻⵛⵛⴻⴹ ⵓ ⵜᵉⵜⵜⵡⴰⵔⴻⴷⴷⴻⴵ ⵏⴻⵜⵜⴰⵜ,
ⵓⵍ ⵉⴼⵙⵉ ⵓⵛⴰ ⵉⴼⴰⴷⴷⴻⵏ ⴼⴻⵛⵍⴻⵏ,
ⵓ ⵜⵜⴻⴽⴽⵙⴻⵏⵜ ⴰⵙ ⵜⵉⵊⵄⵉⵏⵏⴰ ⵎⴰⵔⵔⴰ
ⵓ ⵉⵖⴻⵎⴱⴰⴱ ⵏⵙⴻⵏ ⵡⴰⵔⵖⴻⵏ ⵎⴰⵔⵔⴰ. ■
12 ⵎⴰⵏⵉ ⵉⴵⴰ ⵍⴻⵅⵅⵓ ⵍⵎⴰⵔⴳⴻⵃ ⵏ ⵡⴰⵢⵔⴰⴷⴻⵏ,
ⴷ ⵍⵎⴻⴷⵡⴻⵍ ⵏ ⵡⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ,
ⵎⴰⵏⵉ ⵢⵓⵢⵓⵔ ⵡⴻⵢⵔⴰⴷ, ⴰⵇⴰ-ⵜⵜ ⴷ ⵜⴰⵢⵔⴰⴷⵜ, ⴰⴽ-ⴷ ⵡⴻⵢⵔⴰⴷ ⴰⵎⴻⵥⵢⴰⵏ
ⴰⵎ ⵓⵍⴰ ⴷ ⵉⵊⵊ ⵎⴰ ⵉⵙⵙⵏⴻⵅⵍⴻⵄ ⵉ-ⵜⴻⵏ?
13 ⵎⴰⵏⵉ ⵉⴵⴰ ⵍⴻⵅⵅⵓ ⵡⴰⵢⵔⴰⴷ ⵏⵏⵉ ⵉⵎⴻⵥⵥⵇⴻⵏ ⵎⵉⵏ ⵃⴷⴰⵊⴻⵏ ⵜⴰⵔⵡⴰ ⵏⵏⴻⵙ
ⵓ ⵉⵊⴻⵢⵢⴻⴼ ⵉ ⵜⴰⵢⵔⴰⴷⵉⵏ ⵏⵏⴻⵙ,
ⴷ ⵡⴻⵏⵏⵉ ⵉⵛⵛⵓⵔⴻⵏ ⵉⴼⵔⴰⵏ ⵏⵏⴻⵙ ⵙ ⵓⴽⴻⵛⵛⴻⴹ,
ⴷ ⵉⵎⵓⵛⴰⵏ ⵏⵏⴻⵙ ⵏ ⵓⴷⵓⵔⵔⵉ ⵥⵉ ⵎⵉⵏ ⵉⵜⵜⵡⴰⵛⴰⵔⵔⴳⴻⵏ?
14 ⵅⵥⴰⵔ, ⵏⴻⵛⵛ ⴰⴷ ⵉⵍⵉⵖ ⵅⴰⴽ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔ,
ⵏⴻⵛⵛ ⴰⴷ ⴰⵔⵔⴻⵖ ⵉⴽⴰⵔⵔⵓⵜⴻⵏ ⵏⵏⴻⴽ ⴷ ⴷⴷⴻⵅⵅⴰⵏ,
ⵓ ⴰⴷ ⵛⵛⴻⵖ ⵙⵙⵉⴼ ⵏ ⵡⴻⵢⵔⴰⴷⴻⵏ ⵏⵏⴻⴽ ⵉⵎⴻⵥⵢⴰⵏⴻⵏ,
ⵓ ⵏⴻⵛⵛ ⴰⴷ ⵇⴻⴹⵄⴻⵖ ⵜⴰⴽⴻⵛⵛⴰⴹⵜ ⵏⵏⴻⴽ ⵥⵉ ⵜⴻⵎⵎⵓⵔⵜ
ⵓ ⵄⴻⵎⵎⴰⵔⵚ ⵄⴰⴷ ⴰⴷ ⵜᵉⵜⵜⵡⴰⵙⴻⵍ ⵜⵎⵉⵊⵊⴰ ⵏ ⵉⵔⴻⵇⵇⴰⵙⴻⵏ ⵏⵏⴻⴽ. □