ⵍⵃⴰⵔⴹ ⵡⵉⵙⵙ ⴰⵔⴻⴱⵄⴰ ⵏ ⵉⵍⵉⵀⵓ ⵅ ⵓⵊⴰⵔⵔⴻⴱ ⴷ ⵡⴻⵄⵇⴰⴱ ⵖⴰⵔ ⴰⵔⴻⴱⴱⵉ
36
1 ⵢⴰⵔⵏⵉ ⵉⵍⵉⵀⵓ ⴷⴻⴳ ⵡⴰⵡⴰⵍ, ⵉⵏⵏⴰ: 2 ⵚⴱⴰⵔ ⵛⵡⴰⵢⵜ ⴰⴽⵉⴷⵉ, ⵅⴻⵏⵏⵉ ⵏⴻⵛⵛ ⴰⴷ ⴰⵛ ⵙⵙⴻⵛⵏⴻⵖ,
ⴰⵇⴰ ⴷⵉⵏ ⵄⴰⴷ ⵍⴻⵙⴱⴰⴱ ⴽⵜⴰⵔ ⴷⵉ ⵟⵟⵡⴻⵄ ⵏ ⵜⵎⴻⵙⵍⴰⵛⵜ ⵏ ⴰⵔⴻⴱⴱⵉ.
3 ⵏⴻⵛⵛ ⴰⴷ ⴷⴷ-ⴰⵡⵢⴻⵖ ⵜⵓⵙⵙⵏⴰ ⵉⵏⵓ ⵥⵉ ⵍⴰⴳⴳⵯⴰⵊ,
ⴰⴷ ⵏⴻⵄⵎⴻⵖ ⵜⴰⵙⴻⴳⴷⴰ ⵏ ⵡⴻⵏⵏⵉ ⴷ ⴰⵢⵉ ⴷⴷ-ⵉⵅⴻⵍⵇⴻⵏ.
4 ⵎⴰⵖⴰⵔ ⵙ ⵜⵉⴷⴻⵜⵜ, ⴰⵡⴰⵍⴻⵏ ⵉⵏⵓ ⵡⴰⵔ ⴵⵉⵏ ⴷ ⵉⵅⴰⵔⵔⵉⵇⴻⵏ,
ⴰⵇⴰ ⵥⵥⴰⵜⴻⴽ ⵡⴻⵏⵏⵉ ⴷ ⴱⵓ-ⵜⵓⵙⵙⵏⴰ ⵜⴰⵎⴻⵇⵇⵔⴰⵏⵜ.
5 ⵅⵥⴰⵔ, ⴰⵔⴻⴱⴱⵉ ⵉⵎⵖⴰⵔ ⴰⵟⵟⴰⵙ, ⵎⴰⵛⴰ ⵡⴰⵔ ⵉⵙⵙⴻⵃⵇⵉⵔⵉ ⵃⴻⴷ,
ⵉⵎⵖⴰⵔ ⵊⵊⵀⴻⴷ ⵏ ⵍⴻⴼⵀⴰⵎⴻⵜ ⵏⵏⴻⵙ. ■
6 ⴰⵄⴻⴼⴼⴰⵏ ⵡⴰⵔ ⵜ ⵉⵜⵜⴻⵊⵊⵉ ⴰⴷ ⵉⴷⴷⴰⵔ,
ⵎⴰⵛⴰ ⵉ ⵉⵎⴻⵥⵍⴰⴹ ⵉⵜⵜⴰⵖ ⴰⵙⴻⵏ ⵜⴰⵙⵖⴰⵔⵜ ⵏⵙⴻⵏ.
7 ⵏⴻⵜⵜⴰ ⵡⴰⵔ ⵉⵙⵙⵃⴻⵢⵢⵉⴷ ⵜⵉⵟⵟⴰⵡⵉⵏ ⵏⵏⴻⵙ ⵅ ⵓⵎⵙⴻⴳⴳⴻⴷ,
ⵎⴰⵛⴰ ⵉⵙⵙⵖⵉⵎⵉ ⵜⴻⵏ ⵉ ⵍⴻⴱⴷⴰ ⵅ ⵍⵄⴰⵔⵛ ⴰⴽ-ⴷ ⵉⵊⴻⴵⵉⴷⴻⵏ,
ⵓⵛⴰ ⴰⵎⵎⵓ ⵉ ⵖⴰ ⵜⵜⵡⴰⵙⵓⵄⵍⴰⵏ. ■
8 ⵎⴰⵍⴰ ⵜⵜⵡⴰⵡⵜⴻⵏ ⵏⵉⵜⵏⵉ ⴷⵉ ⵍⴻⴳⵢⵓⴹ,
ⵜⵜⵡⴰⵃⴻⴱⴱⵙⴻⵏ ⴷⵉ ⵙⵙⵏⴰⵙⴻⵍ ⵏ ⵍⴻⵖⴱⴻⵏ,
9 ⵅⴻⵏⵏⵉ ⵉⵙⵙⵛⴻⵏ ⴰⵙⴻⵏ ⵜⵉⵎⴻⴳⴳⴰ ⵏⵙⴻⵏ ⵜⵉⵄⴻⴼⴼⴰⵏⵉⵏ ⴷ ⵉⵄⴻⴷⴷⵉⵢⴻⵏ ⵏⵙⴻⵏ,
ⴰⵇⴰ ⵎⵖⴰⵔⴻⵏ ⴰⵟⵟⴰⵙ.
10 ⵢⴰⵔⴻⵥⵥⴻⵎ ⴰⵎⴻⵥⵥⵓⵖ ⵏⵙⴻⵏ ⵉ ⵓⵡⴻⴱⴱⴻⵅ,
ⵉⵇⵇⴰⵔ ⴰⵙⴻⵏ ⴰⴷ ⴷⴷ-ⴷⴻⵡⵍⴻⵏ ⵥⵉ ⵍⵎⵓⵄⵚⵉⵢⵢⴻⵜ ⵏⵙⴻⵏ.
11 ⵎⴰⵍⴰ ⵙⵍⵉⵏ ⵓ ⵙⴻⵅⵅⴰⵔⴻⵏ ⴰⵙ,
ⵅⴻⵏⵏⵉ ⴰⴷ ⵙⵙⵇⴻⴼⵍⴻⵏ ⴷⴻⴳ ⵡⴻⴼⵍⴰⵃ ⵓⵙⵙⴰⵏ ⵏⵙⴻⵏ,
ⵓ ⴷⵉ ⵥⵥⵀⴰⵔ ⵉⵙⴻⴳⴳⵯⵓⵙⴰ ⵏⵙⴻⵏ.
12 ⵎⴰⵛⴰ ⵎⴰⵍⴰ ⵡⴰⵔ ⵙⵍⵉⵏ,
ⴰⴷ ⵜⵜⵡⴰⵀⴻⵍⵍⴽⴻⵏ ⵙ ⵍⴰⵏⵙⴰ,
ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ ⴰⵎ ⵡⴰⵔ ⵖⴰⵔⵙⴻⵏ ⵜⴻⴵⵉ ⴱⵓ ⵜⵓⵙⵙⵏⴰ.
13 ⵏⵉⵜⵏⵉ ⵉⵏⵏⵉ ⵉⵙⵙⵏⵉⵄⵎⵉⵍⴻⵏ ⴷⴻⴳ ⵡⵓⵍ ⵏⵙⴻⵏ, ⵜⵜⵙⴻⵜⵜⴰⴼⴻⵏ ⴰⵖⴹⴰⴱ,
ⵡⴰⵔ ⵜᵉⵜⵜⴰⵔⴻⵏ ⴰⵄⴰⵡⴻⵏ ⵎⴰⵍⴰ ⵏⴻⵜⵜⴰ ⵉⵛⴰⵔⴼ ⵉ-ⵜⴻⵏ.
14 ⵍⴻⵄⵎⴰⵔ ⵏⵙⴻⵏ ⴰⴷ ⵉⵎⵎⴻⵜ ⵓⵎⵉ ⵏⵉⵜⵏⵉ ⵄⴰⴷ ⴷ ⵉⵃⵓⴷⵔⵉⵢⵢⴻⵏ,
ⵎⴰⵖⴰⵔ ⴷⴷⴰⵔⴻⵏ ⵊⴰⵔ ⵉⵎⵉⵜⵍⴻⵢⵢⴻⵏ. ■
15 ⴰⴷ ⵉⴼⴻⴽⴽ ⴰⵎⴻⵥⵍⵓⴹ ⴷⵉ ⵍⴻⵖⴱⴻⵏ ⵏⵏⴻⵙ,
ⵓ ⴷⵉ ⴷⴷⴻⴵ ⴰⴷ ⵢⴰⵔⵥⴻⵎ ⴰⵎⴻⵥⵥⵓⵖ ⵏⵙⴻⵏ.
16 ⴰⵎⵎⵓ ⵉ ⵛⴻⴽ ⵉⵄⴰⵔⵔⴻⵏ ⵄⴰⵡⴻⴷ ⵥⴻⴳ ⵡⵓⴹⵓⴼ ⵏ ⵍⴻⵃⵚⴰⵔⴻⵜ,
ⵖⴰⵔ ⵜⵜⴰⵙⵉⵄ ⵎⴰⵏⵉ ⵡⴰⵔ ⵉⵜⵜⵉⵍⵉ ⵄⴰⴷ ⵓⵏⴻⴷⵇⴻⴼ,
ⵓ ⵎⵉⵏ ⴷⴷ ⵖⴰ ⵙⵙⴰⵔⵙⴻⵏ ⵅ ⵟⵟⴰⴱⵍⴰ ⵏⵏⴻⴽ ⴷ ⵎⴰⵛⵛⴰ ⵜⴻⵛⵛⵓⵔ ⵙ ⵜⴷⵓⵏⵜ. ■
17 ⵎⴰⵛⴰ ⵛⴻⴽ ⵜⴻⵏⵏⵓⵖⴻⴷ ⴷⵉ ⵛⵛⵔⴻⵄ ⴰⴽ-ⴷ ⵓⵄⴻⴼⴼⴰⵏ,
ⵎⴰⵛⴰ ⴷⴷⴻⵄⵡⴻⵜ ⴷ ⵜⴻⵏⴼⵓⵞ ⵜⵜⴰⵙⴻⵏⵜ-ⵉ-ⴷⴷ ⴰⴽ-ⴷ ⵡⴰⵢⴰⵡⴰⵢⴰ.
18 ⵃⴹⴰ ⴰⵇⴰ ⴰⵙⵄⴰⵔ ⵡⴰⵔ ⵛⴻⴽ ⵉⵜⵜⵖⴰⵔⵔⵉ ⵉ ⵓⵙⵜⴻⵀⵥⵉ,
ⵓ ⵍⵇⴻⴷⴷ ⵏ ⵜⵜⴰⵎⴰⵏ ⵏ ⵡⴻⵚⵍⴰⵃ ⵡⴰⵔ ⵛⴻⴽ ⵉⵙⵙⵓⴼⴼⵓⵖ ⵥⴻⴳ ⵡⴻⴱⵔⵉⴷ.
19 ⵎⴰ ⵉⵖⵓⵢⵢⴰⵏ ⵏⵏⴻⴽ ⴰⴷ ⵛⴻⴽ ⵚⵚⴰⵔⴻⵏ ⵥⵉ ⵍⴻⵃⵚⴰⵔⴻⵜ,
ⵏⵉⵖ ⵎⴰⵔⵔⴰ ⵎⵉⵏ ⵜᵉⵜⵜⴻⴳⴳⴻⴷ ⵙ ⵎⴰⵔⵔⴰ ⵜⵉⵥⴻⵎⵎⴰⵔ ⵏⵏⴻⴽ?
20 ⵡⴰⵔ ⵜⵜⵎⴻⵥⵔⵉ ⴷⵉ ⴵⵉⵍⴻⵜ,
ⵅⵎⵉ ⵉ ⵖⴰ ⵜⵜⵡⴰⴽⴽⵙⴻⵏ ⵍⴻⴳⵏⵓⵙ ⵥⴻⴳ ⵡⴻⵎⵛⴰⵏ ⵏⵙⴻⵏ.
21 ⵃⴹⴰ ⵉⵅⴻⴼ ⵏⵏⴻⴽ, ⵡⴰⵔ ⴳⴳⵓⵔ ⵅ ⵓⵖⴻⵥⴷⵉⵙ ⵎⴰⵏⵉ ⵉⵜⵜⵡⴰⴼⴼ ⵍⵖⴻⵛⵛ,
ⴰⵇⴰ ⵛⴻⴽ ⴰⴷ ⵜⵉⵅⴷⴰⵔⴻⴷ ⴰⵢⴰ ⵅ ⵡⴰⴹⴰⵔ.
22 ⵅⵥⴰⵔ, ⴰⵔⴻⴱⴱⵉ ⵉⵙⵙⵄⵓⴵⴰ ⵙ ⵊⵊⴻⵀⴷ ⵏⵏⴻⵙ,
ⵎⴰⵏ ⵡⴻⵏ ⵉⴵⴰⵏ ⴷ ⴰⵎⵙⴻⵍⵎⴰⴷ ⴰⵎ ⵏⴻⵜⵜⴰ?
23 ⵎⴰⵏ ⵡⴻⵏ ⵉ ⴷ ⴰⵙ ⵉⵙⵙⵛⴰⵏⴻⵏ ⴰⴱⵔⵉⴷ?
ⵏⵉⵖ ⵎⴰⵏ ⵡⴻⵏ ⵉ ⴷ ⴰⵙ ⵉⵏⵏⴰⵏ: ‘ⵛⴻⴽ ⵜⴻⴳⴳⵉⴷ ⵍⵖⴻⵛⵛ!’? ■
24 ⵄⵇⴻⵍ ⴰⴷ ⵜⴻⵙⵙⵄⵓⴵⵉⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ,
ⵍⵅⴻⴷⵎⴻⵜ ⵏⵏⴻⵙ ⵉ ⵥⵉ ⵜⵜⵖⴻⵏⵏⴰⵊⴻⵏ ⵉⵡⴷⴰⵏ.
25 ⴽⵓⵍ ⴱⵏⴰⴷⴻⵎ ⵉⵜⵜⵡⴰⵍⴰ ⵜⵜ,
ⵥⵉ ⵍⴰⴳⴳⵯⴰⵊ ⵜⵜⵡⴰⵍⴰⵏ ⵜⵜ ⵉⵡⴷⴰⵏ.
26 ⵅⵥⴰⵔ, ⴰⵔⴻⴱⴱⵉ ⴷ ⴰⵎⴻⵇⵇⵔⴰⵏ, ⵡⴰⵔ ⵏⵥⴻⵎⵎⴰⵔ ⴰⴷ ⵏⴻⴼⵀⴻⵎ ⴰⵢⴰ,
ⵍⵇⴻⴷⴷ ⵏ ⵉⵙⴻⴳⴳⵯⵓⵙⴰ ⵏⵏⴻⵙ ⵡⴰⵔ ⵏⵥⴻⵎⵎⴰⵔ ⴰⴷ ⴷⴰⵢⴻⵙ ⵏⴰⵔⵥⵓ. ■
27 ⵎⴰⵖⴰⵔ ⵏⴻⵜⵜⴰ ⵉⵊⴻⴱⴱⴻⴷ ⵜⵓⴷⴷⵉⵎⵉⵏ ⵏ ⵡⴰⵎⴰⵏ,
ⵜⵉⵏⵏⵉ ⴷⴷ-ⵉⵜⵜⵡⴰⴽⴽⵙⴻⵏ ⵥⵉ ⵜⴰⵢⵢⵓⵜ ⵅⴻⵏⵏⵉ ⴷⴻⵡⵍⴻⵏⵜ ⴷ ⴰⵏⵥⴰⵔ,
28 ⴰⵏⵥⴰⵔ ⵏⵏⵉ ⵥⵉ ⵜⵜⵏⴻⵙⵏⵉⵙⵉⵏ ⵉⵙⴻⵢⵏⵓⵜⴻⵏ,
ⴰⵏⵥⴰⵔ ⵏⵏⵉ ⴷⴷ ⵉⵡⴻⵟⵟⴰⵏ ⵙ ⵓⴼⴻⵢⵢⴻⴹ ⵅ ⵉⵡⴷⴰⵏ.
29 ⵎⴰⵏ ⵡⴻⵏ ⵉⵜⵜⵃⴰⴽⴰⵏ ⵄⴻⵎⵎⴰⵔⵚ ⴷⴻⴳ ⵓⴱⴻⵥⵥⴻⵄ ⵏ ⵉⵙⴻⵢⵏⵓⵜⴻⵏ,
ⵓⵍⴰ ⴷⴻⴳ ⵡⴰⵊⵊⴰⵊⴻⵏ ⵥⵉ ⵜⴻⵅⵥⴰⵏⵜ ⵏⵏⴻⵙ?
30 ⵅⵥⴰⵔ, ⵉⵜⵜⴱⴻⵥⵥⴻⵄ ⵜⴰⴼⴰⵡⵜ ⵏⵏⴻⵙ ⵜⵉⵡⴰ ⵏ ⵢⵉⵅⴻⴼ ⵏⵏⴻⵙ,
ⵉⵜⵜⵍⴻⵃⵃⴰⴼ ⵥⵥⴰⵢⴻⵙ ⵟⵟⵍⵓⴼⴰ ⵢⵓⴵⵖⴻⵏ ⵇⴰⵄ ⵏ ⵍⴻⴱⵃⴰⵔ.
31 ⵎⴰⵖⴰⵔ ⵙ ⵓⵢⴰ ⵉⵜⵜⵛⴰⵔⵔⴻⵄ ⵍⴻⴳⵏⵓⵙ.
ⵉⵜⵜⵉⵛⵛ ⵎⴰⵛⵛⴰ ⵙ ⵡⴰⵟⵟⴰⵙ. ■
32 ⵉⵜⵜⵛⵓⵔⵔⴰ ⵉⴼⴰⵙⵙⴻⵏ ⵏⵏⴻⵙ ⵙ ⵜⴼⴰⵡⵜ,
ⵉⵡⴻⵚⵚⴰ ⵜⵜ ⴰⴷ ⵜⴻⵍⵇⴻⴼ ⵜⴰⵏⴷⴰⵢⵜ.
33 ⴰⴹⴰⵔⴹⴻⵃ ⵏ ⵡⴰⵙⵙⴰⵎⴻⵏ ⵉⵜⵜⴱⴰⵔⵔⴻⵃ ⵥⵥⴰⵢⴻⵙ,
ⵓⵍⴰ ⴷ ⵜⴰⵃⵉⵎⴰⵔⵜ, ⴰⵇⴰ ⵏⴻⵜⵜⴰ ⴰⴷ ⴷⴷ-ⵢⴰⵙ.