1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵄⴻⵛⵔⴰ, ⴷⴻⴳ ⵓⵢⵓⵔ ⵡⵉⵙⵙ ⵄⴻⵛⵔⴰ, ⵅ ⵡⴰⵙⵙ ⵡⵉⵙⵙ ⵜⴻⵏⵄⴰⵛ ⵏ ⵓⵢⵓⵔ, ⵉⵏⵏⴰ:

2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵔⵔ ⵓⴷⴻⵎ ⵏⵏⴻⴽ ⵖⴰⵔ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ ⵓⵛⴰ ⵏⴰⴱⴱ ⵅⴰⵙ ⵓ ⵅ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ. 3 ⵙⵉⵡⴻⵍ, ⵉⵏⵉ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:

ⵅⵥⴰⵔ, ⵏⴻⵛⵛ ⴹⵉⴷⴷ ⵏⵏⴻⴽ, ⴰ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ,

ⵛⴻⴽ ⴷ ⵍⵀⴰⵢⵛⴻⵜ ⵏⵏⵉ ⵉⵥⵥⵍⴻⵏ ⴷⵉ ⵍⵡⴻⵙⵜ ⵏ ⵉⵖⴻⵥⵔⴰⵏ ⵏⵏⴻⵙ,

ⵜⴻⵏⵏⵉ ⵉⵇⵇⴰⵔⴻⵏ: ⵉⵖⵥⴰⵔ ⵉⵏⵓ,

ⵏⴻⵛⵛ ⴳⴳⵉⵖ ⵜ ⵉ ⵢⵉⵅⴻⴼ ⵉⵏⵓ! ^■  

4 ⵏⴻⵛⵛ ⴰⴷ ⴳⴳⴻⵖ ⵜⵉⵙⴻⵏⵏⴰⵔⵉⵏ ⴷⴻⴳ ⵓⵖⴻⵙⵎⴰⵔ ⵏⵏⴻⴽ,

ⴰⴷ ⵙⵙⵍⴻⵙⵇⴻⵖ ⵉⵙⴻⵍⵎⴰⵏ ⵏ ⵉⵖⴻⵥⵔⴰⵏ ⵏⵏⴻⴽ ⵖⴰⵔ ⵜⴻⵇⵛⵓⵔⵉⵏ ⵏⵏⴻⴽ.

ⴰⴷ ⵛⴻⴽ ⴷⴷ-ⵊⴻⴱⴷⴻⵖ ⵥⵉ ⵍⵡⴻⵙⵜ ⵏ ⵉⵖⴻⵥⵔⴰⵏ ⵏⵏⴻⴽ,

ⵓⵛⴰ ⵎⴰⵔⵔⴰ ⵉⵙⴻⵍⵎⴰⵏ ⵏ ⵉⵖⴻⵥⵔⴰⵏ ⵏⵏⴻⴽ ⴰⴷ ⵍⴻⵙⵇⴻⵏ ⵖⴰⵔ ⵜⴻⵇⵛⵓⵔⵉⵏ ⵏⵏⴻⴽ.

5 ⵏⴻⵛⵛ ⴰⴷ ⵛⴻⴽ ⵏⴹⴰⵔⴻⵖ ⴱⴰⵔⵔⴰ ⴷⵉ ⵍⴻⵅⵍⴰ,

ⵛⴻⴽ ⴷ ⵎⴰⵔⵔⴰ ⵉⵙⴻⵍⵎⴰⵏ ⵏ ⵉⵖⴻⵥⵔⴰⵏ ⵏⵏⴻⴽ.

ⵅ ⵡⵓⴷⴻⵎ ⵏ ⵢⴻⵢⵢⴰⵔ ⴰⴷ ⵜⴻⵡⴹⵉⴷ.

ⵡⴰⵔ ⴷⵉⵏ ⵡⴻⵏⵏⵉ ⵛⴻⴽ ⵉ ⵖⴰ ⵢⴰⵡⵢⴻⵏ ⵏⵉⵖ ⵛⴻⴽ ⵉ ⵖⴰ ⵉⵟⵟⴼⴻⵏ.

ⵏⴻⵛⵛ ⴰⴷ ⵛⴻⴽ ⵡⵛⴻⵖ ⴰⵎⴻⵛⵏⴰⵡ ⵎⴰⵛⵛⴰ ⵉ ⵍⴻⵡⵃⵓⵛ ⵏ ⵜⴻⵎⵎⵓⵔⵜ

ⵓ ⵉ ⵉⵊⴹⴰⴹ ⵏ ⵓⵊⴻⵏⵏⴰ.

6 ⵎⴰⵔⵔⴰ ⵉⵎⴻⵥⴷⴰⵖ ⵏ ⵎⵉⵚⵔⴰ ⴰⴷ ⵙⵙⵏⴻⵏ

ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ,

ⵎⴰⵖⴰⵔ ⵏⵉⵜⵏⵉ ⵜⵓⵖⴰ ⴰⵜⴻⵏ ⴷ ⴰⵥⴻⴵⴰⴹ ⵏ ⵓⵖⴰⵏⵉⵎ ⵉ

ⵅ ⵜⵓⵖⴰ ⵜⵙⴻⵏⵏⴻⴷ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. ^■  

7 ⵎⴰⵍⴰ ⵏⵉⵜⵏⵉ ⴽⵙⵉⵏ ⵛⴻⴽ ⵙ ⵓⴼⵓⵙ ⵏⵏⴻⴽ,

ⵜⴼⴻⴵⵇⴻⴷ ⵓⵛⴰ ⵜⴻⵙⵙⵏⵓⵇⵇⴱⴻⴷ ⵖⴰⵔⵙⴻⵏ ⵜⵉⵖⴰⵔⴹⵉⵏ ⵏⵙⴻⵏ ⵎⴰⵔⵔⴰ,

ⵓ ⵎⴰⵍⴰ ⵅⴰⴽ ⵙⵙⴻⵏⴷⴻⵏ,

ⵜⴰⵔⵥⵉⴷ ⵓⵛⴰ ⵜⴻⵙⵙⴰⵔⵊⵉⵊⴻⴷ ⵜⵉⵊⵄⵉⵏⵏⴰⵜⵉⵏ ⵏⵙⴻⵏ ⵎⴰⵔⵔⴰ.’ ”

8 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵥⴰⵔ, ⵏⴻⵛⵛ ⴰⴷ ⵅⴰⴽ ⵙⵙⴻⵄⴷⵓⵖ ⵙⵙⵉⴼ ⵓⵛⴰ ⴰⴷ ⵇⴻⵙⵙⴻⵖ ⵥⵥⴰⵢⴻⴽ ⴱⵏⴰⴷⴻⵎ ⴷ ⵍⵎⴰⵍ. 9 ⵜⴰⵎⵎⵓⵔⵜ ⵏ ⵎⵉⵚⵔⴰ ⴰⴷ ⵜⴻⴷⵡⴻⵍ ⵉ ⵓⵔⴻⴷⴷⴻⴵ ⵓ ⵉ ⵍⵅⴰⵔⴱⴻⵜ ⵓⵛⴰ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⵎⵉⵏⵥⵉ ⵏⴻⵜⵜⴰ ⵉⵏⵏⴰ: ‘ⵉⵖⵥⴰⵔ ⵉⵏⵓ ⵓ ⵏⴻⵛⵛ ⴳⴳⵉⵖ ⵜ!’ ”

10 “ⵙ ⵓⵢⴰ, ⵅⵥⴰⵔ, ⵏⴻⵛⵛ ⵅⴰⴽ ⵓ ⵅ ⵉⵖⴻⵥⵔⴰⵏ ⵏⵏⴻⴽ ⵓ ⵏⴻⵛⵛ ⴰⴷ ⴳⴳⴻⵖ ⵜⴰⵎⵎⵓⵔⵜ ⵏ ⵎⵉⵚⵔⴰ ⴷ ⵍⴻⵅⵔⴰⴱⵉ, ⵡⴰⵀ ⵉⵛⵜ ⵏ ⵍⵅⵉⵔⴱⴻⵜ ⵏ ⵡⴰⵔⴻⴷⴷⴻⴵ, ⵥⵉ ⵎⴰⵊⴷⴰⵍ ⴰⵍ ⴰⵙⵡⴰⵏ, ⴰⵍ ⴰⵢⵎⵉⵔ ⵏ ⵜⴻⵎⵎⵓⵔⵜ ⵏ ⴽⵓⵛ.

11 ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵡⴰⵔ ⵥⵥⴰⵢⴻⵙ ⵉⵥⴻⴽⴽⵡⵉ ⵅ ⵓⴹⴰⵔ, ⵓ ⵓⵍⴰ ⴷ ⵉⵊⵊ ⵏ ⵓⴹⴰⵔ ⵏ ⵍⵎⴰⵍ ⴰⴷ ⵅⴰⵙ ⵉⵥⵡⴰ. ⵡⴰⵔ ⴷⴰⵢⴻⴽ ⵜⵜⵉⵍⵉⵏ ⵉⵎⴻⵥⴹⴰⵖ ⵉ ⵢⵉⵊⵊ ⵏ ⵍⵎⵉⵊⴰⵔ ⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ.

12 ⵎⵉⵏⵥⵉ ⵏⴻⵛⵛ ⴰⴷ ⴳⴳⴻⵖ ⵜⴰⵎⵎⵓⵔⵜ ⵏ ⵎⵉⵚⵍⴰ ⴷ ⴰⵔⴻⴷⴷⴻⴵ ⴷⵉ ⵍⵡⴻⵙⵜ ⵏ ⵜⴻⵎⵎⵓⵔⴰ ⵜⵜⵡⴰⵔⴻⴷⴵⴻⵏⵜ ⵓⵛⴰ ⵜⵉⵏⴻⴷⴷⴰⵎ ⴰⴷ ⵉⵍⵉⵏⵜ ⴷ ⴰⵔⴻⴷⴷⴻⴵ ⴷⵉ ⵍⵡⴻⵙⵜ ⵏ ⵜⵏⴻⴷⴷⴰⵎ ⵏⵏⴻⵖⵏⵉ ⵏⵏⵉ ⵉⴷⴻⵡⵍⴻⵏ ⴷ ⵍⵅⵉⵔⴱⴰⵜ, ⵍⵎⵉⵊⴰⵔ ⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ, ⵓ ⵏⴻⵛⵛ ⴰⴷ ⵙⵙⵓⵢⵙⴻⵖ ⵉⵎⵉⵚⵔⵉⵢⵢⴻⵏ ⵊⴰⵔ ⵍⴻⴳⵏⵓⵙ ⵓⵛⴰ ⴰⴷ ⵜⴻⵏ ⴱⴻⵥⵥⵄⴻⵖ ⵅ ⵜⴻⵎⵎⵓⵔⴰ.”

13 “ⵎⴰⵛⴰ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⴰⵡⴰⵔⵏⵉ ⵍⴰⵎⵉ ⵉ ⵖⴰ ⵄⴷⵓⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ ⵏⴻⵛⵛ ⴰⴷ ⵙⵙⵎⵓⵏⴻⵖ ⵉⵎⵉⵚⵔⵉⵢⵢⴻⵏ ⵥⵉ ⵍⴻⴳⵏⵓⵙ ⵏⵏⵉ ⵎⴰⵏⵉ ⵜⵓⵖⴰ ⵜⵜⵡⴰⴱⴻⵥⵥⵄⴻⵏ.

14 ⵏⴻⵛⵛ ⴰⴷ ⴱⴻⴷⴷⵍⴻⵖ ⵜⴰⵎⴻⵃⴱⴰⵙⵜ ⵏ ⵉⵎⵉⵚⵔⵉⵢⵢⴻⵏ ⵓⵛⴰ ⴰⴷ ⵜⴻⵏ ⵙⵙⵄⴻⵇⴱⴻⵖ ⴷⵉ ⵜⴻⵎⵎⵓⵔⵜ ⵏ ⴼⴰⵜⵔⵓⵙ, ⴷⵉ ⵜⴻⵎⵎⵓⵔⵜ ⵉ ⵥⵥⴰⵢⴻⵙ ⴷⴷ-ⵉⴼⴼⵖⴻⵏ, ⵓⵛⴰ ⴷⵉⵏⵏⵉ ⴰⴷ ⵉⵍⵉⵏ ⴷ ⵉⵛⵜ ⵏ ⵜⴳⴻⵍⴷⵉⵜ ⵜⴰⵎⴻⵄⵏⴰⵏⵓⵛⵜ.

15 ⴰⴷ ⵜⵉⵍⵉ ⴷ ⵜⴰⵎⴻⵄⵏⴰⵏⵓⵛⵜ ⵥⵉ ⵜⴳⴻⵍⴷⴰⵜⵉⵏ ⵏⵏⴻⵖⵏⵉ ⵓ ⵡⴰⵔ ⵜⴻⵙⵙⴳⴻⵄⵄⴰⴷ ⵉⵅⴻⴼ ⵏⵏⴻⵙ ⵄⴰⴷ ⵅ ⵍⴻⴳⵏⵓⵙ, ⵎⵉⵏⵥⵉ ⵏⴻⵛⵛ ⴰⴷ ⵜⴻⵏ ⵙⵙⵎⴻⵥⵢⴻⵖ ⴰⵍⴰⵎⵉ ⵡⴰⵔ ⵜⵜⵚⴻⵍⵍⵟⴻⵏ ⵄⴰⴷ ⵅ ⵍⴻⴳⵏⵓⵙ.

16 ⵡⴰⵔ ⵜᵉⵜⵜⵉⵍⵉ ⵄⴰⴷ ⵉ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⴷ ⴰⵜⴻⵛⵍⵉ ⵏⵏⵉ ⵜⴻⵏ ⵉ ⵖⴰ ⵉⵙⵙⵉⴷⴰⵔ ⵍⵎⵓⵄⵚⵉⵢⵢⴻⵜ, ⵍⴰⵎⵉ ⴷⴻⵡⵍⴻⵏ ⵖⴰⵔⵙⴻⵏ, ⴹⴻⴼⴼⴰⵔⴻⵏ ⵜⴻⵏ. ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⴷ ⵙⵉⴷⵉ ⵉ ⴵⵉⵖ.” ^■  

17 ⵉⵎⵙⴰⵔ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵙⴻⴱⵄⴰ ⵓ-ⵄⵉⵛⵔⵉⵏ, ⴷⴻⴳ ⵓⵢⵓⵔ ⵡⵉⵙⵙ ⴰⵎⴻⵥⵡⴰⵔⵓ, ⴷⴻⴳ ⵡⴰⵙⵙ ⴰⵎⴻⵥⵡⴰⵔⵓ ⵏ ⵓⵢⵓⵔ, ⴰⵇⴰ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:

18 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ, ⵢⴰⵔⵔⴰ ⵍⵄⴻⵙⴽⴰⵔ ⵏⵏⴻⵙ ⴰⴷ ⵢⴻⴳⴳ ⵉⵛⵜ ⵏ ⵍⵅⴻⴷⵎⴻⵜ ⵜⴰⵎⴻⵇⵇⵔⴰⵏⵜ ⴹⵉⴷⴷ ⵉ ⵚⵓⵔ. ⵎⴰⵔⵔⴰ ⴰⵥⴻⴵⵉⴼ ⵉⵇⵇⵉⵎ ⴷ ⴰⵇⴻⵛⵛⴰⵔ ⵓ ⵎⴰⵔⵔⴰ ⵜⴰⵖⵍⵓⴹⵜ ⵜⴰⵔⴽⴻⵛ, ⵡⴰⵅⵅⴰ ⴰⵎⴻⵏⵏⵉ ⵡⴰⵔ ⵖⴰⵔⴻⵙ ⵜⵓⵖⵉ ⵍⴻⵅⵍⴰⵚ ⵥⵉ ⵜⴻⵏⴷⵉⵏⵜ ⵏ ⵚⵓⵔ, ⵉ ⵏⴻⵜⵜⴰ ⵓ ⵉ ⵍⵄⴻⵙⴽⴰⵔ ⵏⵏⴻⵙ ⵅ ⵍⵅⴻⴷⵎⴻⵜ ⵉ ⵢⴻⴳⴳⴰ ⴹⵉⴷⴷ ⵏⵏⴻⵙ.

19 ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵥⴰⵔ, ⵏⴻⵛⵛ ⴰⴷ ⵡⵛⴻⵖ ⵜⴰⵎⵎⵓⵔⵜ ⵏ ⵎⵉⵚⵔⴰ ⵉ ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ. ⵏⴻⵜⵜⴰ ⴰⴷ ⵥⵥⴰⵢⴻⵙ ⴷⴷ-ⵢⴰⵡⵉ ⴰⴼⴻⵢⵢⴻⴹ ⵏ ⵡⴰⴳⵍⴰ ⵏⵏⴻⵙ ⵓⵛⴰ ⴰⴷ ⵉⴽⴻⵛⵛⴻⴹ ⵜⴰⴽⴻⵛⵛⴰⴹⵜ ⵏⵏⴻⵙ ⵓⵛⴰ ⴰⴷ ⵉⴽⴽⴻⵙ ⵜⵓⴽⴽⴰⵔⴹⴰ. ⴰⵢⴰ ⴰⴷ ⵢⵉⵍⵉ ⴷ ⵍⴻⵅⵍⴰⵚ ⵏⵏⴻⵙ ⵉ ⵍⵄⴻⵙⴽⴰⵔ ⵏⵏⴻⵙ. 20 ⵅ ⵍⵅⴻⴷⵎⴻⵜ ⵏⵏⵉ ⵢⴻⴳⴳⴰ ⴹⵉⴷⴷ ⵏⵏⴻⵙ, ⵡⵛⵉⵖ ⴰⵙ ⵜⴰⵎⵎⵓⵔⵜ ⵏ ⵎⵉⵚⵔⴰ ⴷ ⵍⴻⵅⵍⴰⵚ, ⵎⵉⵏⵥⵉ ⵏⵉⵜⵏⵉ ⴳⴳⵉⵏ ⵜⵜ ⴷⵉ ⵟⵟⵡⴻⵄ ⵉⵏⵓ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ. 21 ⴷⴻⴳ ⵡⴰⵙⵙ ⵏⵏⵉ ⴰⴷ ⴰⵔⵔⴻⵖ ⵉⵛⵛ ⵏ ⵉⵙⵔⴰⵉⵍ ⴰⴷ ⴷⴷ-ⵉⴼⴼⴻⵖ ⵓⵛⴰ ⴰⴷ ⴰⵔⵥⵎⴻⵖ ⴰⵇⴻⵎⵎⵓⵎ ⵏⵏⴻⴽ ⴷⵉ ⵍⵡⴻⵙⵜ ⵏⵙⴻⵏ. ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.”