115
1 ⵡⴰⵔ ⵉⴵⵉ ⵉ ⵏⴻⵛⵛⵉⵏ, ⴰ ⵙⵉⴷⵉ, ⵡⴰⵔ ⵉⴵⵉ ⵉ ⵏⴻⵛⵛⵉⵏ, ⵎⴰⵖⴰⵔ ⵉ ⵢⵉⵙⴻⵎ ⵏⵏⴻⴽ ⴰⴷ ⵢⵉⵍⵉ ⵓⵄⵓⴵⵉ,
ⴷⵉ ⵙⵙⵉⴱⴱⴻⵜ ⵏ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵏⵏⴻⴽ.
2 ⵎⴰⵢⴻⵎⵎⵉ ⵉ ⵖⴰ ⵇⵇⴰⵔⴻⵏ ⵍⴻⴳⵏⵓⵙ:
‘ⵎⴰⵏⵉ ⵉⴵⴰ ⵅⴻⵏⵏⵉ ⴰⵔⴻⴱⴱⵉ ⵏⵙⴻⵏ?’
3 ⴰⵔⴻⴱⴱⵉ ⵏⵏⴻⵖ ⴰⵇⴰ-ⵜ ⴷⴻⴳ ⵓⵊⴻⵏⵏⴰ,
ⵉⴳⴳⴰ ⵎⴰⵔⵔⴰ ⵎⵉⵏ ⴷ ⴰⵙ ⵢⴰⵔⴹⴰⵏ.
4 ⵍⴻⵅⵢⴰⵍⴰⵜ ⵏⵙⴻⵏ ⵏ ⵚⵚⴰⵏⴰⵎ ⴰⵇⴰ ⴰⵜⴻⵏⵜ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ,
ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏ ⵉⵡⴷⴰⵏ. □
5 ⵖⴰⵔⵙⴻⵏ ⴰⵇⴻⵎⵎⵓⵎ, ⵎⴰⵛⴰ ⵡⴰⵔ ⵙⵙⵉⵡⵉⵍⴻⵏⵜ,
ⵖⴰⵔⵙⴻⵏⵜ ⵜⵉⵟⵟⴰⵡⵉⵏ ⵎⴰⵛⴰ ⵡⴰⵔ ⵜⵜⵡⵉⵍⵉⵏⵜ, ■
6 ⵖⴰⵔⵙⴻⵏⵜ ⵉⵎⴻⵥⵥⵓⵖⴻⵏ, ⵎⴰⵛⴰ ⵡⴰⵔ ⵜⵜⴻⵙⵍⵉⵏⵜ,
ⵖⴰⵔⵙⴻⵏⵜ ⵡⴰⵏⵥⴰⵔⴻⵏ, ⵎⴰⵛⴰ ⵡⴰⵔ ⵜⵜⵛⴻⵎⵎⵉⵏⵜ.
7 ⵉⴼⴰⵙⵙⴻⵏ ⵏⵙⴻⵏ ⵡⴰⵔ ⵥⴻⵎⵎⴰⵔⴻⵏ ⴰⴷ ⵛⴻⴱⴱⴰⵔⴻⵏ,
ⵉⴹⴰⵔⴻⵏ ⵏⵙⴻⵏ ⵡⴰⵔ ⵥⴻⵎⵎⴰⵔⴻⵏ ⴰⴷ ⵓⵢⵓⵔⴻⵏ.
ⵏⵉⵜⵏⵉ ⵡⴰⵔ ⵙⵙⵓⴼⴼⵓⵖⴻⵏ ⵍⵃⴻⵙⵙ ⵥⵉ ⵜⵎⵉⵊⵊⴰ ⵏⵙⴻⵏ.
8 ⴻⵊⵊ ⵉⵏⵏⵉ ⵜⴻⵏⵜ ⵉⴳⴳⵉⵏ ⴰⴷ ⴷⴰⵢⵙⴻⵏⵜ ⴰⵔⴻⵡⵙⴻⵏ,
ⴽⵓⵍ ⵉⵊⵊ ⵥⴻⴳ ⵉⵏⵏⵉ ⵅⴰⵙⴻⵏⵜ ⵉⵜⵜⴻⵛⵍⴻⵏ.
9 ⵉⵙⵔⴰⵉⵍ, ⵜⵜⵛⴻⵍ ⵅ ⵙⵉⴷⵉ.
ⵏⴻⵜⵜⴰ ⴷ ⵜⵡⵉⵥⴰ ⵏⵙⴻⵏ ⴷ ⵜⴰⵙⴻⴷⴷⴰⵔⵜ ⵏⵙⴻⵏ ⵉ ⵓⵙⴻⵍⵇⵉ.
10 ⵜⴰⴷⴷⴰⵔⵜ ⵏ ⵀⴰⵔⵓⵏ, ⵜⵜⵛⴻⵍ ⵅ ⵙⵉⴷⵉ.
ⵏⴻⵜⵜⴰ ⴷ ⵜⵡⵉⵥⴰ ⵏⵙⴻⵏ ⴷ ⵜⴰⵙⴻⴷⴷⴰⵔⵜ ⵏⵙⴻⵏ ⵉ ⵓⵙⴻⵍⵇⵉ.
11 ⵎⴰⵔⵔⴰ ⴽⴻⵏⵏⵉⵡ ⵉⵏⵏⵉ ⵉⵜⵜⴻⴳⴳⵯⴻⴷⴻⵏ ⵙⵉⴷⵉ, ⵜⵜⴻⵛⵍⴻⵎ ⵅ ⵙⵉⴷⵉ.
ⵏⴻⵜⵜⴰ ⴷ ⵜⵡⵉⵥⴰ ⵏⵙⴻⵏ ⴷ ⵜⴰⵙⴻⴷⴷⴰⵔⵜ ⵏⵙⴻⵏ ⵉ ⵓⵙⴻⵍⵇⵉ.
12 ⵙⵉⴷⵉ ⵉⵄⵇⴻⵍ ⵅⴰⵏⴻⵖ, ⵏⴻⵜⵜⴰ ⴰⴷ ⵉⴱⴰⵔⴻⴽ.
ⴰⴷ ⵉⴱⴰⵔⴻⴽ ⵜⴰⴷⴷⴰⵔⵜ ⵏ ⵉⵙⵔⴰⵉⵍ,
ⴰⴷ ⵉⴱⴰⵔⴻⴽ ⵜⴰⴷⴷⴰⵔⵜ ⵏ ⵀⴰⵔⵓⵏ.
13 ⵏⴻⵜⵜⴰ ⴰⴷ ⵉⴱⴰⵔⴻⴽ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ ⵥⵉ ⵙⵉⴷⵉ,
ⵉⵎⴻⵥⵢⴰⵏⴻⵏ ⵊⵎⵉⵄ ⴰⴽ-ⴷ ⵉⵎⴻⵇⵇⵔⴰⵏⴻⵏ.
14 ⵙⵉⴷⵉ ⴰⴷ ⴰⵡⴻⵎ ⵉⵙⵙⵎⴰⵔⵏⵉ ⵜⴰⵔⵡⴰ,
ⵉ ⴽⴻⵏⵏⵉⵡ ⵓⵍⴰ ⵉ ⵉⵃⴻⵏⵊⵉⵔⴻⵏ ⵏⵡⴻⵎ.
15 ⴽⴻⵏⵏⵉⵡ ⵜᵉⵜⵜⵡⴰⴱⴰⵔⴽⴻⵎ ⵥⵉ ⵙⵉⴷⵉ,
ⵡⴻⵏⵏⵉ ⵉⴳⴳⵉⵏ ⴰⵊⴻⵏⵏⴰ ⴷ ⵜⴻⵎⵎⵓⵔⵜ.
16 ⵉⵊⴻⵏⵡⴰⵏ, ⵡⴰⵀ ⵉⵊⴻⵏⵡⴰⵏ ⵏ ⵙⵉⴷⵉ,
ⵎⴰⵛⴰ ⵜⴰⵎⵎⵓⵔⵜ ⵉⵡⵛⴰ ⵉ-ⵜⵜ ⵉ ⵜⴰⵔⵡⴰ ⵏ ⴱⵏⴰⴷⴻⵎ.
17 ⵉⵎⴻⵜⵜⴰⵏ ⵡⴰⵔ ⵥⴻⵎⵎⴰⵔⴻⵏ ⴰⴷ ⵙⵙⴻⵎⵖⴰⵔⴻⵏ ⵙⵉⴷⵉ,
ⵓⵍⴰ ⴷ ⵉⵏⵏⵉ ⴷⴷ-ⵉⵀⵡⴰⵏ ⴷⴻⴳ ⵓⵙⵓⵙⴻⵎ.
18 ⵏⴻⵛⵛⵉⵏ ⴰⴷ ⵏⴱⴰⵔⴻⴽ ⵙⵉⴷⵉ,
ⵥⵉ ⵍⴻⵅⵅⵓ ⴰⵍ ⵉ ⵍⴻⴱⴷⴰ. ⵀⴰⵍⵍⵉⵍⵓ-ⵢⴰⵀ!