ⴰⵇⴰⵔⵔⵉ ⵏ ⵜⵓⴱⴱⵓⵀⴻⵍⵢⴰ
10
1 ⵉⵥⴰⵏ ⵉⵏⴻⵇⵇⴻⵏ ⵜⵜⴰⵔⵔⴰⵏ ⵥⵥⴻⵛⵜ ⵏ ⵡⴻⴷⵀⴰⵏ ⵏ ⵓⵄⴻⵟⵟⴰⵔ ⴰⴷ ⵜⴰⵔⵚⵓⴹ ⵓ ⴰⴷ ⵜⴻⵙⵎⴻⵎ. ⴷⵔⵓⵙ ⵏ ⵜⵓⴱⴱⵓⵀⴻⵍⵢⴰ ⵜⵡⴻⵥⵥⴻⵏ ⴰⵟⵟⴰⵙ ⵅ ⵜⵉⵖⵉⵜ ⴷ ⵛⵛⴰⵏ. 2 ⵓⵍ ⵏ ⵓⵎⵉⵖⵉⵙ ⴰⵇⴰ-ⵜ ⵉ ⵏⴻⵜⵜⴰ ⴰⴼⵓⵙ ⵏⵏⴻⵙ ⴰⴼⵓⵙⵉ, ⵎⴰⵛⴰ ⵓⵍ ⵏ ⵓⴱⵓⵀⴰⵍⵉ ⵉ ⵡⴰⵏⵉⵜⴰ ⴰⴼⵓⵙ ⵏⵏⴻⵙ ⴰⵥⴻⵍⵎⴰⴹ. 3 ⵓⵍⴰ ⴷⴻⴳ ⵡⴻⴱⵔⵉⴷ ⵎⵉⵏ ⵅⴻⴼ ⵉⴳⴳⵓⵔ ⵓⴱⵓⵀⴰⵍⵉ, ⵉⵜⵜⵅⴻⵚⵚⴰ ⴰⵙ ⵡⵓⵍ ⵏⵏⴻⵙ, ⵉⵇⵇⴰⵔ ⵉ ⵎⴰⵔⵔⴰ ⴰⵇⴰ ⵏⴻⵜⵜⴰ ⴷ ⴰⴱⵓⵀⴰⵍⵉ. 4 ⵎⴰⵍⴰ ⵅⴰⴽ ⵉⵅⴻⵢⵢⴻⵇ ⴱⵓⵃⴱⴻⵍ ⵏ ⴱⵓ-ⵊⵊⴻⵀⴷ, ⵡⴰⵔ ⵜⵜⴻⴳⴳⵯⵉⵊ ⵅ ⵡⴻⵎⵛⴰⵏ ⵏⵏⴻⴽ, ⵎⴰⵖⴰⵔ ⵎⴰⵏ ⴰⵢⴰ ⴷ ⴷⴷⵡⴰ, ⵢⴰⵔⴻⵙⵙⴰ ⴷⴷⵏⵓⴱ ⵉⵎⴻⵇⵇⵔⴰⵏⴻⵏ. 5 ⴰⵇⴰ ⴷⵉⵏ ⵉⵊⵊ ⵏ ⵍⵖⴰⵔ ⵏⵏⴻⵖⵏⵉ ⵏⵏⵉ ⵥⵔⵉⵖ ⵙⴰⴷⵓ ⵜⴼⵓⵛⵜ, ⴰⵇⴰ-ⵜ ⴷ ⵉⵊⵊ ⵏ ⵓⵡⴻⴷⴷⴰⵔ ⵉ ⴷⴷ-ⵉⴼⴼⵖⴻⵏ ⵥⴻⴳ ⴰⵢⵜ ⵏ ⵚⵚⵓⵍⵟⴰ. 6 ⵜⴻⵜⵜⵡⴰⵙⵙⴳⴻⵄⵄⴰⴷ ⵜⵓⴱⴱⵓⵀⴻⵍⵢⴰ ⴰⵟⵟⴰⵙ, ⴰⵎ ⵜⵜⵖⵉⵎⴰⵏ ⴰⵢⵜ ⵏ ⴱⵓ-ⵡⴰⴳⵍⴰ ⵙⵡⴰⴷⴷⴰⵢ. 7 ⵏⴻⵛⵛ ⵥⵔⵉⵖ ⵉⵎⵙⴻⵅⵅⴰⵔⴻⵏ ⵏⵢⵉⵏ ⵅ ⵢⴻⵢⵙⴰⵏ ⵓⵍⴰ ⴷ ⵍⵃⵓⴽⴽⴰⵎ ⵏⵏⵉ ⵉⴳⴳⵓⵔⴻⵏ ⴰⵎ ⵉⵎⵙⴻⵅⵅⴰⵔⴻⵏ ⵅ ⵉⴹⴰⵔⴻⵏ ⵏⵙⴻⵏ ⵅ ⵜⴻⵎⵎⵓⵔⵜ.
8 ⵡⴻⵏⵏⵉ ⵉⵜⵜⴻⵇⵇⴰⵥⴻⵏ ⴰⵃⴼⵓⵔ, ⴰⴷ ⴷⴰⵢⴻⵙ ⵉⵡⴹⴰ ⵙ ⵢⵉⵅⴻⴼ ⵏⵏⴻⵙ, ⵡⴻⵏⵏⵉ ⵉⵀⴻⴷⴷⵎⴻⵏ ⵍⵃⵉⴹ, ⵉⵥⴻⵎⵎⴰⵔ ⴰⴷ ⴰⵙ ⵉⵇⵇⴻⵙ ⵓⴼⵉⵖⴰⵔ. ■
9 ⵡⴻⵏⵏⵉ ⵢⴰⵔⴻⴱⴱⵓⵏ ⵉⵥⵔⴰ, ⴰⴷ ⵥⵥⴰⵢⵙⴻⵏ ⵉⵢⵥⴻⵎ ⵉⵅⴻⴼ ⵏⵏⴻⵙ, ⵡⴻⵏⵏⵉ ⵉⵜⵜⵇⴻⴷⴷⴰⵔⴻⵏ ⴰⴽⴻⵛⵛⵓⴹ, ⴰⴷ ⵢⵉⵍⵉ ⴷⵉ ⵍⵅⴰⵟⴰⵔ.
10 ⵎⴰⵍⴰ ⵓⵥⵥⴰⵍ ⵏ ⵛⵛⴰⵇⵓⵔ ⵉⴷⵡⴻⵍ ⵉⵃⴼⴰ ⵓ ⴱⴰⴱ ⵏⵏⴻⵙ ⵡⴰⵔ ⵜ ⵉⵙⵙⴻⵇⴹⴻⵄ, ⵅⴻⵏⵏⵉ ⵉⵜⵜⵅⴻⵚⵚⴰ ⴰⵙ ⵊⵊⵀⴻⴷ ⴽⵜⴰⵔ, ⵎⴰⵛⴰ ⵜⵉⵖⵉⵜ ⴷ ⵜⴻⵏⵏⵉ ⵏ ⵢⴻⵎⵎⴰⵜⵙⴻⵏ ⵃⵉⵎⴰ ⴰⴷ ⵉⴼⵍⴻⵃ ⴱⵏⴰⴷⴻⵎ.
11 ⵎⴰⵍⴰ ⵉⵥⵄⴻⴼ ⵓⴼⵉⵖⴰⵔ ⵇⴱⴻⵍ ⴰⵄⴻⵥⵥⴻⵎ, ⵡⴰⵔ ⴷⵉⵏ ⵍⴻⴼⴹⴻⵍ ⵉ ⵓⵄⴻⵥⵥⴰⵎ.
12 ⴰⵡⴰⵍⴻⵏ ⵥⴻⴳ ⵓⵇⴻⵎⵎⵓⵎ ⵏ ⵓⵎⵉⵖⵉⵙ ⵅⵙⴻⵏ ⵙⵙⴰⵔ, ⵎⴰⵛⴰ ⵉⵢⴻⵏⵛⵉⵛⴻⵏ ⵏ ⵓⴱⵓⵀⴰⵍⵉ ⵚⴰⵔⴹⴻⵏ ⵜ ⵙⵉⵎⴰⵏⵜ ⵏⵏⴻⵙ.
13 ⴱⴻⴷⴷⵓ ⵏ ⵡⴰⵡⴰⵍⴻⵏ ⵥⴻⴳ ⵓⵇⴻⵎⵎⵓⵎ ⵏⵏⴻⵙ ⴷ ⵜⵓⴱⴱⵓⵀⴻⵍⵢⴰ ⵓ ⴰⵏⴻⴳⴳⴰⵔⵓ ⵏ ⵎⵉⵏ ⴷⴷ-ⵉⴼⴼⵖⴻⵏ ⵥⴻⴳ ⵓⵇⴻⵎⵎⵓⵎ ⵏⵏⴻⵙ ⴷ ⴰⵟⴻⵎⵎⴻⵙ ⴰⵄⴻⴼⴼⴰⵏ.
14 ⴰⴱⵓⵀⴰⵍⵉ ⵉⵜⵜⴽⴻⵜⵜⴰⵔ ⵍⵀⴰⵔⴹ ⴰⵟⵟⴰⵙ, ⵎⴰⵛⴰ ⴱⵏⴰⴷⴻⵎ ⵡⴰⵔ ⵉⵙⵙⵉⵏ ⵎⵉⵏ ⵖⴰ ⵉⵎⵙⴰⵔⴻⵏ. ⵓ ⵎⵉⵏ ⵖⴰ ⵉⵎⵙⴰⵔⴻⵏ ⴰⵡⴰⵔⵏⵉ ⴰⵙ, ⵡⵉ ⴷ ⴰⵙ ⵜ ⵉ ⵖⴰ ⵉⵄⴰⵡⴷⴻⵏ?
15 ⴰⵔⴱⴻⵔ ⵏ ⵉⴱⵓⵀⴰⵍⵉⵢⵢⴻⵏ ⵉⵜⵜⴰⵔⵔⴰ-ⵜⴻⵏ ⵓⵃⵍⴻⵏ, ⵎⴰⵖⴰⵔ ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵎⴰⵎⵎⴻⵛ ⵉ ⵖⴰ ⵢⵓⵢⵓⵔⴻⵏ ⵖⴰⵔ ⵜⴻⵏⴷⵉⵏⵜ.
16 ⵓⵛⵜ ⵅⴰⵎ, ⴰ ⵜⴰⵎⵎⵓⵔⵜ, ⴰⵊⴻⴵⵉⴷ ⵏⵏⴻⵙ ⴷ ⴰⵃⴻⵏⵊⵉⵔ ⵄⴰⴷ ⵓ ⵍⵃⵓⴽⴽⴰⵎ ⵏⵏⴻⵙ ⵖⴰⵔ ⵜⴻⴼⴼⵓⵜ ⵜⵜᵉⵜⵜⴻⵏ! ■
17 ⵙⵙⴻⵄⴷ ⵏⵏⴻⵎ, ⴰ ⵜⴰⵎⵎⵓⵔⵜ, ⴰⵊⴻⴵⵉⴷ ⵏⵏⴻⵙ ⴷ ⵎⵎⵉⵙ ⵏ ⵜⴰⵔⵡⴰ ⵏ ⵜⴰⵚⵉⵍⴻⵜ ⵏⵏⴻⵙ ⵓ ⵍⵃⵓⴽⴽⴰⵎ ⵏⵏⴻⵙ ⵜⵜᵉⵜⵜⴻⵏ ⵖⴰⵔ ⵍⵡⴻⵇⵜ ⵉⵜⵜⵡⴰⴳⴳⴻⵏ, ⵎⴰⵃⴻⵏⴷ ⴰⴷ ⵜⵜⵡⴰⵎⴻⵃⴷⴻⵏ, ⵡⴰⵔ ⵉⴵⵉ ⵎⴰⵃⴻⵏⴷ ⴰⴷ ⵙⴽⴰⵔⴻⵏ.
18 ⵙ ⵍⴻⵄⴳⴻⵥ ⵉ ⴷⴷ-ⵜⵀⴻⴽⴽⵡⴰ ⵍⵅⴻⴷⵎⴻⵜ ⵏ ⵜⵥⴻⵇⵇⴰ ⵓ ⵙ ⵉⴼⴰⵙⵙⴻⵏ ⵢⴰⵔⴻⵀⴼⴻⵏ ⴳⴳⵓⵔ ⴰⴷ ⵜⵓⴷⵓⵎ ⵜⴰⴷⴷⴰⵔⵜ.
19 ⴱⵏⴰⴷⴻⵎ ⵉⵜⵜⴻⴳⴳ ⴰⵖⵔⵓⵎ ⵎⴰⵃⴻⵏⴷ ⴰⴷ ⵉⴹⵀⴻⵛ, ⵓ ⴱⵉⵏⵓ ⵉⵙⵙⴼⴰⵔⵔⴰⵃ ⵉⵏⵏⵉ ⵉⴷⴷⴰⵔⴻⵏ ⵓ ⵜⵜⵎⴻⵏⵢⴰⵜ ⵏⴻⴼⴼⵄⴻⵏⵜ ⵉ ⵎⴰⵔⵔⴰ ⵎⵉⵏ ⵉⴵⴰⵏ.
20 ⵡⴰⵔ ⵏⴻⵄⵄⴻⵍ ⴰⵊⴻⴵⵉⴷ ⵡⴰⵅⵅⴰ ⵖⴰⵔ ⴷⵉ ⵍⴱⴰⵍ ⵏⵏⴻⵛ, ⴷⴻⴳ ⵡⴻⵅⵅⴰⵎ ⵏ ⵢⵉⴹⴻⵙ ⵡⴰⵔ ⵏⴻⵄⵄⴻⵍ ⴱⵓ-ⵡⴰⴳⵍⴰ, ⵎⴰⵖⴰⵔ ⵉⵊⴹⴰⴹ ⵏ ⵓⵊⴻⵏⵏⴰ ⵥⴻⵎⵎⴰⵔⴻⵏ ⴰⴷ ⵙⵙⵓⵢⵓⵔⴻⵏ ⵍⵃⴻⵙⵙ ⵏ ⵡⴰⵡⴰⵍⴻⵏ ⵏⵏⴻⴽ ⵓ ⴰⵎⵎⵓ ⵎⴰⵔⵔⴰ ⵡⵉ ⵖⴰⵔ ⴵⴰⵏ ⵡⴰⴼⵔⵉⵡⴻⵏ ⵉⵥⴻⵎⵎⴰⵔ ⴰⴷ ⵉⵙⵙⴻⵄⴷⵓ ⴰⵡⴰⵍ. ■