1 ⵅⵥⴰⵔ, ⵇⴰⵄ ⴰⵔⴰⵊⵉ ⴰⴷ ⵉⴼⵛⴻⵍ,

ⵎⵖⵉⵔ ⵜⴰⵎⵓⵖⵍⵉ ⵏⵏⴻⵙ ⵜⴻⵙⵙⴻⵄⴳⴰⵥ ⴱⵏⴰⴷⴻⵎ.

2 ⵡⴰⵔ ⵉⴵⵉ ⵓⵍⴰ ⴷ ⵉⵊⵊⴻⵏ ⴰⵎⵎⵓ ⴷ ⴰⵥⴻⵄⵄⴰⵎ ⴰⵍⴰⵎⵉ ⵜ ⵉ ⵖⴰ ⵉⵀⵡⴻⵍ,

ⵎⴰⵏ ⵡⴻⵏ ⵅⴻⵏⵏⵉ ⵉⵥⴻⵎⵎⴰⵔⴻⵏ ⴰⴷ ⵉⵇⵇⵉⵎ ⵉⴱⴻⴷⴷ ⵥⵥⴰⵜ ⵉ ⵓⵖⴻⵎⴱⵓⴱ ⵉⵏⵓ?

3 ⵎⴰⵏ ⵡⴻⵏ ⵉ ⴷ ⴰⵢⵉ ⵉⵡⵛⵉⵏ ⵛⴰ ⴷ ⴰⵎⴻⵥⵡⴰⵔⵓ,

ⴰⵍⴰⵎⵉ ⴷ ⴰⵢⵉ ⵉⵜⵜⵅⴻⵚⵚⴰ ⴰⴷ ⵖⴰⵔⴻⵙ ⵜ-ⵉ-ⴷⴷ-ⴰⵔⵔⴻⵖ?

ⵎⴰⵔⵔⴰ ⵎⵉⵏ ⵉⴵⴰⵏ ⵙⴰⴷⵓ ⵉⵊⴻⵏⵡⴰⵏ ⵉⵏⵓ! ^■  

4 ⵏⴻⵛⵛ ⵡⴰⵔ ⵜⵜⴻⵙⵇⴰⵔⵉⵖ ⵅ ⵉⴹⴰⵔⴻⵏ ⵏⵏⴻⵙ,

ⵅ ⵍⴻⵎⵖⴰⵔⴻⵜ ⵏ ⵊⵊⴻⵀⴷ ⵏⵏⴻⵙ ⵓ ⵅ ⵓⵛⵓⵡⵡⴰⵔ ⵏ ⵡⴰⴷⴷⵓⴷ ⵏⵏⴻⵙ.

5 ⵎⴰⵏ ⵡⴻⵏ ⵉⵥⴻⵄⵄⵎⴻⵏ ⴰⴷ ⵉⵇⴻⵊⵊⴻⵄ ⵜⴰⵇⵛⵓⵔⵜ ⵏ ⵡⴰⵔⵔⵓⴹ ⵏⵏⴻⵙ,

ⵎⴰⵏ ⵡⴻⵏ ⵉⵥⴻⵄⵄⵎⴻⵏ ⴰⴷ ⴷⴷ-ⵉⵇⴰⵔⵔⴻⴱ ⵖⴰⵔ ⵜⵢⵓⵢⴰ ⵏ ⵍⴻⵙⴷⵓⴷ ⵏ ⵜⴻⵖⵎⴰⵙ ⵏ ⵉⵖⴻⵙⵎⴰⵔ ⵏⵏⴻⵙ?

6 ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⵢⴰⵔⵥⴻⵎ ⵜⵉⵡⵡⵓⵔⴰ ⵖⴰⵔ ⵓⵖⴻⵎⴱⵓⴱ ⵏⵏⴻⵙ?

ⵎⵉⵏ ⵉⵏⵏⴹⴻⵏ ⵉ ⵜⴻⵖⵎⴰⵙ ⵏⵏⴻⵙ ⵎⵖⵉⵔ ⴷ ⴰⵏⴻⵅⵍⵉⵄ.

7 ⵍⴻⵙⴷⵓⴷ ⵏ ⵜⵙⴻⴷⴷⴰⵔⵉⵢⵉⵏ ⵅ ⵡⴻⵄⵔⵓⵔ ⵏⵏⴻⵙ ⵛⴻⵏⵏⵄⴻⵏ,

ⴽⵓⵍ ⵉⵊⵊ ⵥⵥⴰⵢⵙⴻⵏ ⵉⵜⵜⵡⴰⴱⴻⵍⵍⴻⵄ ⵙ ⵟⵟⴰⴱⴻⵄ ⵉⵇⵇⵏⴻⵏ ⵏⵉⵛⴰⵏ.

8 ⵉⵊⵊⴻⵏ ⵉⵇⵇⵏⴻⵏ ⵏⵉⵛⴰⵏ ⵖⴰⵔ ⵉⵊⵊ ⵏ ⵏⵏⴻⵖⵏⵉ,

ⵡⴰⵔ ⵉⵥⴻⵎⵎⴰⵔ ⴰⴷ ⴷⵉⵏ ⴷⴷ-ⵢⴰⴷⴻⴼ ⴰⵔⵔⵉⵃ ⵊⴰⵔ ⴰⵙⴻⵏ.

9 ⵍⴻⵙⵙⵇⴻⵏ ⴷⴻⴳ ⵡⴰⵢⴰⵡⵢⴰ,

ⵓⴷⴼⴻⵏ ⴷⴻⴳ ⵉⵅⴻⴼ ⵏⵙⴻⵏ ⵎⴰⵃⴻⵏⴷ ⵡⴰⵔ ⵜⴻⵎⵎⵙⴻⴱⴹⵉⵏ.

10 ⵎⴰⵍⴰ ⵉⵄⴹⴻⵙ, ⵜᵉⵜⵜⵛⴻⵄⵛⵉⵄ ⵜⴼⴰⵡⵜ,

ⵓ ⵜⵉⵟⵟⴰⵡⵉⵏ ⵏⵏⴻⵙ ⴳⴳⵉⵏⵜ ⴰⵎ ⵡⴰⴱⵍⵉⵡⴻⵏ ⵏ ⵜⴼⴰⵡⵜ ⵏ ⵍⴻⴼⵊⴰⵔ.

11 ⵣⴻⴳ ⵓⵊⴻⵇⵎⵉⵎ ⵏⵏⴻⵙ ⵜⵜⴻⴼⴼⵖⴻⵏ-ⴷⴷ ⵉⵚⴻⴼⴹⴰⵡⴻⵏ,

ⵜⵉⴼⴻⵟⵟⵓⵜⵉⵏ ⵏ ⵜⵎⴻⵙⵙⵉ ⴷⴷⵓⵇⵇⵓⵥⴻⵏ-ⴷⴷ ⵥⵥⴰⵢⴻⵙ.

12 ⴷⴷⴻⵅⵅⴰⵏ ⵉⵜⵜⴼⴻⵡⵡⴰⵔ ⵥⴻⴳ ⵉⵅⵓⴱⴰⵛ ⵏ ⵡⴻⵏⵥⴰⵔⴻⵏ ⵏⵏⴻⵙ,

ⴰⵎ ⵥⴻⴳ ⵉⵊⵊ ⵏ ⵓⵟⴻⵏⵊⵉⵔ ⵉⵜⵜⵏⴻⵏⵏⴰⵏ ⵙ ⵓⵖⴰⵏⵉⵎ ⵉⴷⴷⵓⵅⵅⵓⵏⴻⵏ ⵙⴰⴷⵓ ⵏⵏⴻⵙ.

13 ⵜⵡⴰⵔⵔⵉⵜ ⵏ ⵏⵏⴻⴼⵙ ⵏⵏⴻⵙ ⵜᵉⵙⵙⴻⴽⴽⴰⵔⴰ ⵜⵉⵎⴻⵙⵙⵉ ⴷⵉ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ,

ⵓ ⵥⴻⴳ ⵓⵃⴻⵔⵇⵓⵎ ⵏⵏⴻⵙ ⵉⵜⵜⴻⴼⴼⴻⵖ-ⴷⴷ ⵓⵃⴰⴷⵓⵇ ⵏ ⵜⵎⴻⵙⵙⵉ.

14 ⵊⵊⴻⵀⴷ ⵉⵥⴷⴻⵖ ⴷⴻⴳ ⵉⵊⵉⵎⴰⵏ ⵏⵏⴻⵙ,

ⵖⴰⵔ ⵥⵥⴰⵜ ⵏⵏⴻⵙ ⵉⵏⴻⵟⵟⵓ ⵓⵏⴻⵅⵍⵉⵄ.

15 ⵟⵟⵔⵓⴼⴰ ⵏ ⵡⴻⵢⵙⵓⵎ ⵏ ⵓⵄⴻⴷⴷⵉⵙ ⵏⵏⴻⵙ ⵎⵎⵍⴻⵙⵇⴻⵏ,

ⴰⵎ ⵅⴰⵙⴻⵏ ⴼⴻⵙⵢⴻⵏ, ⵡⴰⵔ ⵥⴻⵎⵎⴰⵔⴻⵏ ⴰⴷ ⵜⵜⵡⴰⵏⵀⴻⵥⵥⴻⵏ.

16 ⵓⵍ ⵏⵏⴻⵙ ⵉⵇⵙⴻⵃ ⴰⵎ ⵡⴻⵥⵔⵓ,

ⵉⵇⵙⴻⵃ ⴰⵎ ⵜⴻⵚⴹⴰⵔⵜ ⵏ ⵙⵡⴰⴷⴷⴰⵢ ⵏ ⵜⵙⵉⵔⵜ.

17 ⵅⵎⵉ ⵉⵙⵙⴳⴻⵄⵄⴰⴷ ⵉⵅⴻⴼ ⵏⵏⴻⵙ, ⵜⵜⵏⴻⵅⵍⴰⵄⴻⵏ ⵉⵏⵏⵉ ⵉⵊⴻⵀⴷⴻⵏ,

ⵥⴻⴳ ⵓⵇⴻⵥⵥⴻⴱ ⵅⴻⵟⵟⴰⵏ ⴷⵉ ⵜⴻⵏⴷⴰⵢⵜ.

18 ⵎⴰⵍⴰ ⵉⵍⵇⴻⴼ ⵉ-ⵜ ⵛⴰ ⵏ ⵢⵉⵊⵊⴻⵏ ⵙ ⵙⵙⵉⴼ, ⵡⴰⵔ ⵉⵜⵜⵉⵍⵉ,

ⵡⴰⵔ ⵉⴵⵉ ⵙ ⵓⵃⵔⵉⵛ, ⵍⴰ ⵙ ⵍⴰⵏⵙⴰ ⵓⵍⴰ ⵙ ⴼⵍⵉⵜⵛⴰ.

19 ⵓⵥⵥⴰⵍ ⵖⴰⵔⴻⵙ ⴰⵎ ⵓⵍⵓⵎ,

ⵏⵏⵃⴰⵙ ⴰⵎ ⵓⴽⴻⵛⵛⵓⴹ ⵢⴰⵔⵛⴰⵏ.

20 ⴼⵍⵉⵜⵛⴰ ⵏ ⵍⵇⴻⵡⵙ ⵡⴰⵔ ⵜ ⵜⴻⵙⵙⵜⴻⵡⵡⴻⵊ,

ⵉⵥⵔⴰ ⵏ ⵉⴵⵉⵢ ⴷⴷⴰⴽⴽⵡⴰⵍⴻⵏ ⵥⵥⴰⵜⴻⵙ ⴷ ⴰⵇⴻⵛⵇⴰⵛ.

21 ⵉⴷⴻⴱⴱⵓⵥⴻⵏ ⵉⵃⴻⵙⵙⴻⴱ ⵉ-ⵜⴻⵏ ⴰⵎ ⵓⵇⴻⵛⵇⴰⵛ,

ⵉⴹⴻⵃⵃⴻⵛ ⵅ ⵓⵥⴻⴱⵥⴻⴱ ⵏ ⵓⵃⵔⵉⵛ.

22 ⵖⴰⵔ ⵡⴰⴷⴷⴰⵢ ⵏ ⵓⵄⴻⴷⴷⵉⵙ ⵏⵏⴻⵙ ⴰⵇⴰ ⴷⵉⵏ ⵉⵛⴻⵇⴼⴰⵏ ⵉⵇⴻⴹⵄⴻⵏ,

ⵉⵜⵜⵊⴰⵔⵔⴰ ⵍⴻⵎⵡⴰⵙ ⵉⵇⴻⴹⵄⴻⵏ ⵏⵏⵉ ⴰⵎ ⵜⴻⵍⵡⵉⵃⵜ ⵉⵜⵜⴻⵃⵍⵓⴵⵓⴹⴻⵏ ⵉ ⵓⵙⴰⵔⵡⴻⵜ ⵜⵉⵡⴰ ⵏ ⵓⴱⴻⴵⴰⵄ.

23 ⵉⴳⴳⴰ ⵍⴰⴵⴰⵖ ⴰⴷ ⵉⵙⵙⵜⴻⵅⵜⴻⵅ ⴰⵎ ⵜⴻⵢⴷⴰⵔⵜ,

ⵉⵜⵜⴻⴳⴳ ⵍⴻⴱⵃⴰⵔ ⴰⵎ ⵓⵎⴻⵇⵔⴰⵊ ⵉⵜⵜⵀⴰⵊⴰⵏ.

24 ⵉⵜⵜⴻⵊⵊⴰ ⴰⵡⴰⵔⵏⵉ ⴰⵙ ⵊⵊⵓⵔⵔⴻⵜ ⵜⴰⵔⴻⵇⵇ ⴷ ⴰⵎⴻⵙⵔⴰⵇ,

ⴰⵎⴰⵏ ⵢⵓⴵⵖⴻⵏ ⵜⵜⴱⴰⵏⴻⵏ ⴰⵎⴻⵛⵏⴰⵡ ⴰⵛⴻⵡⵡⴰⴼ ⵏ ⵓⵎⴻⵛⵛⴰⵢⴱⵓ.

25 ⵡⴰⵔ ⴷⵉⵏ ⵉⴵⵉ ⵓⵍⴰ ⴷ ⵉⵊⵊ ⵅ ⵜⴻⵎⵎⵓⵔⵜ ⵢⴰⵔⵡⴻⵙ ⴷⴰⵢⴻⵙ,

ⵉⵜⵜⵡⴰⴳⴳ ⵃⵉⵎⴰ ⵄⴻⵎⵎⴰⵔⵚ ⵡⴰⵔ ⵉⵜⵜⴻⴳⴳⵯⴻⴷ.

26 ⵉⵏⴹⴰⵔ ⵜⵉⵟⵟⴰⵡⵉⵏ ⵏⵏⴻⵙ ⵅ ⵎⴰⵔⵔⴰ ⵡⵉ ⵢⵓⵄⵍⴰⵏ,

ⴰⵇⴰ-ⵜ ⴷ ⴰⵊⴻⴵⵉⴷ ⵅ ⵎⴰⵔⵔⴰ ⵍⵎⴰⵍ ⵏ ⵍⵄⴻⵥⵥ.