ⵙⵉⴷⵉ ⵢⴰⵔⵔⴰ-ⴷⴷ ⵅ ⵃⴰⴱⴰⵇⵇⵓⵇ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ
2
1 ⵏⴻⵛⵛ ⴳⴳⵉⵖ ⴰⴷ ⴱⴻⴷⴷⴻⵖ ⴷⴻⴳ ⵡⴻⵎⵛⴰⵏ ⵏ ⵜⵄⴻⵙⵙⴰⵙⵜ ⵉⵏⵓ ⵓ ⵙⵙⴱⴻⴷⴷⴻⵖ ⵉⵅⴻⴼ ⵉⵏⵓ ⵅ ⵚⵚⵓⵎⵄⴻⵜ ⵏ ⵜⵄⴻⵙⵙⴰⵙⵜ,
ⵚⴻⵡⴹⴻⵖ ⵎⴰⵃⴻⵏⴷ ⴰⴷ ⵥⴰⵔⴻⵖ ⵎⵉⵏ ⵉ ⴷ ⴰⵢⵉ ⵖⴰ ⵢⵉⵏⵉ ⵏⴻⵜⵜⴰ,
ⵓ ⵎⵉⵏ ⵖⴰ ⵢⴰⵔⵔⴻⵖ ⵅ ⵓⵛⴻⵜⵛⵉ ⵉⵏⵓ. ■
2 ⵢⴰⵔⵔⴰ-ⴷⴷ ⵅⴰⴼⵉ ⵙⵉⴷⵉ ⵓⵛⴰ ⵉⵏⵏⴰ:
ⴰⵔⵉ ⵜⴰⵎⴻⵥⵔⵉⵡⵜ,
ⴰⵔⵉ ⵜⵜ ⵜⴼⴰⵔⵥ ⵅ ⵜⴻⵍⵡⵉⵃⵉⵏ,
ⵎⴰⵃⴻⵏⴷ ⵡⴻⵏⵏⵉ ⵉⵄⴻⴷⴷⵓⵏ ⵉⵥⴻⵎⵎⴰⵔ ⴰⴷ ⵜⵜ ⵉⵖⴰⵔ. ■
3 ⵎⴰⵖⴰⵔ ⵜⴰⵎⴻⵥⵔⵉⵡⵜ ⵜᵉⵜⵜⵔⴰⵊⴰ ⵄⴰⴷ ⴰⵍ ⵍⵡⴻⵇⵜ ⵏⵏⵉ ⵢⵓⵔⴰⵏ.
ⵜᵉⵜⵜⴻⵎⵃⵉⵥⵡⴰⵔ ⵖⴰⵔ ⵓⵇⴻⵟⵟⵓ ⵓ ⵡⴰⵔ ⵜⴻⵙⵙⵅⴰⵔⵔⵉⵇ ⵛⴰ.
ⵎⴰⵍⴰ ⵜⴻⵇⵇⵉⵎ ⵡⴰⵔ ⴷⴷ-ⵜᵉⵜⵜⵉⵙ, ⵇⵇⵉⵎ ⵔⴰⵊⴰ ⵜⵜ,
ⵎⴰⵖⴰⵔ ⴰⴷ ⴷⴷ-ⵜⴰⵙ ⵙ ⵜⵉⴷⴻⵜⵜ, ⵡⴰⵔ ⴳⴳⵓⵔ ⴰⴷ ⵜⵄⴻⵟⵟⴰⵍ.
4 ⵅⵥⴰⵔ, ⴰⵇⴰ ⵉⵜⵜⵓⴼⴼ, ⵡⴰⵀ, ⵍⴻⵄⵎⴰⵔ ⵏⵏⴻⵙ ⵡⴰⵔ ⵉⵙⴻⴳⴳⴻⵎ ⴷⴰⵢⴻⵙ,
ⵎⴰⵛⴰ ⴰⵎⵙⴻⴳⴳⴻⴷ ⵙ ⵍ’ⵉⵎⴰⵏ ⵏⵏⴻⵙ ⴰⴷ ⵉⴷⴷⴰⵔ. □
5 ⵙ ⵜⵉⴷⴻⵜⵜ, ⴱⵉⵏⵓ ⴰⵇⴰ ⵉⵛⴻⵎⵎⴻⵜ!
ⴱⵉⵏⵓ ⴰⵇⴰ-ⵜ ⴰⵎ ⵢⵉⵊⵊ ⵏ ⴱⵓ-ⵏⵏⴼⴰⵅⴻⵜ ⵡⴻⵏⵏⵉ ⵡⴰⵔ ⵉⵜⵜⴰⵔⴻⵢⵢⵃⴻⵏ,
ⵡⴻⵏⵏⵉ ⵉⵙⵙⴻⵎⵖⴰⵔⴰⵏ ⵍⴻⵄⵎⴰⵔ ⵏⵏⴻⵙ ⴰⵎ ⵍⴰⵅⴰⵔⵜ.
ⵏⴻⵜⵜⴰ ⵡⴰⵔ ⵉⵜⵜⵊⵊⵉⵡⵉⵏ ⴰⵎ ⵍⵎⴻⵡⵜ
ⵓ ⵉⵢⵔⵓ ⵖⴰⵔⴻⵙ ⵎⴰⵔⵔⴰ ⵍⴻⴳⵏⵓⵙ
ⵓ ⵉⵙⵙⵎⵓⵏ ⵖⴰⵔⴻⵙ ⵎⴰⵔⵔⴰ ⵉⵢⴷⵓⴷⴻⵏ. □
6 ⵎⴰ ⵡⴰⵔ ⴷⴷ ⵅⴰⵙ ⵜⵜⵉⵡⵢⴻⵏ ⵏⵉⵜⵏⵉ ⵉⵊⵊ ⵏ ⵡⴰⵡⴰⵍ ⵉⵡⴻⵥⵏⴻⵏ
ⵓⵍⴰ ⴷ ⵉⵊⵊ ⵏ ⵢⴻⵥⵔⵉ ⵉⵛⵛⵓⵔ ⵙ ⵍⴻⵎⵄⴰⵏⵉ ⵉⵏⵏⵓⴼⴰⵔⴻⵏ, ⴰⴷ ⵉⵏⵉⵏ:
ⵓⵛⵜ ⵅ ⵡⴻⵏⵏⵉ ⵉⵊⴰⵔⵔⵡⴻⵏ ⵎⵉⵏ ⵡⴰⵔ ⵉⴵⵉⵏ ⵏⵏⴻⵙ!
ⴰⵍ ⵎⴻⵍⵎⵉ ⵄⴰⴷ?
ⵓⵛⵜ ⵅ ⵡⴻⵏⵏⵉ ⵉⵙⵙⴷⴻⵇⵇⴰⵍⴻⵏ ⵉⵅⴻⴼ ⵏⵏⴻⵙ ⵙ ⵡⴻⵔⵀⴰⵏ!
7 ⵎⴰ ⵡⴰⵔ ⴷⴷ-ⵜⵜⴻⴽⴽⴰⵔⴻⵏ ⵙ ⵍⵖⴻⴼⵍⴻⵜ ⵉⵏⵏⵉ ⵉ ⵛⴻⴽ ⵖⴰ ⵉⵥⴻⵄⴼⴻⵏ,
ⵓ ⵎⴰ ⵡⴰⵔ ⴷⴷ-ⵜⵜⴼⴰⵇⴰⵏ ⵛⴰ ⵉⵏⵏⵉ ⵛⴻⴽ ⵖⴰ ⵢⴰⵔⵔⴻⵏ ⵜᵉⵜⵜⴰⵔⵊⵉⵊⴻⴷ,
ⵓ ⵎⴰ ⵡⴰⵔ ⴷ ⴰⵙⴻⵏ ⵜᵉⵜⵜⵉⵍⵉⴷ ⴷ ⵜⴰⴽⴻⵛⵛⴰⴹⵜ ⵏⵙⴻⵏ?
8 ⵎⴰⵖⴰⵔ ⵛⴻⴽ ⵜⴽⴻⵛⵛⴹⴻⴷ ⴰⵟⵟⴰⵙ ⵏ ⵍⴻⴳⵏⵓⵙ,
ⴰⴷ ⵛⴻⴽ ⴽⴻⵛⵛⴹⴻⵏ ⵎⴰⵔⵔⴰ ⵍⴻⴳⵏⵓⵙ ⵉⵇⵇⵉⵎⴻⵏ
ⴷⵉ ⵙⵙⵉⴱⴱⴻⵜ ⵏ ⵉⴷⴰⵎⵎⴻⵏ ⵏ ⵉⵡⴷⴰⵏ ⴷ ⵍⵄⵓⵏⴼ ⵅ ⵜⴻⵎⵎⵓⵔⵜ,
ⵓ ⵅ ⵜⴻⵏⴷⵉⵏⵜ ⵓ ⵅ ⵎⴰⵔⵔⴰ ⵉⵏⵏⵉ ⴷⴰⵢⴻⵙ ⵉⵥⴻⴷⴷⵖⴻⵏ.
9 ⵓⵛⵜ ⵅ ⵡⴻⵏⵏⵉ ⵉⴽⴻⵙⵙⴱⴻⵏ ⵙ ⵍⵖⴻⵛⵛ ⵜⴰⴽⴻⵛⵛⴰⴹⵜ ⵉ ⵜⴰⴷⴷⴰⵔⵜ ⵏⵏⴻⵙ,
ⵎⴰⵃⴻⵏⴷ ⴰⴷ ⵉⴱⵏⴰ ⵍⵄⵓⵛⵛ ⵏⵏⴻⵙ ⴷⵉ ⵍⵓⵄⵍⴰ,
ⵃⵉⵎⴰ ⴰⴷ ⵉⵏⵊⴻⵎ ⴰⵎⵎⵓ ⵥⴻⴳ ⵓⴼⵓⵙ ⵏ ⵍⵖⴰⵔ.
10 ⵛⴻⴽ ⵜⵛⴰⵡⴰⵔⴻⴷ ⵍⴻⴼⴹⵉⵃⴻⵜ ⵉ ⵜⴰⴷⴷⴰⵔⵜ ⵏⵏⴻⴽ,
ⵃⵉⵎⴰ ⴰⴷ ⵜⴻⵇⴹⵉⴷ ⵅ ⵍⴻⴳⵏⵓⵙ,
ⵓⵛⴰ ⴰⵎⵎⵓ ⵉ ⵜⴻⴳⴳⵉⴷ ⴷⴷⴻⵏⴱ ⴷⵉ ⵍⴻⵄⵎⴰⵔ ⵏⵏⴻⴽ.
11 ⵎⵉⵏⵥⵉ ⴰⵥⵔⵓ ⵉⵙⵖⵓⵢⵢⵓ-ⴷⴷ ⵥⵉ ⵍⵃⵉⴹ,
ⵓ ⵜⴰⵃⵏⴰⵛⵜ ⵜᵉⵜⵜⴰⵔⵔⴰ-ⴷⴷ ⵅⴰⵙ ⵥⵉ ⵊⴰⵔ ⵜⴻⴼⵔⴰⵡⵜ.
12 ⵓⵛⵜ ⵅ ⵡⴻⵏⵏⵉ ⵉⴱⴻⵏⵏⴰⵏ ⵉⵛⵜ ⵏ ⵜⴻⵏⴷⵉⵏⵜ ⵙ ⵉⴷⴰⵎⵎⴻⵏ
ⵓⵍⴰ ⵅ ⵡⴻⵏⵏⵉ ⵉⵙⵙⵔⵓⵙⴰⵏ ⴷⵙⴰⵙ ⵏ ⵢⵉⵛⵜ ⵏ ⵜⴻⵏⴷⵉⵏⵜ ⵙ ⵍⵖⴻⵛⵛ!
13 ⵅⵥⴰⵔ, ⵎⴰ ⵡⴰⵔ ⵉⴵⵉ ⵥⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,
ⴰⵇⴰ ⵍⴻⴳⵏⵓⵙ ⴰⵔⴻⴱⴱⵔⴻⵏ ⵉⵅⴻⴼ ⵏⵙⴻⵏ ⵉ ⵜⵎⴻⵙⵙⵉ,
ⵓ ⵛⵛⵓⵄⵓⴱ ⵜⵜⴰⵃⵍⴻⵏ ⵉ ⵡⴰⵍⵓ?
14 ⵎⴰⵖⴰⵔ ⵜⴰⵎⵎⵓⵔⵜ ⴰⴷ ⵜᵉⵜⵜⵡⴰⵛⵛⵓⵔ
ⵙ ⵜⵓⵙⵙⵏⴰ ⵏ ⵓⵄⵓⴵⵉ ⵏ ⵙⵉⴷⵉ,
ⴰⵎ ⵎⴰⵎⵎⴻⵛ ⵜⵜⴷⴰⵍⴻⵏ ⵡⴰⵎⴰⵏ ⵍⴻⴱⵃⴰⵔ.
15 ⵓⵛⵜ ⵅ ⵡⴻⵏⵏⵉ ⵉⵙⵙⴻⵙⵙⴻⵏ ⴰⵎⵇⴰⵔⵔⴻⴱ ⵏⵏⴻⵙ,
ⵡⴻⵏⵏⵉ ⵉⵅⴻⴵⴹⴻⵏ ⴱⵉⵏⵓ ⵙ ⵙⵙⴻⵎ ⵏⵏⴻⴽ ⵓ ⵅⴻⵏⵏⵉ ⵉⵙⵙⵛⴰⵔ ⵉ-ⵜ,
ⵎⴰⵃⴻⵏⴷ ⴰⴷ ⵉⵥⴰⵔ ⵜⵓⵄⵄⴰⵔⵢⴰⵏⵜ ⵏⵙⴻⵏ.
16 ⴰⴷ ⵜⴻⵙⵙⵢⵉⵡⵏⴻⴷ ⵉⵅⴻⴼ ⵏⵏⴻⴽ ⵙ ⵍⴻⴼⴹⵉⵃⴻⵜ ⴷⴻⴳ ⵡⴻⵎⵛⴰⵏ ⵏ ⵛⵛⴰⵏ.
ⵙⵓ ⵛⴻⴽ ⵍⴻⵅⵅⵓ ⵄⴰⵡⴻⴷ, ⵓⵛⴰ ⴻⵊⵊ ⴰⵅⵜⴰⵏ ⵏⵏⴻⴽ ⵡⴰⵔ ⵉⴵⵉⵏ ⵉⵜⵜⴱⴰⵏ.
ⵍⴽⴰⵙ ⵥⴻⴳ ⵓⴼⵓⵙ ⴰⴼⵓⵙⵉ ⵏ ⵙⵉⴷⵉ ⴰⴷ ⵖⴰⵔⴻⴽ ⴷⴷ-ⵢⴰⵙ,
ⵓⵍⴰ ⴷ ⵍⴻⴼⴷⵉⵃⴻⵜ ⵅ ⵓⵄⵓⴵⵉ ⵏⵏⴻⴽ.
17 ⵎⴰⵖⴰⵔ ⵍⵄⵓⵏⴼ ⵉ ⵜⴻⴳⴳⵉⴷ ⴹⵉⴷⴷ ⵉ ⵍⵓⴱⵏⴰⵏ ⴰⴷ ⵛⴻⴽ ⵉⴷⴻⵍ
ⵓⵍⴰ ⴷ ⴰⵔⴻⴷⴷⴻⴵ ⵏ ⵍⵎⴰⵍ ⵉ ⵥⵉ ⵜⴻⵏ ⵜⴻⵙⵙⵉⴳⴳⵯⴷⴻⴷ,
ⴷⵉ ⵙⵙⵉⴱⴱⴻⵜ ⵏ ⵉⴷⴰⵎⵎⴻⵏ ⵏ ⵉⵡⴷⴰⵏ ⴷ ⵍⵄⵓⵏⴼ ⵅ ⵜⴻⵎⵎⵓⵔⵜ,
ⵓ ⵅ ⵜⴻⵏⴷⵉⵏⵜ ⵓ ⵅ ⵎⴰⵔⵔⴰ ⵉⵏⵏⵉ ⴷⴰⵢⴻⵙ ⵉⵥⴻⴷⴷⵖⴻⵏ.
ⴳⴳⵯⴻⴷⴻⵎ ⵙⵉⴷⵉ, ⵡⴰⵔ ⵉⴵⵉ ⵍⴰⵚⵏⴰⵎ ⵉⵎⴻⵜⵜⴰⵏ
18 ⵎⴰ ⵜⵉⵥⵉ ⵏ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ,
ⵓⵎⵉ ⵜ ⵉⵏⵇⴻⵛ ⵓⵏⴻⵇⵇⴰⵛ ⵙ ⵢⵉⵅⴻⴼ ⵏⵏⴻⵙ,
ⵎⴰⵏ ⵜⵉⵥⵉ ⵏ ⵢⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ ⵓ ⵏ ⵉⵊⵊ ⵏ ⵓⵎⵙⴻⵍⵎⴻⴷ ⵏ ⵉⵅⴰⵔⵔⵉⵇⴻⵏ,
ⵍⴰⵎⵉ ⵡⴻⵏⵏⵉ ⵜ ⵉⴳⴳⵉⵏ ⵉⵜⵜⵛⴻⵍ ⵅ ⵎⵉⵏ ⵉⴳⴳⴰ,
ⵓⵎⵉ ⵉⵜⵜⴻⴳⴳ ⵍ’ⴰⵚⵏⴰⵎ ⵉⴳⴻⵏⵡⴻⵏ?
19 ⵓⵛⵜ ⵅ ⵡⴻⵏⵏⵉ ⵉⵇⵇⴰⵔⴻⵏ ⵉ ⵓⴽⴻⵛⵛⵓⴹ ‘ⴼⴰⵇ!’
ⵓ ⵉ ⵡⴻⵥⵔⵓ ⵉⴳⴻⵏⵡⴻⵏ ‘ⴽⴽⴰⵔ!’.
ⵎⴰ ⵉⵥⴻⵎⵎⴰⵔ ⴰⴷ ⵉⵙⵙⴻⵍⵎⴻⴷ?
ⵅⵥⴰⵔ, ⴰⵇⴰ ⵉⵜⵜⵡⴰⵍⴻⵃⵃⴻⴼ ⵙ ⵡⵓⵔⴻⵖ ⴷ ⵏⵏⵓⵇⴰⵔⵜ
ⵓ ⵡⴰⵔ ⴷⴰⵢⴻⵙ ⵇⴰⵄ ⴱⵓ ⴱⵓⵃⴱⴻⵍ.
20 ⵙⵉⴷⵉ ⴰⵇⴰ-ⵜ ⴷⵉ ⵣⵥⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ.
ⵙⵓⵙⴻⵎ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ, ⵎⴰⵔⵔⴰ ⵜⴰⵎⵎⵓⵔⵜ!