ⵉⵥⵍⵉ ⵏ ⵜⴻⵎⵎⵓⵔⵜ ⵏ ⵢⴰⵀⵓⴷⴰ
26
1 ⴷⴻⴳ ⵡⴰⵙⵙ ⵏⵏⵉ ⴰⴷ ⵖⴻⵏⵏⵊⴻⵏ ⵉⵥⵍⵉ ⴰⵢⴰ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ: ⵏⴻⵛⵛⵉⵏ ⵖⴰⵔⵏⴻⵖ ⵉⵛⵜ ⵏ ⵜⴻⵏⴷⵉⵏⵜ ⵉⵊⴻⵀⴷⴻⵏ,
ⵏⴻⵜⵜⴰ ⵉⵙⵙⴱⴻⴷⴷ ‘ⴰⵙⴻⵏⵊⴻⵎ’ ⴷ ⵍⴻⵃⵢⵓⴹ ⴷ ⵍⴻⵇⵡⴰⵔⴰⵜ. ■
2 ⴰⵔⵥⵎⴻⵎ ⵜⵉⵡⵡⵓⵔⴰ,
ⵎⴰⵃⴻⵏⴷ ⵍⴳⴻⵏⵙ ⴰⵎⵙⴻⴳⴳⴻⴷ ⴰⴷ ⴷⴷ-ⵢⴰⴷⴻⴼ,
ⵡⴻⵏⵏⵉ ⵉⵃⴻⵟⵟⴰⵏ ⵍⴰⵎⴰⵏ ⵉ ⵙⵉⴷⵉ ⵍⴻⴱⴷⴰ.
3 ⵙ ⵍⴱⴰⵍ ⵉⵎⵜⴻⵏ ⴰⵎ ⵜ ⵉⴵⴰ,
ⵛⴻⴽ ⵜⵃⴻⵟⵟⵉⴷ ⵜ ⴷⵉ ⵍⴻⵀⵏⴰ,
ⵡⴰⵀ ⴷⵉ ⵍⴻⵀⵏⴰ, ⵎⴰⵖⴰⵔ ⵍⴳⴻⵏⵙ ⵉⵜⵜⵛⴰⵍⴰ ⵅⴰⴽ.”
4 “ⵜⴻⵛⵍⴻⵎ ⵅ ⵙⵉⴷⵉ ⵉ ⵍⴻⴱⴷⴰ,
ⵎⴰⵖⴰⵔ ⴷⵉ ⵙⵉⴷⵉ, ⵙⵉⴷⵉ, ⵉ ⵜⴻⴵⴰ ⵜⴻⵚⴹⴰⵔⵜ ⵏ ⵍⴻⴱⴷⴰ.
5 ⵎⴰⵖⴰⵔ ⵏⴻⵜⵜⴰ ⵉⵜⵜⴰⵔⵔⴰ ⵉⵏⵏⵉ ⵉⵥⴻⴷⴷⵖⴻⵏ ⴷⵉⵏⵏⵉ ⴷⵉ ⵍⵓⵄⵍⴰ ⴰⴷ ⴰⴹⴰⵔⴻⵏ,
ⵜⴰⵏⴷⵉⵏⵜ ⵢⵓⵄⵍⴰⵏ ⴰⴷ ⵜⵜ ⵉⵙⵙⴻⵀⵡⴰ,
ⴰⴷ ⵜⵜ ⵉⵙⵙⴻⵀⵡⴰ ⴰⵍ ⵜⴰⵎⵎⵓⵔⵜ,
ⴰⴷ ⵜⵜ ⵉⵄⴰⵔⵏ ⴷⴻⴳ ⵓⵛⴰⵍ.
6 ⴰⴷ ⵅⴰⵙ ⵉⵄⴼⴻⵙ ⵓⴹⴰⵔ,
ⵉⴹⴰⵔⴻⵏ ⵏ ⵡⴻⵏⵏⵉ ⵉⵜⵜⵡⴰⵃⵚⴰⵔⴻⵏ,
ⵍⴰⵜⴰⵔⴰⵜ ⵏ ⵉⴹⴰⵔⴻⵏ ⵏ ⵉⵎⴻⵥⵍⴰⴹ.”
7 “ⴰⴱⵔⵉⴷ ⵏ ⵓⵎⵙⴻⴳⴳⴻⴷ ⵉⵡⴰⵟⴰ,
ⵏⵉⵛⴰⵏ ⵉ ⵉⴵⴰ ⵍⴰⵜⴰⵔ ⵏ ⵓⵎⵙⴻⴳⴳⴻⴷ,
ⵛⴻⴽ ⵜᵉⵜⵜⵙⴻⴳⴳⴰⵎⴻⴷ ⵜ.
8 ⵓⵍⴰ ⴷⴻⴳ ⵡⴻⴱⵔⵉⴷ ⵏ ⵍⴻⵃⴽⴰⵎⴰⵜ ⵏⵏⴻⴽ, ⴰ ⵙⵉⴷⵉ,
ⵜⵓⵖⴰ ⵏⴻⵙⵙⵉⵜⵉⵎ ⴰⵛ,
ⵍⴻⵄⵎⴰⵔ ⵏⵏⴻⵖ ⵉⵎⵎⴻⵥⵔⵉ ⴷⴻⴳ ⵢⵉⵙⴻⵎ ⵏⵏⴻⴽ ⵓ ⴷⵉ ⵍⵉⴷⴰⵔⴻⵜ ⵏⵏⴻⴽ.
9 ⵜⵓⵖⴰ ⵍⴻⵄⵎⴰⵔ ⵉⵏⵓ ⵉⵜⵜⵡⴻⵃⵃⴰⵛ ⵉ ⵛⴻⴽ ⴷⵉ ⴵⵉⵍⴻⵜ,
ⵓⵍⴰ ⴷ ⴱⵓⵃⴱⴻⵍ ⵉⵏⵓ ⴷⴰⵢⵉ, ⵜⵓⵖⴰ ⵢⴰⵔⴻⵥⵥⵓ ⵅⴰⴽ ⵙ ⵊⵊⴻⵀⴷ.
ⵎⴰⵖⴰⵔ ⵎⴰⵍⴰ ⵍⴻⵃⴽⴰⵎⴰⵜ ⵏⵏⴻⴽ ⵓⵙⵉⵏⵜ-ⵉ-ⴷⴷ ⵅ ⵜⴻⵎⵎⵓⵔⵜ,
ⴰⴷ ⵍⴻⵎⴷⴻⵏ ⵉⵎⴻⵥⴷⴰⵖ ⵏ ⵜⴻⵎⵎⵓⵔⵜ ⵜⴰⵙⴻⴳⴷⴰ.”
10 “ⵎⴰⵍⴰ ⵉⵙⵙⵛⴻⵏ ⴱⵏⴰⴷⴻⵎ ⴰⵃⵉⵏⵏⵉ ⵉ ⵓⵄⴻⴼⴼⴰⵏ,
ⵡⴰⵏⵉⵜⴰ ⵡⴰⵔ ⵉⵍⴻⵎⵎⴻⴷ ⵜⴰⵙⴻⴳⴷⴰ,
ⵎⴰⵛⴰ ⴰⴷ ⵢⴻⴳⴳ ⵍⵖⴰⵔ ⴷⵉ ⵜⴻⵎⵎⵓⵔⵜ ⵉⵛⵛⵓⵔⴻⵏ ⵙ ⵜⵙⴻⴳⴷⴰ,
ⵓ ⵡⴰⵔ ⵉⵥⴰⵔⵔ ⴰⵄⵓⴵⵉ ⵏ ⵙⵉⴷⵉ.”
11 “ⴰ ⵙⵉⴷⵉ, ⴰⴼⵓⵙ ⵏⵏⴻⴽ ⵉⵜⵜⵡⴰⵙⴳⴻⵄⵄⴰⴷ,
ⵎⴰⵛⴰ ⵏⵉⵜⵏⵉ ⵡⴰⵔ ⵜ ⵜⵜⵡⵉⵍⵉⵏ.
ⵡⴰⵅⵅⴰ ⴰⵎⴻⵏⵏⵉ ⴰⴷ ⵜ ⵥⴰⵔⴻⵏ ⵄⴰⴷ,
ⵎⴰⵛⴰ ⴰⴷ ⵙⵙⴻⴹⵃⴰⵏ ⵥⴻⴳ ⵡⴰⵙⴰⵎ ⵏⵏⴻⴽ ⵉ ⵍⴳⴻⵏⵙ ⵏⵏⴻⴽ,
ⵡⴰⵀ, ⵜⵉⵎⴻⵙⵙⵉ ⴰⴷ ⵜⴻⵛⵛ ⵉⵖⵔⵉⵎⴻⵏ ⵏⵏⴻⴽ.
12 ⴰ ⵙⵉⴷⵉ, ⵍⵃⵓⴽⵎ ⵏⵏⴻⴽ ⵅⴰⵏⴻⵖ ⴰⴷ ⵢⵉⵍⵉ ⴷ ⵍⴻⵀⵏⴰ,
ⵎⴰⵖⴰⵔ ⵛⴻⴽ ⵜⴽⴻⵎⵎⵍⴻⴷ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵖ ⴷⵉ ⵟⵟⵡⴻⵄ ⵏⵏⴻⵖ.
13 ⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵉⵙⵉⴷⵉⵜⴻⵏ ⵏⵏⴻⵖⵏⵉ ⵙⴻⴵⴹⴻⵏ ⵅⴰⵏⴻⵖ.
ⵣⵥⴰⵢⴻⴽ ⵛⴻⴽ ⵡⴻⵃⵃⴷⴻⴽ ⴰⵇⴰ ⵏⴻⵜⵜⵉⴷⴰⵔ ⵉⵙⴻⵎ ⵏⵏⴻⴽ.
14 ⵉⵎⴻⵜⵜⴰⵏ ⵡⴰⵔ ⵜⵜⴻⴷⴷⴰⵔⴻⵏ ⵄⴰⵡⴻⴷ, ⵍⴻⵅⵢⴰⵍⴰⵜ ⵡⴰⵔ ⵜⵜᵉⵜⵜⵏⴻⴽⴽⴰⵔⴻⵏ.
ⵉ ⵓⵢⴰ ⵜⵅⴻⵍⴼⴻⴷ ⴰⵙⴻⵏ ⵙ ⵍⵖⴰⵔ ⵓⵛⴰ ⵜⴻⵇⴹⵉⴷ ⵜⴻⵏ.
ⵛⴻⴽ ⵜⴻⴽⴽⵙⴻⴷ ⵎⴰⵔⵔⴰ ⵍⵄⴻⵇⵔⴰⵏ ⵅⴰⵙⴻⵏ.
15 ⴰ ⵙⵉⴷⵉ, ⵛⴻⴽ ⵜⴰⵔⵏⵉⴷ ⴷⵉ ⵍⴳⴻⵏⵙ-ⴰ,
ⵛⴻⴽ ⵜⴰⵔⵏⵉⴷ ⴷⵉ ⵍⴳⴻⵏⵙ-ⴰ,
ⵜᵉⵜⵜⵡⴰⵙⵄⵓⴵⴻⴷ ⴷⴰⵢⴻⵙ,
ⴰⵇⴰ ⵜⴻⵙⵙⵡⴻⵙⵄⴻⴷ ⵎⴰⵔⵔⴰ ⵉⵢⵎⵉⵔⴻⵏ ⵏ ⵜⴻⵎⵎⵓⵔⵜ.”
16 “ⴰ ⵙⵉⴷⵉ, ⴷⵉ ⵍⴻⵃⵚⴰⵔⴻⵜ ⴰⵔⵥⵓⵏ ⵅⴰⴽ,
ⵥⴻⴵⵄⴻⵏ ⵜⵉⵥⴰⴵⵉⵜⵉⵏ ⵏⵙⴻⵏ ⵙ ⵜⵃⴻⵙⵙⴻⵛⵜ
ⵓⵎⵉ ⵅⴰⵙⴻⵏ ⴷⴷ-ⵢⵓⵙⴰ ⵓⵡⴻⴷⴷⴻⴱ ⵏⵏⴻⴽ.
17 ⴰⵎ ⵎⴰⵎⵎⴻⵛ ⵜᵉⵜⵜⵏⴻⵥⴱⴰⵔ ⵉⵛⵜ ⵏ ⵜⴻⵎⵖⴰⵔⵜ ⵙ ⴷⴷⴻⵢⵙⴻⵜ,
ⵜⴻⵏⵏⵉ ⵉⴳⴳⵓⵔⴻⵏ ⴰⴷ ⵜⴰⵔⵓ ⴰⵃⴻⵏⵊⵉⵔ ⵏⵏⴻⵙ
ⵓ ⵜⴻⵙⵖⵓⵢⵢⵓ ⵙ ⵍⴻⵡⵊⴻⵄ ⵏ ⵜⴰⵔⵓⵜ ⵏⵏⴻⵙ,
ⴰⵎⵎⵓ ⵉ ⴷ ⴰⵏⴻⵖ ⵜⵓⵖⴰ ⵏⴻⵛⵛⵉⵏ, ⴰ ⵙⵉⴷⵉ, ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⴽ. ■
18 ⵜⵓⵖⴰ ⵏⴻⵛⵛⵉⵏ ⴰⵅⵎⵉ ⵏⴻⴽⵙⵉ ⵙ ⴷⴷⴻⵢⵙⴻⵜ, ⵉⵎⵏⴻⵄ ⴰⵏⴻⵖ ⵍⴻⵃⵔⵉⵇ ⵏ ⵜⴰⵔⵡⴰ,
ⵜⵓⵖⴰ ⵏⴻⵛⵛⵉⵏ ⴰⵅⵎⵉ ⵏⵓⵔⵓ ⴰⵙⴻⵎⵎⵉⴹ.
ⵡⴰⵔ ⴷⴷ-ⵏⵉⵡⵉ ⴰⵙⴻⵏⵊⴻⵎ ⵉ ⵜⴻⵎⵎⵓⵔⵜ,
ⵓ ⵉⵎⴻⵥⴷⴰⵖ ⵏ ⴷⴷⵓⵏⴻⵛⵜ ⵡⴰⵔ ⴷⴷ-ⵜⵜⵡⴰⵅⴻⵍⵇⴻⵏ.”
19 “ⵉⵎⴻⵜⵜⴰⵏ ⵏⵏⴻⴽ ⴰⴷ ⴷⴷⴰⵔⴻⵏ!
ⵍⵅⴻⵛⴱⴰⵜ ⵉⵏⵓ ⴰⴷ ⴱⴻⴷⴷⴻⵏⵜ!
ⴼⴰⵇⴻⵎ, ⵓⵛⴰ ⵙⵍⵉⵡⴻⵍⵡⴻⵎ ⴽⴻⵏⵏⵉⵡ, ⵉⵏⵏⵉ ⵉⵥⴻⴷⴷⵖⴻⵏ ⴷⴻⴳ ⵓⵛⴰⵍ!
ⴰⵇⴰ ⵏⵏⴷⴰ ⵏ ⵜⴼⴰⵡⵉⵏ ⴰⵎ ⵏⵏⴷⴰ ⵏⵏⴻⴽ,
ⵓⵛⴰ ⵜⴰⵎⵎⵓⵔⵜ ⴰⴷ ⵜⴰⵔⵓ ⵍⴻⵅⵢⴰⵍⴰⵜ ⵏ ⵉⵎⴻⵜⵜⴰⵏ.”
20 “ⵓⵢⵓⵔ, ⴰ ⵍⴳⴻⵏⵙ ⵉⵏⵓ, ⴰⴷⴻⴼ ⵖⴰⵔ ⵉⵅⵅⴰⵎⴻⵏ ⵏⵏⴻⴽ ⵏ ⴷⴰⵅⴻⵍ,
ⴱⴻⵍⵍⴻⵄ ⵜⵉⵡⵡⵓⵔⴰ ⴰⵡⴰⵔⵏⵉ ⴰⵛ.
ⵙⵏⵓⴼⴼⴰⵔ ⵉⵅⴻⴼ ⵏⵏⴻⴽ ⵍⵇⴻⴷⴷ ⵏ ⵉⵛⵜ ⵏ ⵜⵥⴻⵃⵥⵉⵃⵜ
ⵎⴰⵃⴻⵏⴷ ⴰⴷ ⵉⵅⵍⴻⴼ ⵉ ⵉⵎⴻⵥⴷⴰⵖ ⵏ ⵜⴻⵎⵎⵓⵔⵜ ⵍⵎⵓⵄⵚⵉⵢⵢⴻⵜ ⵏⵙⴻⵏ,
ⵓⵛⴰ ⵜⴰⵎⵎⵓⵔⵜ ⴰⴷ ⵜⵄⴰⵔⵔⴰ ⵉⴷⴰⵎⵎⴻⵏ ⵉ ⵅⴰⵙ ⵉⵜⵜⵡⴰⵙⵙⵉⵥⵍⴻⵏ,
ⵡⴰⵔ ⵜⵅⴻⵎⵎⵉⵍ ⵄⴰⴷ ⵉⵏⵏⵉ ⵅⴰⵙ ⵉⵜⵜⵡⴰⵏⵖⴻⵏ.”