ⵙⵉⴷⵉ ⵉⵙⵙⵉⵡⴻⵍ ⴰⴽ-ⴷ ⴰⵢⵓⴱ
40
1 ⵢⴰⵔⵏⵉ ⵢⴰⵔⵔⴰ-ⴷⴷ ⵙⵉⴷⵉ ⵅ ⴰⵢⵓⴱ, ⵉⵏⵏⴰ: 2 ⵎⴰ ⵉⵅⵙ ⵡⴻⵏⵏⵉ ⵉⵜⵜⴻⵎⵛⴰⵔⵔⴰⵄⴻⵏ ⴰⴽ-ⴷ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⴰⴷ ⵜ ⵉⵡⴻⴱⴱⴻⵅ ⵄⴰⴷ?
ⴻⵊⵊ ⵡⴻⵏⵏⵉ ⵉⵅⵙⴻⵏ ⴰⴷ ⵉⴷⵄⴰ ⴰⵔⴻⴱⴱⵉ, ⴰⴷ ⴷⴷ-ⵢⴰⵔⵔ!
3 ⵅⴻⵏⵏⵉ ⵢⴰⵔⵔⴰ-ⴷⴷ ⴰⵢⵓⴱ ⵅ ⵙⵉⴷⵉ, ⵉⵏⵏⴰ:
4 ⵅⵥⴰⵔ, ⵏⴻⵛⵛ ⴷⵔⵓⵙ, ⵎⵉⵏ ⵥⴻⵎⵎⴰⵔⴻⵖ ⴰⴷ ⵅⴰⴽ ⴷⴷ-ⴰⵔⵔⴻⵖ?
ⵏⴻⵛⵛ ⴰⴷ ⴳⴳⴻⵖ ⴰⴼⵓⵙ ⵉⵏⵓ ⵅ ⵓⵇⴻⵎⵎⵓⵎ ⵉⵏⵓ. ■
5 ⴰⵇⴰ ⵙⵙⵉⵡⵍⴻⵖ ⵉⵛⵜ ⵏ ⵜⵡⴰⵍⴰ, ⵎⴰⵛⴰ ⵡⴰⵔ ⴷⴷ-ⵜⵜⴰⵔⵔⵉⵖ ⵄⴰⴷ.
ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ ⵡⴰⵔ ⴷ ⴰⵙ ⴰⵔⴻⵏⵏⵉⵖ!
ⴰⵔⴻⴱⴱⵉ ⵉⴽⴻⵎⵎⴻⵔ ⴰⵡⴰⵍⴻⵏ ⵏⵏⴻⵙ ⵉ ⴰⵢⵓⴱ
6 ⵅⴰⵙ ⵓⵛⴰ ⵢⴰⵔⵏⵉ ⵢⴰⵔⵔⴰ-ⴷⴷ ⵙⵉⴷⵉ ⵅ ⴰⵢⵓⴱ ⵥⵉ ⵜⵃⴰⵔⵢⴰⴹⵜ, ⵉⵏⵏⴰ:
7 ⴱⵢⴻⵙ ⵅⴻⵏⵏⵉ ⵜⵉⵊⵄⵉⵏⵏⴰⵜⵉⵏ ⵏⵏⴻⴽ ⴰⵎ ⵡⴻⵔⵢⴰⵥ.
ⵏⴻⵛⵛ ⵅⵙⴻⵖ ⴰⴷ ⵛⴻⴽ ⵙⵙⴻⵇⵙⵉⵖ ⵓ ⵛⴻⴽ ⴰⵔⵔ-ⴷⴷ ⵅⴰⴼⵉ!
8 ⵎⴰ ⵜⴻⵅⵙⴻⴷ ⵙ ⵜⵉⴷⴻⵜⵜ ⴰⴷ ⵜⴰⵔⵥⴻⴷ ⵍⵃⵓⴽⵎ ⵉⵏⵓ?
ⵎⴰ ⵜⴻⵅⵙⴻⴷ ⴰⴷ ⵖⴰⵔⵉ ⴷⴷ-ⵜⴰⵔⵔⴻⴷ ⵍⵄⵉⴱ, ⵎⴰⵃⴻⵏⴷ ⴰⴷ ⵜⴱⴰⵏⴻⴷ ⵛⴻⴽ ⴷ ⴰⵎⵙⴻⴳⴳⴻⴷ? ■
9 ⵎⴰ ⵖⴰⵔⴻⴽ ⴰⵖⵉⵍ ⴰⵎ ⴰⵔⴻⴱⴱⵉ?
ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⴻⴷⴷⴰⵔⴷⵃⴻⴷ ⴰⵎ ⵡⴰⵊⵊⴰⵊ ⵙ ⵜⵎⵉⵊⵊⴰ ⵏⵏⴻⴽ?
10 ⵇⵇⴻⵏ ⵅⴻⵏⵏⵉ ⵉⵅⴻⴼ ⵏⵏⴻⴽ ⵙ ⵍⵄⴰⴹⴰⵎⴰ ⴷ ⵓⵄⵓⴵⵉ,
ⴰⵔⴹ ⵙ ⵜⵉⵙⵙⵉⵇⵜ ⴷ ⵍⵄⴻⵥⵥ.
11 ⴻⵊⵊ ⴰⴷⵓⵇⵇⴻⵥ ⵏ ⵓⴼⵓⴳⴻⵎ ⵏⵏⴻⴽ ⴰⴷ ⵉⵥⴻⴵⴻⵄ,
ⵅⵥⴰⵔ ⵖⴰⵔ ⴽⵓⵍ ⴱⵓ ⵏⵏⴼⴰⵅⴻⵜ,
ⵓⵛⴰ ⵙⴻⵀⵡⴰ ⵉ-ⵜ!
12 ⵅⵥⴰⵔ ⵎⵍⵉⵃ ⵖⴰⵔ ⵎⴽⵓⵍ ⴱⵓ-ⵏⵏⴼⴰⵅⴻⵜ ⵓⵛⴰ ⵙⴻⵀⵡⴰ ⵉ-ⵜ,
ⵍⴱⴻⵥ ⵉⵄⴻⴼⴼⴰⵏⴻⵏ ⴷⴻⴳ ⵡⴻⵎⵛⴰⵏ ⵏⵙⴻⵏ.
13 ⴼⴼⴰⵔ ⵉ-ⵜⴻⵏ ⵎⴰⵔⵔⴰ ⴰⵎ ⵎⵓⵏⴻⵏ ⴷⴻⴳ ⵓⵛⴰⵍ,
ⴱⴻⵍⵍⴻⵄ ⵅ ⵉⵖⴻⵎⴱⴰⴱ ⵏⵙⴻⵏ ⴷⴻⴳ ⵡⴻⵏⴹⴻⵍ.
14 ⵅⴻⵏⵏⵉ ⵓⵍⴰ ⴷ ⵏⴻⵛⵛ ⴰⴷ ⵛⴻⴽ ⵙⵙⴻⵎⵖⴰⵔⴻⵖ,
ⵎⵉⵏⵥⵉ ⴰⴼⵓⵙ ⵏⵏⴻⴽ ⴰⴼⵓⵙⵉ ⵉⵙⵙⴻⵏⵊⴻⵎ ⵉ ⵛⴻⴽ.
15 ⵅⵥⴰⵔ ⵎⴰⵛⴰ ⵍⵡⴻⵃⵛ, ‘ⴱⵀⵉⵎⵓⵜ’,
ⵡⴻⵏⵏⵉ ⴳⴳⵉⵖ ⴰⵎ ⵎⴰⵎⵎⴻⵛ ⵛⴻⴽ ⴳⴳⵉⵖ.
ⵉⵜⵜⴻⵜⵜ ⴰⵔⵔⴱⵉⵄ ⴰⵎ ⵓⴼⵓⵏⴰⵙ.
16 ⵅⵥⴰⵔ ⵎⴰⵛⴰ ⵊⵊⴻⵀⴷ ⵏⵏⴻⵙ ⴷⵉ ⵜⴻⵊⵄⵉⵏⵏⴰⵜⵉⵏ ⵏⵏⴻⵙ,
ⵍⵄⴻⵥⵥ ⵏ ⵉⵥⴻⵡⵔⴰⵏ ⵏⵏⴻⵙ ⵏ ⵓⵄⴻⴷⴷⵉⵙ!
17 ⵎⴰⵍⴰ ⵉⵅⵙ, ⴰⴷ ⵉⴳⴳ ⴰⴽⴻⵏⵏⴰⵙ ⵏⵏⴻⵙ ⴰⵎ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ,
ⵉⵥⴻⵡⵔⴰⵏ ⵏ ⵜⵎⴻⵚⵚⴰⴹⵉⵏ ⵏⵏⴻⵙ ⵎⴻⵃⴹⴻⵏ ⵎⵎⵓⴷⴻⵏ.
18 ⵉⵅⵙⴰⵏ ⵏⵏⴻⵙ ⵜⵜⴻⴳⴳⴻⵏ ⴰⵎ ⵉⵇⵓⴷⴰⵙ ⵏ ⵏⵏⵃⴰⵙ,
ⴰⵎ ⴱⴰⵔⵔⴰⵜ ⵏ ⵡⵓⵥⵥⴰⵍ ⵉⴹⴰⵔⴻⵏ ⴷ ⵉⵖⴰⴵⴻⵏ ⵏⵏⴻⵙ.
19 ⵏⴻⵜⵜⴰ ⴷ ⴰⵎⴻⵥⵡⴰⵔⵓ ⵏ ⵉⴱⵔⵉⴷⴻⵏ ⵏ ⴰⵔⴻⴱⴱⵉ.
ⵡⴻⵏⵏⵉ ⵜ ⵢⴻⴳⴳⵉⵏ, ⵉⵡⵛⴰ ⴰⵙ ⵙⵙⵉⴼ ⵏⵏⴻⵙ.
20 ⵉⵡⴰ, ⵉⴷⵓⵔⴰⵔ ⵜⵜⴰⵡⵢⴻⵏ ⴰⵙ-ⴷⴷ ⴰⵔⵔⴱⵉⵄ,
ⵎⴰⵔⵔⴰ ⵍⴻⵡⵃⵓⵛ ⵏ ⵢⴻⵢⵢⴰⵔ ⵜⵜⵉⵔⴰⵔⴻⵏ ⴷⵉⵏⵏⵉ.
21 ⵉⴱⴱⵓⵥⵥⴻⵍ ⵙⴰⴷⵓ ⵉ ⵜⵛⴻⵊⵊⵓⵔⴰ ⵉⵜⵜⴻⴳⴳⴻⵏ ⵜⵉⵍⵉ,
ⴷⴻⴳ ⵓⴷⵓⵔⵔⵉ ⵏ ⵓⵖⴰⵏⵉⵎ, ⴷⵉ ⵙⵙⴻⴱⵅⴻⵜ.
22 ⴰⴷ ⵅⴰⵙ ⴷⴷⵓⵔⵢⴻⵏⵜ ⵜⵛⴻⵊⵊⵓⵔⴰ ⵉ ⵉⵜⵜⵉⵛⴻⵏ ⵜⵉⵍⵉ, ⴽⵓⵍ ⵉⵛⵜ ⵙ ⵜⵉⵍⵉ ⵏⵏⴻⵙ,
ⵜⵉⵏⴻⵎⵔⴰⵞ ⵏ ⵜⵖⴻⵥⵔⴰⵜⵉⵏ ⵜⵜⴻⵏⵏⴹⴻⵏⵜ ⴰⵙ-ⴷⴷ.
23 ⵅⵥⴰⵔ, ⵎⴰⵍⴰ ⵉⵀⴰⵊ ⵢⴻⵖⵥⴰⵔ, ⵡⴰⵔ ⵉⵜⵜⴰⵔⵊⵉⵊⵉ,
ⵉⵜⵜⵖⵉⵎⴰ ⵢⴰⵔⵙⴰ ⵎⴰⵍⴰ ⵍⵃⴻⵎⵍⴻⵜ ⵏ ⵍ'ⵓⵔⴷⵓⵏ ⵜⵓⴷⴻⴼ ⴰⵙ-ⴷⴷ ⵖⴰⵔ ⵓⵇⴻⵎⵎⵓⵎ.
24 ⵎⴰ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⵜ ⵉⵟⵟⴻⴼ ⵅⴻⵏⵏⵉ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ,
ⴰⴷ ⴰⵙ ⵉⵙⵙⵏⵓⵇⵇⴻⴱ ⵜⵉⵏⵥⴰⵔⵜ ⵙ ⵜⴻⵙⵖⵓⵏⵉⵏ?
25 ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⵊⴻⴱⴷⴻⴷ ‘ⵍⵉ$ⵉⵢⴰⵜⴰⵏ’ ⵙ ⵜⵙⴻⵏⵏⴰⵔⵜ ⵏ ⵡⴻⵢⵎⴰⵔ,
ⵏⵉⵖ ⴰⴷ ⵜⴻⵙⵙⴻⵀⵡⵉⴷ ⵉⵍⴻⵙ ⵏⵏⴻⵙ ⴷⴻⴳ ⵓⴼⵉⵍⵓ ⵏ ⵡⴻⵢⵎⴰⵔ?
26 ⵎⴰ ⵜⵥⴻⵎⵎⴰⵔⴻⴷ ⴰⴷ ⴰⵙ ⵜⴻⴳⴳⴻⴷ ⵜⵅⴰⴷⴻⵏⵜ ⵏ ⵓⵖⴰⵏⵉⵎ ⴷⵉ ⵜⴻⵏⵥⴰⵔⵜ ⵏⵏⴻⵙ,
ⵏⵉⵖ ⴰⴷ ⵜⴻⵙⵙⵏⵓⵇⵇⴱⴻⴷ ⴰⵖⴻⵙⵎⵉⵔ ⵏⵏⴻⵙ ⵙ ⵓⵖⴰⵏⵞⵓ?
27 ⵎⴰ ⴰⴷ ⵥⵥⴰⵢⴻⴽ ⵉⵜⵜⴰⵔ ⴰⵃⵉⵏⵏⵉ?
ⵎⴰ ⴰⴷ ⵉⵙⵙⵉⵡⴻⵍ ⴰⴽⵉⴷⴻⴽ ⵙ ⵡⴰⵡⴰⵍⴻⵏ ⵉⵎⵉⵥⵉⴹⴻⵏ?
28 ⵎⴰ ⴰⴷ ⵢⴻⴳⴳ ⴰⴽⵉⴷⴻⴽ ⵍⵄⴰⵀⴷ?
ⵎⴰ ⵜⵥⴻⵎⵎⴰⵔⴻⴷ ⴰⴷ ⵜ ⵜⴻⴽⵙⵉⴷ ⴷ ⵉⵙⵎⴻⵖ ⵉ ⵍⴻⴱⴷⴰ?
29 ⵎⴰ ⵜⵥⴻⵎⵎⴰⵔⴻⴷ ⴰⴽⵉⴷⴻⵙ ⵜᵉⵜⵜⵉⵔⴰⵔⴻⴷ ⴰⵎ ⴰⴽ-ⴷ ⵉⵊⵊ ⵏ ⵓⵊⴹⵉⴹ,
ⵏⵉⵖ ⴰⴷ ⵜ ⵜⴻⵇⵇⵏⴻⴷ ⵉ ⵜⴻⵃⵔⴰⵎⵉⵏ ⵏⵏⴻⴽ?
30 ⵎⴰ ⵥⴻⵎⵎⴰⵔⴻⵏ ⵉⵏⴻⵢⵎⴰⵔⴻⵏ ⴰⴷ ⴷⴰⵢⴻⵙ ⵙⴻⴱⴱⴻⴱⴻⵏ?
ⵎⴰ ⵥⴻⵎⵎⴰⵔⴻⵏ ⴰⴷ ⵜ ⴱⴹⴰⵏ ⵊⴰⵔ ⵉⴽⴻⵏⵄⴰⵏⵉⵢⵢⴻⵏ?
31 ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⴻⵊⵊⵓⴷ ⵜⵉⵍⵎⴻⵛⵜ ⵏⵏⴻⵙ ⵙ ⴼⵍⵉⵜⵛⴰⵜ,
ⵏⵉⵖ ⵙ ⵍⴰⵏⵙⴰ ⵏ ⵉⵙⴻⵍⵎⴰⵏ ⴰⵥⴻⴵⵉⴼ ⵏⵏⴻⵙ?
32 ⵙⴰⵔⵙ ⵅⴰⵙ ⵎⴰⵛⴰ ⴰⴼⵓⵙ ⵏⵏⴻⴽ,
ⵅⴻⵎⵎ ⵖⴰⵔ ⵓⵎⴻⵏⵖⵉ, ⵡⴰⵔ ⵜ ⵜⵜⴻⴳⴳⵉⴷ ⵄⴻⵎⵎⴰⵔⵚ ⵄⴰⴷ.