ⵉⵥⵍⵉ ⵏ ⵓⵇⴰⴷⵉ ⵅ ⵓⵙⴻⵏⵊⴻⵎ
25
1 “ⴰ ⵙⵉⴷⵉ, ⵛⴻⴽ ⴷ ⴰⵔⴻⴱⴱⵉ ⵉⵏⵓ, ⵏⴻⵛⵛ ⴰⴷ ⵛⴻⴽ ⵙⵙⵄⵓⴵⴻⵖ, ⴰⴷ ⵚⴻⴱⴱⵃⴻⵖ ⵉⵙⴻⵎ ⵏⵏⴻⴽ,
ⵎⴰⵖⴰⵔ ⵛⴻⴽ ⵜⴻⴳⴳⵉⴷ ⵍⴻⵄⵊⴻⴱ,
ⴰⵟⵟⴰⵙ ⵏ ⵛⵛⵡⴰⵔ ⵏⵏⴻⴽ ⵥⴻⴳ ⵡⴻⵛⵃⴰⵍ ⵓⵢⴰ ⴰⵇⴰ-ⵜ ⴷ ⵜⵉⴷⴻⵜⵜ ⵓ ⴷⴰⵢⴻⵙ ⵍⴰⵎⴰⵏ.
2 ⵛⴻⴽ ⵜⴰⵔⵔⵉⴷ ⵜⴰⵏⴷⵉⵏⵜ ⴷ ⴰⵄⵓⵔⵔⵉⵛ ⵏ ⵢⴻⵥⵔⴰ,
ⵜⴰⵏⴷⵉⵏⵜ ⵉⵜⵜⵡⴰⵙⵊⴻⵀⴷⴻⵏ ⴷ ⵍⵅⵉⵔⴱⴻⵜ,
ⵍⴻⵇⵚⴰⵔ ⵏ ⵉⴱⴰⵔⵔⴰⵏⵉⵢⵢⴻⵏ ⴷ ⵜⴰⵏⴷⵉⵏⵜ
ⵏⵏⵉ ⵡⴰⵔ ⵙⵙⴱⴻⴷⴷⵉⵏ ⵄⴻⵎⵎⴰⵔⵚ ⵄⴰⵡⴻⴷ. ■
3 ⵙ ⵓⵢⴻⵏⵏⵉ ⴰⴷ ⵛⴻⴽ ⵉⵙⵙⵄⵓⴵⴰ ⵉⵊⵊ ⵏ ⵍⴳⴻⵏⵙ ⵉⵊⵀⴻⴷ,
ⵜⴰⵏⴷⵉⵏⵜ ⵏ ⵍⴻⴳⵏⵓⵙ ⵉⵇⴻⵙⵃⴻⵏ ⴰⵟⵟⴰⵙ ⴰⴷ ⵥⵥⴰⵢⴻⴽ ⵜⴻⴳⴳⵯⴻⴷ.
4 ⵎⴰⵖⴰⵔ ⵜⵓⵖⴰ ⵛⴻⴽ ⴷ ⵍⵇⴻⵍⵄⴰ ⵉ ⵓⵎⴰⵔⵅⵓ,
ⴷ ⵍⵇⴻⵍⵄⴰ ⵉ ⵓⵎⴻⵥⵍⵓⴹ
ⵅⵎⵉ ⵉⵜⵜⵏⴻⵃⵚⴰⵔ,
ⵛⴻⴽ ⴷ ⴰⴷⵓⵔⵔⵉ ⵉ ⵡⴻⵏⵥⴰⵔ ⵉⵛⵛⴰⵜⴻⵏ,
ⵓⵍⴰ ⴷ ⵜⵉⵍⵉ ⴷⵉ ⵍⴻⵃⵎⵓ
ⵎⵉⵏⵥⵉ ⵍⵃⴰⵔⴰⵊ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵛⵜ ⴰⵇⴰ-ⵜ ⴰⵎ ⵡⴻⵏⵥⴰⵔ ⵉⵛⵛⴰⵜⴻⵏ ⵅ ⵍⵃⵉⴹ.
5 ⴰⵎ ⵍⴻⵃⵎⵓ ⴷⴻⴳ ⵉⵊⵊ ⵏ ⵡⴻⵎⵛⴰⵏ ⵢⵓⵥⴻⵖ,
ⴰⵎⵎⵓ ⵉ ⵖⴰ ⵜⴻⵙⵙⴻⵖⴷⴻⴷ ⵍⵃⴰⵔⴰⵊ ⵏ ⵉⴱⴰⵔⵔⴰⵏⵉⵢⵢⴻⵏ,
ⴰⵎ ⵜⵉⵍⵉ ⵏ ⵓⵙⴻⵢⵏⵓ ⵜⴻⵙⵙⴻⵙⵎⵉⴹ ⵍⴻⵀⵎⵓ,
ⴰⵎⵎⵓ ⵉ ⵖⴰ ⵉⵜⵜⵡⴰⵙⵙⴻⵖⴷ ⵉⵥⵍⵉ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵛⵜ.”
6 “ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⴷ ⵉⵙⵙⴻⵡⵊⴻⴷ ⵅ ⵡⴻⴷⵔⴰⵔ-ⴰ
ⵉⵛⵜ ⵏ ⵥⵥⴰⵔⴷⴻⵜ ⵙ ⵎⴰⵛⵛⴰ ⵜⴻⵛⵛⵓⵔ ⵙ ⵜⴷⵓⵏⵜ ⵅ ⵡⴻⴷⵔⴰⵔ-ⴰ
ⵉ ⵎⴰⵔⵔⴰ ⵔⴻⴳⵏⵓⵙ,
ⵉⵛⵜ ⵏ ⵥⵥⴰⵔⴷⴻⵜ ⵙ ⴱⵉⵏⵓ ⵉⵚⴻⴱⵃⴻⵏ ⵇⴰⵄ,
ⵙ ⵎⴰⵛⵛⴰ ⵜⴻⵛⵛⵓⵔ ⵙ ⵜⴷⵓⵏⵜ ⴷ ⵡⴰⴷⵓⴼ,
ⵙ ⴱⵉⵏⵓ ⵉⵚⴻⴱⵃⴻⵏ ⵉⵚⴼⴰⵏ.
7 ⵏⴻⵜⵜⴰ ⴰⴷ ⵉⴱⴻⵟⵟⴻⵍ ⵅ ⵡⴻⴷⵔⴰⵔ-ⴰ ⴰⵍⴻⵃⵃⴰⴼ
ⵉ ⵥⵉ ⵜⵜⵍⴻⵃⵃⴰⴼⴻⵏ ⵎⴰⵔⵔⴰ ⵍⴻⴳⵏⵓⵙ
ⵓⵍⴰ ⴷ ⴷⴷⵓⵔⵉ ⵉ ⵥⵉ ⵜⵜⵡⴰⵙⴷⵓⵔⵔⴰⵢⴻⵏ ⵎⴰⵔⵔⴰ ⵍⴻⴳⵏⵓⵙ.
8 ⵏⴻⵜⵜⴰ ⴰⴷ ⵉⵚⴰⵔⴹ ⵍⵎⴻⵡⵜ ⵉ ⵍⴻⴱⴷⴰ
ⵓⵛⴰ ⵙⵉⴷⵉ ⵉⵏⵓ, ⵙⵉⴷⵉ, ⴰⴷ ⵉⵎⵙⴻⵃ ⵉⵎⴻⵟⵟⴰⵡⴻⵏ ⵥⵉ ⵎⴰⵔⵔⴰ ⵉⵖⴻⵎⴱⴰⴱ
ⵓⵛⴰ ⴰⴷ ⵉⴽⴽⴻⵙ ⵍⴻⴼⴹⵉⵃⴻⵜ ⵏ ⵍⴳⴻⵏⵙ ⵏⵏⴻⵙ ⵥⵉ ⵎⴰⵔⵔⴰ ⵜⴰⵎⵎⵓⵔⵜ,
ⵎⴰⵖⴰⵔ ⴰⵎⵎⵓ ⵉ ⵉⵏⵏⴰ ⵙⵉⴷⵉ.” ■
9 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵏⵉⵏ:
‘ⴰⵇⴰ ⴷⴰ, ⵡⴰ ⴷ ⴰⵔⴻⴱⴱⵉ ⵏⵏⴻⵖ,
ⵅⴰⵙ ⵉ ⵏⴻⴳⴳⴰ ⴰⵙⵉⵜⴻⵎ ⵏⵏⴻⵖ
ⵓ ⵏⴻⵜⵜⴰ ⴰⴷ ⴰⵏⴻⵖ ⵉⵙⵙⴻⵏⵊⴻⵎ.
ⵡⴰ ⴷ ⵙⵉⴷⵉ ⵏⵏⵉ ⵅ ⵏⴻⴳⴳⴰ ⴰⵙⵉⵜⴻⵎ ⵏⵏⴻⵖ,
ⴰⴷ ⵏⴻⵙⵍⵉⵡⵍⴻⵡ, ⴰⴷ ⵏⴼⴰⵔⵃ ⵅ ⵓⵙⴻⵏⵊⴻⵎ ⵏⵏⴻⵙ!’
10 ⵎⴰⵖⴰⵔ ⴰⴼⵓⵙ ⵏ ⵙⵉⴷⵉ ⴰⴷ ⵢⴰⵔⵙ ⵅ ⵡⴻⴷⵔⴰⵔ-ⴰ,
ⵎⴰⵛⴰ ⵎⵓ’ⴰⴱ ⴰⴷ ⵉⵜⵜⵡⴰⴷⴷⴻⵥ ⴷⵉ ⵜⴻⵎⵎⵓⵔⵜ ⵏⵏⴻⵙ,
ⴰⵎ ⵎⴰⵎⵎⴻⵛ ⵉⵜⵜⵡⴰⴷⴷⴻⵥ ⵓⵍⵓⵎ, ⴰⴷ ⵉⴷⵡⴻⵍ ⴷ ⵜⴰⵥⵓⴱⴰⵛⵜ.
11 ⵎⵓ’ⴰⴱ ⴰⴷ ⴷⴰⵢⴻⵙ ⵉⴱⴻⵥⵥⴻⵄ ⵙ ⵉⴼⴰⵙⵙⴻⵏ ⵏⵏⴻⵙ,
ⴰⵎ ⵓⴼⴻⵜⵜⴰⵃ ⴷⴻⴳ ⵡⴻⴼⵜⴰⵃ.
ⴰⵔⴻⴱⴱⵉ ⴰⴷ ⵉⵙⵙⴰⴹⴰⵔ ⵏⵏⴼⴰⵅⴻⵜ ⵏⵏⴻⵙ
ⵊⵎⵉⵄ ⴰⴽ-ⴷ ⵎⴰⵔⵔⴰ ⵎⵉⵏ ⵉⵥⴻⵎⵎⴰⵔ ⴰⴷ ⵉⴳⴳ ⵙ ⵉⴼⴰⵙⵙⴻⵏ ⵏⵏⴻⵙ. ■
12 ⵏⴻⵜⵜⴰ ⴰⴷ ⵉⵀⴷⴻⵎ ⵍⴱⵓⵔⵊ ⴰⴽ-ⴷ ⵍⴻⵃⵢⵓⴹ ⵏⵏⴻⴽ ⵢⵓⵄⵍⴰⵏ,
ⴰⴷ ⵜⴻⵏ ⵉⵙⵙⴻⵀⵡⴰ, ⴰⴷ ⵜⴻⵏ ⵉⵎⵎⴻⵏⴹⴰⵔ ⵖⴰⵔ ⵜⴻⵎⵎⵓⵔⵜ, ⴷⴻⴳ ⵓⵛⴰⵍ.”