1 “ⵙⵍⴻⵎ ⵖⴰⵔⵉ, ⴰ ⴽⴻⵏⵏⵉⵡ ⵉⵏⵏⵉ ⵉⴹⴰⴼⴼⴰⵔⴻⵏ ⵜⴰⵙⴻⴳⴷⴰ, ⴽⴻⵏⵏⵉⵡ ⵉⵏⵏⵉ ⵢⴰⵔⴻⵥⵥⵓⵏ ⵙⵉⴷⵉ! ⵅⵥⴰⵔⴻⵎ ⵖⴰⵔ ⵜⴻⵚⴹⴰⵔⵜ ⵎⴰⵏⵉⵙ ⵜᵉⵜⵜⵡⴰⵏⴻⵇⵛⴻⵎ ⵓ ⵖⴰⵔ ⵡⴻⵅⴱⵓⵛ ⵏ ⵡⴰⵏⵓ ⵎⴰⵏⵉⵙ ⴷⴷ-ⵜᵉⵜⵜⵡⴰⵖⵥⴻⵎ. 2 ⵅⵥⴰⵔⴻⵎ ⵖⴰⵔ ⵉⴱⵔⴰⵀⵉⵎ, ⴱⴰⴱⴰⵜⵡⴻⵎ, ⵓ ⵖⴰⵔ ⵙⴰⵔⴰ, ⵜⴻⵏⵏⵉ ⴽⴻⵏⵏⵉⵡ ⵉ ⴷⴷ-ⵢⵓⵔⵡⴻⵏ. ⵎⴰⵖⴰⵔ ⵜⵓⵖⴰ-ⵜ ⵄⴰⴷ ⵃⴰⴼⵉ ⵓⵎⵉ ⵜ ⵍⴰⵖⵉⵖ, ⵎⴰⵛⴰ ⵏⴻⵛⵛ ⴱⴰⵔⴽⴻⵖ ⵜ ⵓ ⴰⵔⵥⴼⴻⵖ ⴰⵙ ⴰⵟⵟⴰⵙ ⵏ ⵡⴰⵔⴰ. 3 ⵎⴰⵖⴰⵔ ⵙⵉⴷⵉ ⴰⴷ ⵉⵙⵙⴼⴻⵡⵡⴻⵊ ⵚⵉⵀⵢⵓⵏ, ⴰⴷ ⵉⵙⵙⴼⴻⵡⵡⴻⵊ ⵎⴰⵔⵔⴰ ⵍⵅⵉⵔⴱⴰⵜ ⵏⵏⴻⵙ ⵓⵛⴰ ⴰⴷ ⵜⵜ ⵢⴰⵔⵔ ⴰⵎ ⵊⵊⴻⵏⵏⴻⵜ ⵏ ⵄⴰⴷⵏ ⵓ ⵍⴻⵅⵍⴰ ⵏⵏⴻⵙ ⴰⵎ ⵡⴻⵃⵡⵉⵛ ⴷⵉ ⵊⵊⴻⵏⵏⴻⵜ ⵏ ⵙⵉⴷⵉ. ⴰⵔⵛⴰⵇ ⴷ ⵍⴻⴼⵔⴰⵃⴻⵜ ⴰⴷ ⴷⴰⵢⴻⵙ ⵜⴻⵏ ⴰⴼⴻⵏ, ⴰⵇⴰⴷⵉ ⴷ ⵍⵃⴻⵙⵙ ⵏ ⵓⵖⴻⵏⵏⴻⵊ.”

4 “ⵙⵍⴻⵎ-ⴷⴷ ⵖⴰⵔⵉ, ⴰ ⵛⵛⴻⵄⴱ ⵉⵏⵓ, ⵓ ⵡⵛⴻⵎ ⴰⵢⵉ ⴰⵎⴻⵥⵥⵓⵖ, ⴰ ⵍⴳⴻⵏⵙ ⵉⵏⵓ, ⵎⴰⵖⴰⵔ ⴰⴷ ⵥⵥⴰⵢⵉ ⵜⴻⴼⴼⴻⵖ ⵛⵛⴰⵔⵉⵄⴰ ⵓ ⵏⴻⵛⵛ ⴰⴷ ⴹⴻⵎⵏⴻⵖ ⵍⵃⴻⵇⵇ ⵉⵏⵓ ⴰⵍ ⵖⴰ ⵢⵉⵍⵉ ⵍⵃⴻⵇⵇ ⵉⵏⵓ ⴷ ⵜⴰⴼⴰⵡⵜ ⵉ ⵍⴻⴳⵏⵓⵙ. 5 ⵜⴰⵙⴻⴳⴷⴰ ⵉⵏⵓ ⵜⵓⴷⴻⵙ-ⴷⴷ, ⴰⵙⴻⵏⵊⴻⵎ ⵉⵏⵓ ⵉⵜⵜⴻⴼⴼⴻⵖ-ⴷⴷ ⵓ ⵉⵖⴰⴵⴻⵏ ⵉⵏⵓ ⴰⴷ ⵛⴰⵔⵔⵄⴻⵏ ⵍⴻⴳⵏⵓⵙ, ⴰⴷ ⴰⵢⵉ ⵔⴰⵊⴰⵏⵜ ⵜⴻⴳⵥⵉⵔⵉⵏ ⵓⵛⴰ ⴰⴷ ⵙⵙⵉⵜⵎⴻⵏⵜ ⵅ ⵓⵖⵉⵍ ⵉⵏⵓ.”

6 “ⵙⴳⴻⵄⵄⴷⴻⵎ ⵜⵉⵟⵟⴰⵡⵉⵏ ⵏⵡⴻⵎ ⵖⴰⵔ ⵓⵊⴻⵏⵏⴰ, ⵅⵥⴰⵔⴻⵎ ⵜⴰⵎⵎⵓⵔⵜ ⴷⴰ ⵙⵡⴰⴷⴷⴰⵢ, ⵎⴰⵖⴰⵔ ⴰⵊⴻⵏⵏⴰ ⴰⴷ ⵉⴼⴼⴰⵔⴼⴰⵔ ⴰⵎ ⴷⴷⴻⵅⵅⴰⵏ, ⵜⴰⵎⵎⵓⵔⵜ ⴰⴷ ⵜⴻⴷⴷⵓⵢⵙⴰⵔ ⴰⵎ ⵡⴰⵔⵔⵓⴹ, ⵓⵛⴰ ⴰⵎⵎⵓ ⵉ ⵖⴰ ⵎⵎⵜⴻⵏ ⵓⵍⴰ ⴷ ⵉⵎⴻⵥⴷⴰⵖ ⵏⵏⴻⵙ, ⵎⴰⵛⴰ ⴰⵙⴻⵏⵊⴻⵎ ⵉⵏⵓ ⴰⴷ ⵉⵇⵇⵉⵎ ⵉ ⵍⴻⴱⴷⴰ, ⵜⴰⵙⴻⴳⴷⴰ ⵉⵏⵓ ⵄⴻⵎⵎⴰⵔⵚ ⵡⴰⵔ ⵜⵜ ⵇⴻⵟⵟⵉⵏ.”

7 “ⵙⵍⴻⵎ-ⴷⴷ ⵖⴰⵔⵉ, ⴰ ⴽⴻⵏⵏⵉⵡ ⵉⵏⵏⵉ ⵉⵙⵙⵏⴻⵏ ⵜⴰⵙⴻⴳⴷⴰ, ⴰ ⵛⴻⴽ ⵍⴳⴻⵏⵙ ⵏⵏⵉ ⵢⴰⵔⴻⴱⴱⵓⵏ ⵛⵛⴰⵔⵉⵄⴰ ⵉⵏⵓ ⴷⴻⴳ ⵡⵓⵍ. ⵡⴰⵔ ⵜⵜⴻⴳⴳⵯⴷⴻⵎ ⵥⵉ ⵍⵃⴻⴳⵔⴰ ⵏ ⵢⴻⵡⴷⴰⵏ ⵓ ⵡⴰⵔ ⵜⴻⵏ ⵜⵜⴻⵊⵊⵉⵎ ⴰⴷ ⵛⴻⵎ ⴰⵔⵥⴻⵏ ⵙ ⵓⵄⴻⵢⵢⴻⴱ ⵏⵙⴻⵏ!” ^■   8 ⵎⴰⵖⴰⵔ ⵜⴰⵛⵉⵏⴷⴰ ⴰⴷ ⵜⴻⵏ ⵜⴻⵛⵛ ⴰⵎ ⵜᵉⵜⵜⴻⵜⵜ ⴰⵔⵔⵓⴹ, ⵓⵛⴰ ⴰⴽⵉⵛⵛⵓ ⴰⴷ ⵜⴻⵏ ⵢⴻⵛⵛ ⴰⵎ ⵜⴰⴹⵓⴼⵜ, ⵎⴰⵛⴰ ⵜⴰⵙⴻⴳⴷⴰ ⵉⵏⵓ ⴰⴷ ⵜⴻⵇⵇⵉⵎ ⵉ ⵍⴻⴱⴷⴰ ⵓ ⴰⵙⴻⵏⵊⴻⵎ ⵉⵏⵓ ⵥⵉ ⵊⵊⵉⵍ ⴰⵍ ⵊⵊⵉⵍ.” ^■  

9 “ⴼⴰⵇ, ⴼⴰⵇ, ⴰⵔⴹ ⵙ ⵊⵊⵀⴻⴷ, ⴰ ⴰⵖⵉⵍ ⵏ ⵙⵉⴷⵉ! ⴼⴰⵇ ⴰⵎ ⴷⴻⴳ ⵡⵓⵙⵙⴰⵏ ⵏ ⵥⵉⵛ, ⴰⵎ ⴷⵉ ⵊⵊⵉⵍⴰⵜ ⵏ ⵡⴻⵛⵃⴰⵔ ⵓⵢⴰ. ⵎⴰ ⵡⴰⵔ ⵉⴵⵉ ⴷ ⵛⴻⴽ, ⵡⴻⵏⵏⵉ ⵉⵇⴻⵙⵙⴻⵏ ⵔⴰⵀⴰⴱ, ⴷ ⵡⴻⵏⵏⵉ ⵉⵙⵙⵏⵓⵇⵇⴱⴻⵏ ⵍⵀⴰⵢⵛⴻⵜ?

10 ⵎⴰ ⵡⴰⵔ ⵉⴵⵉ ⴷ ⵛⴻⴽ ⵡⴻⵏⵏⵉ ⵉⵙⵙⵉⵥⵖⴻⵏ ⵍⴻⴱⵃⴰⵔ, ⴰⵎⴰⵏ ⵏ ⵍⵃⴻⵎⵍⴻⵜ ⵏ ⵡⴰⵎⴰⵏ ⵉⵎⴻⵇⵇⵔⴰⵏⴻⵏ ⵢⵓⴵⵖⴻⵏ? ⵎⴰ ⵡⴰⵔ ⵉⴵⵉ ⴷ ⵛⴻⴽ ⵡⴻⵏⵏⵉ ⵢⴰⵔⵔⵉⵏ ⴰⵎⴰⵏ ⵢⵓⴵⵖⴻⵏ ⵏ ⵍⴻⴱⵃⴰⵔ ⴷ ⴰⴱⵔⵉⴷ ⴰⵍⴰⵎⵉ ⵥⴻⵎⵎⴰⵔⴻⵏ ⴰⴷ ⵥⵡⴰⵏ ⵉⵏⵏⵉ ⵉⵜⵜⵡⴰⴼⴻⴽⴽⴻⵏ? ^■  

11 ⵉⵏⵏⵉ ⵉⴼⴷⴰ ⵉ-ⵜⴻⵏ ⵙⵉⴷⵉ ⴰⴷ ⴷⴷ-ⴷⴻⵡⵍⴻⵏ, ⴰⴷ ⴷⴷ-ⴰⵙⴻⵏ ⵖⴰⵔ ⵚⵉⵀⵢⵓⵏ ⵙ ⵓⵙⵍⵉⵡⵍⴻⵡ. ⵍⴻⴼⵔⴰⵃⴻⵜ ⵏ ⵍⴻⴱⴷⴰ ⴰⴷ ⵜⵉⵍⵉ ⵅ ⵉⵥⴻⴵⵉⴼⴻⵏ ⵏⵙⴻⵏ, ⵏⵉⵜⵏⵉ ⴰⴷ ⵙⵙⵡⵉⵥⵥⴹⴻⵏ ⵉⴼⴰⵙⵙⴻⵏ ⵏⵙⴻⵏ ⵖⴰⵔ ⵡⴰⵔⵛⴰⵇ ⴷ ⵍⴻⴼⵔⴰⵃⴻⵜ, ⴰⵎ ⵉ ⵖⴰ ⵢⴰⵔⵡⴻⵍ ⵥⵥⴰⵢⵙⴻⵏ ⵡⴻⵛⴹⴰⵏ ⴷ ⵡⴻⵙⵃⵉⵙⵙⴻⴼ.”

12 “ⴷ ⵏⴻⵛⵛ, ⵡⴰⵀ ⴷ ⵏⴻⵛⵛ ⵡⴻⵏⵏⵉ ⴽⴻⵏⵏⵉⵡ ⵉⵙⵙⴼⴻⵡⵡⵊⴻⵏ. ⵎⵉⵏ ⵜⴻⵄⵏⵉⴷ ⵛⴻⴽ, ⴰⵇⴰ ⵛⴻⴽ ⵜᵉⵜⵜⴻⴳⴳⵯⴻⴷⴻⴷ ⵥⴻⴳ ⵡⴻⵔⵢⴰⵥ ⵉⴼⴻⵏⵏⴰⵏ, ⵥⵉ ⵎⵎⵉⵙ ⵏ ⴱⵏⴰⴷⴻⵎ ⵏⵏⵉ ⵉⴵⴰⵏ ⴰⵎ ⴰⵔⵔⴱⵉⵄ, ^■  

13 ⵜᵉⵜⵜⴻⵜⵜⵓⴷ ⵙⵉⴷⵉ ⵡⴻⵏⵏⵉ ⵛⴻⴽ ⵉⴳⴳⵉⵏ, ⵡⴻⵏⵏⵉ ⵉⴱⴻⵥⵥⵄⴻⵏ ⴰⵊⴻⵏⵏⴰ ⴷ ⵡⴻⵏⵏⵉ ⵉⵙⵙⴰⵔⵙⴻⵏ ⴷⵙⵓⵙⴰ ⵏ ⵜⴻⵎⵎⵓⵔⵜ, ⴰⵇⴰ ⵛⴻⴽ ⵜᵉⵜⵜⴻⴳⴳⵯⴻⴷⴻⴷ ⵍⴻⴱⴷⴰ, ⴰⵙⵙ ⵉⴽⵎⴻⵍ, ⵥⵉ ⵙⵙⵉⴱⴱⴻⵜ ⵏ ⵡⴻⵙⵄⴰⵔ ⵏ ⵡⴻⵏⵏⵉ ⵉⵃⴻⵚⵚⴰⵔⴻⵏ ⵓⵎⵉ ⵉⵙⵙⴻⵡⵊⴰⴷ ⵉⵅⴻⴼ ⵏⵏⴻⵙ ⵎⴰⵃⴻⵏⴷ ⴰⴷ ⵢⴰⵔⴻⴷⴷⴻⴵ? ⵎⴰⵏⵉ ⵉⴵⴰ ⵅⴻⵏⵏⵉ ⵡⴻⵙⵄⴰⵔ ⵏ ⵡⴻⵏⵏⵉ ⵉⵃⴻⵚⵚⴰⵔⴻⵏ? ^■  

14 ⵡⴻⵏⵏⵉ ⵉⵛⴰⵔⵔⴼⴻⵏ ⵙ ⵙⵙⵏⴰⵙⴻⵍ ⴰⵎ ⵉⵜⵜⴻⴼⵔⵉⵖ ⴰⴷ ⵉⵜⵜⵡⴰⴼⴻⴽⴽ ⴷⴰⵡⴻⵃⴷⴰ. ⵡⴰⵔ ⵉⵜⵜⵎⴻⵜⵜⵉ ⴷⵉ ⵜⴻⵙⵖⴰⴼⵜ ⵏ ⵉⵎⴻⵃⴱⴰⵙ, ⵡⴰⵔ ⵥⵥⴰⵢⴻⵙ ⵉⵏⴻⵇⵇⴻⵙ ⵡⴻⵖⵔⵓⵎ.

15 ⵎⴰⵖⴰⵔ ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵡⴻⵏⵏⵉ ⵉⵙⵙⴻⵀⵡⴰⵍⴻⵏ ⵍⴻⴱⵃⴰⵔ ⴰⵍ ⵖⴰ ⵀⴰⵊⴰⵏ ⵍⴻⵎⵡⴰⵊ ⵏⵏⴻⵙ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴷ ⵉⵙⴻⵎ ⵏⵏⴻⵙ.

16 ⵏⴻⵛⵛ ⴳⴳⵉⵖ ⴰⵛ ⴰⵡⴰⵍⴻⵏ ⵉⵏⵓ ⴷⴻⴳ ⵓⵇⴻⵎⵎⵓⵎ ⵏⵏⴻⴽ ⵓ ⵙⵙⴷⵓⵔⵔⵢⴻⵖ ⵛⴻⴽ ⴷⵉ ⵜⵉⵍⵉ ⵏ ⵓⴼⵓⵙ ⵉⵏⵓ, ⵎⴰⵃⴻⵏⴷ ⴰⴷ ⵥⵥⵓⵖ ⴰⵊⴻⵏⵏⴰ, ⴰⴷ ⵙⵙⴰⵔⵙⴻⵖ ⴷⵙⵓⵙⴰ ⵏ ⵜⴻⵎⵎⵓⵔⵜ ⵓ ⴰⴷ ⵉⵏⵉⵖ ⵉ ⵚⵉⵀⵢⵓⵏ: ‘ⵛⴻⴽ ⴷ ⵍⴳⴻⵏⵙ ⵉⵏⵓ!’ ”

17 “ⴼⴰⵇ, ⴼⴰⵇ, ⴽⴽⴰⵔ-ⴷⴷ ⴰ ⵓⵔⵛⴰⵍⵉⵎ! ⵣⴻⴳ ⵓⴼⵓⵙ ⵏ ⵙⵉⴷⵉ ⵜⴻⵙⵡⵉⴷ ⵥⵉ ⵍⴽⴰⵙ ⵏ ⵡⴻⵙⵄⴰⵔ ⵏⵏⴻⵙ ⴰⵎⴻⵇⵇⵔⴰⵏ. ⵜⴻⵛⵛⵉⴷ ⵍⴻⵅⵎⵉⵔⴰ ⵥⵉ ⵍⴽⴰⵙ ⵏⵏⵉ ⵉⵙⵙⴷⴻⵡⵡⴰⵅⴻⵏ, ⵡⴰⵀ ⵜⵥⴻⵎⵎⴻⴷ ⵜⵜ. ^■  

18 ⵡⴰⵔ ⵜⵜ ⵉⵜⵜⴳⴻⵡⵡⵉⴷ ⵓⵍⴰ ⴷ ⵉⵊⵊⴻⵏ ⵥⵉ ⵎⴰⵔⵔⴰ ⵉⵃⴻⵏⵊⵉⵔⴻⵏ ⵏⵏⵉ ⴷⴷ-ⵜⵓⵔⵓⵡ, ⵓ ⵥⵉ ⵎⴰⵔⵔⴰ ⵉⵃⴻⵏⵊⵉⵔⴻⵏ ⵏⵏⵉ ⵜⴻⵙⵙⵢⴻⵎ, ⵡⴰⵔ ⵜⵜ ⵢⴻⵟⵟⵉⴼ ⵓⵍⴰ ⴷ ⵉⵊⵊ ⵥⴻⴳ ⵓⴼⵓⵙ.

19 ⵜⵏⴰⵢⴻⵏ ⵏ ⵜⵎⴻⵙⵍⴰⵢⵉⵏ-ⴰ ⵍⴻⵇⴼⴻⵏⵜ ⵛⴻⵎ, ⵎⴰⵛⴰ ⵡⵉ ⵅⴰⵎ ⵉ ⵖⴰ ⵉⵃⵉⵏⵏⴻⵏ? ⵅⵥⴰⵔ, ⴰⵅⴰⵔⵔⴻⴱ ⴷ ⵡⴻⵍⴱⴻⵥ ⴷ ⵍⴰⵥ ⴷ ⵙⵙⵉⴼ! ⵎⴰⵎⵎⴻⵛ ⵛⴻⵎ ⵉ ⵖⴰ ⵙⵙⴼⴻⵡⵡⵊⴻⵖ? ^■   20 ⵡⴹⴰⵏ ⵉⵃⴻⵏⵊⵉⵔⴻⵏ ⵏⵏⴻⵎ, ⵖⴰⵛⴰⵏ, ⵥⵥⵍⴻⵏ ⵖⴰⵔ ⵎⴰⵔⵔⴰ ⵜⵉⵖⴻⵎⵎⴰⵔ ⵏ ⵉⴱⵔⵉⴷⴻⵏ ⴰⵎ ⵜⵖⴰⵢⴹⵉⵏ ⵏ ⵡⴻⵥⵖⴰⵔ ⴷⵉ ⵜⵔⴰⵛⵛⴰ. ⵏⵉⵜⵏⵉ ⵊⵊⵉⵡⵏⴻⵏ ⵙ ⵡⴻⵙⵄⴰⵔ ⵏ ⵙⵉⴷⵉ, ⵙ ⵓⵙⵉⴳⴳⵯⴻⴷ ⵏ ⴰⵔⴻⴱⴱⵉ ⵏⵏⴻⵎ.” ^■  

21 “ⵙ ⵓⵢⴻⵏⵏⵉ ⵙⴻⵍ ⴰⵢⴰ, ⴰ ⴽⴻⵏⵏⵉⵡ ⵍⵎⵓⵙⴰⴽⵉⵏ, ⴷ ⵉⵎⴻⵙⵛⴰⵔⴻⵏ, ⵎⴰⵛⴰ ⵡⴰⵔ ⵉⴵⵉ ⵙ ⴱⵉⵏⵓ! 22 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏⵏⴻⵎ, ⵙⵉⴷⵉ, ⴰⵔⴻⴱⴱⵉ ⵏⵏⴻⵎ, ⵡⴻⵏⵏⵉ ⵉⵛⵛⴰⵜⴻⵏ ⴷⴷⴻⵄⵡⴻⵜ ⵅ ⵍⴳⴻⵏⵙ ⵏⵏⴻⵙ: ‘ⵅⵥⴰⵔ, ⵏⴻⵛⵛ ⴰⴷ ⴽⴽⵙⴻⵖ ⵍⴽⴰⵙ ⵉⵙⵙⴷⴻⵡⵡⴰⵅⴻⵏ ⵥⴻⴳ ⵓⴼⵓⵙ ⵏⵏⴻⵎ, ⵡⴰⵔ ⵜⵙⴻⵙⵙⴻⴷ ⵄⴰⴷ ⴽⵜⴰⵔ ⵥⵉ ⵍⴻⵅⵎⵉⵔⴰ ⵏ ⵍⴽⴰⵙ ⵏ ⵡⴻⵙⵄⴰⵔ ⵉⵏⵓ. 23 ⵏⴻⵛⵛ ⴰⴷ ⵜ ⴳⴳⴻⵖ ⴷⴻⴳ ⵓⴼⵓⵙ ⵏ ⵢⵉⵏⵏⵉ ⴷⴰⵢⴻⵎ ⵉⵖⴻⵥⵥⴰⵏ, ⵉⵏⵏⵉ ⵉⵏⵏⴰⵏ ⵉ ⵍⴻⵄⵎⴰⵔ ⵏⵏⴻⵎ: ⵙⴰⴹⴰⵔ ⵉⵅⴻⴼ ⵏⵏⴻⵎ ⵖⴰⵔ ⵜⴻⵎⵎⵓⵔⵜ, ⵏⴻⵛⵛⵉⵏ ⴰⴷ ⵅⴰⵎ ⵏⴻⵥⵡⴰ! ⴰⵎⵎⵓ ⵉ ⵜⴻⴳⴳⵉⴷ ⴰⵄⵔⵓⵔ ⵏⵏⴻⵎ ⴰⵎⴻⵛⵏⴰⵡ ⵎⴰⵎⵎⴻⵛ ⵜⴻⴵⵉⴷ ⴷ ⵜⴰⵎⵎⵓⵔⵜ, ⵓⵛⴰ ⵜⵓⵖⴰ ⵛⴻⴽ ⴷ ⴰⴱⵔⵉⴷ ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵅⴰⵎ ⵉⵥⵡⴰⵏ.’ ”