119
1 ⴰⵍⵉⴼ. ⵙⵙⴻⵄⴷ ⵏⵙⴻⵏ ⵉ ⵢⵉⵏⵏⵉ ⵉⴽⴻⵎⵎⵍⴻⵏ ⴰⴱⵔⵉⴷ ⵏ ⵜⵓⴷⴰⵔⵜ ⵏⵙⴻⵏ ⴱⵍⴰ ⵍⵄⵉⴱ, ⵉⵏⵏⵉ ⵉⴳⴳⵓⵔⴻⵏ ⵅ ⵡⴻⴱⵔⵉⴷ ⵏ ⵛⵛⴰⵔⵉⵄⴰ ⵏ ⵙⵉⴷⵉ. ■
2 ⵙⵙⴻⵄⴷ ⵏⵙⴻⵏ ⵉ ⵢⵉⵏⵏⵉ ⵉⵃⴻⵟⵟⴰⵏ ⵛⵛⵀⴰⴷⴰⵜ ⵏⵏⴻⵙ,
ⵉⵏⵏⵉ ⵅⴰⵙ ⵢⴰⵔⴻⵥⵥⵓⵏ ⵙ ⵎⴰⵔⵔⴰ ⵓⵍ ⵏⵙⴻⵏ.
3 ⵏⵉⵜⵏⵉ ⵡⴰⵔ ⵜⵜⴻⴳⴳⴻⵏ ⵍⵖⴻⵛⵛ,
ⵎⴰⵛⴰ ⴳⴳⵓⵔⴻⵏ ⴷⴻⴳ ⵉⴱⵔⵉⴷⴻⵏ ⵏⵏⴻⵙ.
4 ⴰ ⵙⵉⴷⵉ, ⵛⴻⴽ ⵜⵓⵎⴰⵔⴻⴷ
ⵎⴰⵃⴻⵏⴷ ⴱⵏⴰⴷⴻⵎ ⴰⴷ ⵉⵃⴹⴰ ⵜⵉⵡⴻⵚⵚⴰ ⵏⵏⴻⴽ ⵏⵉⵛⴰⵏ.
5 ⵎⵍⵉ ⵇⴰⵄ ⵉⴱⵔⵉⴷⴻⵏ ⵉⵏⵓ ⵜⵜⵡⴰⵙⴻⴳⴳⴷⴻⵏ,
ⵎⴰⵃⴻⵏⴷ ⴰⴷ ⵃⴹⵉⵖ ⵜⵉⵡⴻⵚⵚⴰ ⵏⵏⴻⴽ,
6 ⵅⴻⵏⵏⵉ ⵄⴻⵎⵎⴰⵔⵚ ⴰⴷ ⵙⴻⴹⵃⵉⵖ
ⵎⴰⵍⴰ ⵅⴻⵥⵥⴰⵔⴻⵖ ⵖⴰⵔ ⵎⴰⵔⵔⴰ ⵜⵉⵡⴻⵚⵚⴰ ⵏⵏⴻⴽ.
7 ⵙ ⵡⵓⵍ ⵉⵇⵇⵓⵔ ⴰⴷ ⵛⴻⴽ ⵇⴰⴷⵉⵖ,
ⵎⴰⵍⴰ ⵏⴻⵛⵛ ⵍⴻⵎⴷⴻⵖ ⵍⴻⵃⴽⴰⵎⴰⵜ ⵏⵏⴻⴽ ⵉⵙⴻⴳⴳⴷⴻⵏ.
8 ⴰⴷ ⵃⴹⵉⵖ ⵜⵉⵡⴻⵚⵚⴰ ⵏⵏⴻⴽ!
ⵡⴰⵔ ⴷⴰⵢⵉ ⵙⴻⵎⵎⴻⵃ ⵎⴰⵔⵔⴰ!
9 ⴱⵉⵜ. ⵎⴰⵎⵎⴻⵛ ⵉ ⵖⴰ ⵉⵙⵙⵉⵥⴷⴻⴳ ⵉⵊⵊ ⵏ ⵓⴱⵍⵉⵖ ⴰⴱⵔⵉⴷ ⵏⵏⴻⵙ?
ⵙ ⵡⴻⵎⵏⴰⵄ ⵏⵏⴻⵙ ⴷⴻⴳ ⵡⴰⵡⴰⵍ ⵏⵏⴻⴽ.
10 ⵏⴻⵛⵛ ⴰⵔⴻⵥⵥⵓⵖ ⵅⴰⴽ ⵙ ⵡⵓⵍ ⵉⵏⵓ ⵎⴰⵔⵔⴰ,
ⵡⴰⵔ ⴷ ⴰⵢⵉ ⵜⵜⴻⵊⵊⵉ ⴰⴷ ⴼⴼⵖⴻⵖ ⵅ ⵍⵓⵎⵓⵔⴰⵜ ⵏⵏⴻⴽ.
11 ⵎⵉⵏ ⵜⴻⵇⵇⴰⵔⴻⴷ ⵛⴻⴽ, ⵅⴻⵎⵎⵍⴻⵖ ⵜ ⴷⴻⴳ ⵡⵓⵍ ⵉⵏⵓ,
ⵎⴰⵃⴻⵏⴷ ⵡⴰⵔ ⴽⵉⴷⴻⴽ ⵅⴻⵟⵟⵉⵖ.
12 ⵜⴻⵜⵜⵡⴰⴱⴰⵔⴽⴻⴷ ⵛⴻⴽ, ⴰ ⵙⵉⴷⵉ,
ⵙⴻⵍⵎⴻⴷ ⴰⵢⵉ ⵜⵉⵡⴻⵚⵚⴰ ⵏⵏⴻⴽ.
13 ⵙ ⵉⵢⴻⵏⵛⵉⵛⴻⵏ ⵉⵏⵓ ⴱⴰⵔⵔⵃⴻⵖ
ⵎⴰⵔⵔⴰ ⵍⴼⴰⵔⴰⵢⵉⴹ ⵏ ⵓⵇⴻⵎⵎⵓⵎ ⵏⵏⴻⴽ.
14 ⴰⵇⴰ ⴼⴰⵔⵃⴻⵖ ⵙ ⵡⴻⴱⵔⵉⴷ ⵏ ⵛⵛⵀⴰⴷⴰⵜ ⵏⵏⴻⴽ,
ⴰⵎ ⵅ ⵎⴰⵔⵔⴰ ⵎⵉⵏ ⵉⴵⴰⵏ ⵉⵖⵍⴰ.
15 ⴰⴷ ⵅⴰⵔⵔⵚⴻⵖ ⴷⵉ ⵍⵓⵎⵓⵔⴰⵜ ⵏⵏⴻⴽ,
ⴰⴷ ⵅⴻⵥⵥⴰⵔⴻⵖ ⵖⴰⵔ ⵉⵎⴻⵙⵔⴰⵇ ⵏⵏⴻⴽ.
16 ⵏⴻⵛⵛ ⴹⴰⴼⴼⴰⵔⴻⵖ ⵜⵉⵡⴻⵚⵚⴰ ⵏⵏⴻⴽ,
ⴰⵡⴰⵍ ⵏⵏⴻⴽ ⵡⴰⵔ ⵜ ⵜᵉⵜⵜⵓⵖ.
17 ⴳⵉⵎⴻⵍ. ⴻⴳⴳ ⵜⵛⵓⵏⵉ ⵉ ⵓⵎⵙⴻⵅⵅⴰⵔ ⵏⵏⴻⴽ,
ⵎⴰⵃⴻⵏⴷ ⴰⴷ ⴷⴷⴰⵔⴻⵖ ⵓ ⴰⴷ ⵃⴹⵉⵖ ⴰⵡⴰⵍ ⵏⵏⴻⴽ. ■
18 ⴰⵔⵥⴻⵎ ⴰⵢⵉ ⵜⵉⵟⵟⴰⵡⵉⵏ ⵉⵏⵓ,
ⵃⵉⵎⴰ ⴰⴷ ⵥⴰⵔⴻⵖ ⵍⵎⵓⵄⵊⵉⵥⴰⵜ ⵏ ⵛⵛⴰⵔⵉⵄⴰ ⵏⵏⴻⴽ.
19 ⵏⴻⵛⵛ ⴰⵇⴰ ⴰⵢⵉ ⴷ ⴰⴱⴰⵔⵔⴰⵏⵉ ⵅ ⵜⴻⵎⵎⵓⵔⵜ,
ⵡⴰⵔ ⵅⴰⴼⵉ ⵜⴻⴼⴼⴰⵔ ⵍⵓⵎⵓⵔⴰⵜ ⵏⵏⴻⴽ. ■
20 ⵍⴻⵄⵎⴰⵔ ⵉⵏⵓ ⵉⵜⵜⵡⴰⴼⵏⴰ,
ⵙ ⵓⵡⴻⵃⵃⴻⵛ ⵖⴰⵔ ⵍⴼⴰⵔⴰⵢⵉⴹ ⵏⵏⴻⴽ.
21 ⵛⴻⴽ ⵜⵄⴰⵇⴱⴻⴷ ⵉⵎⵄⴻⴼⴼⴰⵔⴻⵏ ⵉⵜⵜⵡⴰⵏⴻⵄⵍⴻⵏ,
ⵉⵏⵏⵉ ⵉⵜⵜⴻⴼⴼⵖⴻⵏ ⵅ ⵍⵓⵎⵓⵔⴰⵜ ⵏⵏⴻⴽ.
22 ⴽⵙⵉ ⵅⴰⴼⵉ ⵍⴻⴼⴹⵉⵃⴻⵜ ⴷ ⵓⵙⴻⵃⵇⴰⵔ,
ⵎⴰⵖⴰⵔ ⵃⴹⵉⵖ ⵛⵛⵀⴰⴷⴰⵜ ⵏⵏⴻⴽ.
23 ⵓⵍⴰ ⴷ ⵍⵃⵓⴽⴽⴰⵎ ⵇⵇⵉⵎⴻⵏ, ⵙⵙⴰⵡⴰⵍⴻⵏ ⴰⴽ-ⴷ ⵡⴰⵢⴰⵡⵢⴰ ⵅⴰⴼⵉ,
ⵎⴰⵛⴰ ⴰⵎⵙⴻⵅⵅⴰⵔ ⵏⵏⴻⴽ ⵉⵜⵜⵅⴰⵔⵔⴻⵚ ⴷⵉ ⵜⵡⴻⵚⵚⴰ ⵏⵏⴻⴽ.
24 ⵛⵛⵀⴰⴷⴰⵜ ⵏⵏⴻⴽ ⴷ ⵎⴻⵥⵔⵉ ⵉⵏⵓ,
ⴰⵇⴰ-ⵜⴻⵏⵜ ⴷ ⵉⵎⵛⴰⵡⴰⵔⴻⵏ ⵉⵏⵓ. ■
25 ⴷⴰⵍⵉⵜ. ⵍⴻⵄⵎⴰⵔ ⵉⵏⵓ ⵉⵍⵚⴻⵇ ⵖⴰⵔ ⵜⵄⴻⵊⵊⴰⵊⵜ,
ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⵄⵍⴰⵃⵙⴰⴱ ⴰⵡⴰⵍ ⵏⵏⴻⴽ.
26 ⵏⴻⵛⵛ ⵏⴻⵄⵎⴻⵖ ⵉ ⵛⴻⴽ ⵅ ⵉⴱⵔⵉⴷⴻⵏ ⵉⵏⵓ ⵓ ⵛⴻⴽ ⵜⴻⵙⵜⴰⵊⴱⴻⴷ ⴰⵢⵉ.
ⵙⴻⵍⵎⴻⴷ ⴰⵢⵉ ⵜⵉⵡⴻⵚⵚⴰ ⵏⵏⴻⴽ. ■
27 ⴰⵔⵔ ⴰⵢⵉ ⴰⴷ ⴼⴻⵀⵎⴻⵖ ⴰⴱⵔⵉⴷ ⵏ ⵍⵓⵎⵓⵔⴰⵜ ⵏⵏⴻⴽ,
ⴰⴷ ⵅⴰⵔⵔⵚⴻⵖ ⴷⵉ ⵍⵎⵓⵄⵊⵉⵥⴰⵜ ⵏⵏⴻⴽ.
28 ⵍⴻⵄⵎⴰⵔ ⵉⵏⵓ ⵉⴼⵙⵉ ⵙ ⵡⴻⵛⴹⴰⵏ,
ⵙⴻⴳⴳⴻⵎ ⴰⵢⵉ ⵖⴰⵔ ⵡⴻⴱⵔⵉⴷ ⵏ ⵡⴰⵡⴰⵍ ⵏⵏⴻⴽ.
29 ⵙⵉⴳⴳⵯⴻⵊ ⴰⵢⵉ ⵅ ⵡⴻⴱⵔⵉⴷ ⵏ ⵉⵅⴰⵔⵔⵉⵇⴻⵏ,
ⵃⵉⵏⵏ ⵅⴰⴼⵉ ⵙ ⵛⵛⴰⵔⵉⵄⴰ ⵏⵏⴻⴽ.
30 ⵏⴻⵛⵛ ⵉⵅⴹⴰⵔⴻⵖ ⴰⴱⵔⵉⴷ ⵏ ⵜⵉⴷⴻⵜⵜ,
ⵙⵙⴰⵔⵙⴻⵖ ⵍⴼⴰⵔⴰⵢⵉⴹ ⵏⵏⴻⴽ ⵥⵥⴰⵜⵉ.
31 ⵏⴻⵛⵛ ⵛⴻⴱⴱⴰⵔⴻⵖ ⴷⵉ ⵛⵛⵀⴰⴷⴰⵜ ⵏⵏⴻⴽ, ⴰ ⵙⵉⴷⵉ,
ⵡⴰⵔ ⴷ ⴰⵢⵉ ⵜⵜⴻⵊⵊⵉ ⴰⴷ ⵙⴻⴹⵃⵉⵖ.
32 ⵏⴻⵛⵛ ⴰⴷ ⴹⴼⴰⵔⴻⵖ ⴰⴱⵔⵉⴷ ⵏ ⵍⵓⵎⵓⵔⴰⵜ ⵏⵏⴻⴽ,
ⵎⴰⵖⴰⵔ ⵛⴻⴽ ⵜⴻⴳⴳⵉⴷ ⵜⵜⴰⵙⵉⵄ ⵉ ⵡⵓⵍ ⵉⵏⵓ.
33 ⵀⵉ. ⴰ ⵙⵉⴷⵉ! ⵙⴻⵍⵎⴻⴷ ⴰⵢⵉ ⴰⴱⵔⵉⴷ ⵏ ⵜⵡⴻⵚⵚⴰ ⵏⵏⴻⴽ,
ⵅⴻⵏⵏⵉ ⵏⴻⵛⵛ ⴰⴷ ⴷⴰⵢⴻⵙ ⵟⵟⴼⴻⵖ ⴰⵍ ⴰⵏⴻⴳⴳⴰⵔ.
34 ⴻⵡⵛ ⴰⵢⵉ ⵍⴻⴼⵀⴰⵎⴻⵜ, ⵅⴻⵏⵏⵉ ⵏⴻⵛⵛ ⴰⴷ ⵃⴹⵉⵖ ⵛⵛⴰⵔⵉⵄⴰ ⵏⵏⴻⴽ,
ⵓ ⴰⴷ ⴷⴰⵢⴻⵙ ⵟⵟⴼⴻⵖ ⵙ ⵡⵓⵍ ⵉⵏⵓ ⵎⴰⵔⵔⴰ.
35 ⵏⴷⴻⵀ ⴰⵢⵉ ⵅ ⵡⴻⴱⵔⵉⴷ ⵏ ⵍⵓⵎⵓⵔⴰⵜ ⵏⵏⴻⴽ,
ⵎⵉⵏⵥⵉ ⴼⴰⵔⵔⵃⴻⵖ ⵥⵥⴰⵢⴻⵙ.
36 ⴰⵔⵔ ⵓⵍ ⵉⵏⵓ ⵖⴰⵔ ⵛⵛⵀⴰⴷⴰⵜ ⵏⵏⴻⴽ,
ⵡⴰⵔ ⵉⴵⵉ ⵖⴰⵔ ⵟⵟⵎⴻⵄ ⵏ ⴰⵔⴱⴻⵃ.
37 ⵙⵀⴻⵢⵢⴻⴹ ⵜⵉⵟⵟⴰⵡⵉⵏ ⵉⵏⵓ ⵅ ⵍⴱⴰⵟⴻⵍ,
ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⵙ ⵉⴱⵔⵉⴷⴻⵏ ⵏⵏⴻⴽ.
38 ⴹⵎⴻⵏ ⵎⵉⵏ ⵜⴻⵏⵏⵉⴷ ⵉ ⵓⵎⵙⴻⵅⵅⴰⵔ ⵏⵏⴻⴽ,
ⵡⴻⵏⵏⵉ ⵛⴻⴽ ⵉⵜⵜⴻⴳⴳⵯⴷⴻⵏ.
39 ⵙⵃⴻⵢⵢⴻⴹ ⵅⴰⴼⵉ ⵍⴻⴼⴹⵉⵃⴻⵜ ⵉ ⵥⵉ ⵜⵜⴻⴳⴳⵯⴻⴷⴻⵖ,
ⵎⴰⵖⴰⵔ ⵍⴼⴰⵔⴰⵢⵉⴹ ⵏⵏⴻⴽ ⵛⵏⴰⵏⵜ.
40 ⵅⵥⴰⵔ, ⵜⵜⵡⴻⵃⵃⵛⴻⵖ ⵍⵓⵎⵓⵔⴰⵜ ⵏⵏⴻⴽ,
ⴰⵔⵔ ⴰⵢⵉ ⴷⴷⴰⵔⴻⵖ ⵙ ⵜⵙⴻⴳⴷⴰ ⵏⵏⴻⴽ.
41 ⵡⴰⵡ. ⴻⵊⵊ ⴰⴷ ⵖⴰⵔⵉ ⴷⴷ-ⵜⴰⵙ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ,
ⴰⵙⴻⵏⵊⴻⵎ ⵏⵏⴻⴽ ⴰⵇⴰ-ⵜ ⴰⵎ ⵎⴰⵎⵎⴻⵛ ⵉ ⵜⴻⵏⵏⵉⴷ ⵛⴻⴽ.
42 ⵃⵉⵎⴰ ⵥⴻⵎⵎⴰⵔⴻⵖ ⴰⴷ ⴰⵔⵔⴻⵖ ⵅ ⵡⴻⵏⵏⵉ ⵥⵥⴰⵢⵉ ⵉⵙⵙⴱⴻⵀⴷⴰⵍⴻⵏ,
ⵎⴰⵖⴰⵔ ⵜⵜⴻⵛⵍⴻⵖ ⵅ ⵡⴰⵡⴰⵍ ⵏⵏⴻⴽ.
43 ⵡⴰⵔ ⵜⵜⴻⴽⴽⴻⵙ ⴰⵡⴰⵍ ⵏ ⵜⵉⴷⴻⵜⵜ ⵇⴰⵄ ⵥⴻⴳ ⵓⵇⴻⵎⵎⵓⵎ ⵉⵏⵓ,
ⵎⴰⵖⴰⵔ ⵜⵜⵔⴰⵊⵉⵖ ⵍⴼⴰⵔⴰⵢⵉⴹ ⵏⵏⴻⴽ.
44 ⵏⴻⵛⵛ ⴰⴷ ⵃⴹⵉⵖ ⵛⵛⴰⵔⵉⵄⴰ ⵏⵏⴻⴽ ⴱⵍⴰ ⵇⴻⵟⵟⵓ,
ⵉ ⵍⴻⴱⴷⴰ ⵇⴰⵄ.
45 ⵏⴻⵛⵛ ⴳⴳⵓⵔⴻⵖ ⴷⵉ ⵜⵜⴰⵙⵉⵄ,
ⵎⴰⵖⴰⵔ ⴰⵔⵥⵓⵖ ⵅ ⵍⵓⵎⵓⵔⴰⵜ ⵏⵏⴻⴽ.
46 ⴰⴷ ⵙⵙⵉⵡⵍⴻⵖ ⵅ ⵛⵛⵀⴰⴷⴰⵜ ⵏⵏⴻⴽ ⵥⵥⴰⵜ ⵉ ⵉⵊⴻⴵⵉⴷⴻⵏ,
ⵡⴰⵔ ⵥⵥⴰⵜⵙⴻⵏ ⵜⵜⵙⴻⴹⵃⵉⵖ ⵛⴰ.
47 ⴰⴷ ⴰⵔⵔⴻⵖ ⵎⴻⵥⵔⵉ ⴷⵉ ⵍⵓⵎⵓⵔⴰⵜ ⵏⵏⴻⴽ,
ⵜⵉⵏⵏⵉ ⵉ ⵜⵜⴻⵅⵙⴻⵖ.
48 ⵏⴻⵛⵛ ⴰⴷ ⴽⵙⵉⵖ ⵉⴼⴰⵙⵙⴻⵏ ⵉⵏⵓ
ⵇⵉⴱⴰⵍ ⵉ ⵍⵓⵎⵓⵔⴰⵜ ⵏⵏⴻⴽ, ⵜⵉⵏⵏⵉ ⵉ ⵜⵜⴻⵅⵙⴻⵖ,
ⴰⴷ ⵅⴰⵔⵔⵚⴻⵖ ⴷⵉ ⵜⵡⴻⵚⵚⴰ ⵏⵏⴻⴽ.
49 ⵣⴰⵢⵉⵏ. ⵄⵇⴻⵍ ⵅ ⵡⴰⵡⴰⵍ ⵉ ⵜⴻⵏⵏⵉⴷ ⵉ ⵓⵎⵙⴻⵅⵅⴰⵔ ⵏⵏⴻⴽ,
ⵎⵉⵏ ⵅⴻⴼ ⵜⵓⵢⵍⴻⴷ ⴰⵙⵉⵜⴻⵎ ⵉⵏⵓ.
50 ⴷ ⵡⴰ ⴷ ⴰⴼⴻⵡⵡⴻⵊ ⵉⵏⵓ ⵅ ⵍⴻⵎⵃⴰⵢⴻⵏ ⵉⵏⵓ,
ⵎⴰⵖⴰⵔ ⵍⵡⴰⵄⴷ ⵏⵏⴻⴽ ⵢⴰⵔⵔⴰ-ⴷⴷ ⴷⴰⵢⵉ ⵜⵓⴷⴰⵔⵜ.
51 ⵉⵎⵄⴻⴼⴼⴰⵔⴻⵏ ⵃⴻⵛⵛⴻⵏ ⴰⵢⵉ-ⴷⴷ ⴰⵡⴰⵍ ⴰⵍ ⵟⵟⴰⵔⴼ,
ⵎⴰⵛⴰ ⵏⴻⵛⵛ ⵡⴰⵔ ⵃⴻⵢⵢⵉⴷⴻⵖ ⵛⴰ ⵅ ⵛⵛⴰⵔⵉⵄⴰ ⵏⵏⴻⴽ.
52 ⵏⴻⵛⵛ ⵅⴰⵔⵔⵚⴻⵖ ⴷⵉ ⵍⴼⴰⵔⴰⵢⵉⴹ ⵏⵏⴻⴽ ⵏ ⵍⴻⴱⴷⴰ, ⴰ ⵙⵉⴷⵉ,
ⵅⴻⵏⵏⵉ ⴰⵇⴰ ⵜⵜⵡⴰⴼⴻⵡⵡⵊⴻⵖ.
53 ⵜⴰⴼⵇⴻⵃⵜ ⵜᵉⵟⵟⴻⴼ ⴰⵢⵉ ⴷⵉ ⵙⵙⵉⴱⴱⴻⵜ ⵏ ⵉⵄⴻⴼⴼⴰⵏⴻⵏ,
ⵉⵏⵏⵉ ⵉⵙⴻⵎⵎⵃⴻⵏ ⴷⵉ ⵛⵛⴰⵔⵉⵄⴰ ⵏⵏⴻⴽ.
54 ⵜⵉⵡⴻⵚⵚⴰ ⵏⵏⴻⴽ ⵜⵓⵖⴰ ⴰⵜⴻⵏⵜ ⴷ ⵉⵥⵍⴰⵏ ⵉⵏⵓ,
ⴷⵉ ⵜⴰⴷⴷⴰⵔⵜ ⵏ ⵜⴱⴰⵔⵔⴰⵏⴻⵛⵜ ⵉⵏⵓ.
55 ⴷⵉ ⴵⵉⵍⴻⵜ ⵜⵓⵖⴰ ⵜⵜⵅⴰⵔⵔⵚⴻⵖ ⴷⴻⴳ ⵢⵉⵙⴻⵎ ⵏⵏⴻⴽ, ⴰ ⵙⵉⴷⵉ,
ⵓ ⵃⴹⵉⵖ ⵛⵛⴰⵔⵉⵄⴰ ⵏⵏⴻⴽ. ■
56 ⴰⵎⵎⵓ ⵉ ⴷ ⴰⵢⵉ ⵉⵎⵙⴰⵔ,
ⵎⴰⵖⴰⵔ ⵃⴹⵉⵖ ⵍⵓⵎⵓⵔⴰⵜ ⵏⵏⴻⴽ.
57 ⵅⵉⵜ. ⵙⵉⴷⵉ ⴷ ⵜⴰⵙⵖⴰⵔⵜ ⵉⵏⵓ,
ⵏⴻⵛⵛ ⵏⵏⵉⵖ ⴰⴷ ⵃⴹⵉⵖ ⴰⵡⴰⵍⴻⵏ ⵏⵏⴻⴽ.
58 ⵃⴻⵛⵛⵎⴻⵖ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⵙ ⵎⴰⵔⵔⴰ ⵡⵓⵍ ⵉⵏⵓ,
ⵃⵉⵏⵏ ⵅⴰⴼⵉ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⴻⵏⵏⵉⴷ.
59 ⵏⴻⵛⵛ ⵅⴰⵔⵔⵚⴻⵖ ⴷⴻⴳ ⵉⴱⵔⵉⴷⴻⵏ ⵉⵏⵓ,
ⴰⴷ ⵙⵙⵄⴻⵇⴱⴻⵖ ⵉⵚⵓⵔⴰⴼ ⵏ ⵉⴹⴰⵔⴻⵏ ⵉⵏⵓ ⵖⴰⵔ ⵛⵛⵀⴰⴷⴰⵜ ⵏⵏⴻⴽ.
60 ⵏⴻⵛⵛ ⵇⴻⴵⵇⴻⵖ, ⵡⴰⵔ ⵄⴻⵟⵟⴰⵍⴻⵖ ⵛⴰ,
ⵃⵉⵎⴰ ⴰⴷ ⵃⴹⵉⵖ ⵍⵓⵎⵓⵔⴰⵜ ⵏⵏⴻⴽ.
61 ⵉⵙⴻⵖⵡⴰⵏ ⵏ ⵉⵄⴻⴼⴼⴰⵏⴻⵏ ⵛⴰⵔⵔⴼⴻⵏ ⴰⵢⵉ,
ⵎⴰⵛⴰ ⵡⴰⵔ ⵜⵜᵉⵜⵜⵓⵖ ⵛⵛⴰⵔⵉⵄⴰ ⵏⵏⴻⴽ.
62 ⵖⴰⵔ ⵡⴻⵥⵢⴻⵏ ⵏ ⴵⵉⵍⴻⵜ ⵜⵜⵏⴻⴽⴽⴰⵔⴻⵖ,
ⵃⵉⵎⴰ ⴰⴷ ⵛⴻⴽ ⵇⴰⴷⵉⵖ ⵅ ⵍⴼⴰⵔⴰⵢⵉⴹ ⵏⵏⴻⴽ ⵉⵙⴻⴳⴳⴷⴻⵏ.
63 ⵏⴻⵛⵛ ⴷ ⴰⵎⴻⴷⴷⵓⴽⴽⴻⵍ ⵏ ⵎⴰⵔⵔⴰ ⵉⵏⵏⵉ ⵛⴻⴽ ⵉⵜⵜⴻⴳⴳⵯⴻⴷⴻⵏ,
ⵏ ⵢⵉⵏⵏⵉ ⵉⵃⴻⵟⵟⴰⵏ ⵍⵓⵎⵓⵔⴰⵜ ⵏⵏⴻⴽ.
64 ⵣⵉ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⵜⴻⵛⵛⵓⵔ ⵜⴻⵎⵎⵓⵔⵜ ⵎⴰⵔⵔⴰ, ⴰ ⵙⵉⴷⵉ,
ⵙⴻⵍⵎⴻⴷ ⴰⵢⵉ ⵜⵉⵡⴻⵚⵚⴰ ⵏⵏⴻⴽ.
65 ⵜⵉⵜ. ⵛⴻⴽ ⵜⴻⴳⴳⵉⴷ ⵙ ⵜⵛⵓⵏⵉ ⵉ ⵓⵎⵙⴻⵅⵅⴰⵔ ⵏⵏⴻⴽ, ⴰ ⵙⵉⴷⵉ,
ⵄⵍⴰⵃⵙⴰⴱ ⴰⵡⴰⵍ ⵏⵏⴻⴽ.
66 ⵙⴻⵍⵎⴻⴷ ⴰⵢⵉ ⵎⴰⵃⴻⵏⴷ ⴰⴷ ⵎⴻⵢⵢⵥⴻⵖ ⵓ ⴰⴷ ⵙⵙⵏⴻⵖ ⵎⵍⵉⵃ,
ⵎⵉⵏⵥⵉ ⵜⵜⴻⵛⵍⴻⵖ ⵅ ⵍⵓⵎⵓⵔⴰⵜ ⵏⵏⴻⴽ.
67 ⵇⴱⴻⵍ ⵎⴰ ⵜⵜⵡⴰⵃⵚⴰⵔⴻⵖ, ⵡⴻⴷⴷⴰⵔⴻⵖ,
ⵎⴰⵛⴰ ⵍⴻⵅⵅⵓ ⵃⴻⵟⵟⵉⵖ ⵎⵉⵏ ⵜⴻⵇⵇⴰⵔⴻⴷ ⵛⴻⴽ.
68 ⵛⴻⴽ ⴷ ⴰⵚⴻⴱⵃⴰⵏ ⵓ ⵜᵉⵜⵜⴻⴳⴳⴻⴷ ⵎⵉⵏ ⵉⵚⴻⴱⵃⴻⵏ,
ⵙⴻⵍⵎⴻⴷ ⴰⵢⵉ ⵜⵉⵡⴻⵚⵚⴰ ⵏⵏⴻⴽ.
69 ⵉⵎⵄⴻⴼⴼⴰⵔⴻⵏ ⴰⵔⴻⵅⵅⵓⵏ-ⴷⴷ ⵅⴰⴼⵉ ⵉⵅⴰⵔⵔⵉⵇⴻⵏ,
ⵎⴰⵛⴰ ⵏⴻⵛⵛ ⵃⴻⵟⵟⵉⵖ ⵍⵓⵎⵓⵔⴰⵜ ⵏⵏⴻⴽ ⵙ ⵎⴰⵔⵔⴰ ⵓⵍ ⵉⵏⵓ.
70 ⵓⵍ ⵏⵙⴻⵏ ⵡⴰⵔ ⵉⵜⵜⴰⵛⴰⵏ ⴰⵎ ⵜⴰⴷⵓⵏⵜ,
ⵎⴰⵛⴰ ⵏⴻⵛⵛ, ⴰⵇⴰ ⵛⵛⴰⵔⵉⵄⴰ ⵏⵏⴻⴽ ⵜⵜⴰⴼⴻⵖ ⴷⴰⵢⴻⵙ ⵎⴻⵥⵔⵉ.
71 ⵜⵓⵖⴰ ⵉ ⵏⴻⵛⵛ ⵎⵍⵉⵃ ⵓⵎⵉ ⵜⵜⵡⴰⵃⵚⴰⵔⴻⵖ,
ⵎⴰⵖⴰⵔ ⴰⵎⵎⵓ ⵉ ⵍⴻⵎⴷⴻⵖ ⵜⵉⵡⴻⵚⵚⴰ ⵏⵏⴻⴽ.
72 ⵛⵛⴰⵔⵉⵄⴰ ⵥⴻⴳ ⵓⵇⴻⵎⵎⵓⵎ ⵏⵏⴻⴽ ⵖⴰⵔⵉ ⵉⵃⵍⴰ ⴰⵟⵟⴰⵙ
ⵅ ⵡⴰⵍⴰⴼ ⵏ ⵓⵇⵉⵢⵢⴰⵜ ⵏ ⵡⵓⵔⴻⵖ ⵏⵉⵖ ⵏ ⵏⵏⵓⵇⴰⵔⵜ. ■
73 ⵢⵓⴷ. ⵉⴼⴰⵙⵙⴻⵏ ⵏⵏⴻⴽ ⴳⴳⵉⵏ ⴰⵢⵉ, ⴽⴻⵡⵡⵏⴻⵏ ⴰⵢⵉ.
ⴻⵡⵛ ⴰⵢⵉ ⵍⴻⵄⵇⴻⵍ, ⵎⴰⵃⴻⵏⴷ ⴰⴷ ⵍⴻⵎⴷⴻⵖ ⵍⵓⵎⵓⵔⴰⵜ ⵏⵏⴻⴽ. ■
74 ⵉⵏⵏⵉ ⵛⴻⴽ ⵉⵜⵜⴻⴳⴳⵯⴻⴷⴻⵏ ⴰⴷ ⴰⵢⵉ ⵥⴰⵔⴻⵏ ⵓⵛⴰ ⴰⴷ ⴼⴰⵔⵃⴻⵏ,
ⵎⴰⵖⴰⵔ ⵜⵜⵔⴰⵊⵉⵖ ⴰⵡⴰⵍ ⵏⵏⴻⴽ.
75 ⵏⴻⵛⵛ ⵙⵙⵏⴻⵖ, ⴰ ⵙⵉⴷⵉ, ⴰⵇⴰ ⵙⴻⴳⴳⴷⴻⵏⵜ ⵍⴻⵃⴽⴰⵎⴰⵜ ⵏⵏⴻⴽ,
ⵓ ⴰⵇⴰ ⵛⴻⴽ ⵜⴻⵃⵚⴰⵔⴻⴷ ⴰⵢⵉ ⵙ ⵍⴰⵎⴰⵏ.
76 ⴻⵊⵊ ⴰⴷ ⵜⵉⵍⵉ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴷ ⴰⴼⴻⵡⵡⴻⵊ ⵉ ⵏⴻⵛⵛ,
ⴰⵎ ⵎⴰⵎⵎⴻⵛ ⵉ ⵜⴻⵏⵏⵉⴷ ⵉ ⵓⵎⵙⴻⵅⵅⴰⵔ ⵏⵏⴻⴽ.
77 ⴰⴷ ⵅⴰⴼⵉ ⴷⴷ-ⵜⴰⵙ ⴰⵔⵔⴻⵃⵎⴻⵜ ⵏⵏⴻⴽ,
ⵎⴰⵃⴻⵏⴷ ⴰⴷ ⴷⴷⴰⵔⴻⵖ, ⵎⴰⵖⴰⵔ ⵛⵛⴰⵔⵉⵄⴰ ⵏⵏⴻⴽ ⴷⴰⵢⴻⵙ ⵎⴻⵥⵔⵉ ⵉⵏⵓ.
78 ⴻⵊⵊ ⴰⴷ ⵙⵙⴻⴹⵃⴰⵏ ⵉⵎⵄⴻⴼⴼⴰⵔⴻⵏ,
ⵎⴰⵖⴰⵔ ⵙ ⵉⵅⴰⵔⵔⵉⵇⴻⵏ ⵙⵙⴼⴰⵔⵔⵖⴻⵏ ⴰⵢⵉ ⵚⵚⵉⴼⴻⵜ ⵉⵏⵓ,
ⵎⴰⵛⴰ ⵏⴻⵛⵛ ⵜⵅⴻⵎⵎⴰⵎⴻⵖ ⴷⵉ ⵍⵓⵎⵓⵔⴰⵜ ⵏⵏⴻⴽ.
79 ⴻⵊⵊ ⴰⴷ ⵖⴰⵔⵉ ⴷⴷ-ⴷⴻⵡⵍⴻⵏ ⵉⵏⵏⵉ ⵛⴻⴽ ⵉⵜⵜⴻⴳⴳⵯⴻⴷⴻⵏ,
ⵉⵏⵏⵉ ⵉⵙⵙⵏⴻⵏ ⵛⵛⵀⴰⴷⴰⵜ ⵏⵏⴻⴽ.
80 ⴻⵊⵊ ⴰⴷ ⵢⵉⵍⵉ ⵓⵍ ⵉⵏⵓ ⵉⵎⵓⵏ ⵖⴰⵔ ⵜⵡⴻⵚⵚⴰ ⵏⵏⴻⴽ,
ⵃⵉⵎⴰ ⵡⴰⵔ ⵜⵜⵙⴻⴹⵃⵉⵖ ⵛⴰ.
81 ⴽⴰⴼ. ⵍⴻⵄⵎⴰⵔ ⵉⵏⵓ ⵉⵙⵅⴻⴼ ⵥⵉ ⵎⴻⵥⵔⵉ ⵖⴰⵔ ⵓⵙⴻⵏⵊⴻⵎ ⵏⵏⴻⴽ,
ⴰⵇⴰ ⵜⵜⵔⴰⵊⵉⵖ ⴰⵡⴰⵍ ⵏⵏⴻⴽ.
82 ⵜⵉⵟⵟⴰⵡⵉⵏ ⵉⵏⵓ ⴷⴻⵇⵇⵍⴻⵏⵜ ⵥⵉ ⵎⴻⵥⵔⵉ ⵖⴰⵔ ⵎⵉⵏ ⵜⴻⵇⵇⴰⵔⴻⴷ ⵛⴻⴽ,
ⵓⵎⵉ ⵏⵏⵉⵖ: ‘ⵎⴻⵍⵎⵉ ⵉ ⵅⴰⴼⵉ ⵉ ⵖⴰ ⵜⴻⵙⵙⴼⴻⵡⵡⵊⴻⴷ?’
83 ⵎⴰⵖⴰⵔ ⴷⴻⵡⵍⴻⵖ ⴰⵎ ⵉⵛⵜ ⵏ ⵜⵅⴰⵏⵛⴻⵜ ⵏ ⵢⵉⵍⴻⵎ ⵜⵓⵢⴻⵍ ⴷⵉ ⴷⴷⴻⵅⵅⴰⵏ,
ⵎⴰⵛⴰ ⵜⵉⵡⴻⵚⵚⴰ ⵏⵏⴻⴽ ⵡⴰⵔ ⵜⴻⵏⵜ ⵜⵜⵓⵖ.
84 ⵎⴻⵛⵃⴰⵍ ⵏ ⵡⵓⵙⵙⴰⵏ ⵄⴰⴷ ⵉ ⵉⵇⵇⵉⵎⴻⵏ ⵉ ⵓⵎⵙⴻⵅⵅⴰⵔ ⵏⵏⴻⴽ?
ⵎⴻⵍⵎⵉ ⵉ ⵖⴰ ⵜⵛⴰⵔⵔⵄⴻⴷ ⵉⵏⵏⵉ ⴷ ⴰⵢⵉ ⵉⴹⴻⴼⴼⴰⵔⴻⵏ?
85 ⵉⵎⵄⴻⴼⴼⴰⵔⴻⵏ ⵖⵥⴰⵏ ⴰⵢⵉ ⵉⵃⵓⴼⴰⵔ,
ⵎⵉⵏ ⵡⴰⵔ ⴷⴷ-ⵢⵓⵙⵉⵏ ⴰⴽ-ⴷ ⵛⵛⴰⵔⵉⵄⴰ ⵏⵏⴻⴽ.
86 ⵎⴰⵔⵔⴰ ⵍⵓⵎⵓⵔⴰⵜ ⵏⵏⴻⴽ ⴷ ⵜⵉⴷⴻⵜⵜ.
ⵏⵉⵜⵏⵉ ⴹⴻⴼⴼⴰⵔⴻⵏ ⴰⵢⵉ-ⴷⴷ ⵙ ⵉⵅⴰⵔⵔⵉⵇⴻⵏ, ⴻⵡⵛ ⴰⵢⵉ ⴰⴼⵓⵙ!
87 ⵄⵍⴰⵃⴰⵍ ⵉⵍⵉ ⴰⵇⴰ ⵜⴻⵃⵃⴰⵏ ⴰⵢⵉ ⵥⵉ ⵜⴻⵎⵎⵓⵔⵜ,
ⵎⴰⵛⴰ ⵏⴻⵛⵛ ⵡⴰⵔ ⵃⴻⵢⵢⴷⴻⵖ ⵅ ⵍⵓⵎⵓⵔⴰⵜ ⵏⵏⴻⴽ.
88 ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⵄⵍⴰⵃⵙⴰⴱ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,
ⵅⴻⵏⵏⵉ ⴰⴷ ⵃⴹⵉⵖ ⵛⵛⵀⴰⴷⴻⵜ ⵉ ⴷⴷ-ⵉⴼⴼⵖⴻⵏ ⵥⴻⴳ ⵓⵇⴻⵎⵎⵓⵎ ⵏⵏⴻⴽ.
89 ⵍⴰⵎⵉⴷ. ⴰ ⵙⵉⴷⵉ, ⴰⵡⴰⵍ ⵏⵏⴻⴽ ⵉⵜⵜⵖⵉⵎⴰ ⵉ ⵍⴻⴱⴷⴰ ⵉⵎⵜⴻⵏ ⴷⴻⴳ ⵓⵊⴻⵏⵏⴰ.
90 ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⵜⵉⵡⴻⴹ ⵥⵉ ⵊⵊⵉⵍ ⴰⵍ ⵊⵊⵉⵍ.
ⵛⴻⴽ ⵜⴻⴳⴳⵉⴷ ⵜⴰⵎⵎⵓⵔⵜ ⴰⴷ ⵜⴱⴻⴷⴷ ⵜⴻⵎⵜⴻⵏ ⵓ ⴰⵎⵎⵓ ⵉ ⵖⴰ ⵜⴻⵇⵇⵉⵎ ⵜⴱⴻⴷⴷ. ■
91 ⵄⵍⴰⵃⵙⴰⴱ ⵍⴼⴰⵔⴰⵢⵉⴹ ⵏⵏⴻⴽ ⴰⴷ ⵇⵇⵉⵎⴻⵏⵜ ⴱⴻⴷⴷⴻⵏⵜ,
ⵎⴰⵖⴰⵔ ⵎⴰⵔⵔⴰ ⵏⵉⵜⴻⵏⵜⵉ ⴷ ⵉⵎⵙⴻⵅⵅⴰⵔⴻⵏ ⵏⵏⴻⴽ.
92 ⵎⵍⵉ ⵡⴰⵔ ⵜⴻⴵⵉ ⵛⵛⴰⵔⵉⵄⴰ ⵏⵏⴻⴽ ⴷ ⵎⴻⵥⵔⵉ ⵉⵏⵓ,
ⵉⵍⵉ ⵜⵜⵡⴰⵀⴻⵍⵍⴽⴻⵖ ⴷⵉ ⵍⴻⵃⵚⴰⵔⴻⵜ ⵉⵏⵓ.
93 ⵄⴻⵎⵎⴰⵔⵚ ⴰⴷ ⵜⵜⵓⵖ ⵍⵓⵎⵓⵔⴰⵜ ⵏⵏⴻⴽ ⵉ ⵍⴻⴱⴷⴰ,
ⵎⴰⵖⴰⵔ ⵥⵥⴰⵢⵙⴻⵏⵜ ⵜⴰⵔⵔⵉⴷ-ⴷⴷ ⴰⵢⵉ ⵜⵓⴷⴰⵔⵜ.
94 ⵏⴻⵛⵛ ⴰⵇⴰ ⴰⵢⵉ ⵉ ⵛⴻⴽ, ⵙⴻⵏⵊⴻⵎ ⴰⵢⵉ,
ⵎⵉⵏⵥⵉ ⴰⵔⵥⵓⵖ ⵅ ⵍⵓⵎⵓⵔⴰⵜ ⵏⵏⴻⴽ.
95 ⵉⵄⴻⴼⴼⴰⵏⴻⵏ ⵔⴰⵊⴰⵏ ⴰⵢⵉ ⵃⵉⵎⴰ ⴰⴷ ⴰⵢⵉ ⵜⴻⵃⵃⴰⵏ,
ⵎⴰⵛⴰ ⵏⴻⵛⵛ ⵅⴻⵥⵥⴰⵔⴻⵖ ⵖⴰⵔ ⵛⵛⵀⴰⴷⴰⵜ ⵏⵏⴻⴽ.
96 ⵏⴻⵛⵛ ⵥⵔⵉⵖ ⴰⵇⴰ ⵎⴰⵔⵔⴰ ⵎⵉⵏ ⵜⴻⴵⴰ ⵍⴻⴽⵎⴰⵔⴻⵜ ⵖⴰⵔⴻⵙ ⴰⵏⴻⴳⴳⴰⵔ,
ⵎⴰⵛⴰ ⵍⵓⵎⵓⵔ ⵏⵏⴻⴽ ⵖⴰⵔⴻⵙ ⵜⵜⴰⵙⵉⵄ ⴰⵟⵟⴰⵙ.
97 ⵎⵉⵎ. ⵎⴰⵎⵎⴻⵛ ⵉ ⵅⴰⴼⵉ ⵜⵄⵉⵥⵥ ⵛⵛⴰⵔⵉⵄⴰ ⵏⵏⴻⴽ,
ⴰⵙⵙ ⵉⴽⵎⴻⵍ ⵜⵜⵅⴰⵔⵔⵚⴻⵖ ⴷⴰⵢⴻⵙ.
98 ⵙ ⵍⵓⵎⵓⵔⴰⵜ ⵏⵏⴻⴽ ⵜⴰⵔⵔⵉⴷ ⴰⵢⵉ ⴷ ⴰⵎⵉⵖⵉⵙ ⵅ ⵍⵄⴻⴷⵢⴰⵏ ⵉⵏⵓ,
ⵎⴰⵖⴰⵔ ⴰⵇⴰ ⴰⵜⴻⵏ ⵖⴰⵔⵉ ⵉ ⵍⴻⴱⴷⴰ.
99 ⵏⴻⵛⵛ ⵖⴰⵔⵉ ⵍⴻⵄⵇⴻⵍ ⴽⵜⴰⵔ ⵅ ⵎⴰⵔⵔⴰ ⵉⵎⵙⴻⵍⵎⴰⴷⴻⵏ ⵉⵏⵓ,
ⵎⴰⵖⴰⵔ ⵜⵜⵅⴰⵔⵔⵚⴻⵖ ⴷⴻⴳ ⵉⴱⵔⵉⴷⴻⵏ ⵏⵏⴻⴽ.
100 ⵏⴻⵛⵛ ⵖⴰⵔⵉ ⵍⴻⴼⵀⴰⵎⴻⵜ ⴽⵜⴰⵔ ⵅ ⵉⵡⴻⵙⵙⵓⵔⴰ,
ⵎⴰⵖⴰⵔ ⵃⴹⵉⵖ ⵍⵓⵎⵓⵔⴰⵜ ⵏⵏⴻⴽ.
101 ⵎⴻⵏⵄⴻⵖ ⵉⴹⴰⵔⴻⵏ ⵉⵏⵓ ⵥⵉ ⵇⴰⵄ ⵉⴱⵔⵉⴷⴻⵏ ⵉⵄⴻⴼⴼⴰⵏⴻⵏ,
ⵃⵉⵎⴰ ⴰⴷ ⵃⴹⵉⵖ ⴰⵡⴰⵍ ⵏⵏⴻⴽ.
102 ⵏⴻⵛⵛ ⵡⴰⵔ ⵃⴻⵢⵢⴷⴻⵖ ⵛⴰ ⵅ ⵍⴼⴰⵔⴰⵢⵉⴹ ⵏⵏⴻⴽ,
ⵎⴰⵖⴰⵔ ⵛⴻⴽ ⴷ ⵡⴻⵏⵏⵉ ⴷ ⴰⵢⵉ ⵉⵙⵙⵖⴰⵔⴻⵏ.
103 ⵎⴰⵎⵎⴻⵛ ⵉ ⵖⴰ ⵢⵉⵍⵉ ⴷ ⵎⵉⵥⵉⴷ ⵎⵉⵏ ⵜⴻⵇⵇⴰⵔⴻⴷ ⵛⴻⴽ ⵉ ⵡⴰⵏⴻⵖ ⵉⵏⵓ,
ⵅ ⵜⴰⵎⵎⴻⵏⵜ ⵉ ⵓⵇⴻⵎⵎⵓⵎ ⵉⵏⵓ! ■
104 ⵣⵉ ⵍⵓⵎⵓⵔⴰⵜ ⵏⵏⴻⴽ ⵜⵜⴰⵔⵔⵉⵖ-ⴷⴷ ⵍⴻⵄⵇⴻⵍ,
ⵙ ⵓⵢⴻⵏⵏⵉ ⵛⴰⵔⵔⵀⴻⵖ ⴽⵓⵍ ⴰⵎⴻⵙⵔⵓⵇ ⵏ ⵉⵅⴰⵔⵔⵉⵇⴻⵏ.
105 ⵏⵓⵏ. ⴰⵡⴰⵍ ⵏⵏⴻⴽ ⴷ ⵍⴻⴼⵏⴰⵔ ⵉ ⵓⴹⴰⵔ ⵉⵏⵓ
ⴷ ⵜⴰⴼⴰⵡⵜ ⵉ ⵓⵎⴻⵙⵔⵓⵇ ⵉⵏⵓ.
106 ⵏⴻⵛⵛ ⵊⵊⵓⴵⴻⵖ ⵓ ⵅⵙⴻⵖ ⴰⴷ ⵜⵜ ⵙⵙⵇⴻⴼⵍⴻⵖ,
ⴰⵇⴰ ⴰⴷ ⵃⴹⵉⵖ ⵎⴰⵔⵔⴰ ⵍⴼⴰⵔⴰⵢⵉⴹ ⵏⵏⴻⴽ ⵉⵙⴻⴳⴳⴷⴻⵏ. ■
107 ⵏⴻⵛⵛ ⵜⵜⵡⴰⵃⵚⴰⵔⴻⵖ ⴰⵟⵟⴰⵙ, ⴰ ⵙⵉⴷⵉ,
ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⵄⵍⴰⵃⵙⴰⴱ ⴰⵡⴰⵍ ⵏⵏⴻⴽ.
108 ⵜⵜⵥⴰⵡⴳⴻⵖ, ⴽⵙⵉ ⵜⵉⵡⵀⵉⴱⵉⵏ ⵏ ⵍⵅⴰⴹⴰⵔ ⵥⴻⴳ ⵓⵇⴻⵎⵎⵓⵎ ⵉⵏⵓ, ⴰ ⵙⵉⴷⵉ,
ⵓ ⵙⴻⵍⵎⴻⴷ ⴰⵢⵉ ⵍⴼⴰⵔⴰⵢⵉⴹ ⵏⵏⴻⴽ.
109 ⵜⵓⴷⴰⵔⵜ ⵉⵏⵓ ⴰⵇⴰ-ⵜ ⵍⴻⴱⴷⴰ ⴷⵉ ⵍⵅⴰⵟⴻⵔ,
ⵎⴰⵛⴰ ⵄⴻⵎⵎⴰⵔⵚ ⴰⴷ ⵜⵜⵓⵖ ⵛⵛⴰⵔⵉⵄⴰ ⵏⵏⴻⴽ.
110 ⵉⵄⴻⴼⴼⴰⵏⴻⵏ ⴳⴳⵉⵏ ⴰⵢⵉ ⵉⵊⵊ ⵏ ⵍⴼⴻⵅ,
ⵎⴰⵛⴰ ⵏⴻⵛⵛ ⵡⴰⵔ ⴼⴼⵖⴻⵖ ⵛⴰ ⵅ ⵍⵓⵎⵓⵔⴰⵜ ⵏⵏⴻⴽ.
111 ⵛⵛⵀⴰⴷⴰⵜ ⵏⵏⴻⴽ ⴷ ⵜⴰⵙⵖⴰⵔⵜ ⵉⵏⵓ ⵉ ⵍⴻⴱⴷⴰ,
ⵎⴰⵖⴰⵔ ⵏⵉⵜⴻⵏⵜⵉ ⵙⵙⴼⴰⵔⵔⵃⴻⵏⵜ ⵓⵍ ⵉⵏⵓ.
112 ⵃⴻⵥⵥⵎⴻⵖ ⵓⵍ ⵉⵏⵓ ⵎⴰⵃⴻⵏⴷ ⴰⴷ ⴳⴳⴻⵖ ⵄⵍⴰⵃⵙⴰⴱ ⵜⵉⵡⴻⵚⵚⴰ ⵏⵏⴻⴽ,
ⵉ ⵍⴻⴱⴷⴰ, ⴰⵍ ⴰⵏⴻⴳⴳⴰⵔ.
113 ⵙⴰⵎⵉⵅ. ⴰⵢⵜ ⵏ ⵜⵏⴰⵢⴻⵏ ⵏ ⵉⵖⴻⵎⴱⴰⴱ ⵛⴰⵔⵔⵀⴻⵖ ⵜⴻⵏ,
ⵎⴰⵛⴰ ⵜⵜⴻⵅⵙⴻⵖ ⵛⵛⴰⵔⵉⵄⴰ ⵏⵏⴻⴽ.
114 ⵛⴻⴽ ⴷ ⴰⴷⵓⵔⵔⵉ ⵉⵏⵓ ⴷ ⵜⴰⵙⴻⴷⴷⴰⵔⵜ ⵏ ⵓⵙⴻⵍⵇⵉ ⵉⵏⵓ,
ⵏⴻⵛⵛ ⵜⵜⵔⴰⵊⵉⵖ ⴰⵡⴰⵍ ⵏⵏⴻⴽ.
115 ⴱⴻⵄⵄⴻⴷ ⵅⴰⴼⵉ, ⴰ ⵉⵄⴻⴼⴼⴰⵏⴻⵏ,
ⵃⵉⵎⴰ ⴰⴷ ⵃⴹⵉⵖ ⵍⵓⵎⵓⵔⴰⵜ ⵏ ⴰⵔⴻⴱⴱⵉ ⵉⵏⵓ.
116 ⵙⴻⵏⵏⴻⴷ ⴰⵢⵉ ⵄⵍⴰⵃⵙⴰⴱ ⵍⵡⴰⵄⴷ ⵏⵏⴻⴽ,
ⵎⴰⵃⴻⵏⴷ ⴰⴷ ⴷⴷⴰⵔⴻⵖ ⵓ ⵡⴰⵔ ⵜⵜⵙⴻⴹⵃⵉⵖ ⴷⵉ ⵍⴰⵢⴰⵙ ⵉⵏⵓ.
117 ⵄⴻⵎⵎⴻⴷ ⴰⵢⵉ, ⵅⴻⵏⵏⵉ ⴰⴷ ⵜⵜⵡⴰⵙⵏⴻⵊⵎⴻⵖ,
ⵓ ⴰⴷ ⴰⵔⵔⴻⵖ ⵎⴻⵥⵔⵉ ⴷⵉ ⵜⵡⴻⵚⵚⴰ ⵏⵏⴻⴽ ⵍⴻⴱⴷⴰ.
118 ⵎⴰⵔⵔⴰ ⵉⵏⵏⵉ ⵉⵜⵜⴰⴳⴳⵯⴻⵊⴻⵏ ⵅ ⵜⵡⴻⵚⵚⴰ ⵏⵏⴻⴽ, ⵙⵙⴻⵃⵇⴰⵔⴻⵖ ⵜⴻⵏ,
ⵎⴰⵖⴰⵔ ⵍⵖⴻⵛⵛ ⵏⵙⴻⵏ ⵎⵖⵉⵔ ⴷ ⵉⵅⴰⵔⵔⵉⵇⴻⵏ.
119 ⴰⵎ ⴽⵓⴼⴼⵓ ⵜⵎⴻⵃⵃⵉⴷ ⵎⴰⵔⵔⴰ ⵉⵄⴻⴼⴼⴰⵏⴻⵏ ⵥⵉ ⵜⴻⵎⵎⵓⵔⵜ,
ⵙ ⵓⵢⴻⵏⵏⵉ ⵜⵜⴻⵅⵙⴻⵖ ⵛⵛⵀⴰⴷⴰⵜ ⵏⵏⴻⴽ.
120 ⵣⵉ ⵜⵉⴳⴳⵯⵓⴷⵉ ⵥⵥⴰⵢⴻⴽ ⵜⴻⵛⵛⵉⵔⵔⵓⵡ ⴰⵔⵔⵉⵎⴻⵜ ⵉⵏⵓ,
ⴰⵎⵎⵓ ⵉ ⴳⴳⵯⴻⴷⴻⵖ ⵥⵉ ⵍⴻⵃⴽⴰⵎⴰⵜ ⵏⵏⴻⴽ.
121 ⵄⴰⵢⵉⵏ. ⵏⴻⵛⵛ ⴳⴳⵉⵖ ⵍⵃⴻⵇⵇ ⴷ ⵜⵙⴻⴳⴷⴰ,
ⵡⴰⵔ ⴷ ⴰⵢⵉ ⵜⵜⵙⴻⵍⵍⴻⵎ ⵉ ⵍⵎⴰⵔⴳⴻⵃ ⵏ ⵢⴻⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ.
122 ⴻⴳⴳ ⵍⵄⴰⵔⴱⵓⵏ ⴷⵉ ⵟⵟⵡⴻⵄ ⵏ ⵓⵎⵙⴻⵅⵅⴰⵔ ⵏⵏⴻⴽ,
ⵡⴰⵔ ⵜⵜⴻⵊⵊⵉ ⵉⵎⵄⴻⴼⴼⴰⵔⴻⵏ ⴰⴷ ⴰⵢⵉ ⵃⵚⴰⵔⴻⵏ.
123 ⵜⵉⵟⵟⴰⵡⵉⵏ ⵉⵏⵓ ⴷⴻⵇⵇⵍⴻⵏⵜ ⵥⵉ ⵎⴻⵥⵔⵉ ⵖⴰⵔ ⵓⵙⴻⵏⵊⴻⵎ ⵏⵏⴻⴽ,
ⵖⴰⵔ ⵍⵡⴰⵄⴷ ⵏ ⵜⵙⴻⴳⴷⴰ ⵏⵏⴻⴽ.
124 ⴻⴳⴳ ⵙ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴰⴽ-ⴷ ⵓⵎⵙⴻⵅⵅⴰⵔ ⵏⵏⴻⴽ,
ⵙⴻⵍⵎⴻⴷ ⴰⵢⵉ ⵜⵉⵡⴻⵚⵚⴰ ⵏⵏⴻⴽ.
125 ⵏⴻⵛⵛ ⴷ ⴰⵎⵙⴻⵅⵅⴰⵔ ⵏⵏⴻⴽ, ⴻⵡⵛ ⴰⵢⵉ ⵍⴻⵄⵇⴻⵍ,
ⵎⴰⵃⴻⵏⴷ ⴰⴷ ⵙⵙⵏⴻⵖ ⵛⵛⵀⴰⴷⴰⵜ ⵏⵏⴻⴽ.
126 ⴰⵇⴰ ⵢⵉⵡⴻⴹ ⴰⵙ-ⴷⴷ ⵍⵃⴰⵍ ⵉ ⵙⵉⴷⵉ ⵃⵉⵎⴰ ⴰⴷ ⵉⴱⴻⴷⴷ ⵅ ⵉⴹⴰⵔⴻⵏ ⵏⵏⴻⵙ,
ⵎⴰⵖⴰⵔ ⵏⵉⵜⵏⵉ ⴰⵔⵥⵉⵏ ⵛⵛⴰⵔⵉⵄⴰ ⵏⵏⴻⴽ.
127 ⵙ ⵓⵢⴻⵏⵏⵉ ⵜⵜⴻⵅⵙⴻⵖ ⵜⵉⵡⴻⵚⵚⴰ ⵏⵏⴻⴽ ⵅ ⵡⵓⵔⴻⵖ,
ⵡⴰⵀ ⴰⵟⵟⴰⵙ ⵅ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ.
128 ⵙ ⵓⵢⴻⵏⵏⵉ ⵃⴻⵙⴱⴻⵖ ⵎⴰⵔⵔⴰ ⵍⵓⵎⵓⵔⴰⵜ ⵏⵏⴻⴽ ⴷⵉ ⴽⵓⵍ ⵜⴰⵎⴻⵙⵍⴰⵛⵜ ⵏⵉⵛⴰⵏ,
ⵎⴰⵛⴰ ⵛⴰⵔⵀⴻⵖ ⴽⵓⵍ ⴰⵎⴻⵙⵔⵓⵇ ⵏ ⵉⵅⴰⵔⵔⵉⵇⴻⵏ.
129 ⴱⵉ. ⵛⵛⵀⴰⴷⴰⵜ ⵏⵏⴻⴽ ⴷ ⵍⵎⵓⵄⵊⵉⵥⴰⵜ,
ⵙ ⵓⵢⴻⵏⵏⵉ ⵉⵃⴻⵟⵟⴰ ⵜⴻⵏⵜ ⵡⵓⵍ ⵉⵏⵓ.
130 ⴰⵏⵓⵔⵥⴻⵎ ⵏ ⵡⴰⵡⴰⵍⴻⵏ ⵏⵏⴻⴽ ⵉⵙⵙⵛⴰⵏ ⵜⴰⴼⴰⵡⵜ,
ⵉ ⵉⵃⴰⴼⵉⵢⵢⴻⵏ ⵉⵜⵜⵉⵛ ⴰⵙⴻⵏ ⵍⴻⵄⵇⴻⵍ. ■
131 ⴰⵔⵥⵎⴻⵖ ⴰⵇⴻⵎⵎⵓⵎ ⵉⵏⵓ ⴰⵟⵟⴰⵙ,
ⵓ ⵙⵙⴰⵃⵔⴰⵜⴻⵖ ⵥⵉ ⵎⴻⵥⵔⵉ ⵖⴰⵔ ⵍⵓⵎⵓⵔⴰⵜ ⵏⵏⴻⴽ.
132 ⴰⵔⵔ ⵓⴷⴻⵎ ⵏⵏⴻⴽ ⵖⴰⵔⵉ ⵓ ⵃⵉⵏⵏ ⵅⴰⴼⵉ,
ⴰⵎ ⵎⴰⵎⵎⴻⵛ ⴷⴷ-ⵜⴻⴽⴽⴰⵔ ⵉ ⵢⴻⵏⵏⵉ ⵉⵜⵜⴻⵅⵙⴻⵏ ⵉⵙⴻⵎ ⵏⵏⴻⴽ.
133 ⵙⴻⵎⵜⴻⵏ ⵉⵚⵓⵔⴰⴼ ⵉⵏⵓ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⴻⵏⵏⵉⴷ,
ⵡⴰⵔ ⵜⵜⴻⵊⵊⵉ ⴰⴷ ⵅⴰⴼⵉ ⵉⵃⴽⴻⵎ ⵍⵖⴻⵛⵛ.
134 ⴼⴻⴽⴽ ⴰⵢⵉ ⵥⵉ ⵍⴻⵃⵚⴰⵔⴻⵜ ⵏ ⵉⵡⴷⴰⵏ,
ⵎⴰⵃⴻⵏⴷ ⴰⴷ ⵃⴹⵉⵖ ⵍⵓⵎⵓⵔⴰⵜ ⵏⵏⴻⴽ.
135 ⴻⵊⵊ ⵓⴷⴻⵎ ⵏⵏⴻⴽ ⴰⴷ ⵢⴰⵔⵖ ⵅ ⵓⵎⵙⴻⵅⵅⴰⵔ ⵏⵏⴻⴽ,
ⵙⴻⵍⵎⴻⴷ ⴰⵢⵉ ⵜⵉⵡⴻⵚⵚⴰ ⵏⵏⴻⴽ. ■
136 ⵜⵉⵖⴻⵥⵔⴰⵜⵉⵏ ⵏ ⵡⴰⵎⴰⵏ ⵀⵡⴰⵏⵜ-ⵉ-ⴷⴷ ⵥⵉ ⵜⵉⵟⵟⴰⵡⵉⵏ ⵉⵏⵓ,
ⵎⴰⵖⴰⵔ ⵏⵉⵜⵏⵉ ⵡⴰⵔ ⵃⴻⵟⵟⴰⵏ ⵛⵛⴰⵔⵉⵄⴰ ⵏⵏⴻⴽ.
137 ⵜⵙⴰⴷⵉ. ⴰⵇⴰ ⵛⴻⴽ ⴷ ⴰⵎⵙⴻⴳⴳⴻⴷ, ⴰ ⵙⵉⴷⵉ,
ⵓⵍⴰ ⴷ ⵍⴼⴰⵔⴰⵢⵉⴹ ⵏⵏⴻⴽ ⵙⴻⴳⴳⴷⴻⵏⵜ.
138 ⵛⴻⴽ ⵜⵓⵎⵓⵔⴻⴷ ⵜⴰⵙⴻⴳⴷⴰ ⵏ ⵛⵛⵀⴰⴷⴰⵜ ⵏⵏⴻⴽ,
ⵍⵎⴰⵏⴻⵜ ⵏⵙⴻⵏ ⴷ ⵜⴰⵎⴻⵇⵇⵔⴰⵏⵜ ⴰⵟⵟⴰⵙ.
139 ⴰⵙⴻⵎ ⵉⵏⵓ ⵉⵀⴻⵍⵍⴻⴽ ⴰⵢⵉ,
ⵎⴰⵖⴰⵔ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⵜⵜⵓⵏ ⴰⵡⴰⵍⴻⵏ ⵏⵏⴻⴽ.
140 ⵍⵡⴰⵄⴷ ⵏⵏⴻⴽ ⵉⵇⵇⵓⵔ ⴰⵟⵟⴰⵙ,
ⴰⵎⵙⴻⵅⵅⴰⵔ ⵏⵏⴻⴽ ⵉⵜⵜⴻⵅⵙ ⵉ-ⵜ. ■
141 ⵏⴻⵛⵛ ⴷ ⴰⵎⵓⵇⵍⵉⵍ ⵓ ⵜⵜⵡⴰⵙⴻⵃⵇⴰⵔⴻⵖ,
ⵎⴰⵛⴰ ⵡⴰⵔ ⵜⵜᵉⵜⵜⵓⵖ ⵍⵓⵎⵓⵔⴰⵜ ⵏⵏⴻⴽ.
142 ⵜⴰⵙⴻⴳⴷⴰ ⵏⵏⴻⴽ ⴷ ⵉⵛⵜ ⵏ ⵜⵙⴻⴳⴷⴰ ⵉ ⵍⴻⴱⴷⴰ,
ⵛⵛⴰⵔⵉⵄⴰ ⵏⵏⴻⴽ ⴷ ⵜⵉⴷⴻⵜⵜ.
143 ⴷⴷⵉⵇⴻⵜ ⴷ ⵜⴻⴳⴳⵯⵓⴷⵉ ⵍⴻⵇⵇⴼⴻⵏⵜ ⴰⵢⵉ,
ⵎⴰⵛⴰ ⵍⵓⵎⵓⵔⴰⵜ ⵏⵏⴻⴽ ⴷⴰⵢⵙⴻⵏⵜ ⵎⴻⵥⵔⵉ ⵉⵏⵓ.
144 ⵜⴰⵙⴻⴳⴷⴰ ⵏ ⵛⵛⵀⴰⴷⴰⵜ ⵏⵏⴻⴽ ⵉ ⵍⴻⴱⴷⴰ ⵉ ⵜⴻⴵⴰ.
ⵙⴻⴼⵀⴻⵎ ⴰⵢⵉ ⵜⴻⵏⵜ, ⵅⴻⵏⵏⵉ ⴰⴷ ⴷⴷⴰⵔⴻⵖ.
145 ⵇⵓⴼ. ⵍⴰⵖⵉⵖ ⵙ ⵎⴰⵔⵔⴰ ⵓⵍ ⵉⵏⵓ, ⴰⵔⵔ-ⴷⴷ ⵅⴰⴼⵉ, ⴰ ⵙⵉⴷⵉ,
ⵅⴻⵏⵏⵉ ⴰⴷ ⵃⴹⵉⵖ ⵜⵉⵡⴻⵚⵚⴰ ⵏⵏⴻⴽ.
146 ⵏⴻⵛⵛ ⵍⴰⵖⵉⵖ-ⴷⴷ ⵅⴰⴽ, ⴼⴻⴽⴽ ⴰⵢⵉ,
ⵅⴻⵏⵏⵉ ⴰⴷ ⵃⴹⵉⵖ ⵎⴰⵔⵔⴰ ⵛⵛⵀⴰⴷⴰⵜ ⵏⵏⴻⴽ.
147 ⵇⴱⴻⵍ ⵜⵓⴼⴼⵓⵜ ⵜⵓⵖⴰ ⵜⵜⵍⴰⵖⵉⵖ ⵃⵉⵎⴰ ⴰⴷ ⴰⵢⵉ ⴷⴷ-ⵜⴻⵡⵛⴻⴷ ⴰⴼⵓⵙ,
ⵔⴰⵊⵉⵖ ⴰⵡⴰⵍ ⵏⵏⴻⴽ. ■
148 ⵜⵉⵟⵟⴰⵡⵉⵏ ⵉⵏⵓ ⴼⴰⵇⴻⵏⵜ ⵇⴱⴻⵍ ⵍⵡⴻⵇⵜ ⵏ ⵡⵓⴹⵓⴼ ⵏ ⵡⴻⵛⴱⴰⵔ,
ⵃⵉⵎⴰ ⴰⴷ ⵅⴰⵔⵔⵚⴻⵖ ⴷⵉ ⵎⵉⵏ ⵜⴻⵇⵇⴰⵔⴻⴷ. ■
149 ⵙⴻⵍ-ⴷⴷ ⵖⴰⵔ ⵜⵎⵉⵊⵊⴰ ⵉⵏⵓ ⵄⵍⴰⵃⵙⴰⴱ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ,
ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⵄⵍⴰⵃⵙⴰⴱ ⵍⴼⴰⵔⴰⵢⵉⴹ ⵏⵏⴻⴽ.
150 ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴳⴳⴻⵏ ⵍⴻⴼⴹⴰⵢⴻⵃ ⵓⴷⵙⴻⵏ ⴰⵢⵉ,
ⴰⵇⴰ ⵏⵉⵜⵏⵉ ⴳⴳⵯⴻⵊⴻⵏ ⴰⵟⵟⴰⵙ ⵅ ⵛⵛⴰⵔⵉⵄⴰ ⵏⵏⴻⴽ.
151 ⵛⴻⴽ ⵜⵓⴷⵙⴻⴷ, ⴰ ⵙⵉⴷⵉ,
ⵎⴰⵔⵔⴰ ⵍⵓⵎⵓⵔⴰⵜ ⵏⵏⴻⴽ ⴷ ⵜⵉⴷⴻⵜⵜ ⵉ ⴵⴰⵏ.
152 ⵓⵍⴰ ⴷ ⴰⵟⵟⴰⵙ ⵥⴻⴳ ⵡⴰⵎⵉ ⵜⵓⵖⴰ ⵙⵙⵏⴻⵖ ⵛⵛⵀⴰⴷⴰⵜ ⵏⵏⴻⴽ,
ⵎⴰⵖⴰⵔ ⵛⴻⴽ ⵜⴻⴳⴳⵉⴷ ⵜⴻⵏⵜ ⵉ ⵍⴻⴱⴷⴰ.
153 ⵔⵉⵅ. ⵅⵥⴰⵔ ⵖⴰⵔ ⵍⴻⵖⴱⴻⵏ ⵉⵏⵓ ⵓ ⵜⴻⵙⵙⵏⴻⵊⵎⴻⴷ ⴰⵢⵉ,
ⵎⴰⵖⴰⵔ ⵡⴰⵔ ⵜⵜⵓⵖ ⵛⵛⴰⵔⵉⵄⴰ ⵏⵏⴻⴽ.
154 ⴰⵖ ⴰⵢⵉ ⵜⴰⵙⵖⴰⵔⵜ ⵓⵛⴰ ⴼⴻⴽⴽ ⴰⵢⵉ,
ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⴻⵏⵏⵉⴷ.
155 ⵉⴳⴳⵯⴻⵊ ⵓⵙⴻⵏⵊⴻⵎ ⵅ ⵉⵄⴻⴼⴼⴰⵏⴻⵏ,
ⵎⴰⵖⴰⵔ ⵡⴰⵔ ⴰⵔⴻⵥⵥⵓⵏ ⵜⵉⵡⴻⵚⵚⴰ ⵏⵏⴻⴽ.
156 ⴰ ⵙⵉⴷⵉ, ⴰⵔⵔⴻⵃⵎⴻⵜ ⵏⵏⴻⴽ ⴷ ⴰⵟⵟⴰⵙ,
ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⵄⵍⴰⵃⵙⴰⴱ ⵍⴼⴰⵔⴰⵢⵉⴹ ⵏ ⵏⵏⴻⴽ.
157 ⵉⵏⵏⵉ ⴷ ⴰⵢⵉ ⵉⵜⵜⴷⴰⵔⵔⴰⵛⴻⵏ ⴷ ⵢⴻⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⴰⵇⴰ ⴰⵜⴻⵏ ⵙ ⵡⴰⵟⵟⴰⵙ,
ⵎⴰⵛⴰ ⵏⴻⵛⵛ ⵡⴰⵔ ⵃⴻⵢⵢⴷⴻⵖ ⵛⴰ ⵅ ⵛⵛⵀⴰⴷⴰⵜ ⵏⵏⴻⴽ.
158 ⵥⵔⵉⵖ ⵉⵏⵏⵉ ⴷ ⴰⵢⵉ ⵉⵖⴷⴰⵔⴻⵏ ⵓⵛⴰ ⵄⵉⴼⴼⴻⵖ ⵜⴻⵏ,
ⵎⴰⵖⴰⵔ ⵏⵉⵜⵏⵉ ⵡⴰⵔ ⵟⵟⵉⴼⴻⵏ ⴷⴻⴳ ⵡⴰⵡⴰⵍ ⵏⵏⴻⴽ.
159 ⵅⵥⴰⵔ, ⵎⴰⵎⵎⴻⵛ ⵜⵜⴻⵅⵙⴻⵖ ⵍⵓⵎⵓⵔⴰⵜ ⵏⵏⴻⴽ, ⴰ ⵙⵉⴷⵉ,
ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⵄⵍⴰⵃⵙⴰⴱ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ.
160 ⴱⴻⴷⴷⵓ ⵏ ⵡⴰⵡⴰⵍ ⵏⵏⴻⴽ ⴰⵇⴰ-ⵜ ⴷ ⵜⵉⴷⴻⵜⵜ,
ⴽⵓⵍ ⵍⴻⵃⴽⴰⵎ ⵉⵙⴻⴳⴳⴷⴻⵏ ⵥⵥⴰⵢⴻⴽ ⴰⵇⴰ-ⵜ ⵉ ⵍⴻⴱⴷⴰ.
161 ⵛⵉⵏ. ⵍⵃⵓⴽⴽⴰⵎ ⴷⴰⵔⵔⵛⴻⵏ ⵅⴰⴼⵉ ⵅ ⵡⴰⵍⵓ,
ⵎⴰⵛⴰ ⵓⵍ ⵉⵏⵓ ⵜⵓⵖⴰ ⵉⵜⵜⴻⴳⴳⵯⴻⴷ ⵥⴻⴳ ⵡⴰⵡⴰⵍ ⵏⵏⴻⴽ.
162 ⵏⴻⵛⵛ ⴼⴰⵔⵃⴻⵖ ⵅ ⵍⵡⴰⵄⴷ ⵏⵏⴻⴽ,
ⴰⵎⴻⵛⵏⴰⵡ ⵉⵊⵊⴻⵏ ⵉ ⵉⵜⵜⴰⴼ ⵉⵛⵜ ⵏ ⵜⴽⴻⵛⵛⴰⴹⵜ ⵜⴰⵎⴻⵇⵇⵔⴰⵏⵜ.
163 ⵏⴻⵛⵛ ⵛⴰⵔⵔⵀⴻⵖ ⴰⵅⴰⵔⵔⵉⵇ ⵓ ⵄⵉⴼⴼⴻⵖ ⵜ,
ⵎⴰⵛⴰ ⵜⵜⴻⵅⵙⴻⵖ ⵛⵛⴰⵔⵉⵄⴰ ⵏⵏⴻⴽ.
164 ⵙⴻⴱⵄⴰ ⵏ ⵜⵡⴰⵍⴰⵡⵉⵏ ⴷⴻⴳ ⵡⴰⵙⵙ ⵚⴻⴱⵃⴻⵖ ⵛⴻⴽ,
ⵅ ⵍⴻⵃⴽⴰⵎⴰⵜ ⵏ ⵜⵙⴻⴳⴷⴰ ⵏⵏⴻⴽ.
165 ⵉⵏⵏⵉ ⵉⵜⵜⴻⵅⵙⴻⵏ ⵛⵛⴰⵔⵉⵄⴰ ⵏⵏⴻⴽ, ⴰⵇⴰ ⵖⴰⵔⵙⴻⵏ ⵍⴻⵀⵏⴰ ⵜⴰⵎⴻⵇⵇⵔⴰⵏⵜ,
ⵡⴰⵔ ⴷⵉⵏ ⴰⵥⵔⵓ ⵏ ⵓⵏⴻⵇⵔⴰⴹ ⵥⵥⴰⵜⵙⴻⵏ.
166 ⴰ ⵙⵉⴷⵉ, ⵜⵜⵔⴰⵊⵉⵖ ⴰⵙⴻⵏⵊⴻⵎ ⵏⵏⴻⴽ,
ⵓ ⵜⵜⴻⴳⴳⴻⵖ ⵄⵍⴰⵃⵚⴰⴱ ⵜⵉⵡⴻⵚⵚⴰ ⵏⵏⴻⴽ.
167 ⵍⴻⵄⵎⴰⵔ ⵉⵏⵓ ⵉⵃⴻⵟⵟⴰ ⵛⵛⵀⴰⴷⴰⵜ ⵏⵏⴻⴽ,
ⵜⵜⴻⵅⵙⴻⵖ ⵜⴻⵏⵜ ⴰⵟⵟⴰⵙ.
168 ⵏⴻⵛⵛ ⵃⴻⵟⵟⵉⵖ ⵍⵓⵎⵓⵔⴰⵜ ⵏⵏⴻⴽ ⴷ ⵛⵛⵀⴰⴷⴰⵜ ⵏⵏⴻⴽ,
ⵎⴰⵖⴰⵔ ⵎⴰⵔⵔⴰ ⵉⴱⵔⵉⴷⴻⵏ ⵉⵏⵓ ⴰⵔⵥⵎⴻⵏ ⵥⵥⴰⵜⴻⴽ.
169 ⵜⴰⵡ. ⴰ ⵙⵉⴷⵉ, ⴻⵊⵊ ⴰⴷ ⵖⴰⵔⴻⴽ ⴷⴷ-ⵢⴰⵡⴻⴹ ⵓⵍⴰⵖⵉ ⵉⵏⵓ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ,
ⴻⵡⵛ ⴰⵢⵉ ⵍⴻⵄⵇⴻⵍ ⵄⵍⴰⵃⵙⴰⴱ ⴰⵡⴰⵍ ⵏⵏⴻⴽ.
170 ⴻⵊⵊ ⴰⴷ ⴷⴷ-ⵢⴰⵙ ⵓⵃⴻⵛⵛⴻⵎ ⵉⵏⵓ ⵖⴰⵔ ⵡⵓⴷⴻⵎ ⵏⵏⴻⴽ,
ⵙⴻⵏⵊⴻⵎ ⴰⵢⵉ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⴻⵏⵏⵉⴷ.
171 ⵉⵢⴻⵏⵛⵉⵛⴻⵏ ⵉⵏⵓ ⴰⴷ ⵓⵛⵔⵓⵔⴻⵏ ⴰⵚⴻⴱⴱⴻⵃ ⴰⵎ ⵉⵊⵊ ⵏ ⵍⵄⵓⵏⵚⴰⵔ,
ⵎⴰⵖⴰⵔ ⵛⴻⴽ ⵜⴻⵙⵙⴻⵍⵎⴰⴷⴻⴷ ⴰⵢⵉ ⵜⵉⵡⴻⵚⵚⴰ ⵏⵏⴻⴽ.
172 ⵉⵍⴻⵙ ⵉⵏⵓ ⴰⴷ ⵢⴰⵔⵔ ⵎⵉⵏ ⵜⴻⵏⵏⵉⴷ ⵛⴻⴽ,
ⵎⴰⵖⴰⵔ ⵎⴰⵔⵔⴰ ⵍⵓⵎⵓⵔⴰⵜ ⵏⵏⴻⴽ ⵙⴻⴳⴳⴷⴻⵏ.
173 ⴻⵊⵊ ⴰⴼⵓⵙ ⵏⵏⴻⴽ ⴰⴷ ⴰⵢⵉ ⵉⴳⴳ ⵜⵡⵉⵥⴰ,
ⵎⴰⵖⴰⵔ ⵉⵅⴹⴰⵔⴻⵖ ⵍⵓⵎⵓⵔⴰⵜ ⵏⵏⴻⴽ.
174 ⴰ ⵙⵉⴷⵉ, ⵜⵜⵎⴻⵥⵔⴻⵖ ⵖⴰⵔ ⵓⵙⴻⵏⵊⴻⵎ ⵏⵏⴻⴽ,
ⵛⵛⴰⵔⵉⵄⴰ ⵏⵏⴻⴽ ⴰⵇⴰ ⴷⴰⵢⴻⵙ ⵎⴻⵥⵔⵉ ⵉⵏⵓ.
175 ⴻⵊⵊ ⵍⴻⵄⵎⴰⵔ ⵉⵏⵓ ⴰⴷ ⵉⴷⴷⴰⵔ, ⴰⴷ ⵛⴻⴽ ⵉⵚⴻⴱⴱⴻⵃ,
ⴰⴷ ⴰⵢⵉ ⵄⴰⵡⵏⴻⵏⵜ ⵍⴼⴰⵔⴰⵢⵉⴹ ⵏⵏⴻⴽ.
176 ⵏⴻⵛⵛ ⵡⴻⴷⴷⴰⵔⴻⵖ ⴰⵎ ⵉⵊⵊ ⵏ ⵓⵀⵓⵍⵉ ⵉⵡⴻⴷⴷⴰⵔⴻⵏ.
ⴰⵔⵥⵓ ⵅ ⵓⵎⵙⴻⵅⵅⴰⵔ ⵏⵏⴻⴽ, ⵎⴰⵖⴰⵔ ⵡⴰⵔ ⵜⵜⵓⵖ ⵍⵓⵎⵓⵔⴰⵜ ⵏⵏⴻⴽ. ■