ⵉⴼⵔⴰⵢⵉⵎ ⵡⴰⵔ ⵉⵅⵙ ⴰⴷ ⵉⵜⵓⴱ
7
1 “ⴰⵎ ⵙⵙⴳⴻⵏⴼⵉⵖ ⵉⵙⵔⴰⵉⵍ, ⵜᵉⵜⵜⵡⴰⵄⴰⵔⵔ ⵍⵎⵓⵄⵚⵉⵢⵢⴻⵜ ⵏ ⵉⴼⵔⴰⵢⵉⵎ ⴷ ⵜⵓⵄⴻⴼⴼⵏⴰ ⵏ ⵙⴰⵎⴰⵔⵢⴰ, ⵎⴰⵖⴰⵔ ⵏⵉⵜⵏⵉ ⵜⵜⴻⴳⴳⴻⵏ ⵙ ⵍⵖⴻⵛⵛ ⵓⵛⴰ ⴰⵛⴻⴼⴼⴰⵔ ⵉⵜⵜⴰⴷⴻⴼ ⵓ ⵉⵛⵜ ⵏ ⴱⴰⵏⴷⵉⵢⵢⴰ ⵜᵉⵜⵜⴽⴻⵛⵛⴰⴹ ⴷⵉ ⴱⴰⵔⵔⴰ. 2 ⵡⴰⵔ ⵇⵇⴰⵔⴻⵏ ⵄⴻⵎⵎⴰⵔⵚ ⴷⴻⴳ ⵡⵓⵍ ⵏⵙⴻⵏ ⴰⵇⴰ ⵏⴻⵛⵛ ⴰⴷ ⵅⴰⵔⵔⵚⴻⵖ ⴷⵉ ⵎⴰⵔⵔⴰ ⵍⵖⴰⵔ ⵏⵙⴻⵏ. ⵅⴻⵏⵏⵉ ⵍⴻⵅⵅⵓ, ⵜⴻⵏⵏⴻⴹ ⴰⵙⴻⵏ ⵜⵎⴻⴳⴳⴰ ⵏⵙⴻⵏ, ⴰⵇⴰ ⴰⵜⴻⵏⵜ ⵥⵥⴰⵜ ⵉ ⵡⵓⴷⴻⵎ ⵉⵏⵓ. 3 ⵏⵉⵜⵏⵉ ⵙⵙⴼⵔⴰⵃⴻⵏ ⴰⵊⴻⴵⵉⴷ ⵙ ⵍⵖⴰⵔ ⵏⵙⴻⵏ ⵓ ⵍⵃⵓⴽⴽⴰⵎ ⵙⵙⴼⵔⴰⵃⴻⵏ ⵜⴻⵏ ⵙ ⵉⵅⴰⵔⵔⵉⵇⴻⵏ ⵏⵙⴻⵏ. 4 ⵏⵉⵜⵏⵉ ⵎⴰⵔⵔⴰ ⴷ ⵉⵎⵥⴻⵏⵏⴰⵢⴻⵏ, ⴰⵇⴰ ⴰⵜⴻⵏ ⴰⵎ ⵢⵉⵊⵊ ⵏ ⵓⴼⴰⵔⵔⴰⵏ ⵏⵏⵉ ⵉⵜⵜⵡⴰⵙⴻⵃⵎⴰⵏ ⵥⴻⴳ ⵓⵅⴻⴱⴱⴰⵥ. ⵡⴰⵏⵉⵜⴰ ⴰⴷ ⵉⵙⵙⴱⴻⴷⴷ ⵥⴻⴳ ⵓⵛⴻⵎⵎⵓⴹ ⵅⵎⵉ ⴰⵔⴻⵛⵜⵉ ⵏⵏⵉ ⵉⴳⴳⵯⴰ ⴰⵇⴰ ⵉⵙⵎⴻⵎ ⵇⴰⵄ. 5 ⴷⴻⴳ ⵡⴰⵙⵙ ⵏ ⵓⵊⴻⴵⵉⴷ ⵏⵏⴻⵖ ⵙⵙⵀⴻⵍⵛⴻⵏ ⵜ ⵍⵃⵓⴽⴽⴰⵎ ⵙ ⵍⵃⴰⴷⵓⵇ ⵏ ⴱⵉⵏⵓ. ⵏⴻⵜⵜⴰ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵉ ⵢⵉⵎⴻⵙⵜⴻⵀⵥⴰⵢⴻⵏ.
6 ⵅⵎⵉ ⴷⴷ-ⵜⵜⵇⴰⵔⵔⴰⴱⴻⵏ, ⵢⴰⵔⴻⵇⵇ ⵓⵍ ⵏⵙⴻⵏ ⴰⵎ ⵢⵉⵊⵊ ⵏ ⵓⴼⴰⵔⵔⴰⵏ ⵥⵉ ⵜⵃⵔⴰⵢⵎⴻⵛⵜ ⵏⵙⴻⵏ. ⵉⵜⵜⴻⵟⵟⴻⵚ ⵓⵅⴻⴱⴱⴰⵥ ⵏⵙⴻⵏ ⴵⵉⵍⴻⵜ ⵜⴻⴽⵎⴻⵍ. Ƴⴰⵔ ⵚⵚⴱⴻⵃ ⵢⴰⵔⴻⵇⵇ ⵓⴼⴰⵔⵔⴰⵏ ⴰⵎ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ. 7 ⵏⵉⵜⵏⵉ ⵎⴰⵔⵔⴰ ⵃⴻⵎⵎⴰⵏ ⴰⵎ ⵢⵉⵊⵊ ⵏ ⵓⴼⴰⵔⵔⴰⵏ ⵓ ⵏⵉⵜⵏⵉ ⵜⵜᵉⵜⵜⴻⵏ ⵍⵇⵓⴹⴰⵜ ⵏⵙⴻⵏ. ⵎⴰⵔⵔⴰ ⵉⵊⴻⴵⵉⴷⴻⵏ ⵏⵙⴻⵏ ⴰⴷ ⵡⴹⴰⵏ, ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵊⴰⵔ ⴰⵙⴻⵏ ⵉ ⴷⴷ ⵅⴰⴼⵉ ⵖⴰ ⵉⵍⴰⵖⴰⵏ.
8 ⵉⴼⵔⴰⵢⵉⵎ ⵉⵊⵊⴰ ⵉⵅⴻⴼ ⵏⵏⴻⵙ ⵉⵙⵙⵓⵔ ⵊⴰⵔ ⵍⴻⴳⵏⵓⵙ, ⵉⴼⵔⴰⵢⵉⵎ ⴷ ⵉⵛⵜ ⵏ ⵜⴻⴼⴹⵉⵍⵜ ⵡⴰⵔ ⵜᵉⵜⵜⵡⴰⵙⵏⴻⵇⵍⴻⴱ ⵛⴰ. ■ 9 ⵉⴱⴰⵔⵔⴰⵏⵉⵢⵢⴻⵏ ⵙⴰⵔⴹⴻⵏ ⵊⵊⴻⵀⴷ ⵏⵏⴻⵙ, ⵡⴰⵔ ⴰⴽⵉⴷⴻⵙ ⵉⵜⵜⵉⵛⵉ. ⵓⵍⴰ ⴷ ⴰⵛⴻⵡⵡⴰⴼ ⵏⵏⴻⵙ ⵉⵜⵜⵛⴰⴱ, ⵡⴰⵔ ⴰⴽⵉⴷⴻⵙ ⵉⵜⵜⵉⵛⵉ.
10 ⴰⵄⴻⴼⴼⴰⵔ ⵏ ⵉⵙⵔⴰⵉⵍ ⴰⴷ ⵅⴰⵙ ⵉⴷⵄⴰ, ⵎⴰⵖⴰⵔ ⵏⵉⵜⵏⵉ ⵡⴰⵔ ⴷⴷⵉⴽⴽⵡⵉⵍⴻⵏ ⵛⴰ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ, ⵓ ⵡⴰⵔ ⵜ ⴰⵔⵥⵓⵏ ⵛⴰ ⴷⵉ ⵎⴰⵔⵔⴰ ⵎⴰⵏ ⴰⵢⴰ. ■
11 ⵉⴼⵔⴰⵢⵉⵎ ⵉⴳⴳⴰ ⴰⵎ ⵉⵛⵜ ⵏ ⵜⴻⴷⴱⵉⵔⵜ ⵡⴰⵔ ⴷⴰⵢⴻⵙ ⵍⴻⴼⵀⴰⵎⴻⵜ. ⵏⵉⵜⵏⵉ ⵜⵜⵍⴰⵖⴰⵏ ⵅ ⵎⵉⵚⵔⴰ, ⴳⴳⵓⵔⴻⵏ ⵖⴰⵔ ⴰⵛⵛⵓⵔ.
12 ⵅⵎⵉ ⴳⴳⵓⵔⴻⵏ ⵏⵉⵜⵏⵉ, ⵜⵜⴱⴻⵥⵥⴰⵄⴻⵖ ⵏⴻⵛⵛ ⵜⵔⴰⵛⵛⴰ ⵉⵏⵓ ⵅⴰⵙⴻⵏ, ⴰⴷ ⵜⴻⵏ ⴷⴷ-ⵙⵙⴻⵀⵡⵉⵖ ⴰⵎ ⵉⵊⴹⴰⴹ ⵏ ⵓⵊⴻⵏⵏⴰ, ⴰⴷ ⵜⴻⵏ ⵡⴻⴱⴱⵅⴻⵖ ⵅ ⵓⵙⴻⵍ ⴷⵉ ⵜⵎⴻⵙⵎⵓⵏⵜ ⵏⵙⴻⵏ.
13 ⵓⵛⵜ ⵅⴰⵙⴻⵏ ⵎⴰⵖⴰⵔ ⵏⵉⵜⵏⵉ ⴰⵔⴻⵡⵍⴻⵏ ⵥⵥⴰⵢⵉ. ⴰⴽⴻⵃⵃⴻⴹ ⵅⴰⵙⴻⵏ, ⵎⴰⵖⴰⵔ ⵏⵉⵜⵏⵉ ⵄⴻⴷⴷⴰⵏ ⵅⴰⴼⵉ. ⵏⴻⵛⵛ ⴳⴳⵉⵖ ⴰⴷ ⵜⴻⵏ ⴼⴷⵉⵖ, ⵎⴰⵛⴰ ⵏⵉⵜⵏⵉ ⵏⵏⴰⵏ ⵅⴰⴼⵉ ⵉⵅⴰⵔⵔⵉⵇⴻⵏ.
14 ⵏⵉⵜⵏⵉ ⵡⴰⵔ ⴷⴷ-ⵙⵖⵓⵢⵢⴻⵏ ⵛⴰ ⵖⴰⵔⵉ ⵙ ⵡⵓⵍ ⵏⵙⴻⵏ, ⵅⵎⵉ ⵟⵟⵚⴻⵏ ⵏⵉⵜⵏⵉ ⵅ ⵔⴻⵛⵜⵓ ⵏⵙⴻⵏ ⵜⵜⵛⴻⵜⵛⴰⵏ. ⵏⵉⵜⵏⵉ ⵜⵜⵎⵓⵏⴰⵏ ⴷⵉ ⵟⵟⵡⴻⵄ ⵏ ⵉⵎⴻⵏⴷⵉ ⴷ ⴱⵉⵏⵓ ⵏ ⵊⴷⵉⴷ, ⴰⵇⴰ ⵜⵜⵖⴻⵏⵏⴰⵏ ⵅⴰⴼⵉ.
15 ⵏⴻⵛⵛ ⴷⴰⵔⵔⴱⴻⵖ ⵓ ⵙⵙⵊⴻⵀⴷⴻⵖ ⵉⵖⴰⴵⴻⵏ ⵏⵙⴻⵏ, ⵎⴰⵛⴰ ⵏⵉⵜⵏⵉ ⵜⵜⵅⴰⵔⵔⴰⵚⴻⵏ ⴷⴰⵢⵉ ⴷⵉ ⵍⵖⴰⵔ.
16 ⵏⵉⵜⵏⵉ ⵜⵜⵄⴰⵇⵇⴰⴱⴻⵏ, ⵎⴰⵛⴰ ⵡⴰⵔ ⵉⴵⵉ ⵖⴰⵔ ⵓⵎⵄⵓⴵⵉ ⵅ ⴽⵓⵍⵛⵉ. ⴰⵇⴰ ⴰⵜⴻⵏ ⴰⵎ ⵢⵉⵊⵊ ⵏ ⵍⵇⴻⵡⵙ ⵉⵅⴻⵟⵟⴰⵏ, ⵍⵃⵓⴽⴽⴰⵎ ⵏⵙⴻⵏ ⵡⴻⵟⵟⴰⵏ ⵥⵉ ⵙⵙⵉⴼ, ⵥⵉ ⵙⴻⵎⵎ ⵉⵏⴻⵇⵇⴻⵏ ⵏ ⵢⵉⵍⴻⵙ ⵏⵙⴻⵏ. ⵙ ⵓⵢⴻⵏⵏⵉ ⴰⴷ ⵅⴰⵙⴻⵏ ⴳⴳⴻⵏ ⵜⵉⴹⴻⵃⵃⴰⵛ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ.” ■