39
1 ⵎⴰ ⵜⴻⵙⵙⵏⴻⴷ ⵎⴻⵍⵎⵉ ⵜⵜⴰⵔⵡⴻⵏⵜ ⵜⵖⴰⵢⴷⵉⵏ ⵏ ⵜⵚⵓⴹⴰⵔ? ⵎⴰ ⵜⵃⴻⵟⵟⵉⴷ ⵜⵉⵔⵡⴰ ⵏ ⵜⵓⴷⴰⴷⵉⵏ? ■
2 ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⵃⴻⵙⴱⴻⴷ ⵉⵢⵓⵔⴻⵏ ⵏ ⵜⴽⴻⵙⵙⵉⵜ ⵏⵙⴻⵏⵜ,
ⵎⴰ ⵜⴻⵙⵙⵏⴻⴷ ⵍⵃⴰⵍ ⵏ ⵜⵉⵔⵡⴰ ⵏⵙⴻⵏⵜ?
3 ⵏⵉⵜⴻⵏⵜⵉ ⵜⵜⴻⵇⵡⵉⵙⴻⵏⵜ, ⵜⵜⴰⵔⵡⴻⵏⵜ ⵉⵎⴻⵥⵢⴰⵏⴻⵏ ⵏⵙⴻⵏⵜ,
ⵍⴻⵡⵊⴻⵄ ⵏ ⵜⴰⵔⵓⵜ ⵏⵙⴻⵏⵜ ⵙⵙⵓⴼⴼⵓⵖⴻⵏ ⵜⴻⵏ.
4 ⵎⴻⵃⴹⴻⵏ ⵉⵎⴻⵥⵢⴰⵏⴻⵏ ⵏⵙⴻⵏⵜ , ⵎⴻⵇⵇⴰⵔⴻⵏ ⴷⵉ ⵍⴻⵅⵍⴰ,
ⵜⵜⴻⴼⴼⵖⴻⵏ ⵖⴰⵔ ⴱⴰⵔⵔⴰ ⵓ ⵡⴰⵔ ⵖⴰⵔⵙⴻⵏⵜ ⵜⵜⵄⵉⵇⵇⵉⴱⴻⵏ.
5 ⵎⴰⵏ ⵡⴻⵏ ⵢⴰⵔⵅⵓⵏ ⵉ ⵡⴻⵖⵢⵓⵍ ⵏ ⵍⴻⵅⵍⴰ,
ⵓ ⵜⵉⵙⴰⵔⵔⵉⴼⵉⵏ ⵏ ⵡⴻⵖⵢⵓⵍ ⵏ ⵍⴻⵅⵍⴰ, ⵎⴰⵏ ⵡⴻⵏ ⵜⴻⵏⵜ ⵉⴼⴻⵙⵢⴻⵏ?
6 ⵏⴻⵛⵛ ⵡⵛⵉⵖ ⴰⵙ ⵜⴰⵏⴻⵥⵔⵓⴼⵜ ⴷ ⵜⴰⴷⴷⴰⵔⵜ,
ⵍⴻⵡⴹⴰ ⴰⵎⴻⴵⴰⵃ ⴷ ⵜⵉⵥⴻⴷⴷⵉⵖⵉⵏ ⵏⵏⴻⵙ. ■
7 ⵏⴻⵜⵜⴰ ⵉⴹⴻⵃⵃⴻⵛ ⵅ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵜⴻⵏⴷⵉⵏⵜ,
ⵡⴰⵔ ⵉⵜⵜⴻⵙⵍⵉ ⵉⵖⵓⵢⵢⴰⵏ ⵏ ⵢⵉⵏⵏⵉ ⵉⵥⴻⵢⵢⴰⵔⴻⵏ ⵉⵙⴻⵎⵖⴰⵏ.
8 ⵊⵊⵡⴰⵢⴻⵀ ⵏ ⵉⴷⵓⵔⴰⵔ ⴷ ⴷⴷⵎⴰⵏⵉ ⵏⵏⴻⵙ ⵏ ⵜⴰⵔⴻⵡⵙⴰ,
ⵢⴰⵔⴻⵥⵥⵓ ⴷⴰⵢⵙⴻⵏ ⵅ ⵇⴰⵄ ⵎⵉⵏ ⵉⴵⴰⵏ ⴷ ⴰⵥⵉⵥⴰ.
9 ⵎⴰ ⴰⴷ ⵉⵅⵙ ⵉⵖⴰⵢⴹ ⴰⴽ-ⴷ ⵢⵉⵊⵊ-ⵏ-ⵢⵉⵛⵛ ⴰⴷ ⵅⴰⴽ ⵉⵙⴻⵅⵅⴰⵔ?
ⵎⴰ ⴰⴷ ⵉⵙⵙⴻⵏⵙ ⵖⴰⵔ ⵍⵎⴻⴷⵡⴻⴷ ⵏⵏⴻⴽ?
10 ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⵎⴻⵏⵄⴻⴷ ⵉⵖⴰⵢⴹ ⴰⴽ-ⴷ ⵢⵉⵊⵊ-ⵏ-ⵢⵉⵛⵛ ⵙ ⵡⴻⵙⵖⵓⵏ ⵏⵏⴻⵙ ⵖⴰⵔ ⵓⵄⴻⵢⵢⴻⴷ ⵏ ⵡⴻⵛⵔⴰⵥ?
ⵎⴰ ⴰⴷ ⵉⵛⴰⵔⵥ ⵜⵉⵢⵙⴰⵔⵉⵏ ⴰⵡⴰⵔⵏⵉ ⴰⵛ?
11 ⵎⴰ ⵜᵉⵜⵜⵛⴰⵍⴻⴷ ⵅⴰⵙ, ⵎⵉⵏⵥⵉ ⵏⴻⵜⵜⴰ ⵉⵊⵀⴻⴷ ⴰⵟⵟⴰⵙ,
ⵎⴰ ⴰⴷ ⴰⵙ ⵜⴻⵊⵊⵉⴷ ⵍⵅⴻⴷⵎⴻⵜ ⵏⵏⴻⴽ?
12 ⵎⴰ ⴰⴷ ⵅⴰⵙ ⵜᵉⵜⵜⴻⵛⵍⴻⴷ ⴰⴷ ⵖⴰⵔⴻⴽ ⴷⴷ-ⵢⴰⵔⵔ ⵥⵥⴰⵔⵉⵄⴻⵜ ⵏⵏⴻⴽ ⵏⴻⵜⵜⴰ,
ⴰⴷ ⵜⵜ ⵢⴰⵡⵉ ⵖⴰⵔ ⵓⵏⴻⴷⵔⴰⵔ ⵏⵏⴻⴽ?
13 ⴰⴼⵔⵉⵡⴻⵏ ⵏ ⵏⵏⵄⴰⵎⴻⵜ ⵛⵛⴰⵜⴻⵏ ⵙ ⵍⵅⴰⴹⴰⵔ.
ⵡⴰⵔ ⴷⵉⵏ ⴰⵀⴰⵡⴰⵍ ⵙ ⵡⴰⴼⵔⵉⵡⴻⵏ ⴷ ⵡⴰⵔⵔⵉⵛ ⵏⵏⴻⵙ, □
14 ⵎⴰⵛⴰ ⵜᵉⵜⵜⴻⵊⵊⴰ ⵜⵉⵎⴻⴵⴰⵍⵉⵏ ⵏⵏⴻⵙ ⴷⴻⴳ ⵓⵛⴰⵍ ⵏ ⵜⴻⵎⵎⵓⵔⵜ,
ⵜᵉⵜⵜⴻⵊⵊⴰ ⵉ-ⵜⴻⵏⵜ ⵜⵜⴻⵃⵎⴰⵏⵜ ⴷⴻⴳ ⵉⵊⴷⵉ.
15 ⵜᵉⵜⵜᵉⵜⵜⵓ ⴰⵇⴰ ⵉⵊⵊ ⵏ ⵓⴹⴰⵔ ⵉⵥⴻⵎⵎⴰⵔ ⴰⴷ ⵜⴻⵏⵜ ⵉⵍⴱⴻⵥ,
ⴰⵇⴰ ⵍⴻⵡⵃⵓⵛ ⵏ ⵍⴻⵅⵍⴰ ⵥⴻⵎⵎⴰⵔⴻⵏ ⴰⴷ ⵅⴰⵙⴻⵏⵜ ⵄⴻⴼⵙⴻⵏ.
16 ⵏⴻⵜⵜⴰⵜ ⵜⵇⴻⵙⵙⴻⵃ ⴷⴻⴳ ⵉⵎⴻⵥⵢⴰⵏⴻⵏ ⵏⵏⴻⵙ ⴰⵅⵎⵉ ⵡⴰⵔ ⴵⵉⵏ ⵏⵏⴻⵙ.
ⴱⴰⵟⴻⵍ ⵉ ⵜᵉⵜⵜⴻⴳⴳ ⵜⵉⵥⴻⵎⵎⴰⵔ ⵏⵏⴻⵙ, ⵎⴰⵖⴰⵔ ⵏⴻⵜⵜⴰⵜ ⵡⴰⵔ ⵜⴽⴻⵙⵙⵉ ⵙ ⵡⴻⵎⵏⵓⵙ,
17 ⵎⴰⵖⴰⵔ ⴰⵔⴻⴱⴱⵉ ⵉⵊⵊⴰ ⵉ-ⵜⵜ ⴰⴷ ⵜᵉⵜⵜⵓ ⵜⵉⵖⵉⵜ,
ⵡⴰⵔ ⴷ ⴰⵙ ⵉⵡⵛⵉ ⴱⵓ ⵜⴻⵙⵖⴰⵔⵜ ⴷⵉ ⵍⴻⴼⵀⴰⵎⴻⵜ.
18 ⵎⴰⵛⴰ ⵎⴰⵍⴰ ⵜⴻⴽⵙⵉ ⴷⴻⴳ ⵓⴹⴰⵔ ⵏⵏⴻⵙ, ⵜⴻⵙⵙⴳⴻⵄⵄⴰⴷ ⵉⵅⴻⴼ ⵏⵏⴻⵙ,
ⵜⴹⴻⵃⵃⴻⵛ ⵅ ⵓⵢⵉⵙ ⴷ ⵡⴻⵏⵏⵉ ⵅⴰⵙ ⵉⵏⵢⵉⵏ.
19 ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⴻⵡⵛⴻⴷ ⵊⵊⴻⵀⴷ ⵉ ⵓⵢⵉⵙ?
ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⴻⵙⵙⵢⴰⵔⴹⴻⴷ ⵉⵊⵉⵎⴰⵏ ⵏⵏⴻⵙ ⵙ ⵙⵙⴱⵉⴱ?
20 ⵎⴰ ⵜⵥⴻⵎⵎⴰⵔⴻⴷ ⴰⴷ ⵜ ⵢⴰⵔⵔ ⵉⵏⴻⵟⵟⵓ ⴰⵎ ⵓⴱⵓⵔⵅⴻⵙ?
ⵍⵄⴻⵥⵥ ⵏ ⵓⵙⵏⴻⵃⵏⴻⵃ ⵏⵏⴻⵙ ⵉⵙⵙⴰⴳⴳⵯⴰⴷ ⴰⵟⵟⴰⵙ.
21 ⵅⴻⴱⴱⵛⴻⵏ ⵉⵢⵙⴰⵏ ⵙ ⵉⴹⴰⵔⴻⵏ ⵏⵙⴻⵏ ⴰⵎ ⵜⵜⵔⴰⵊⴰⵏ ⴷⵉ ⵍⴻⵡⴹⴰ ⵏ ⵜⴻⵖⵥⵓⵔⵜ,
ⵉⴼⴰⵔⵃ ⵓⵢⵉⵙ ⵙ ⵊⵊⴻⵀⴷ ⵏⵏⴻⵙ,
ⵉⵜⵜⴻⴼⴼⴻⵖ ⵎⴰⵃⴻⵏⴷ ⴰⴷ ⵉⵎⵎⴻⵍⵇⴰ ⴰⴽ-ⴷ ⵍⵄⴻⵙⴽⴰⵔ ⵢⴰⵔⴹⴻⵏ ⴰⵔⵔⵓⴹ ⵏ ⵡⵓⵥⵥⴰⵍ.
22 ⵉⴹⴻⵃⵃⴻⵛ ⵅ ⵎⴰⵔⵔⴰ ⵎⵉⵏ ⵉⵙⵙⴰⴳⴳⵯⴰⴷⴻⵏ, ⵡⴰⵔ ⵉⵜⵜⵏⴻⵅⵍⵉⵄ ⵥⵉ ⵡⴰⵍⵓ,
ⵓ ⵡⴰⵔ ⵉⴷⴷⵉⴽⴽⵡⵉⵍ ⵖⴰⵔ ⴹⴻⴼⴼⴰⵔ ⵥⵉ ⵙⵙⵉⴼ.
23 ⵉⵜⵜⵇⴰⵔⵇⵓⴱ ⵡⴻⵇⵔⴰⴱ ⵏ ⴼⵍⵉⵜⵛⴰⵜ ⵙⴻⵏⵏⴻⵊ ⵏⵏⴻⵙ,
ⵍⴰⵏⵙⴰ ⴷ ⴼⵍⵉⵜⵛⴰ ⵜⵜⵉⵙⵙⵉⵇⴻⵏ.
24 ⵙ ⴷⴷⵔⵉⵥ ⵏ ⵜⵛⴻⴹⵢⵉⵏ ⴷ ⵥⵥⵄⴰⵎⴻⵜ ⵉⵚⴰⵔⵔⴻⴹ ⵏⴻⵜⵜⴰ ⵜⴰⵎⵎⵓⵔⵜ,
ⵡⴰⵔ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵙⴱⴻⴷⴷ ⵖⴰⵔ ⵓⵚⵓⴹⵉ ⵏ ⵓⵢⵉⵛⵛ ⵏ ⵉⵛⴰⵔⵔⵉ.
25 ⵖⴰⵔ ⵜⵎⵉⵊⵊⴰ ⵏ ⵓⵚⵓⴹⵉ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⵉⵙⵙⵏⴻⵃⵏⵉⵃ: ‘ⵀⴻⵀⴻⵀ!’
ⵉⵜⵜⴰⵛⴰ ⴰⴽ-ⴷ ⵓⵎⴻⵏⵖⵉ ⵥⵉ ⵍⴰⴳⴳⵯⴰⵊ,
ⵥⵥⴳⴰ ⵏ ⵉⵥⴻⴵⵉⴼⴻⵏ ⵏ ⵍⵄⴻⵙⴽⴰⵔ ⴷ ⵉⵖⵓⵢⵢⴰⵏ ⵏ ⵓⵎⴻⵏⵖⵉ.
26 ⵎⴰ ⵉⵟⵟⴰⵡ ⵍⴱⴰⵥ ⵥⵉ ⵍⴻⴼⵀⴰⵎⴻⵜ ⵏⵏⴻⴽ,
ⴰⵇⴰ ⵉⵜⵜⴱⴻⵥⵥⴰⵄ ⴰⴼⵔⵉⵡⴻⵏ ⵏⵏⴻⵙ ⵖⴰⵔ ⵍⵊⴰⵏⵓⴱ?
27 ⵎⴰ ⵉⵙⵙⴳⴻⵄⵄⴰⴷ ⵓⴳⵉⴷⴰⵔ ⵉⵅⴻⴼ ⵏⵏⴻⵙ ⴰⵎⵎⵓ ⵙⴻⵏⵏⴻⵊ ⵇⴰⵄ ⵙ ⵍⵓⵎⵓⵔ ⵏⵏⴻⴽ,
ⵓ ⵉⵜⵜⴻⴳⴳ ⵍⵄⵓⵛⵛ ⵏⵏⴻⵙ ⴷⵉ ⵍⵓⵄⵍⴰ? ■
28 ⵉⵥⴻⴷⴷⴻⵖ ⵓ ⵉⵙⵙⵏⵓⵙⴰ ⵅ ⵊⵊⴰⵔⴼ,
ⵅ ⵓⵛⴻⵏⵇⵓⴱ ⵏ ⵊⵊⴰⵔⴼ, ⴰⵇⴰ-ⵜ ⴷ ⵍⴱⵓⵔⵊ ⵏⵏⴻⵙ.
29 ⵙⵙⴻⵏⵏⵉ ⵉⵃⴻⵟⵟⴰ ⵥⵥⴰⵔⴷⴻⵜ,
ⵜⵉⵟⵟⴰⵡⵉⵏ ⵏⵏⴻⵙ ⵅⴻⵥⵥⴰⵔⴻⵏⵜ-ⵉ-ⴷⴷ ⵥⵉ ⵍⴰⴳⴳⵯⴰⵊ.
30 ⵉⵎⴻⵥⵢⴰⵏⴻⵏ ⵏⵏⴻⵙ ⵙⴻⴽⴽⴼⴻⵏ ⵉⴷⴰⵎⵎⴻⵏ,
ⵓ ⵎⴰⵏⵉ ⴵⴰⵏ ⵉⵏⵏⵉ ⵉⵜⵜⵡⴰⵏⵖⴻⵏ, ⴰⵇⴰ-ⵜ ⴷⵉⵏ ⵉ ⵢⴻⴵⴰ. ■