ⵍⵃⵓⴽⵎ ⵅ ⵎⵉⵚⵔⴰ
30
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⴱ ⵓⵛⴰ ⵉⵏⵉ: ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
ⵔⵓⵎ! ⴰⵢⵢⴻⵀⵀⴰⵜ ⵅ ⵡⴰⵙⵙ ⵏⵏⵉ!
3 ⵎⵉⵏⵥⵉ ⵢⵓⴷⴻⵙ ⵉ ⵢⴻⴵⴰ ⵡⴰⵙⵙ ⵏⵏⵉ, ⵢⵓⴷⴻⵙ ⵉ ⵢⴻⴵⴰ ⵡⴰⵙⵙ ⵏ ⵙⵉⴷⵉ,
ⴰⵙⵙ ⵏ ⵉⵙⴻⵢⵏⵓⵜⴻⵏ.
ⴰⴷ ⵢⵉⵍⵉ ⴷ ⵍⵡⴻⵇⵜ ⵏ ⵍⴻⴳⵏⵓⵙ.
4 ⴰⴷ ⴷⴷ-ⵢⴰⵙ ⵙⵙⵉⴼ ⴷⵉ ⵎⵉⵚⵔⴰ
ⵓⵛⴰ ⴰⴷ ⵢⵉⵍⵉ ⵡⴰⵔⵊⴻⴼ ⴰⵎⴻⵇⵇⵔⴰⵏ ⴷⵉ ⵜⴻⵎⵎⵓⵔⵜ ⵏ ⴽⵓⵛ
ⵅⵎⵉ ⵉ ⵖⴰ ⵡⴹⴰⵏ ⵉⵏⵏⵉ ⵉⵜⵜⵡⴰⵙⵏⵓⵇⵇⴱⴻⵏ ⴷⵉ ⵎⵉⵚⵔⴰ,
ⵎⵉⵏⵥⵉ ⴰⴷ ⴰⵡⵢⴻⵏ ⴰⴼⴻⵢⵢⴻⴹ ⵏ ⵡⴰⴳⵍⴰ ⵏⵏⴻⵙ,
ⴰⴷ ⴰⵔⴻⴷⴷⴵⴻⵏ ⴷⵙⵓⵙⴰ ⵏⵏⴻⵙ.
5 ⴽⵓⵛ ⴷ ⴼⵓⵟ ⴷ ⵍⵓⴷ ⴷ ⵄⵍⴰⵎ ⴽⵓⵍ ⵉⴱⴰⵔⵔⴰⵏⵉⵢⵢⴻⵏ,
ⴷ ⴽⵓⴱ, ⴷ ⴰⵢⵜ ⵏ ⵜⴻⵎⵎⵓⵔⵜ ⵏ ⵍⵄⴰⵀⴷ
ⴰⴷ ⴽⵉⵙⴻⵏ ⵡⴹⴰⵏ ⵙ ⵙⵙⵉⴼ.”
6 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ:
ⵉⵏⵏⵉ ⵉⵜⵜⵛⴰⵍⴻⵏ ⵅ ⵎⵉⵚⵔⴰ ⴰⴷ ⵡⴹⴰⵏ,
ⵓ ⵏⵏⴼⴰⵅⴻⵜ ⵏ ⵚⵚⵓⵍⵟⴰ ⵏⵏⴻⵙ ⴰⴷ ⵜⵖⴰⵔⵇ.
ⵣⵉ ⵎⴰⵊⴷⴰⵍ ⴰⵍ ⴰⵙⵡⴰⵏ ⴰⴷ ⵡⴹⴰⵏ ⵏⵉⵜⵏⵉ ⵙ ⵙⵙⵉⴼ ⴷⵉ ⵜⴻⵎⵎⵓⵔⵜ!,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ. □
7 ⴰⴷ ⴷⵉⵏ ⵜⵉⵍⵉ ⴷ ⵍⵅⵉⵔⴱⴻⵜ ⴷⵉ ⵍⵡⴻⵙⵜ ⵏ ⵜⴻⵎⵎⵓⵔⴰ ⵉⵜⵜⵡⴰⵔⴻⴷⴵⴻⵏⵜ,
ⵓ ⵜⵉⵏⴻⴷⴷⴰⵎ ⵏⵏⴻⵙ ⴰⴷ ⵉⵍⵉⵏⵜ ⴷⵉ ⵍⵡⴻⵙⵜ ⵏ ⵜⵏⴻⴷⴷⴰⵎ ⵏⵏⴻⵖⵏⵉ ⵉⵜⵜⵡⴰⵅⴰⵔⵔⴱⴻⵏ.
8 ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ,
ⵅⵎⵉ ⵉ ⵖⴰ ⵙⵙⴰⵔⵖⴻⵖ ⵜⵉⵎⴻⵙⵙⵉ ⴷⵉ ⵎⵉⵚⵔⴰ
ⵓⵛⴰ ⵎⴰⵔⵔⴰ ⵉⵏⵏⵉ ⵜⵜ ⵉⵜⵜⵄⴰⵡⴰⵏⴻⵏ ⴰⴷ ⵜⵜⵡⴰⵔⵥⴻⵏ.
9 ⴷⴻⴳ ⵡⴰⵙⵙ ⵏⵏⵉ ⴰⴷ ⴼⴼⵖⴻⵏ ⵉⵔⴻⵇⵇⴰⵙⴻⵏ ⵙ ⵜⵖⴰⵔⵔⵓⴱⴰ ⵥⵉ ⵥⵥⴰⵜ ⵏ ⵡⵓⴷⴻⵎ ⵉⵏⵓ
ⵎⴰⵃⴻⵏⴷ ⴰⴷ ⵙⵙⵉⴳⴳⵯⴻⴷⴻⵏ ⴽⵓⵛ ⵡⴻⵏⵏⵉ ⵓⵎⵉ ⵉⵜⵜⵖⵉⵍ ⴰⵇⴰ ⵏⴻⵜⵜⴰ ⴷⵉ ⵍⴰⵎⴰⵏ.
ⴰⴷ ⴷⴰⵢⵙⴻⵏ ⵢⵉⵍⵉ ⵡⴰⵔⵊⴻⴼ ⴰⵎⴻⵇⵇⵔⴰⵏ,
ⴰⵎⴻⵛⵏⴰⵡ ⴷⴻⴳ ⵡⴰⵙⵙ ⵏⵏⵉ ⵏ ⵎⵉⵚⵔⴰ,
ⵎⴰⵖⴰⵔ ⵅⵥⴰⵔ, ⴰⴷ ⴷⴷ-ⵢⴰⵙ!”
10 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
ⵏⴻⵛⵛ ⴰⴷ ⵙⵙⴱⴻⴷⴷⴻⵖ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵎⵉⵚⵔⴰ
ⵙ ⵓⴼⵓⵙ ⵏ ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ.
11 ⵏⴻⵜⵜⴰ ⴷ ⵍⴳⴻⵏⵙ ⵏⵏⴻⵙ ⴰⴽⵉⴷⴻⵙ,
ⵉⵎⵙⴰⴳⴳⵯⴰⴷⴻⵏ ⵇⴰⵄ ⵏ ⵍⴻⴳⵏⵓⵙ
ⴰⴷ ⴷⴷ-ⴰⵙⴻⵏ ⵃⵉⵎⴰ ⴰⴷ ⵜⴻⵃⵃⴰⵏ ⵜⴰⵎⵎⵓⵔⵜ.
ⵏⵉⵜⵏⵉ ⴰⴷ ⵙⵙⵓⴼⴼⵖⴻⵏ ⵍⴻⵙⵢⵓⴼ ⵏⵙⴻⵏ ⴹⵉⴷⴷ ⵉ ⵎⵉⵚⵔⴰ
ⵓⵛⴰ ⴰⴷ ⵛⵛⵓⵔⴻⵏ ⵜⴰⵎⵎⵓⵔⵜ ⵙ ⵢⴻⵏⵏⵉ ⵉⵜⵜⵡⴰⵙⵏⵓⵇⵇⴱⴻⵏ. ■
12 ⵏⴻⵛⵛ ⴰⴷ ⵙⵙⵉⵥⵖⴻⵖ ⵉⵖⴻⵥⵔⴰⵏ ⵓⵛⴰ ⴰⴷ ⵥⵥⴻⵏⵥⴻⵖ ⵜⴰⵎⵎⵓⵔⵜ ⵉ ⵉⵄⴻⴼⴼⴰⵏⴻⵏ
ⵓ ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⵜⴰⵎⵎⵓⵔⵜ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ
ⵙ ⵓⴼⵓⵙ ⵏ ⵉⴱⴰⵔⵔⴰⵏⵉⵢⵢⴻⵏ.
ⵏⴻⵛⵛ, ⵙⵉⴷⵉ, ⵡⴻⵏⵏⵉ ⵉⵏⵏⴰⵏ ⴰⵢⴰ.” □
13 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⵉⵎⴻⵢⴹⴰ ⵏ ⵚⵚⴰⵏⴰⵎ
ⵓⵛⴰ ⴰⴷ ⵇⴹⵉⵖ ⵅ ⵍ’ⴰⵚⵏⴰⵎ ⵥⵉ ⵏⵓⴼ.
ⵡⴰⵔ ⵉⵜⵜⵖⵉⵎⵉ ⵄⴰⴷ ⵓⵍⴰ ⴷ ⵉⵊⵊ ⵏ ⵍⵃⴰⴽⴻⵎ ⵥⵉ ⵎⵉⵚⵔⴰ.
ⵏⴻⵛⵛ ⴰⴷ ⵙⵙⵉⴷⴼⴻⵖ ⵍⵄⵓⵔⵔⴻⵜ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ.
14 ⵏⴻⵛⵛ ⴰⴷ ⴰⵔⴻⴷⴷⴵⴻⵖ ⴼⴰⵜⵔⵓⵙ
ⵓ ⴰⴷ ⵙⵙⴰⵔⵖⴻⵖ ⵚⵓⵄⴰⵏ
ⵓ ⴰⴷ ⴰⵡⵢⴻⵖ ⵍⴻⵃⴽⴰⵎⴰⵜ ⵉⵏⵓ ⴷⵉ ⵏⵓ.
15 ⵏⴻⵛⵛ ⴰⴷ ⵙⵙⴼⴰⵔⵖⴻⵖ ⴰⵙⵄⴰⵔ ⵉⵏⵓ ⵅ ⵙⵉⵏ,
ⵍⴱⵓⵔⵊ ⵏ ⵎⵉⵚⵔⴰ,
ⴰⴷ ⵇⴻⴹⵄⴻⵖ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵏⵓ.
16 ⵏⴻⵛⵛ ⴰⴷ ⵙⵙⵉⴷⴼⴻⵖ ⵜⵉⵎⴻⵙⵙⵉ ⵖⴰⵔ ⵎⵉⵚⵔⴰ,
ⵙⵉⵏ ⴰⴷ ⵜⴻⴼⵙⵉ ⵙ ⵍⴻⵃⵔⵉⵇ,
ⵜⴰⵎⵎⵓⵔⵜ ⵏ ⵏⵓ ⴰⴷ ⵜᵉⵜⵜⵡⴰⴼⴻⴵⴻⵇ
ⵓ ⵏⵓⴼ ⴰⴷ ⵜⵉⵍⵉ ⴷⵉ ⵍⴻⵃⵚⴰⵔⴻⵜ ⴽⵓⵍ ⴰⵙⵙ.
17 ⵉⵃⵓⴷⵔⵉⵢⵢⴻⵏ ⵥⵉ ⴰⵡⴰⵏ ⴷ ⴼⵉⴱⵉⵙⵜⴰ ⴰⴷ ⵡⴹⴰⵏ ⵙ ⵙⵙⵉⴼ,
ⵓ ⵜⵉⵎⵖⴰⵔⵉⵏ ⴰⴷ ⵓⵢⵓⵔⴻⵏⵜ ⴷⵉ ⵜⵎⴻⵃⴱⴰⵙⵜ.
18 ⴰⵙⵙ ⴰⴷ ⵉⵜⵜⴱⴰⵔⵛⴻⵏ ⴷⵉ ⵜⴰⵃⴼⴰⵃⵉⵙ
ⵅⵎⵉ ⵉ ⵖⴰ ⵢⴰⵔⵥⴻⵖ ⵏⴻⵛⵛ ⴰⵥⴰⵢⵍⵓ ⵏ ⵎⵉⵚⵔⴰ,
ⵓ ⴰⴷ ⴰⵙ ⵙⵙⴱⴻⴷⴷⴻⵖ ⵏⵏⴼⴰⵅⴻⵜ ⵏ ⵊⵊⴻⵀⴷ ⵏⵏⴻⵙ ⴷⵉⵏⵏⵉ.
ⵉⵊⵊ ⵏ ⵓⵙⴻⵢⵏⵓ ⴰⴷ ⵜⵜ ⵉⵙⴷⵓⵔⵔⵉ
ⵓⵛⴰ ⵢⴻⵙⵙⵉⵙ ⴰⴷ ⵓⵢⵓⵔⴻⵏⵜ ⴷⵉ ⵜⵎⴻⵃⴱⴰⵙⵜ.
19 ⵏⴻⵛⵛ ⴰⴷ ⵙⵙⵉⵡⴹⴻⵖ ⵍⴻⵃⴽⴰⵎⴰⵜ ⵅ ⵎⵉⵙⵍⴰ
ⵓ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.”
20 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵃⵉⵟⴰⵛ, ⴷⴻⴳ ⵓⵢⵓⵔ ⴰⵎⴻⵥⵡⴰⵔⵓ, ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ ⵏ ⵓⵢⵓⵔ, ⵉⵎⵙⴰⵔ ⴱⴻⵍⵍⵉ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
21 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴻⵛⵛ ⴰⵔⵥⵉⵖ ⴰⵖⵉⵍ ⵏ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ.
ⵅⵥⴰⵔ, ⵡⴰⵔ ⵜ ⵉⵊⴻⴱⴱⴰⵔ ⵓⵍⴰ ⴷ ⵉⵊⵊⴻⵏ ⵎⴰⵃⴻⵏⴷ ⴰⴷ ⵉⵜⵜⵡⴰⵙⴳⴻⵏⴼⴰ,
ⵓⵎⵉ ⵜ ⵖⴰ ⵏⵏⴹⴻⵏ ⵙ ⴱⵉⵏⴷⴰⵜ ⴰⵍⴰⵎⵉ ⵥⵥⴰⵢⵙⴻⵏⵜ ⵜ ⵖⴰ ⵙⵙⵊⴻⵀⴷⴻⵏ
ⵃⵉⵎⴰ ⴰⴷ ⵉⵟⵟⴻⴼ ⵙⵙⵉⴼ!”
22 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
ⵅⵥⴰⵔ, ⵏⴻⵛⵛ ⵅ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵍⴰ,
ⵓ ⵏⴻⵛⵛ ⴰⴷ ⴰⵔⵥⴻⵖ ⵉⵖⴰⴵⴻⵏ ⵏⵏⴻⵙ,
ⴰⵎ ⵓⵖⵉⵍ ⵉⵊⴻⵀⴷⴻⵏ ⵄⴰⴷ ⵓⵍⴰ ⴷ ⵡⴻⵏⵏⵉ ⵉⵜⵜⵡⴰⵔⵥⵉⵏ.
ⵏⴻⵛⵛ ⴰⴷ ⴰⵔⵔⴻⵖ ⵙⵙⵉⴼ ⵏⵏⴻⵙ ⴰⴷ ⵉⵡⴹⴰ ⵥⴻⴳ ⵓⴼⵓⵙ ⵏⵏⴻⵙ.
23 ⵏⴻⵛⵛ ⴰⴷ ⵥⵓⵥⵥⴰⵔⴻⵖ ⵉⵎⵉⵚⵔⵉⵢⵢⴻⵏ ⵊⴰⵔ ⵍⴻⴳⵏⵓⵙ
ⵓ ⴰⴷ ⵜⴻⵏ ⴱⴻⵥⵥⵄⴻⵖ ⵅ ⵜⴻⵎⵎⵓⵔⴰ.
24 ⵏⴻⵛⵛ ⴰⴷ ⵙⵙⵊⴻⵀⴷⴻⵖ ⵉⵖⴰⴵⴻⵏ ⵏ ⵓⵊⴻⴵⵉⴷ ⵏ ⴱⴰⴱⵉⵍ
ⵓⵛⴰ ⴰⴷ ⵡⵛⴻⵖ ⵙⵙⵉⴼ ⵉⵏⵓ ⴷⴻⴳ ⵓⴼⵓⵙ ⵏⵏⴻⵙ,
ⵎⴰⵛⴰ ⵉⵖⴰⴵⴻⵏ ⵏ ⴼⵉⵔⵄⵓⵏ ⴰⴷ ⵜⴻⵏ ⴰⵔⵥⴻⵖ,
ⴰⵍⴰⵎⵉ ⵉ ⵖⴰ ⵉⵙⵖⵓⵢⵢ
ⴰⵎ ⵉⵙⵖⵓⵢⵢ ⵡⴻⵏⵏⵉ ⵉⵙⵙⵏⵓⵇⴱⴻⵏ.
25 ⵡⴰⵀ ⵏⴻⵛⵛ ⴰⴷ ⵙⵙⵊⴻⵀⴷⴻⵖ ⵉⵖⴰⴵⴻⵏ ⵏ ⵓⵊⴻⴵⵉⴷ ⵏ ⴱⴰⴱⵉⵍ,
ⵎⴰⵛⴰ ⵉⵖⴰⴵⴻⵏ ⵏ ⴼⵉⵔⵄⵓⵏ ⴰⴷ ⵡⴹⴰⵏ.
ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ,
ⵅⵎⵉ ⵉ ⵖⴰ ⴳⴳⴻⵖ ⵙⵙⵉⴼ ⵉⵏⵓ ⴷⴻⴳ ⵓⴼⵓⵙ ⵏ ⵓⵊⴻⴵⵉⴷ ⵏ ⴱⴰⴱⵉⵍ
ⵓ ⵏⴻⵜⵜⴰ ⴰⴷ ⵜ ⵉⵙⵙⵡⵉⵥⵥⴻⴹ ⵅ ⵜⴻⵎⵎⵓⵔⵜ ⵏ ⵎⵉⵚⵔⴰ.
26 ⵏⴻⵛⵛ ⴰⴷ ⵥⵓⵥⵥⴰⵔⴻⵖ ⵉⵎⵉⵚⵔⵉⵢⵢⴻⵏ ⵊⴰⵔ ⵍⴻⴳⵏⵓⵙ,
ⴰⴷ ⵜⴻⵏ ⴱⴻⵥⵥⵄⴻⵖ ⵅ ⵜⴻⵎⵎⵓⵔⴰ.
ⴰⵎⵎⵓ ⵉ ⵖⴰ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.”