44
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵣⵉ ⴰⵢⵜ ⵏ ⵇⵓⵔⴰⵃ. ⴰⵅⴻⵎⵎⵉ. 2 ⴰ ⴰⵔⴻⴱⴱⵉ, ⵏⴻⵛⵛⵉⵏ ⵏⴻⵙⵍⴰ ⵜⵜ ⵙ ⵉⵎⴻⵥⵥⵓⵖⴻⵏ ⵏⵏⴻⵖ,
ⵉⴱⴰⴱⴰⵜⴻⵏ ⵏⵏⴻⵖ ⵃⴰⵊⴰⵏ ⴰⵏⴻⵖ ⵜⵜ:
ⵛⴻⴽ ⵜⴻⴳⴳⵉⴷ ⵉⵛⵜ ⵏ ⵜⵎⴻⴳⴳⵉⵜ ⴷ ⵜⴰⵎⴻⵇⵇⵔⴰⵏⵜ ⴷⴻⴳ ⵡⵓⵙⵙⴰⵏ ⵏⵙⴻⵏ,
ⴷⴻⴳ ⵡⵓⵙⵙⴰⵏ ⵏ ⵡⴻⵛⵃⴰⵍ ⵓⵢⴰ.
3 ⵙ ⵓⴼⵓⵙ ⵏⵏⴻⴽ ⴰⵇⴰ ⵜⴻⵙⵙⵓⴼⴼⵖⴻⴷ ⵍⴻⴳⵏⵓⵙ ⵥⵉ ⵜⴻⵙⵖⴰⵔⵜ ⵏⵙⴻⵏ,
ⵅⴻⵏⵏⵉ ⵜⴻⵥⵥⵓⴷ ⵜⴻⵏ ⴷⴰⵢⴻⵙ.
ⵛⴻⴽ ⵜⴻⴳⴳⵉⴷ ⵍⵖⴰⵔ ⴷⵉ ⵛⵛⵓⵄⵓⴱ,
ⵜⴱⴻⵥⵥⵄⴻⴷ ⵜⴻⵏ. ■
4 ⵏⵉⵜⵏⵉ ⵎⴰⵛⴰ ⵡⴰⵔ ⵡⴰⵔⵜⴻⵏ ⵜⴰⵎⵎⵓⵔⵜ ⵙ ⵙⵙⵉⴼ,
ⴰⵖⵉⵍ ⵏⵙⴻⵏ ⵡⴰⵔ ⴷ ⴰⵙⴻⵏ ⴷⴷ-ⵢⵉⵡⵉ ⴰⵙⴻⵏⵊⴻⵎ,
ⵎⴰⵛⴰ ⴰⴼⵓⵙ ⵏⵏⴻⴽ ⴰⴼⵓⵙⵉ, ⴰⵖⵉⵍ ⵏⵏⴻⴽ ⴷ ⵜⴼⴰⵡⵜ ⵏ ⵡⵓⴷⴻⵎ ⵏⵏⴻⴽ,
ⵎⵉⵏⵥⵉ ⵓⴼⵉⵏ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏⵏⴻⴽ.
5 ⴰⵇⴰ ⵛⴻⴽ ⴷ ⴰⵊⴻⴵⵉⴷ ⵉⵏⵓ, ⴰ ⴰⵔⴻⴱⴱⵉ!
ⴻⵡⵛ ⵄⴰⴷ ⵍⴻⵅⵅⵓ ⵍⵓⵎⵓⵔ ⵉ ⵉⵙⴻⵏⵊⴰⵎⴻⵏ ⵏ ⵢⴰⵄⵇⵓⴱ.
6 ⴰⴽⵉⴷⴻⴽ ⴰⴷ ⵏⴻⵖⴹⴻⵍ ⵉⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ,
ⵙ ⵢⵉⵙⴻⵎ ⵏⵏⴻⴽ ⴰⴷ ⵏⴻⵄⴼⴻⵙ ⵅ ⵢⴻⵏⵏⵉ ⵅⴰⵏⴻⵖ ⵉⵜⵜⴻⵎⵄⴰⵍⴰⵏ.
7 ⵎⴰⵖⴰⵔ ⵡⴰⵔ ⵜⵜⴻⵛⵍⴻⵖ ⵅ ⵍⵇⴻⵡⵙ ⵉⵏⵓ,
ⵙⵙⵉⴼ ⵉⵏⵓ ⵡⴰⵔ ⴷ ⴰⵢⵉ ⵉⵙⵙⴻⵏⵊⴰⵎ.
8 ⵎⴰⵖⴰⵔ ⵛⴻⴽ ⵜⴻⵙⵙⴻⵏⵊⴰⵎⴻⴷ ⴰⵏⴻⵖ ⵥⴻⴳ ⵉⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ,
ⵜⴻⵙⵙⴱⴻⵀⴷⵉⵍⴻⴷ ⵉⵏⵏⵉ ⴷ ⴰⵏⴻⵖ ⵉⵛⴰⵔⵔⵀⴻⵏ.
9 ⵏⵚⴻⴱⴱⴻⵃ ⵉ ⴰⵔⴻⴱⴱⵉ ⴰⵙⵙ ⵎⴰⵔⵔⴰ,
ⴰⴷ ⵏⵇⴰⴷⴰ ⵉⵙⴻⵎ ⵏⵏⴻⴽ ⵉ ⵍⴻⴱⴷⴰ. ⵙⵉⵍⴰⵀ.
10 ⵎⴰⵛⴰ ⵍⴻⵅⵅⵓ ⵜⴻⵏⴹⴰⵔⴻⴷ ⴰⵏⴻⵖ ⵓ ⵜⴻⵙⵙⴱⴻⵀⴷⴰⵍⴻⴷ ⴰⵏⴻⵖ,
ⵛⴻⴽ ⵡⴰⵔ ⵜᵉⵜⵜⴻⴼⴼⵉⵖⴻⴷ ⵛⴰ ⴰⴽ-ⴷ ⵍⵄⴻⵙⴽⴰⵔⴰⵜ ⵏⵏⴻⵖ ⵖⴰⵔ ⵓⵎⴻⵏⵖⵉ. ■
11 ⵛⴻⴽ ⵜⴻⵊⵊⵉⴷ ⴰⵏⴻⵖ ⵏⴻⵜⵜⵔⴰⴽⴽⵡⴰⵍ ⵥⵥⴰⵜ ⵉ ⵡⴻⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ,
ⵓ ⵉⵏⵏⵉ ⴷ ⴰⵏⴻⵖ ⵉⵛⴰⵔⵔⵀⴻⵏ ⵜⵜⴽⴻⵛⵛⴹⴻⵏ ⵎⵉⵏ ⵜⴻⵅⵙⴻⵏ ⵉ ⵢⵉⵅⴻⴼ ⵏⵙⴻⵏ.
12 ⵛⴻⴽ ⵜⴻⵡⵛⵉⴷ ⴰⵏⴻⵖ ⴰⵎ ⵡⵓⴵⵉ ⵉ ⵎⴰⵛⵛⴰ,
ⵜⴻⵥⵥⵓⵥⵥⴰⵔⴻⴷ ⴰⵏⴻⵖ ⵊⴰⵔ ⵍⴻⴳⵏⵓⵙ.
13 ⵛⴻⴽ ⵜⴻⵥⵥⵏⵓⵥⵉⴷ ⵍⴳⴻⵏⵙ ⵏⵏⴻⴽ ⵙ ⵡⴰⵍⵓ,
ⵓ ⴷⴻⴳ ⵓⵥⵥⴻⵏⵥⵉ ⵏⵙⴻⵏ ⵡⴰⵔ ⵖⴰⵔⴻⴽ ⴱⵓ ⵍⴻⴼⴹⴻⵍ.
14 ⵛⴻⴽ ⵜᵉⵜⵜⴻⴳⴳⴻⴷ ⴰⵏⴻⵖ ⴷ ⵍⵃⴻⴳⵔⴰ ⵉ ⵡⴰⵊⵊⴰⵔⴻⵏ ⵏⵏⴻⵖ,
ⴷ ⴰⵙⵜⴻⵀⵥⵉ ⴷ ⵓⴱⴻⵀⴷⴻⵍ ⵖⴰⵔ ⵢⴻⵏⵏⵉ ⴷ ⴰⵏⴻⵖ-ⴷⴷ ⵉⵜⵜⴻⵏⵏⴹⴻⵏ. ■
15 ⵛⴻⴽ ⵜᵉⵜⵜⴻⴳⴳⴻⴷ ⴰⵏⴻⵖ ⴷ ⴰⵎⴻⴷⵢⴰ ⵊⴰⵔ ⵍⴻⴳⵏⵓⵙ,
ⵜᵉⵜⵜⴻⴳⴳⴻⴷ ⴰⴷ ⵅⴰⵏⴻⵖ ⵀⴻⵥⵥⴻⵏ ⴰⵥⴻⴵⵉⴼ ⵊⴰⵔ ⵛⵛⵓⵄⵓⴱ.
16 ⴰⵙⵙ ⵎⴰⵔⵔⴰ ⵍⵄⴰⵔ ⵉⵏⵓ ⴰⵇⴰ-ⵜ ⵥⵥⴰⵜⵉ ⵊⴰⵔ ⵜⵉⵟⵟⴰⵡⵉⵏ ⵉⵏⵓ,
ⵍⴻⵃⵢⴰ ⵉⴷⵍⴰ ⴰⵖⴻⵎⴱⵓⴱ ⵉⵏⵓ,
17 ⵥⵉ ⵙⵙⵉⴱⴱⴻⵜ ⵏ ⵍⵃⴻⵙⵙ ⵏ ⵢⵉⵏⵏⵉ ⵉⵙⵙⴻⵃⵇⴰⵔⴰⵏ ⵓ ⵜⵜⵛⴻⵇⵇⴰⴼⴻⵏ,
ⵥⵉ ⵙⵙⵉⴱⴱⴻⵜ ⵏ ⵍⴻⵄⴷⵓ ⴷ ⵡⴻⵏⵏⵉ ⵢⴰⵔⴻⵥⵥⵓⵏ ⴰⵏⵜⴰⵇⴻⵎ.
18 ⴰⵢⴰ ⵎⴰⵔⵔⴰ ⵉⴽⴽⴰ ⵅⴰⵏⴻⵖ, ⵎⴰⵛⴰ ⵡⴰⵔ ⵛⴻⴽ ⵏⴻⵜⵜⵓ,
ⵡⴰⵔ ⵏⵖⴻⵛⵛ ⵛⴰ ⴷⵉ ⵍⵄⴰⵀⴷ ⵏⵏⴻⴽ.
19 ⵓⵍ ⵏⵏⴻⵖ ⵡⴰⵔ ⵉⴷⵡⵉⵍ ⵖⴰⵔ ⴹⴻⴼⴼⴰⵔ,
ⵉⵚⵓⵔⴰⴼ ⵏⵏⴻⵖ ⵡⴰⵔ ⴷⴷ-ⴼⴼⵉⵖⴻⵏ ⵛⴰ ⵥⴻⴳ ⵓⵎⴻⵙⵔⵓⵇ ⵏⵏⴻⴽ,
20 ⵡⴰⵅⵅⴰ ⵛⴻⴽ ⵜⵍⴻⴱⵥⴻⴷ ⴰⵏⴻⵖ ⴷⴻⴳ ⵡⴻⵎⵛⴰⵏ ⵏ ⵡⵓⵛⵛⴰⵏⴻⵏ ⵏ ⵍⴻⵅⵍⴰ,
ⵓ ⵜⴻⴷⵍⵉⴷ ⴰⵏⴻⵖ ⵙ ⵜⵉⵍⵉ ⵏ ⵍⵎⴻⵡⵜ.
21 ⵎⵍⵉ ⵜⵓⵖⴰ ⵏⴻⵜⵜⵓ ⵉⵙⴻⵎ ⵏ ⴰⵔⴻⴱⴱⵉ ⵏⵏⴻⵖ,
ⵏⴻⵙⵙⵡⵉⵥⵥⴻⴹ ⵉⴼⴰⵙⵙⴻⵏ ⵏⵏⴻⵖ ⵖⴰⵔ ⵢⵉⵊⵊ ⵏ ⴰⵔⴻⴱⴱⵉ ⴷ ⴰⵖⵔⵉⴱ,
22 ⵎⴰ ⵉⵍⵉ ⴰⵔⴻⴱⴱⵉ ⵡⴰⵔ ⵢⴰⵔⴻⵥⵥⵓ ⴷⵉ ⵎⴰⵏ ⴰⵢⴰ?
ⴰⵇⴰ ⵏⴻⵜⵜⴰ ⵢⴰⵔⴻⴳⴳⴻⴱ ⵅ ⵎⵉⵏ ⵉⵏⵏⵓⴼⴼⴰⵔⴻⵏ ⴷⴻⴳ ⵡⵓⵍ.
23 ⵎⴰⵖⴰⵔ ⴷⵉ ⵟⵟⵡⴻⵄ ⵏⵏⴻⴽ ⵏⴻⵇⵇⴻⵏ ⴰⵏⴻⵖ ⴽⵓⵍ ⴰⵙⵙ,
ⴰⵇⴰ ⵃⴻⵙⵙⴱⴻⵏ ⴰⵏⴻⵖ ⴰⵎ ⵡⵓⴵⵉ ⵏ ⵜⵖⴰⵔⵚⵜ. ■
24 ⴼⴰⵇ, ⵎⴰⵢⴻⵎⵎⵉ ⵜᵉⵟⵟⵚⴻⴷ, ⵙⵉⴷⵉ ⵉⵏⵓ?
ⴼⴰⵇ, ⵡⴰⵔ ⴷ ⴰⵏⴻⵖ ⵏⴻⵟⵟⴰⵔ ⵉ ⵍⴻⴱⴷⴰ!
25 ⵎⴰⵢⴻⵎⵎⵉ ⵉ ⵖⴰ ⵜⴻⴼⴼⴰⵔⴻⴷ ⵓⴷⴻⵎ ⵏⵏⴻⴽ,
ⴰⴷ ⵜᵉⵜⵜⵓⴷ ⵍⴻⵖⴱⴻⵏ ⴷ ⴷⴷⴻⴵ ⵏⵏⴻⵖ?
26 ⵎⴰⵖⴰⵔ ⵍⴻⵄⵎⴰⵔ ⵏⵏⴻⵖ ⵉⵜⵜⴰⴹⴰⵔ ⵖⴰⵔ ⵜⵄⴻⵊⵊⴰⵊⵜ,
ⴰⵄⴻⴷⴷⵉⵙ ⵏⵏⴻⵖ ⵉⵍⴻⵚⵚⴻⵇ ⴷⵉ ⵜⴻⵎⵎⵓⵔⵜ.
27 ⴽⴽⴰⵔ, ⴻⵡⵛ ⴰⵏⴻⵖ ⴰⴼⵓⵙ,
ⴼⴷⵉ ⵅⴰⵏⴻⵖ ⴷⵉ ⵟⵟⵡⴻⵄ ⵏ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ. □