1 ⴰⵢⵓⴱ ⵢⴰⵔⵔⴰ-ⴷⴷ ⵅ ⵙⵉⴷⵉ, ⵉⵏⵏⴰ:

2 “ⵏⴻⵛⵛ ⵙⵙⵏⴻⵖ ⴰⵇⴰ ⵛⴻⴽ ⵜⵥⴻⵎⵎⴰⵔⴻⴷ ⵉ ⴽⵓⵍⵛⵉ

ⵓ ⵡⴰⵔ ⵉⵙⵙⴱⴻⵟⵟⵉⵍ ⵓⵍⴰ ⴷ ⵉⵊⵊ ⵏ ⵡⴻⵏⵡⴰⵢ ⵏⵏⴻⴽ.

3 ⵛⴻⴽ ⵜⴻⵇⵇⴰⵔⴻⴷ: ‘ⵎⴰⵏ ⵡⴻⵏ ⵉⵙⵙⴱⴰⵔⵔⵛⵏⴻⵏ ⴱⵍⴰ ⵜⵓⵙⵙⵏⴰ ⵛⵛⵡⴰⵔ ⵏ ⴰⵔⴻⴱⴱⵉ?’ ⵙ ⵓⵢⴻⵏⵏⵉ ⵙⵙⵉⵡⵍⴻⵖ ⵅ ⵎⵉⵏ ⵡⴰⵔ ⴼⵀⵉⵎⴻⵖ, ⵅ ⵜⵎⴻⵙⵍⴰⵢⵉⵏ ⵏⵏⵉ ⴷⵉ ⵜⵜⴱⴻⵀⵜⴻⵖ ⴰⵟⵟⴰⵙ, ⵡⴰⵔ ⵜⴻⵏⵜ ⵙⵙⵉⵏⴻⵖ.” ^■  

4 “ⵙⴻⵍ ⵎⴰⵛⴰ ⵓⵛⴰ ⴰⴷ ⵙⵙⵉⵡⵍⴻⵖ, ⵅⵙⴻⵖ ⴰⴷ ⵛⴻⴽ ⵙⵙⴻⵇⵙⵉⵖ ⵓⵛⴰ ⵅⴻⵏⵏⵉ ⵛⴻⴽ ⴰⴷ ⴰⵢⵉ ⵅⴰⵙ ⵜⴻⵙⵙⴰⵔⴳⴱⴻⴷ.

5 ⵙ ⵓⵎⴻⵥⵥⵓⵖ ⵅⴰⴽ ⵉ ⵙⵍⵉⵖ ⵡⴰⵀⴰ, ⵎⴰⵛⴰ ⵍⴻⵅⵅⵓ ⵜⵉⵟⵟ ⵉⵏⵓ ⵜⴻⵥⵔⵉ ⵛⴻⴽ.

6 ⵙ ⵓⵢⴻⵏⵏⵉ ⵜⵜⵄⵉⴼⴼⵉⵖ ⵉⵅⴻⴼ ⵉⵏⵓ ⵓⵛⴰ ⵏⴷⴻⵎⵎⴻⵖ, ⵇⵇⵉⵎⴻⵖ ⴷⵉ ⵜⵄⴻⵊⵊⴰⵊⵜ ⴷ ⵢⵉⵖⵖⴻⴹ.”

7 ⴰⵡⴰⵔⵏⵉ ⵍⴰⵎⵉ ⵜⵓⵖⴰ ⵉⵙⵙⵉⵡⵉⵍ ⵙⵉⴷⵉ ⴰⵡⴰⵍⴻⵏ-ⴰ ⴰⴽ-ⴷ ⴰⵢⵓⴱ, ⵉⵏⵏⴰ ⵙⵉⴷⵉ ⵉ ⵉⵍⵉⴼⴰⵥ ⵥⵉ ⵜⴰⵢⵎⴰⵏ: “ⵍⵖⴰⴹⴰⴱ ⵉⵏⵓ ⵢⴰⵔⵖⴰ ⵅⴰⴽ ⵓ ⵅ ⵜⵏⴰⵢⴻⵏ ⵏ ⵉⵎⴻⴷⴷⵓⴽⴽⴰⵍ ⵏⵏⴻⴽ, ⵎⴰⵖⴰⵔ ⴽⴻⵏⵏⵉⵡ ⵡⴰⵔ ⵅⴰⴼⵉ ⵜⴻⵙⵙⵉⵡⵍⴻⵎ ⵛⴰ ⵏⵉⵛⴰⵏ ⴰⵎ ⵎⴰⵎⵎⴻⵛ ⵅⴰⴼⵉ ⵉⵙⵙⵉⵡⴻⵍ ⵓⵎⵙⴻⵅⵅⴰⵔ ⵉⵏⵓ ⴰⵢⵓⴱ.

8 ⵅⴻⵏⵏⵉ ⵍⴻⵅⵅⵓ, ⴽⵙⵉⵎ ⴽⴻⵏⵏⵉⵡ ⵙⴻⴱⵄⴰ ⵏ ⵉⵢⴻⵏⴷⵓⵥⴻⵏ ⴷ ⵙⴻⴱⵄⴰ ⵏ ⵉⵛⴰⵔⵔⵉⵢⵢⴻⵏ, ⵓⵛⴰ ⵓⵢⵓⵔⴻⵎ ⵖⴰⵔ ⵓⵎⵙⴻⵅⵅⴰⵔ ⵉⵏⵓ ⴰⵢⵓⴱ ⵓⵛⴰ ⵇⴻⴷⴷⵎⴻⵎ ⵜⴻⵏ ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵉ ⵢⵉⵅⴻⴼ ⵏⵡⴻⵎ. ⵊⵊⴻⵎ ⴰⵎⵙⴻⵅⵅⴰⵔ ⵉⵏⵓ ⴰⵢⵓⴱ ⴰⴷ ⵅⴰⵡⴻⵎ ⵉⵥⵥⴰⴵ. ⵎⴰⵖⴰⵔ ⵏⴻⵛⵛ ⴰⴷ ⵙⵙⴳⴻⵄⵄⴷⴻⵖ ⴰⵖⴻⵎⴱⵓⴱ ⵏⵏⴻⵙ ⵉ ⵡⴻⵙⵜⴰⵊⴻⴱ, ⵃⵉⵎⴰ ⵡⴰⵔ ⵜⵜⴻⴳⴳⴻⵖ ⴰⴽⵉⴷⵡⴻⵎ ⴰⵎ ⵜⵓⴱⴱⵓⵀⴻⵍⵢⴰ ⵏⵡⴻⵎ, ⵎⵉⵏⵥⵉ ⴽⴻⵏⵏⵉⵡ ⵡⴰⵔ ⵅⴰⴼⵉ ⵜⴻⵙⵙⵉⵡⵉⵍⴻⵎ ⵏⵉⵛⴰⵏ ⴰⵎ ⵎⴰⵎⵎⴻⵛ ⵅⴰⴼⵉ ⵉⵙⵙⵉⵡⵉⵍ ⵓⵎⵙⴻⵅⵅⴰⵔ ⵉⵏⵓ ⴰⵢⵓⴱ.”

9 ⵅⴻⵏⵏⵉ ⵉⴼⴼⴻⵖ ⵉⵍⵉⴼⴰⵥ ⵥⵉ ⵜⴰⵢⵎⴰⵏ, ⵓ ⴱⵉⵍⴷⴰⴷ ⵥⵉ ⵛⵓⵃⴰ ⴷ ⵚⵓⴼⴰⵔ ⵥⵉ ⵏⴰⵄⵎⴰⵜ ⵓⵛⴰ ⴳⴳⵉⵏ ⵏⵉⵜⵏⵉ ⴰⵎ ⵎⴰⵎⵎⴻⵛ ⵉ ⴷ ⴰⵙⴻⵏ ⵉⵏⵏⴰ ⵙⵉⴷⵉ. ⵙⵉⴷⵉ ⵉⵙⵙⴳⴻⵄⵄⴻⴷ ⴰⵖⴻⵎⴱⵓⴱ ⵏ ⴰⵢⵓⴱ ⵉ ⵓⵙⵜⴰⵊⴻⴱ ⵏ ⵜⵥⴰⴵⵉⵜ ⵏⵏⴻⵙ.

10 ⵙⵉⴷⵉ ⵉⴼⵙⵉ ⵉⵛⴻⴷⴷⵉⵢⵢⴻⵏ ⵏ ⴰⵢⵓⴱ, ⴰⵡⴰⵔⵏⵉ ⵍⴰⵎⵉ ⵜⵓⵖⴰ ⵉⵜⵜⵥⴰⴵⴰ ⴰⵢⵓⴱ ⵉ ⵉⵎⴻⴷⴷⵓⴽⴽⴰⵍ ⵏⵏⴻⵙ, ⵓⵛⴰ ⵢⴰⵔⵏⵉ ⵙⵉⴷⵉ ⴷⵉ ⵎⴰⵔⵔⴰ ⴰⴳⵍⴰ ⵏ ⴰⵢⵓⴱ ⵜⵏⴰⵢⴻⵏ ⵏ ⵜⵙⴻⵇⵇⴰⵔ.

11 ⵓⵙⵉⵏ-ⴷⴷ ⵖⴰⵔⴻⵙ ⵎⴰⵔⵔⴰ ⴰⵢⵜⵎⴰⵙ ⴷ ⵎⴰⵔⵔⴰ ⵙⵓⵢⴻⵜⵎⴰⵙ ⴷ ⵎⴰⵔⵔⴰ ⵉⵏⵏⵉ ⵜ ⵉⵙⵙⵏⴻⵏ ⵥⵉⵛ. ⵏⵉⵜⵏⵉ ⵛⵛⵉⵏ ⴰⴽⵉⴷⴻⵙ ⴰⵖⵔⵓⵎ ⴷⵉ ⵜⴰⴷⴷⴰⵔⵜ ⵏⵏⴻⵙ ⵓⵛⴰ ⵙⵙⴻⵛⵏⴻⵏ ⴰⵙ ⴰⵥⵉⴵⴻⵥ ⵏⵙⴻⵏ ⵓⵛⴰ ⵄⴻⵥⵥⴰⵏ ⵜ ⵅ ⵎⴰⵔⵔⴰ ⵍⵖⴰⵔ ⵅⴰⵙ ⴷⴷ-ⵉⵖⴹⴻⵍ ⵙⵉⴷⵉ. ⵉⵡⵛⴰ ⴰⵙ ⴽⵓⵍ ⵉⵊⵊⴻⵏ ⵥⵥⴰⵢⵙⴻⵏ ⵉⵛⵜ ⵏ ⵜⴻⴱⵢⴰⵙⵜ ⵏ ⵏⵏⵓⵇⴰⵔⵜ ⵓⵍⴰ ⴷ ⵉⵛⵜ ⵏ ⵜⵅⴰⴷⴻⵏⵜ ⵏ ⵡⵓⵔⴻⵖ.

12 ⵉⴱⴰⵔⴻⴽ ⵙⵉⴷⵉ ⵜⴰⵏⴻⴳⴳⴰⵔⵓⵜ ⵏ ⴰⵢⵓⴱ ⴽⵜⴰⵔ ⵥⵉ ⵜⵎⴻⵥⵡⴰⵔⵓⵜ ⵏⵏⴻⵙ, ⵎⴰⵖⴰⵔ ⵜⵓⵖⴰ ⵖⴰⵔⴻⵙ ⴰⵔⴻⴱⵄⴰ-ⴰⵍⴰⴼ ⵏ ⵡⵓⴵⵉ ⴷ ⵙⴻⵜⵜⴰ-ⴰⵍⴰⴼ ⵏ ⵉⵍⴻⵖⵎⴰⵏ ⴷ ⵡⴰⵍⴻⴼ ⵏ ⵉⴼⵓⵏⴰⵙⴻⵏ ⵏ ⵜⴻⵖⵏⴰⵛⵜ ⴷ ⵡⴰⵍⴻⴼ ⵏ ⵜⴻⵖⵢⴰⵍ.

13 ⵜⵓⵖⴰ ⵖⴰⵔⴻⵙ ⵙⴻⴱⵄⴰ ⵏ ⵉⵃⴻⵏⵊⵉⵔⴻⵏ ⴷ ⵜⵍⴰⵜⴰ ⵏ ⵢⴻⵙⵙⵉⵙ.

14 ⵜⴰⵎⴻⵥⵡⴰⵔⵓⵜ ⵉⴳⴳⴰ ⴰⵙ ⵢⴰⵎⵉⵎⴰ, ⵡⵉⵙⵙ ⵜⵏⴰⵢⴻⵏ ⵇⵇⴰⵔⴻⵏ ⴰⵙ ⵇⴰⵚⵉⵄⴰ ⴷ ⵡⵉⵙⵙ ⵜⵍⴰⵜⴰ ⵇⵇⴰⵔⴻⵏ ⴰⵙ ⵇⴰⵔⵏ-ⵀⴰⴼⴼⵓⴽ.

15 ⵡⴰⵔ ⵓⴼⵉⵏ, ⴷⵉ ⵎⴰⵔⵔⴰ ⴷⴷⵓⵏⴻⵛⵜ, ⵜⵉⵃⵔⴰⵎⵉⵏ ⵛⵏⴰⵏⵜ ⴰⵎⴻⵛⵏⴰⵡ ⵢⴻⵙⵙⵉⵙ ⵏ ⴰⵢⵓⴱ. ⴱⴰⴱⴰⵜⵙⴻⵏⵜ ⵉⵡⵛⴰ ⴰⵙⴻⵏⵜ ⵜⴰⵙⵖⴰⵔⵜ ⵊⴰⵔ ⴰⵢⵜⵎⴰⵜⵙⴻⵏⵜ.

16 ⴰⵢⵓⴱ ⵉⴷⴷⴰⵔ ⴰⵡⴰⵔⵏⵉ ⵉ ⵓⵢⴰ ⵎⵢⴰ ⵓ-ⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ. ⵏⴻⵜⵜⴰ ⵉⵥⵔⴰ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵉⵃⴻⵏⵊⵉⵔⴻⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵖⴰⵔⴻⵙ ⴰⵍ ⵊⵊⵉⵍ ⵡⵉⵙⵙ ⴰⵔⴻⴱⵄⴰ.

17 ⴰⵢⵓⴱ ⵉⵎⵎⵓⵜ ⴰⵡⴰⵔⵏⵉ ⵍⴰⵎⵉ ⵉⵡⵙⴰⵔ ⴰⵟⵟⴰⵙ ⵓ ⵜⵓⵖⴰ ⵉⵊⵊⵉⵡⴻⵏ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ.