1 ⵖⴰⵔ ⵉⵖⴻⵥⵔⴰⵏ ⵏ ⴱⴰⴱⵉⵍ, ⴷⵉⵏⵏⵉ ⵉ ⵜⵓⵖⴰ ⵏⴻⵜⵜⵖⵉⵎⴰ,

ⵏⵔⵓ ⵄⴰⵡⴻⴷ ⵅⵎⵉ ⵜⵓⵖⴰ ⵏⴻⵜⵜⵉⴷⴰⵔ ⵚⵉⵀⵢⵓⵏ.

2 ⵏⵓⵢⴻⵍ ⵍⴳⴰⵎⴱⵔⵉⵢⴰⵜ ⵏⵏⴻⵖ ⵖⴰⵔ ⵉⵚⴻⴼⵚⴰⴼⴻⵏ ⵉ ⵉⴵⴰⵏ ⴷⵉ ⵍⵡⴻⵙⵜ ⵏⵏⴻⵙ.

3 ⵎⴰⵖⴰⵔ ⵉⵏⵏⵉ ⴷ ⴰⵏⴻⵖ ⵉⵃⴻⴱⴱⵙⴻⵏ

ⵜⵜⴰⵔⴻⵏ ⵥⵥⴰⵢⵏⴻⵖ ⴷⵉⵏⵏⵉ ⴰⴷ ⵏⵖⴻⵏⵏⴻⵊ ⴰⵡⴰⵍⴻⵏ ⵏ ⵉⵊⵊ ⵏ ⵢⴻⵥⵍⵉ,

ⵉⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ ⵜⵜⴰⵔⴻⵏ ⵛⴰ ⵏ ⵍⵃⴰⵊⵊⴻⵜ ⵉⵙⵙⴻⴼⵔⴰⵃⴻⵏ,

ⵏⵏⴰⵏ: “ⵖⴻⵏⵏⵊⴻⵎ ⵥⴻⵄⵎⴰ ⵉⵊⵊ ⵥⴻⴳ ⵉⵥⵍⴰⵏ ⵏ ⵚⵉⵀⵢⵓⵏ ⵉ ⵏⴻⵛⵛⵉⵏ!” ^■  

4 ⵎⴰⵎⵎⴻⵛ ⵏⵥⴻⵎⵎⴰⵔ ⴰⴷ ⵏⵖⴻⵏⵏⴻⵊ ⵉⵊⵊ ⵏ ⵢⴻⵥⵍⵉ ⵏ ⵙⵉⴷⵉ,

ⴷⵉ ⵜⴻⵎⵎⵓⵔⵜ ⵏ ⵎⵉⴷⴷⴻⵏ?

5 ⵎⴰⵍⴰ ⵏⴻⵛⵛ ⵜⵜⵓⵖ ⵛⴻⵎ, ⴰ ⵓⵔⵛⴰⵍⵉⵎ,

ⵅⴻⵏⵏⵉ ⵉⵍⵉ ⴰⵅⵎⵉ ⵎⴰⵍⴰ ⴰⴼⵓⵙ ⴰⴼⵓⵙⵉ ⵉⵜⵜⵓ ⵉⵅⴻⴼ ⵏⵏⴻⵙ.

6 ⴻⵊⵊ ⴰⴷ ⴰⵢⵉ ⵉⵍⵚⴻⵇ ⵉⵍⴻⵙ ⵉⵏⵓ ⵅ ⵡⴰⵏⴻⵖ ⵉⵏⵓ,

ⵎⴰⵍⴰ ⵡⴰⵔ ⵛⴻⵎ ⵜⵜⵉⴷⴰⵔⴻⵖ,

ⵎⴰⵍⴰ ⵡⴰⵔ ⵙⵙⵄⵓⴵⵉⵖ ⵓⵔⵛⴰⵍⵉⵎ ⵅ ⵍⴻⴼⵔⴰⵃⴻⵜ ⵉⵏⵓ ⵜⴰⵎⴻⵇⵇⵔⴰⵏⵜ ⵇⴰⵄ.

7 ⴰ ⵙⵉⴷⵉ, ⵄⵇⴻⵍ ⵅ ⴰⵢⵜ ⵏ ⵉⴷⵓⵎ, ⴷⴻⴳ ⵡⴰⵙⵙ ⵏ ⵓⵔⵛⴰⵍⵉⵎ,

ⵉⵏⵏⵉ ⵉⵇⵇⴰⵔⴻⵏ: “ⵄⴰⵔⵔⴰⵎ ⵜⵜ, ⵄⴰⵔⵔⴰⵎ ⵜⵜ, ⴰⵍ ⴷⵙⴰⵙ ⵏⵏⴻⵙ!” ^■  

8 ⴰ ⵢⴻⴵⵉⵙ ⵏ ⴱⴰⴱⵉⵍ, ⵛⴻⵎ ⵜⴻⵏⵏⵉ ⵉⵜⵜⵡⴰⵙⵃⵓⵥⴻⵏ ⵉ ⵡⴰⵔⴻⴷⴷⴻⴵ,

ⵙⵙⴻⵄⴷ ⵏ ⵢⵉⵏⵏⵉ ⴷ ⴰⵎ ⵉ ⵖⴰ ⵉⵅⴻⴵⵚⴻⵏ ⵜⴰⵎⴻⴳⴳⵉⵜ ⵉⵄⴻⴼⴼⵏⴻⵏ ⵉ ⴷⴰⵢⵏⴻⵖ ⵜⴻⴳⴳⵉⴷ. ^■  

9 ⵙⵙⴻⵄⴷ ⵏ ⵡⴻⵏⵏⵉ ⵉ ⵖⴰ ⵉⵟⵟⴼⴻⵏ ⵉⵃⴻⵏⵊⵉⵔⴻⵏ ⵏⵡⴻⵏ ⵉⵎⴻⵥⵢⴰⵏⴻⵏ,

ⴰⴷ ⵜⴻⵏ ⵜⴻⵍⴱⴻⵥ ⵅ ⵜⴻⵚⴹⴰⵔⵜ.