94
1 ⴰ ⴰⵔⴻⴱⴱⵉ ⵏ ⵓⵏⵜⴰⵇⴻⵎ, ⴰ ⵙⵉⴷⵉ, ⴰⵔⴻⴱⴱⵉ ⵏ ⵓⵏⵜⴰⵇⴻⵎ, ⴱⴰⵏ-ⴷⴷ ⴷⵉ ⵜⵉⵙⵙⵉⵇⵜ!
2 ⴰ, ⵍⵇⴰⴹⵉ ⵏ ⵜⴻⵎⵎⵓⵔⵜ, ⵙⴳⴻⵄⵄⴻⴷ ⵉⵅⴻⴼ ⵏⵏⴻⴽ,
ⴰⵔⵔ ⵜⴰⵙⵖⴰⵔⵜ ⵉ ⵉⵎⵄⴻⴼⴼⴰⵔⴻⵏ ⴰⵎ ⵎⵉⵏ ⵙⵙⴷⴰⵃⴻⴵⴻⵏ ⵏⵉⵜⵏⵉ.
3 ⵎⴻⵛⵃⴰⵍ ⵉ ⵖⴰ ⴽⴽⴻⵏ ⵄⴰⴷ ⵉⵄⴻⴼⴼⴰⵏⴻⵏ, ⴰ ⵙⵉⴷⵉ,
ⵎⴻⵛⵃⴰⵍ ⵉ ⵖⴰ ⴽⴽⴻⵏ ⵏⴻⴳⴳⵥⴻⵏ ⵉⵄⴻⴼⴼⴰⵏⴻⵏ ⵙ ⵍⴻⴼⵔⴰⵃⴻⵜ,
4 ⴰⴷ ⵇⵇⵉⵎⴻⵏ ⵙⵙⴰⵡⴰⵍⴻⵏ ⴰⵡⴰⵍⴻⵏ ⵉⵇⴻⵙⵃⴻⵏ,
ⵎⴻⵛⵃⴰⵍ ⵉ ⵖⴰ ⵇⵇⵉⵎⴻⵏ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ ⴰⴷ ⵙⵙⴻⵎⵖⴰⵔⴻⵏ ⵉⵅⴻⴼ ⵏⵙⴻⵏ?
5 ⴰ ⵙⵉⴷⵉ, ⵏⵉⵜⵏⵉ ⵍⴻⴱⴱⵥⴻⵏ ⵍⴳⴻⵏⵙ ⵏⵏⴻⴽ,
ⵃⴻⵚⵚⴰⵔⴻⵏ ⵜⴰⵙⵖⴰⵔⵜ ⵏ ⵍⵡⴰⵔⵜ ⵏⵏⴻⴽ.
6 ⵏⵉⵜⵏⵉ ⵏⴻⵇⵇⴻⵏ ⵜⴰⵊⵊⴰⵞ ⴷ ⵓⴱⴰⵔⵔⴰⵏⵉ,
ⵖⴰⵔⵔⵚⴻⵏ ⵉ ⵉⵢⵓⵊⵉⵍⴻⵏ.
7 ⵏⵉⵜⵏⵉ ⵇⵇⴰⵔⴻⵏ: “ⵙⵉⴷⵉ ⵡⴰⵔ ⵜⵜ ⵉⵜⵜⵡⵉⵍⵉ,
ⴰⵔⴻⴱⴱⵉ ⵏ ⵢⴰⵄⵇⵓⴱ ⵡⴰⵔ ⴷ ⴰⵙ ⵉⵜⵜⵃⴻⴽⴽⴰⵔ.” ■
8 ⴼⴻⵜⵏⴻⵎ ⴽⴻⵏⵏⵉⵡ ⵉⵇⴻⴼⴼⵓⵃⴻⵏ ⴷⵉ ⵍⴳⴻⵏⵙ ⵊⵎⵉⵄ ⴰⴽ-ⴷ ⵉⴱⵓⵀⴰⵍⵉⵢⵢⴻⵏ,
ⵎⴻⵍⵎⵉ ⵉ ⵖⴰ ⵜⴷⴻⵡⵍⴻⵎ ⵜⴼⴻⵀⵀⵎⴻⵎ? ■
9 ⵎⴰ ⵡⴰⵔ ⵉⵜⵜⴻⵙⵍⵉ ⵡⴻⵏⵏⵉ ⵉⵥⵥⵓⵏ ⴰⵎⴻⵥⵥⵓⵖ?
ⵎⴰ ⵡⴰⵔ ⵉⵥⴰⵔⵔ ⵡⴻⵏⵏⵉ ⵉⴳⴳⵉⵏ ⵜⵉⵟⵟ? ■
10 ⵎⴰ ⵡⴰⵔ ⵉⵜⵜⵄⴰⵇⴻⴱ ⵡⴻⵏⵏⵉ ⵉⵜⵜⵡⴻⴱⴱⵅⴻⵏ ⵍⴻⴳⵏⵓⵙ,
ⵡⴻⵏⵏⵉ ⵉⵙⵙⴻⵍⵎⴰⴷⴻⵏ ⵜⵓⵙⵙⵏⴰ ⵉ ⴱⵏⴰⴷⴻⵎ?
11 ⵙⵉⴷⵉ ⵢⴰⵔⴻⴳⴳⴻⴱ ⵅ ⵉⵅⴰⵔⵔⵉⵚⴻⵏ ⵏ ⵉⵡⴷⴰⵏ,
ⴰⵇⴰ-ⵜⴻⵏ ⴰⵎ ⵉⵊⵊ ⵏ ⵓⵚⵓⴹⵉ ⵡⴰⵀⴰ. ■
12 ⵙⵙⴻⵄⴷ ⵏ ⵡⴻⵔⵢⴰⵥ ⵏⵏⵉ ⵜᵉⵜⵜⵡⴻⴱⴱⵅⴻⴷ, ⴰ ⵙⵉⴷⵉ,
ⵡⴻⵏⵏⵉ ⵜⴻⵙⵙⴻⵍⵎⴰⴷⴻⴷ ⵥⵉ ⵛⵛⴰⵔⵉⵄⴰ ⵏⵏⴻⴽ,
13 ⵃⵉⵎⴰ ⴰⴷ ⵜ ⵜⴻⵙⵙⴰⵔⴻⵢⵢⴻⵃⴻⴷ ⵥⴻⴳ ⵡⵓⵙⵙⴰⵏ ⵉⵄⴻⴼⴼⵏⴻⵏ,
ⴰⵍ ⵖⴰ ⵉⵜⵜⵡⴰⵃⴼⴰⵔ ⵡⴻⵃⴼⵓⵔ ⵉ ⵉⵄⴻⴼⴼⴰⵏⴻⵏ.
14 ⵎⴰⵖⴰⵔ ⵙⵉⴷⵉ ⵡⴰⵔ ⵉⵏⴻⵟⵟⴰⵔ ⵍⴳⴻⵏⵙ ⵏⵏⴻⵙ,
ⵡⴰⵔ ⵉⵙⴻⵎⵎⴻⵃ ⴷⵉ ⵜⴻⵙⵖⴰⵔⵜ ⵏⵏⴻⵙ. ■
15 ⵎⴰⵖⴰⵔ ⵍⵃⵓⴽⵎ ⴰⴷ ⴷⴷ-ⵉⴷⵡⴻⵍ ⵖⴰⵔ ⵜⵙⴻⴳⴷⴰ,
ⵎⴰⵔⵔⴰ ⵉⵏⵏⵉ ⵖⴰⵔⵙⴻⵏ ⵓⵍ ⵉⵙⴻⴳⴳⵎⴻⵏ ⴰⴷ ⵜⵜ-ⵉ-ⴷⴷ ⴹⴻⴼⴼⴰⵔⴻⵏ.
16 ⵎⴰⵏ ⵡⴻⵏ ⴽⵉⴷⵉ ⵉ ⵖⴰ ⵉⴱⴻⴷⴷⴻⵏ ⴹⵉⴷⴷ ⵉ ⵉⵄⴻⴼⴼⴰⵏⴻⵏ?
ⵎⴰⵏ ⵡⴻⵏ ⵉ ⵅⴰⴼⵉ ⵉ ⵖⴰ ⵉⵡⵜⴻⵏ ⴹⵉⴷⴷ ⵉ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ?
17 ⵎⵍⵉ ⵡⴰⵔ ⵉⴵⵉ ⵙⵉⴷⵉ ⴷ ⵜⵡⵉⵥⴰ ⵉⵏⵓ,
ⵉⵍⵉ ⵉⵥⴷⴻⵖ ⵍⴻⵄⵎⴰⵔ ⵉⵏⵓ ⵄⵍⴰⵃⴰⵍ ⴷⴻⴳ ⵡⴻⵙⵖⴰⴹ. □
18 ⵎⴰⵍⴰ ⵏⵏⵉⵖ: ‘ⴰⴹⴰⵔ ⵉⵏⵓ ⵉⵜⵜⴻⴼⵔⵉⵖ!’,
ⵅⴻⵏⵏⵉ ⵜᵉⵟⵟⴻⴼ ⴰⵢⵉ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ!
19 ⵎⴰⵍⴰ ⵎⵎⴰⵔⵏⵉⵏ ⴷⴰⵢⵉ ⵉⵅⴰⵔⵔⵉⵚⴻⵏ ⴰⵍ ⵟⵟⴰⵔⴼ,
ⵜⵓⵖⴰ ⵍⴻⵄⵎⴰⵔ ⵉⵏⵓ ⵉⵜⵜⴰⵔⵔ ⵎⴻⵥⵔⵉ ⴷⴻⴳ ⵓⵙⴼⴻⵡⵡⴻⵊ ⵏⵏⴻⴽ.
20 ⵎⴰ ⵜⴻⵅⵙⴻⴷ ⴰⴷ ⴽⵉⴷⴻⴽ ⵉⵙⵙⵎⵓⵏ ⵍⴽⵓⵔⵙⵉ ⵏ ⵓⵀⴻⵍⵍⴻⴽ,
ⵡⴻⵏⵏⵉ ⵉⵙⵙⵉⵡⴹⴻⵏ ⵍⴻⵖⴱⴻⵏ ⵅ ⴷⵙⴰⵙ ⵏ ⵜⴻⵡⵚⴻⵢⵢⴻⵜ?
21 ⵏⵉⵜⵏⵉ ⵃⴻⵚⵚⴰⵔⴻⵏ ⵍⴻⵄⵎⴰⵔ ⵏ ⵓⵎⵙⴻⴳⴳⴰⴷ,
ⵛⴻⵀⵀⴷⴻⵏ ⵅ ⵉⴷⴰⵎⵎⴻⵏ ⵉⵎⴻⵥⴷⴰⴳⴻⵏ ⵙ ⵍⵖⴰⵔ.
22 ⵙⵉⴷⵉ ⵜⵓⵖⴰ ⴰⵢⵉ ⴷ ⵉⵊⵊ ⵏ ⵍⴱⵓⵔⵊ ⵢⵓⵄⵍⴰⵏ,
ⴰⵔⴻⴱⴱⵉ ⵉⵏⵓ ⴷ ⵜⴰⵚⴹⴰⵔⵜ ⵏ ⵜⴰⵔⴻⵡⵍⴰ ⵉⵏⵓ.
23 ⵏⴻⵜⵜⴰ ⴰⴷ ⵅⴰⵙⴻⵏ ⵉⵙⵙⴻⵄⵇⴻⴱ ⵍⵎⵓⵄⵚⵉⵢⵢⴻⵜ ⵏⵙⴻⵏ,
ⴰⵎ ⵜⵜⴻⴳⴳⴻⵏ ⵍⵖⴰⵔ ⵏⵙⴻⵏ ⴰⴷ ⵜⴻⵏ ⵉⵜⴻⵃⵃⴰ.
ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⴰⴷ ⵜⴻⵏ ⵉⵜⴻⵃⵃⴰ.