1 “ⵓⵎⵉ ⵉⵙⵙⵉⵡⴻⵍ ⵉⴼⵔⴰⵢⵉⵎ, ⴰⵇⴰ ⴷⵉⵏ ⵜⴰⵔⵊⵉⵊⴻⵜ ⵙ ⵓⵡⴻⵇⵇⴰⵔ. ⵏⴻⵜⵜⴰ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⴷⵉ ⵉⵙⵔⴰⵉⵍ ⵓⵛⴰ ⵉⴷⵡⴻⵍ ⴷ ⴰⵎⴻⴷⵏⵓⴱ ⵥⵉ ⵙⵙⵉⴱⴱⴻⵜ ⵏ ⴱⴰⵄⵍ ⵓ ⵅⴻⵏⵏⵉ ⵉⵎⵎⵓⵜ. 2 ⵍⴻⵅⵅⵓ ⴰⵔⵏⵉⵏ ⵜⵜⴻⴳⴳⴻⵏ ⴷⴷⵏⵓⴱ ⵓ ⴳⴳⵉⵏ ⵙ ⵏⵏⵓⵇⴰⵔⵜ ⵏⵙⴻⵏ ⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ, ⵍⴻⵅⵢⴰⵍⴰⵜ ⵏ ⵚⵚⴰⵏⴰⵎ ⵄⵍⴰⵃⵙⴰⴱ ⵍⴻⵄⵇⴻⵍ ⵏⵙⴻⵏ. ⴰⵇⴰ ⴰⵜⴻⵏ ⵎⴰⵔⵔⴰ ⵎⵖⵉⵔ ⵍⵅⴻⴷⵎⴻⵜ ⵏ ⵓⵎⵥⵉⵍ. ⵏⵉⵜⵏⵉ ⵇⵇⴰⵔⴻⵏ ⵅⴰⵙⴻⵏ: ‘ⴻⵊⵊ ⵉⵡⴷⴰⵏ ⵉⵏⵏⵉ ⵉ ⵖⴰ ⵉⵡⴻⵀⵀⴱⴻⵏ ⵜⵉⵖⴰⵔⵚⴰ ⴰⴷ ⵙⵙⵓⴷⵓⵎⴻⵏ ⵉⵢⴻⵏⴷⵓⵥⴻⵏ!’ ^■   3 ⵙ ⵓⵢⴻⵏⵏⵉ ⴰⴷ ⴷⴻⵡⵍⴻⵏ ⴰⵎ ⵢⵉⵊⵊ ⵏ ⵓⵙⴻⵢⵏⵓ ⵏ ⵚⵚⴱⴻⵃ ⵓ ⴰⵎ ⵏⵏⴷⴰ ⵖⴰⵔ ⵜⵓⴼⴼⵓⵜ ⵏⵏⵉ ⴷⴻⵖⵢⴰ ⵉⵄⴻⴷⴷⵓⵏ, ⴰⵎ ⵓⵍⵓⵎ ⵉⵟⵟⴰⵡⴻⵏ ⵥⴻⴳ ⵓⵏⴻⴷⵔⴰⵔ ⵓ ⴰⵎ ⴷⴷⴻⵅⵅⴰⵏ ⵉⵜⵜⴻⴼⴼⵖⴻⵏ ⵥⵉ ⵜⴱⵓⵔⵊⴻⵜ.

4 ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵥⴻⴳ ⵡⴰⵎⵉ ⴷⴷ-ⵜⴻⴼⴼⵖⴻⵎ ⴽⴻⵏⵏⵉⵡ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. ⵛⴻⴽ ⵡⴰⵔ ⵜᵉⵜⵜⴻⵙⵙⵏⴻⴷ ⴱⵓ ⴰⵔⴻⴱⴱⵉ ⵏⵏⴻⵖⵏⵉ ⵎⵖⵉⵔ ⵏⴻⵛⵛ ⵓ ⵡⴰⵔ ⴷⵉⵏ ⴰⵎⵙⴻⵏⵊⴻⵎ ⵎⵖⵉⵔ ⵏⴻⵛⵛ. ^■   5 ⵏⴻⵛⵛ ⵙⵙⵏⴻⵖ ⵛⴻⴽ ⴷⵉ ⵍⴻⵅⵍⴰ, ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵏ ⵍⴻⵃⵎⵓ ⵢⴰⵔⴻⵇⵇⴻⵏ. 6 ⴰⵍⴰⵎⵉ ⵉⵡⴹⴻⵏ ⵖⴰⵔ ⴷⴷⴻⵎⵏⴻⵜ ⵏ ⵀⴻⴷⴷⵓ ⵏⵙⴻⵏ, ⴷⴻⵡⵍⴻⵏ ⵊⵊⵉⵡⵏⴻⵏ. ⴰⵍⴰⵎⵉ ⵊⵊⵉⵡⵏⴻⵏ, ⵉⵏⵏⵓⵔⴼⴻⵄ ⵡⵓⵍ ⵏⵙⴻⵏ. ⵙ ⵓⵢⴻⵏⵏⵉ ⵜⵜⵓⵏ ⴰⵢⵉ. ^■   7 ⵙ ⵓⵢⴻⵏⵏⵉ ⵏⴻⵛⵛ ⴷⴻⵡⵍⴻⵖ ⵉ ⵏⵉⵜⵏⵉ ⴰⵎ ⵡⴻⵢⵔⴰⴷ ⵉⵥⴻⵀⵀⴰⵔⴻⵏ, ⴰⵎ ⵓⵖⵉⵍⴰⵙ ⵍⴻⴱⵜⴻⵖ ⴷⴻⴳ ⵡⴻⴱⵔⵉⴷ. 8 ⵏⴻⵛⵛ ⵓⵙⵉⵖ-ⴷⴷ ⵖⴰⵔⵙⴻⵏ ⴰⵎ ⵢⵉⵊⵊ ⵏ ⴷⴷⵓⴱ ⵡⴻⵏⵏⵉ ⵓⵎⵉ ⵓⵛⴰⵔⴻⵏ ⵜⴰⵔⵡⴰ ⵏⵏⴻⵙ ⵓ ⴰⵍⵥⴻⵖ ⵉⴷⵎⴰⵔⴻⵏ ⵏⵙⴻⵏ ⵓ ⵚⴰⵔⴹⴻⵖ ⵜⴻⵏ ⴷⵉⵏ ⴰⵎ ⵜⵉⵥⴻⵎⵜ. ⵍⴻⵡⵃⵓⵛ ⵏ ⵍⴻⵅⵍⴰ ⵎⴻⵥⵥⵇⴻⵏ ⵜⴻⵏ. ^□  

9 ⵎⴰⵏ ⴰⵢⴰ ⵉⴷⵡⴻⵍ ⴷ ⴰⴽⴻⵃⵃⴻⴹ ⵏⵏⴻⴽ, ⴰ ⵉⵙⵔⴰⵉⵍ, ⴰⵇⴰ ⵜⵄⴻⴽⴽⵙⴻⴷ ⴰⵢⵉ, ⴹⵉⴷⴷ ⵉ ⵡⴻⵏⵏⵉ ⵉⴵⴰⵏ ⴷ ⴰⵎⵄⴰⵡⴻⵏ ⵏⵏⴻⴽ.

10 ⵎⴰⵏⵉ ⵉⴵⴰ ⵅⴻⵏⵏⵉ ⵓⵊⴻⴵⵉⴷ ⵏⵏⴻⴽ? ⴷ ⵡⴻⵏⵏⵉ ⵉⵥⴻⵎⵎⴰⵔⴻⵏ ⴰⴷ ⵛⴻⴽ ⵉⵙⵙⴻⵏⵊⴻⵎ ⴷⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵏⵏⴻⴽ! ⵓ ⵎⴰⵏⵉ ⴵⴰⵏ ⵍⵇⵓⴹⴰⵜ ⵏⵏⴻⴽ ⵓⵎⵉ ⵜⴻⵏⵏⵉⴷ: ‘ⴻⵡⵛ ⴰⵢⵉ ⵉⵊⵊ ⵏ ⵓⵊⴻⴵⵉⴷ ⵓⵍⴰ ⴷ ⵍⵃⵓⴽⴽⴰⵎ?’

11 ⵙ ⵡⴻⵖⴹⴰⴱ ⵉⵏⵓ ⵡⵛⵉⵖ ⴰⵛ ⵉⵊⵊ ⵏ ⵓⵊⴻⴵⵉⴷ ⵓ ⵙ ⵓⴷⵓⵇⵇⴻⵥ ⵉⵏⵓ ⵏ ⵡⴻⵖⴹⴰⴱ ⴽⴽⵙⴻⵖ ⴰⵛ ⵜ. ^■  

12 ⵍⵎⵓⵄⵚⵉⵢⵢⴻⵜ ⵏ ⵉⴼⵔⴰⵢⵉⵎ ⵜᵉⵜⵜⵡⴰⵇⴻⴱⴱⴻⴹ, ⴷⴷⵏⵓⴱ ⵏⵏⴻⵙ ⵏⵓⴼⴼⴰⵔⴻⵏ.

13 ⵍⴻⵃⵔⵉⵇ ⵏ ⵜⴰⵔⵡⴰ ⴰⴷ ⵖⴰⵔⴻⵙ ⴷⴷ-ⵢⴰⵙ. ⵏⴻⵜⵜⴰ ⴷ ⵉⵊⵊ ⵏ ⵎⵎⵉⵙ ⵉⵇⵇⵉⵎ ⴱⵍⴰ ⵜⵉⵖⵉⵜ, ⵎⴰⵖⴰⵔ ⵅⵎⵉ ⴰⵔⴻⵥⵥⵎⴻⵏ ⵉⵃⴻⵏⵊⵉⵔⴻⵏ ⵍⴻⵎⵍⴰⵡⵍⴻⵜ ⵃⵉⵎⴰ ⴰⴷ ⴼⴼⵖⴻⵏ, ⴰⵇⴰ ⵏⴻⵜⵜⴰ ⵡⴰⵔ ⴷⵉⵏ ⵉⴱⴻⴷⴷ ⴷⵉ ⵍⵡⴻⵇⵜ ⵏⵏⴻⵙ.

14 ⵣⴻⴳ ⵓⴼⵓⵙ ⵏ ⵍⴰⵅⴰⵔⵜ ⴰⴷ ⵜⴻⵏ ⴼⴷⵉⵖ, ⴰⴷ ⵜⴻⵏ ⴼⴻⴽⴽⴻⵖ ⵥⵉ ⵍⵎⴻⵡⵜ. ⴰ ⵍⵎⴻⵡⵜ, ⵎⴰⵏⵉ ⴵⴰⵏ ⵍⴻⵃⵍⴰⵛⴰⵜ ⵏ ⵟⵟⴰⵄⵓⵏ ⵏⵏⴻⵎ, ⴰ ⵍⴰⵅⴰⵔⵜ, ⵎⴰⵏⵉ ⵜⴻⴵⴰ ⵜⴰⵔⵚⵓⴹⵉ ⵏⵏⴻⵎ? ⵎⴰ ⴰⴷ ⵏⴻⴷⵎⴻⵖ ⵄⴰⴷ? ⵍⵍⴰ, ⴰⵢⴰ ⵉⵏⵓⴼⴼⴰⵔ ⵥⵥⴰⵜ ⵉ ⵜⵉⵟⵟⴰⵡⵉⵏ ⵉⵏⵓ. ^■  

15 ⵡⴰⵅⵅⴰ ⴳⴳⵓⵔ ⵉⴼⵔⴰⵢⵉⵎ ⴰⴷ ⵉⵡⵛ ⵍⵖⵉⴵⴻⵜ ⵊⴰⵔ ⴰⵢⵜⵎⴰⵙ, ⵄⴰⴷ ⴰⴷ ⴷⴷ-ⵢⴰⵙ ⵉⵊⵊ ⵏ ⵓⵙⴻⵎⵎⵉⴹ ⵥⵉ ⵛⵛⴰⵔⵇ, ⵉⵊⵊ ⵏ ⵓⵙⴻⵎⵎⵉⴹ ⵏ ⵙⵉⴷⵉ ⵏⵏⵉ ⵉ-ⴷⴷ ⵉ ⵖⴰ ⵉⴽⴽⴰⵔⴻⵏ, - ⵜⴰⵍⴰ ⵏⵏⴻⵙ ⴳⴳⵓⵔ ⴰⴷ ⵜⴰⵥⴻⵖ, ⴰⵏⵓ ⵏⵏⴻⵙ ⴳⴳⵓⵔ ⴰⴷ ⵉⵡⴹⴰ - , ⴳⴳⵓⵔ ⴰⴷ ⵉⴽⴻⵛⵛⴻⴹ ⵉⵛⵜ ⵏ ⵜⵅⴰⴱⴻⵛⵜ ⵥⵉ ⵎⴽⵓⵍ ⵍⴻⵇⵛⵓⵄ ⵉⵖⵍⴰⵏ.”