118
1 ⵇⴰⴷⴰⵎ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⴷ ⴰⵚⴻⴱⵃⴰⵏ, ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.
2 ⴻⵊⵊ ⵉⵙⵔⴰⵉⵍ ⴰⴷ ⵢⵉⵏⵉ:
“ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.”
3 ⴻⵊⵊ ⵜⴰⴷⴷⴰⵔⵜ ⵏ ⵀⴰⵔⵓⵏ ⴰⴷ ⵜⵉⵏⵉ
“ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.”
4 ⴻⵊⵊ ⵉⵏⵏⵉ ⵉⵜⵜⴻⴳⴳⵯⴻⴷⴻⵏ ⵙⵉⴷⵉ ⴰⴷ ⵉⵏⵉⵏ:
“ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.”
5 ⴷⵉ ⵍⴻⵃⵚⴰⵔⴻⵜ ⵍⴰⵖⵉⵖ ⵖⴰⵔ ⵙⵉⴷⵉ.
ⵙⵉⴷⵉ ⵢⴰⵔⵔⴰ-ⴷⴷ ⵅⴰⴼⵉ ⵓⵎⵉ ⵉⵡⵛⴰ ⴰⵢⵉ ⵜⵜⴰⵙⵉⵄ.
6 ⵙⵉⴷⵉ ⴰⵇⴰ-ⵜ ⴰⴽⵉⴷⵉ, ⵡⴰⵔ ⵜⵜⴻⴳⴳⵯⴻⴷⴻⵖ ⵛⴰ,
ⵎⴰⵖⴰⵔ ⵎⵉⵏ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⴰⵢⵉ ⵉⴳⴳ? ■
7 ⵙⵉⴷⵉ ⴰⵇⴰ-ⵜ ⴰⴽⵉⴷⵉ ⵊⴰⵔ ⵢⴻⵏⵏⵉ ⴷ ⴰⵢⵉ ⵉⵡⵛⵉⵏ ⴰⴼⵓⵙ.
ⵏⴻⵛⵛ ⴰⴷ ⵅⴻⵥⵥⴰⵔⴻⵖ ⵖⴰⵔ ⵙⵡⴰⴷⴷⴰⵢ ⵅ ⵢⴻⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ.
8 ⵉⵃⵍⴰ ⴰⴷ ⴰⵔⵥⵓⵖ ⴷⴷⵓⵔⵉ ⵖⴰⵔ ⵙⵉⴷⵉ,
ⵅ ⵓⵜⴻⵛⵍⵉ ⵅ ⴱⵏⴰⴷⴻⵎ. ■
9 ⵉⵃⵍⴰ ⴰⴷ ⴰⵔⵥⵓⵖ ⴷⴷⵓⵔⵉ ⵖⴰⵔ ⵙⵉⴷⵉ,
ⵅ ⵓⵜⴻⵛⵍⵉ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ.
10 ⵎⴰⵔⵔⴰ ⵍⴻⴳⵏⵓⵙ ⵏⵏⴹⴻⵏ ⴰⵢⵉ-ⴷⴷ.
ⵏⴻⵛⵛ ⵖⴻⴹⵍⴻⵖ ⵜⴻⵏ ⵙ ⵢⵉⵙⴻⵎ ⵏ ⵙⵉⴷⵉ.
11 ⵏⵏⴹⴻⵏ ⴰⵢⵉ-ⴷⴷ, ⵡⴰⵀ, ⵇⵓⵡⵡⴰⵔⴻⵏ ⴰⵢⵉ.
ⵏⴻⵛⵛ ⵖⴻⴹⵍⴻⵖ ⵜⴻⵏ ⵙ ⵢⵉⵙⴻⵎ ⵏ ⵙⵉⴷⵉ.
12 ⵏⵉⵜⵏⵉ ⵏⵏⴹⴻⵏ ⴰⵢⵉ ⴰⵎ ⵜⵥⵉⵥⵡⴰ,
ⴰⵇⴰ ⴰⵎⴻⵛⵏⴰⵡ ⵜⵉⵎⴻⵙⵙⵉ ⵏ ⵉⵙⴻⵏⵏⴰⵏⴻⵏ ⵅⴻⵙⵢⴻⵏ.
ⵏⴻⵛⵛ ⵖⴻⴹⵍⴻⵖ ⵜⴻⵏ ⵙ ⵢⵉⵙⴻⵎ ⵏ ⵙⵉⴷⵉ.
13 ⵛⴻⴽ ⵜⵄⴰⵔⵏⴻⴷ ⴰⵢⵉ ⵙ ⵍⴻⵇⵙⴰⵃⴻⵜ ⴰⵍⴰⵎⵉ ⴳⴳⵓⵔ ⴰⴷ ⵡⴹⵉⵖ,
ⵎⴰⵛⴰ ⵙⵉⴷⵉ ⵉⵡⵛⴰ ⴰⵢⵉ ⴰⴼⵓⵙ.
14 ⵙⵉⴷⵉ ⴷ ⵊⵊⴻⵀⴷ ⵉⵏⵓ ⴷ ⴰⵥⴻⵀⵀⴻⴷ ⵉⵏⵓ,
ⵏⴻⵜⵜⴰ ⵉⴷⵡⴻⵍ ⴰⵢⵉ ⴷ ⴰⵙⴻⵏⵊⴻⵎ.
15 ⴷⴻⴳ ⵉⵇⵉⴹⴰⵏ ⵏ ⵉⵎⵙⴻⴳⴳⴰⴷⴻⵏ ⵉⵜⵜⵡⴰⵙⴻⵍ ⵍⵃⴻⵙⵙ ⵏ ⵓⵙⵍⵉⵡⵍⴻⵡ ⴷ ⵓⵙⴻⵏⵊⴻⵎ.
ⴰⴼⵓⵙ ⴰⴼⵓⵙⵉ ⵏ ⵙⵉⴷⵉ ⵉⴳⴳⴰ ⵙ ⵊⵊⴻⵀⴷ.
16 ⴰⴼⵓⵙ ⴰⴼⵓⵙⵉ ⵏ ⵙⵉⴷⵉ ⵉⵜⵜⵡⴰⵙⴳⴻⵄⵄⴻⴷ,
ⴰⴼⵓⵙ ⴰⴼⵓⵙⵉ ⵏ ⵙⵉⴷⵉ ⵉⴳⴳⴰ ⵙ ⵡⴻⵎⵃⴰⴹ. ■
17 ⵏⴻⵛⵛ ⵡⴰⵔ ⵜⵎⴻⵜⵜⵉⵖ ⵛⴰ, ⴰⴷ ⴷⴷⴰⵔⴻⵖ,
ⴰⴷ ⴱⴰⵔⵔⵃⴻⵖ ⵜⵉⵎⴻⴳⴳⴰ ⵏ ⵙⵉⴷⵉ.
18 ⵙⵉⴷⵉ ⵉⵡⴻⴱⴱⴻⵅ ⴰⵢⵉ ⴰⵟⵟⴰⵙ,
ⵎⴰⵛⴰ ⵡⴰⵔ ⴷ ⴰⵢⵉ ⵉⵡⵛⵉ ⵉ ⵍⵎⴻⵡⵜ.
19 ⴰⵔⵥⵎⴻⵎ ⴰⵢⵉ ⵜⵉⵡⵡⵓⵔⴰ ⵏ ⵜⵙⴻⴳⴷⴰ,
ⴰⴷ ⵥⵥⴰⵢⵙⴻⵏⵜ ⴰⴷⴼⴻⵖ, ⴰⴷ ⵇⴰⴷⵉⵖ ⵙⵉⴷⵉ.
20 ⵜⴰ ⴷ ⵜⴰⵡⵡⴰⵔⵜ ⵏ ⵙⵉⴷⵉ,
ⵉⵎⵙⴻⴳⴳⴰⴷⴻⵏ ⴰⴷ ⵥⵥⴰⵢⴻⵙ ⴰⴷⴼⴻⵏ.
21 ⵏⴻⵛⵛ ⴰⴷ ⴰⵛ ⵇⴰⴷⵉⵖ ⵓⵎⵉ ⴷ ⴰⵢⵉ ⵜⴻⵙⵍⵉⴷ,
ⵜⴷⴻⵡⵍⴻⴷ ⴰⵢⵉ ⴷ ⴰⵙⴻⵏⵊⴻⵎ.
22 ⴰⵥⵔⵓ ⵉ ⵡⴰⵔ ⵅⵙⴻⵏ ⵉⴱⴻⵏⵏⴰⵢⴻⵏ,
ⵉⴷⵡⴻⵍ ⴷ ⵉⵅⴻⴼ ⵏ ⵜⴻⵖⵎⴰⵔⵜ. ■
23 ⴰⵢⴰ ⵉⵜⵜⵡⴰⴳⴳ ⵥⵉ ⵙⵉⴷⵉ,
ⵓ ⵎⴰⵏ ⴰⵢⴰ ⴷ ⵍⴻⵄⵊⴻⴱ ⴷⵉ ⵜⵉⵟⵟⴰⵡⵉⵏ ⵏⵏⴻⵖ.
24 ⵡⴰ ⴷ ⴰⵙⵙ ⵉ ⵉⴳⴳⴰ ⵙⵉⴷⵉ,
ⴻⵊⵊ ⴰⵏⴻⵖ ⴰⴷ ⵏⴰⵔⵛⴻⵇ ⵓ ⴰⴷ ⴷⴰⵢⴻⵙ ⵏⴼⴰⵔⵃ.
25 ⴰ ⵙⵉⴷⵉ, ⴰⵡⵉ-ⴷⴷ ⴰⵙⴻⵏⵊⴻⵎ,
ⴰ ⵙⵉⴷⵉ, ⴰⵡⵉ-ⴷⴷ ⴰⴼⵍⴰⵃ.
26 ⴷ ⴰⵎⵉⵎⵓⵏ ⵡⴻⵏⵏⵉ ⴷⴷ ⵖⴰ ⵢⴰⵙⴻⵏ ⵙ ⵢⵉⵙⴻⵎ ⵏ ⵙⵉⴷⵉ!
ⵏⴻⵛⵛⵉⵏ ⴰⴷ ⴽⴻⵏⵏⵉⵡ ⵏⴱⴰⵔⴻⴽ ⵥⵉ ⵜⴰⴷⴷⴰⵔⵜ ⵏ ⵙⵉⴷⵉ.
27 ⴰⵔⴻⴱⴱⵉ ⴷ ⵙⵉⴷⵉ ⵏⵏⵉ ⴷ ⴰⵏⴻⵖ ⵉⴳⴳⵉⵏ ⵜⴰⴼⴰⵡⵜ.
ⵇⵏⴻⵎ ⵜⴰⵖⴰⵔⵚⵜ ⵏ ⵍⵄⵉⴷ ⵙ ⵉⵙⴻⵖⵡⴰⵏ ⵖⴰⵔ ⵡⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ, ⵍⵎⴻⴷⴱⴻⵃ ⵏ ⵡⴻⵛⵎⴰⴹ.
28 ⵛⴻⴽ ⴷ ⴰⵔⴻⴱⴱⵉ ⵉⵏⵓ, ⵙ ⵓⵢⴰ ⴰⴷ ⵛⴻⴽ ⵇⴰⴷⵉⵖ,
ⴰ ⴰⵔⴻⴱⴱⵉ ⵉⵏⵓ, ⴰⴷ ⵛⴻⴽ ⵙⵙⵄⵓⴵⴻⵖ.
29 ⵇⴰⴷⴰⵎ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⴷ ⴰⵚⴻⴱⵃⴰⵏ,
ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵜᵉⵜⵜⵖⵉⵎⴰ ⵉ ⵍⴻⴱⴷⴰ.