ⵉⵥⵍⴰⵏ ⵙ ⵉⴳⴻⵊⴷⵓⵔⴻⵏ
ⵉⵥⵍⵉ ⴰⵎⴻⵥⵡⴰⵔⵓ - ⴰⵏⴰⴱⵉ ⵉⵡⵜⴰ ⴰⴳⴻⵊⴷⵓⵔ ⵅ ⵓⵔⵛⴰⵍⵉⵎ
1
1 ⴰⵍⵉⴼ. ⵎⴰⵎⵎⴻⵛ ⵜⴻⵇⵇⵉⵎ ⴷⵉⵀⴰ ⵜⴻⵏⴷⵉⵏⵜ ⵡⴻⵃⵃⴷⴻⵙ! ⵜⵓⵖⴰ ⵍⴻⴱⴷⴰ ⵜⴻⵛⵛⵓⵔ ⵙ ⵍⵖⴰⵛⵉ,
ⵜⴻⴷⵡⴻⵍ ⴰⵎ ⵉⵛⵜ ⵏ ⵜⴰⵊⵊⴰⵞ,
ⵜⵓⵖⴰ-ⵜⵜ ⴷ ⵜⴰⵎⴻⵇⵇⵔⴰⵏⵜ ⵊⴰⵔ ⵍⴻⴳⵏⵓⵙ, ⵉⴵⵉⵙ ⵏ ⵓⵊⴻⴵⵉⴷ ⵊⴰⵔ ⵍⵄⴰⵎⴰⵍⴰⵜ,
ⵜⴷⴻⵡⵍⴻⴷ ⵖⴰⵔ ⵜⴻⵙⵎⵓⵖⵉ.
2 ⴱⵉⵜ. ⵜᵉⵜⵜⵔⵓ ⵉⵎⴻⵟⵟⴰⵡⴻⵏ ⵉⵎⴻⵔⵥⴰⴳⴻⵏ ⵙ ⴵⵉⵍⴻⵜ,
ⵉⵎⴻⵟⵟⴰⵡⴻⵏ ⵏⵏⴻⵙ ⵅ ⵉⵎⴻⴳⴳⵉⵥⴻⵏ ⵏⵏⴻⵙ.
ⵡⴰⵔ ⵖⴰⵔⴻⵙ ⵡⵉ ⵜⵜ ⵖⴰ ⵉⵄⴻⵥⵥⴰⵏ ⵥⵉ ⵎⴰⵔⵔⴰ ⵉⵏⵏⵉ ⵜⵜ ⵉⵜⵜⴻⵅⵙⴻⵏ,
ⵎⴰⵔⵔⴰ ⵉⵎⴻⴷⴷⵓⴽⴽⴰⵍ ⵏⵏⴻⵙ ⵖⴷⴰⵔⴻⵏ-ⵜⵜ,
ⴷⴻⵡⵍⴻⵏ ⴰⵙ ⴷ ⵍⵄⴻⴷⵢⴰⵏ. ■
3 ⴳⵉⵎⴻⵍ. ⵜⴻⵜⵜⵡⴰⵃⴻⴱⴱⴻⵙ ⵜⴻⵎⵎⵓⵔⵜ ⵏ ⵢⴰⵀⵓⴷⴰ ⵥⵉ ⵙⵙⵉⴱⴱⴻⵜ ⵏ ⵍⴻⵖⴱⴻⵏ,
ⵓ ⵥⵉ ⵙⵙⵉⴱⴱⴻⵜ ⵏ ⵍⵇⴻⴷⴷ ⵏ ⵜⵅⴻⵎⵎⴰⵙⵜ ⵏⵏⴻⵙ ⵉⵇⴻⵙⵃⴻⵏ.
ⵜⴻⵜⵜⵖⵉⵎⴰ ⵊⴰⵔ ⵍⴻⴳⵏⵓⵙ, ⵡⴰⵔ ⵜⵓⴼⵉ ⴰⵔⵔⴰⵃⴻⵜ,
ⵎⴰⵔⵔⴰ ⵉⵏⵏⵉ ⵜⵜ ⵉⴹⴰⴼⴼⴰⵔⴻⵏ ⵃⴰⵔⵔⵜⴻⵏ ⵅⴰⵙ ⴷⵉ ⵍⵡⴻⵙⵜ ⵏ ⵍⴻⵃⵚⴰⵔⴰⵜ ⵏⵏⴻⵙ.
4 ⴷⴰⵍⵉⵜ. ⵉⴱⵔⵉⴷⴻⵏ ⵖⴰⵔ ⵚⵉⵀⵢⵓⵏ ⵛⴻⴹⵏⴻⵏ, ⵎⵉⵏⵥⵉ ⵓⵍⴰ ⴷ ⵉⵊⵊ ⵡⴰⵔ ⵉⴳⴳⵓⵔ ⵄⴰⴷ ⵖⴰⵔ ⵍⵄⵉⴷ.
ⵎⴰⵔⵔⴰ ⵜⵉⵡⵡⵓⵔⴰ ⵏⵏⴻⵙ ⵅⵍⴰⵏⵜ,
ⵉⴽⴻⵀⵀⴰⵏⴻⵏ ⵏⵏⴻⵙ ⵥⴻⵀⵀⴰⵔⴻⵏ,
ⵜⵉⵄⵥⴰⵔⵉⵢⵢⵉⵏ ⵏⵏⴻⵙ ⵛⴻⴹⵏⴻⵏⵜ,
ⵓⵛⴰ ⵏⴻⵜⵜⴰⵜ ⵙⵉⵎⴰⵏⵜ ⵏⵏⴻⵙ ⵜⴻⵛⵛⵓⵔ ⵙ ⵜⴰⵔⵥⵓⴳⵉ.
5 ⵀⵉ. ⵉⵖⵔⵉⵎⴻⵏ ⵏⵏⴻⵙ ⴷⴻⵡⵍⴻⵏ ⵃⴻⴽⴽⵎⴻⵏ ⵅⴰⵙ,
ⵍⵄⴻⴷⵢⴰⵏ ⵏⵏⴻⵙ ⴼⴰⵔⵃⴻⵏ,
ⵎⴰⵖⴰⵔ ⵙⵉⴷⵉ ⵉⵙⵙⴻⵛⴹⴻⵏ ⵉ-ⵜⵜ,
ⵥⵉ ⵙⵙⵉⴱⴱⴻⵜ ⵏ ⵍⵇⴻⴷⴷ ⵏ ⵍⵎⵓⵄⵚⵉⵢⵢⴻⵜ ⵏⵏⴻⵙ.
ⵉⵃⴻⵏⵊⵉⵔⴻⵏ ⵏⵏⴻⵙ ⵉⵎⴻⵥⵢⴰⵏⴻⵏ ⵓⵢⵓⵔⴻⵏ ⴷⵉ ⵜⵎⴻⵃⴱⴰⵙⵜ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵉⵖⵔⵉⵎⴻⵏ ⵏⵙⴻⵏ.
6 ⵡⴰⵡ. ⴰⵛⴻⵡⵡⴰⵔ ⵏ ⵢⴻⴵⵉⵙ ⵏ ⵚⵉⵀⵢⵓⵏ ⵉⵏⴳⴻⵥ ⵥⵥⴰⵢⴻⵙ,
ⵎⴰⵔⵔⴰ ⵍⵃⵓⴽⴽⴰⵎ ⵏⵏⴻⵙ ⴳⴳⵉⵏ ⴰⵎ ⵓⴷⴰⴷⴻⵏ
ⵉⵏⵏⵉ ⵡⴰⵔ ⵉⵜⵜⵉⴼⴻⵏ ⵀⴻⴷⴷⵓ.
ⴳⴳⵓⵔⴻⵏ ⵏⵉⵜⵏⵉ ⴱⵍⴰ ⵊⵊⴻⵀⴷ,
ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵡⴻⵏⵏⵉ ⵜⴻⵏ ⵉⴹⴰⴼⴼⴰⵔⴻⵏ.
7 ⵣⴰⵢⵉⵏ. ⴷⴻⴳ ⵡⵓⵙⵙⴰⵏ ⵏ ⵍⴻⵖⴱⴻⵏ ⵏⵏⴻⵙ ⵓ ⴷⴻⴳ ⵡⴰⵟⵟⴰⵙ ⵏ ⵡⴻⵜⵍⴰⵄ ⵏⵏⴻⵙ
ⴰⴷ ⵜⴻⵄⵇⴻⵍ ⵓⵔⵛⴰⵍⵉⵎ ⵅ ⵎⴰⵔⵔⴰ ⵎⵉⵏ ⴷⴰⵢⴻⵙ ⵉⵖⵍⴰⵏ,
ⵎⵉⵏ ⵖⴰⵔⴻⵙ ⵜⵓⵖⴰ ⵥⵉⵛ.
ⵍⴰⵎⵉ ⵉⵡⴹⴰ ⵍⴳⴻⵏⵙ ⵏⵏⴻⵙ ⵙ ⵓⴼⵓⵙ ⵏ ⵡⴻⵖⵔⵉⵎ,
ⵜⵓⵖⴰ ⵡⴰⵔ ⴷⵉⵏ ⵡⵉ ⴷ ⴰⵙ ⵉ ⵖⴰ ⵉⵡⵛⴻⵏ ⴰⴼⵓⵙ.
ⵉⵖⵔⵉⵎⴻⵏ ⵏⵏⴻⵙ ⵥⵔⵉⵏ ⵜⵜ,
ⵙⵜⴻⵀⵥⴰⵏ ⵥⴻⴳ ⵓⵙⴱⴻⴷⴷⵉ ⵏ ⵡⴻⵄⴱⴰⴷ ⴷⵉ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ.
8 ⵅⵉⵜ. ⵓⵔⵛⴰⵍⵉⵎ ⵜⵓⵖⴰ ⵜⵅⴻⵟⵟⴰ ⴰⵟⵟⴰⵙ.
ⵙ ⵓⵢⴻⵏⵏⵉ ⵜⴻⴷⵡⴻⵍ ⴰⵎ ⵉⵛⵜ ⵏ ⵜⴻⵎⵖⴰⵔⵜ ⴷⴻⴳ ⵡⵓⵙⵙⴰⵏ ⵏ ⵡⴻⵄⵥⴰⵍ ⵏⵏⴻⵙ.
ⵎⴰⵔⵔⴰ ⵉⵏⵏⵉ ⵜⵓⵖⴰ ⵜⵜ ⵉⵜⵜⵡⴻⵇⵇⴰⵔⴻⵏ,
ⵙⵙⴻⵃⵇⴰⵔⵔⴰⵏ ⵜⵜ,
ⵎⵉⵏⵥⵉ ⵥⵔⵉⵏ ⵍⴻⵃⵢⴰ ⵏⵏⴻⵙ.
ⵓⵍⴰ ⵏⴻⵜⵜⴰⵜ ⵙⵉⵎⴰⵏⵜ ⵏⵏⴻⵙ ⵜⵥⴻⵀⵀⴰⵔ,
ⵜⴻⴷⵡⴻⵍ ⵖⴰⵔ ⴹⴻⴼⴼⴰⵔ. ■
9 ⵜⵉⵜ. ⵜⴰⵅⵎⵓⵊⵉ ⵏⵏⴻⵙ ⵜⴻⵍⵚⴻⵇ ⵖⴰⵔ ⵜⵎⵓⵡⵡⴰ ⵏ ⵓⴱⴻⵃⵔⵓⵔ ⵏⵏⴻⵙ,
ⴰⵏⴻⴳⴳⴰⵔⵓ ⵏⵏⴻⵙ ⵡⴰⵔ ⴷⴰⵢⴻⵙ ⵜⵅⴻⵎⵎ.
ⴰⵇⴰ ⵜⴻⵀⵡⴰ-ⴷⴷ ⵖⴰⵔ ⵍⴰⴵⴰⵖ ⵙ ⵉⵊⵊ ⵏ ⵡⴻⴱⵔⵉⴷ ⵉⵙⵙⵜⴻⴱⵀⵜⴻⵏ,
ⵓⵍⴰ ⴷ ⵉⵊⵊ ⵡⴰⵔ ⵜⵜ ⵉⵄⴻⵥⵥⵉ.
ⵅⵥⴰⵔ ⵎⴰⵛⴰ ⵍⴻⵖⴱⴻⵏ ⵉⵏⵓ, ⴰ ⵙⵉⴷⵉ,
ⵎⴰⵖⴰⵔ ⵍⴻⵄⴷⵓ ⵉⵙⵙⵎⴻⵇⵇⴰⵔ ⵉⵅⴻⴼ ⵏⵏⴻⵙ. ■
10 ⵢⵓⴷ. ⴰⵖⵔⵉⵎ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ
ⵖⴰⵔ ⵎⴰⵔⵔⴰ ⵎⵉⵏ ⴷⴰⵢⴻⵙ ⵉⵖⵍⴰⵏ.
ⵉⵡⴰ ⵜⴻⵥⵔⴰ ⵏⴻⵜⵜⴰⵜ ⵎⴰⵎⵎⴻⵛ ⵓⴷⴼⴻⵏ ⵍⴻⴳⵏⵓⵙ ⵖⴰⵔ ⵣⵥⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ,
ⵍⴻⴳⵏⵓⵙ ⵎⵉⵏ ⵅⴻⴼ ⵜⵓⵎⵓⵔⴻⴷ,
ⵡⴰⵔ ⵉⵄⴻⴷⴷⴻⵍ ⴰⴷ ⴷⴷ-ⴰⴷⴼⴻⵏ ⵖⴰⵔ ⵡⴻⴳⵔⴰⵡ ⵏ ⵍⴳⴻⵏⵙ.
11 ⴽⴰⴼ. ⵇⴰⵄ ⵉⵎⴻⵥⴷⴰⵖ ⵏⵏⴻⵙ ⵥⴻⵀⵀⴰⵔⴻⵏ,
ⴰⵔⴻⵥⵥⵓⵏ ⴰⵖⵔⵓⵎ.
ⵏⵉⵜⵏⵉ ⵡⵛⵉⵏ ⵍⴻⵇⵛⵓⵄ ⵉⵖⵍⴰⵏ ⵏⵙⴻⵏ ⴷⵉ ⵟⵟⵡⴻⵄ ⵏ ⵎⴰⵛⵛⴰ,
ⵎⴰⵃⴻⵏⴷ ⴰⴷ ⴷⴷ-ⴰⵔⵔⴻⵏ ⵍⴻⵄⵎⴰⵔ ⵏⵙⴻⵏ.
ⵅⵥⴰⵔ, ⴰ ⵙⵉⴷⵉ, ⵡⴰⵍⴰ,
ⵎⴰⵎⵎⴻⵛ ⴷⴻⵡⵍⴻⵖ ⵜⵜⵡⴰⵙⴻⵃⵇⴰⵔⴻⵖ. ■
12 ⵍⴰⵎⵉⴷ. ⵎⴰ ⵡⴰⵔ ⴷⴰⵢⵡⴻⵎ ⵉⵛⵇⵉ,
ⴽⴻⵏⵏⵉⵡ ⵉⵏⵏⵉ ⵉⵄⴻⴷⴷⵓⵏ ⵅ ⵡⴻⴱⵔⵉⴷ?
ⵡⴰⵍⴰⵎ ⵓ ⵅⵥⴰⵔⴻⵎ,
ⵎⴰ ⴷⵉⵏ ⵛⴰ ⵏ ⵍⴻⵃⵔⵉⵇ ⴰⵎ ⵍⴻⵃⵔⵉⵇ ⵉ ⴷ ⴰⵢⵉ ⵉⵜⵜⵡⴰⴳⴳⴻⵏ,
ⵉ ⵥⵉ ⴷ ⴰⵢⵉ ⵉⵙⵙⵅⴻⵢⵢⴻⵇ ⵙⵉⴷⵉ,
ⴷⴻⴳ ⵡⴰⵙⵙ ⵏ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ.
13 ⵎⵉⵎ. ⵣⵉ ⵙⴻⵏⵏⴻⵊ ⵉ ⵥⵉ ⴷⴷ-ⵉⵙⵙⴻⴽⴽ ⵏⴻⵜⵜⴰ ⵜⵉⵎⴻⵙⵙⵉ ⴷⴻⴳ ⵉⵅⵙⴰⵏ ⵉⵏⵓ,
ⵜⵛⴻⴱⴱⴰⵔ ⴷⴰⵢⵙⴻⵏ.
ⵏⴻⵜⵜⴰ ⵉⵏⴹⴰⵔ-ⴷⴷ ⵜⵔⴰⵛⵛⴰ ⵖⴰⵔ ⵉⴹⴰⵔⴻⵏ ⵉⵏⵓ,
ⵢⴰⵔⵔⴰ ⴰⵢⵉ ⴰⴷ ⴷⴻⵡⵍⴻⵖ ⵖⴰⵔ ⴹⴻⴼⴼⴰⵔ,
ⴰⵇⴰ ⵢⴰⵔⴻⴷⴷⴻⴵ ⴰⵢⵉ,
ⵉⵙⵙⴻⵀⵍⴻⵛ ⴰⵢⵉ ⴰⵙⵙ ⴰⵎ ⵉⴽⵎⴻⵍ.
14 ⵏⵓⵏ. ⵉⵜⵜⵡⴰⵛⴻⴷⴷ ⵓⵥⴰⵢⵍⵓ ⵏ ⵉⵄⴻⴷⵉⵢⵢⴻⵏ ⵉⵏⵓ ⵙ ⵓⴼⵓⵙ ⵏⵏⴻⵙ,
ⴰⵇⴰ ⵜⵜⵡⴰⵎⵓⴷⴻⵏ, ⴳⴻⵄⵄⴷⴻⵏ-ⴷⴷ ⵅ ⵢⵉⵔⵉ ⵉⵏⵓ.
ⵏⴻⵜⵜⴰ ⵢⴰⵔⵔⴰ ⵊⵊⴻⵀⴷ ⵉⵏⵓ ⴰⴷ ⵉⴼⵛⴻⵍ.
ⵉⵡⵛⴰ ⴰⵢⵉ ⵙⵉⴷⵉ ⴷⴻⴳ ⵉⴼⴰⵙⵙⴻⵏ ⵏⵙⴻⵏ,
ⵏⴻⵛⵛ ⵡⴰⵔ ⵥⴻⵎⵎⴰⵔⴻⵖ ⴰⴷ ⴱⴻⴷⴷⴻⵖ ⵄⴰⴷ.
15 ⵙⴰⵎⵉⵅ. ⵉⵏⴹⴰⵔ ⵙⵉⴷⵉ ⵉⵏⵓ ⵎⴰⵔⵔⴰ ⴰⵢⵜ ⵏ ⴱⵓ-ⵚⵚⵓⵍⵟⴰ ⵉⵏⵓ ⴷⵉ ⵍⵡⴻⵙⵜ ⵉⵏⵓ,
ⵉⴱⴰⵔⵔⴻⵃ ⵙ ⵉⵊⵊ ⵏ ⵡⵓⵔⴰⵔ ⴹⵉⴷⴷ ⵉⵏⵓ,
ⵎⴰⵃⴻⵏⴷ ⴰⴷ ⵢⴰⵔⵥ ⵉⵃⵓⴷⵔⵉⵢⵢⴻⵏ ⵉⵏⵓ,
ⵙⵉⴷⵉ ⵉⵏⵓ ⴰⵇⴰ ⵉⵄⴼⴻⵙ ⵅ ⵜⵙⵉⵔⵜ ⵏ ⵓⴹⵉⵍ,
ⵏ ⵜⴻⵄⵥⴰⵔⴻⵛⵜ, ⵏ ⵢⴻⴵⵉⵙ ⵏ ⵢⴰⵀⵓⴷⴰ.
16 ⵄⴰⵢⵉⵏ. ⵙ ⵎⴰⵏ ⴰⵢⴰ ⵜⵜⵔⵓⵖ, ⴰ ⵜⵉⵟⵟ ⵉⵏⵓ, ⴰ ⵜⵉⵟⵟ ⵉⵏⵓ ⵉⵙⵙⴰⵥⵥⴰⵍⴻⵏ ⵉⵎⴻⵟⵟⴰⵡⴻⵏ,
ⵎⵉⵏⵥⵉ ⴰⵎⴻⵙⴼⴻⵡⵡⴻⵊ ⵏⵏⵉ ⵉⵥⴻⵎⵎⴰⵔⴻⵏ ⴰⴷ ⴷⴷ-ⵢⴰⵔⵔ ⵍⴻⵄⵎⴰⵔ ⵉⵏⵓ,
ⵉⴳⴳⵯⴻⵊ ⵅⴰⴼⵉ.
ⵜⵜⵡⴰⵜⴻⵃⵃⴰⵏ ⵉⵃⴻⵏⵊⵉⵔⴻⵏ ⵉⵏⵓ,
ⵎⵉⵏⵥⵉ ⵍⴻⵄⴷⵓ ⵉⵊⵀⴻⴷ ⵅⴰⵙⴻⵏ.■
ⴰⵏⵄⴰⵎ ⵏ ⵢⴻⴵⵉⵙ ⵏ ⵚⵉⵀⵢⵓⵏ
17 ⴱⵉ. ⵜⴻⵙⵙⵡⵉⵥⵥⴻⴹ ⵚⵉⵀⵢⵓⵏ ⵉⴼⴰⵙⵙⴻⵏ ⵏⵏⴻⵙ,
ⵎⴰⵛⴰ ⵏⴻⵜⵜⴰⵜ ⵡⴰⵔ ⵖⴰⵔⴻⵙ ⵡⵉ ⵜⵜ ⵖⴰ ⵉⵙⵙⴼⴻⵡⵡⵊⴻⵏ.
ⵢⵓⵎⵓⵔ ⵙⵉⴷⵉ ⵅ ⵢⴰⵄⵇⵓⴱ,
ⴰⵇⴰ ⵉⵖⵔⵉⵎⴻⵏ ⵏⵏⴻⵙ ⴰⴷ ⴰⵙ ⴷⴷ-ⵏⵏⴹⴻⵏ.
ⵓⵔⵛⴰⵍⵉⵎ ⵜⴻⴷⵡⴻⵍ ⵊⴰⵔ ⴰⵙⴻⵏ ⴰⵎ ⵉⵛⵜ ⵏ ⵜⴻⵎⵖⴰⵔⵜ ⴷⴻⴳ ⵡⵓⵙⵙⴰⵏ ⵏ ⵡⴻⵄⵥⴰⵍ ⵏⵏⴻⵙ.
18 ⵜⵙⴰⴷⵉ. ⵙⵉⴷⵉ ⴷ ⴰⵎⵙⴻⴳⴳⴻⴷ,
ⵎⴰⵖⴰⵔ ⵏⴻⵛⵛ ⵜⵓⵖⴰ ⵖⴻⵡⵡⵖⴻⵖ ⵅ ⵍⵓⵎⵓⵔⴰⵜ ⵏⵏⴻⵙ.
ⵙⵍⴻⵎ ⵅⴻⵏⵏⵉ, ⵎⴰⵔⵔⴰ ⵍⴻⴳⵏⵓⵙ,
ⵅⵥⴰⵔⴻⵎ ⵖⴰⵔ ⵍⴻⵀⵍⵉⵇ ⵉⵏⵓ.
ⵜⵉⵄⵥⴰⵔⵉⵢⵢⵉⵏ ⵉⵏⵓ ⴷ ⵉⵃⵓⴷⵔⵉⵢⵢⴻⵏ ⵉⵏⵓ ⵓⵢⵓⵔⴻⵏ ⴷⵉ ⵜⵎⴻⵃⴱⴰⵙⵜ.□
19 ⵇⵓⴼ. ⵏⴻⵛⵛ ⵍⴰⵖⵉⵖ ⵅ ⵢⴻⵏⵏⵉ ⴷ ⴰⵢⵉ ⵉⵜⵜⴻⵅⵙⴻⵏ,
ⵎⴰⵛⴰ ⵏⵉⵜⵏⵉ ⵛⴻⵎⵜⴻⵏ ⴰⵢⵉ.
ⵉⴽⴻⵀⵀⴰⵏⴻⵏ ⵉⵏⵓ ⴷ ⵉⵎⵖⴰⵔⴻⵏ ⵉⵏⵓ ⴹⴻⵍⵇⴻⵏ ⵉ ⴱⵓⵃⴱⴻⵍ ⴷⵉ ⵜⴻⵏⴷⵉⵏⵜ,
ⵓⵎⵉ ⵜⵓⵖⴰ ⴰⵔⴻⵥⵥⵓⵏ ⵎⴰⵛⵛⴰ ⵉ ⵢⵉⵅⴻⴼ ⵏⵙⴻⵏ,
ⵃⵉⵎⴰ ⴰⴷ ⵙⵙⵎⴻⵃⴹⴻⵏ ⵍⴻⵄⵎⴰⵔ ⵏⵙⴻⵏ. ■
20 ⵔⵉⵅ. ⵅⵥⴰⵔ, ⴰ ⵙⵉⴷⵉ, ⵎⴰⵖⴰⵔ ⵏⴻⵛⵛ ⴷⵉ ⵍⴻⵃⵚⴰⵔⴻⵜ,
ⵜⴰⴽⵔⵉⵛⵜ ⵉⵏⵓ ⵜⴻⵏⵏⴻⵃⵡⴻⵍ,
ⵓⵍ ⵉⵏⵓ ⵉⵏⵏⴻⵇⵍⴻⴱ-ⴷⴷ ⵥⵉ ⴷⴰⵅⴻⵍ ⵉⵏⵓ,
ⵎⴰⵖⴰⵔ ⵜⵓⵖⴰ ⵖⴻⵡⵡⵖⴻⵖ ⴰⵟⵟⴰⵙ.
ⴷⵉ ⴱⴰⵔⵔⴰ ⵉ ⴷ ⴰⵢⵉ ⵢⵓⵛⴰⵔ ⵙⵙⵉⴼ ⵉⵃⴻⵏⵊⵉⵔⴻⵏ ⵉⵏⵓ,
ⴷⴰⵅⴻⵍ ⴰⵇⴰ-ⵜⵜ ⴰⵎ ⵍⵎⴻⵡⵜ. ■
21 ⵛⵉⵏ. ⵙⵍⵉⵏ ⵎⴰⵎⵎⴻⵛ ⵥⴻⵀⵀⴰⵔⴻⵖ,
ⵎⴰⵛⴰ ⵏⴻⵛⵛ ⵡⴰⵔ ⵖⴰⵔⵉ ⵓⵍⴰ ⴷ ⵉⵊⵊ ⵏ ⵓⵎⴻⵙⴼⴻⵡⵡⴻⵊ.
ⵎⴰⵔⵔⴰ ⵍⵄⴻⴷⵢⴰⵏ ⵉⵏⵓ ⵙⵍⵉⵏ ⵅ ⴰⵔⵥⵉⵢⵢⴻⵜ ⵉⵏⵓ.
ⴼⴰⵔⵃⴻⵏ ⴰⵇⴰ ⵛⴻⴽ ⵉ ⵜⵜ ⵉⴳⴳⵉⵏ.
ⵅⵎⵉ ⴷⴷ ⵖⴰ ⵜⴻⵙⵙⵉⵡⴹⴻⴷ ⴰⵙⵙ ⵉ ⵥⵉ ⴷⴷ-ⵜⵄⴻⵍⵎⴻⴷ,
ⵅⴻⵏⵏⵉ ⴰⴷ ⵉⵍⵉⵏ ⴰⵎⴻⵛⵏⴰⵡ ⵎⴰⵎⵎⴻⵛ ⴵⵉⵖ ⵏⴻⵛⵛ.
22 ⵜⴰⵡ. ⴻⵊⵊ ⴰⴷ ⴷⴷ-ⵢⴰⵙ ⵎⴰⵔⵔⴰ ⵍⵖⴰⵔ ⵏⵙⴻⵏ ⵥⵥⴰⵜⴻⴽ,
ⴻⴳⴳ ⵥⵥⴰⵢⵙⴻⵏ ⴰⵎ ⵎⴰⵎⵎⴻⵛ ⵥⵥⴰⵢⵉ ⵜⴻⴳⴳⵉⴷ
ⵥⵉ ⵙⵙⵉⴱⴱⴻⵜ ⵏ ⵎⴰⵔⵔⴰ ⵉⵄⴻⴷⴷⵉⵢⴻⵏ ⵉⵏⵓ,
ⵎⵉⵏⵥⵉ ⵉⵥⴻⵀⵀⴰⵔⴻⵏ ⵉⵏⵓ ⴷ ⴰⵟⵟⴰⵙ,
ⵓⵍ ⵉⵏⵓ ⵢⵓⵃⴻⵍ ⴰⵟⵟⴰⵙ.