ⵍⵃⴰⵔⴹ ⵡⵉⵙⵙ ⵜⵍⴰⵜⴰ ⵏ ⵉⵍⵉⵀⵓ: ⵜⴰⵙⴻⴳⴷⴰ ⵏ ⴱⵏⴰⴷⴻⵎ ⵡⴰⵔ ⵜⵏⴻⴼⴼⴻⵄ ⵥⵥⴰⵜ ⵉ ⴰⵔⴻⴱⴱⵉ
35
1 ⵢⴰⵔⵔⴰ-ⴷⴷⴼ ⵉⵍⵉⵀⵓ ⵄⴰⵡⴻⴷ ⴰⵡⴰⵍ ⵓⵛⴰ ⵉⵏⵏⴰ: 2 ⵎⴰ ⵉⵜⵜⵖⵉⵍ ⴰⵛ ⴰⵢⴰ ⵏⵉⵛⴰⵏ,
ⴰⵇⴰ ⵜⴻⵇⵇⴰⵔⴻⴷ: ‘ⵜⴰⵙⴻⴳⴷⴰ ⵉⵏⵓ ⴽⵜⴰⵔ ⵅ ⵜⴻⵏⵏⵉ ⵏ ⴰⵔⴻⴱⴱⵉ!’?
3 ⵎⴰⵖⴰⵔ ⵜⴻⵏⵏⵉⴷ: ‘ⵎⴰⵏ ⵍⴻⴼⴹⴻⵍ ⵖⴰⵔⴻⴽ?
ⵎⵉⵏ ⴷ ⴰⵢⵉ ⴷⴷ ⵖⴰ ⵉⴽⴽⴰⵔⴻⵏ ⴰⵇⴰ ⵏⴻⵛⵛ ⵡⴰⵔ ⵜⵜⴻⴳⴳⴻⵖ ⴷⴷⵏⵓⴱ?’ ■
4 ⴰⴷ ⵅⴰⴽ ⴷⴷ-ⴰⵔⵔⴻⵖ,
ⵓⵍⴰ ⵅ ⵉⵎⴻⴷⴷⵓⴽⴽⴰⵍ ⵏⵏⴻⴽ ⴰⴽⵉⴷⴻⴽ.
5 ⵅⵥⴰⵔ ⴰⵊⴻⵏⵏⴰ, ⵓ ⵅⵥⴰⵔ,
ⵃⴻⴽⴽⴰⵔ ⵉⵙⴻⵢⵏⵓⵜⴻⵏ ⵜⵉⵡⴰ ⵏⵏⴻⴽ ⵇⴰⵄ!
6 ⵎⴰⵍⴰ ⵜⴻⵅⴹⵉⴷ, ⵎⵉⵏ ⵉ ⴷ ⴰⵙ ⵜᵉⵜⵜⴻⴳⴳⴻⴷ ⵙ ⵎⴰⵏ ⴰⵢⴰ?
ⵎⴰⵍⴰ ⵉⵄⴻⴷⴷⵉⵢⴻⵏ ⵏⵏⴻⴽ ⴷ ⴰⵟⵟⴰⵙ, ⵎⵉⵏ ⵥⵥⴰⵢⴻⵙ ⵖⴰ ⵜⴰⵡⵢⴻⴷ?
7 ⵎⴰⵍⴰ ⵛⴻⴽ ⴷ ⴰⵎⵙⴻⴳⴳⴻⴷ, ⵎⵉⵏ ⵉ ⴷ ⴰⵙ ⵜᵉⵜⵜⵉⵛⴻⴷ ⵙ ⵓⵢⴰ,
ⵏⵉⵖ ⵎⵉⵏ ⵉⵜⵜⴻⵟⵟⴻⴼ ⵏⴻⵜⵜⴰ ⵥⴻⴳ ⵓⴼⵓⵙ ⵏⵏⴻⴽ? ■
8 ⴰⵇⴰ ⵜⵓⵄⴻⴼⴼⵏⴰ ⵏⵏⴻⴽ ⵜⵍⴻⵇⵇⴻⴼ ⴰⵔⵢⴰⵥ ⴰⵎ ⵛⴻⴽ ⵡⴰⵀⴰ,
ⵓ ⵜⴰⵙⴻⴳⴷⴰ ⵏⵏⴻⴽ ⵜᵉⵜⵜⵉⵍⵉ ⴷⵉ ⵟⵟⵡⴻⵄ ⵏ ⵉⵊⵊ ⵏ ⵎⵎⵉⵙ ⵏ ⴱⵏⴰⴷⴻⵎ ⵡⴰⵀⴰ.
9 ⵙⵖⵓⵢⵢⵓⵏ ⵥⴻⴳ ⵡⴰⵟⵟⴰⵙ ⵏ ⵍⴻⵃⵚⴰⵔⴰⵜ,
ⵜⵜⵍⴰⵖⴰⵏ ⵖⴰⵔ ⵜⵡⵉⵥⴰ ⵥⵉ ⵙⵙⵉⴱⴱⴻⵜ ⵏ ⵓⵖⵉⵍ ⵏ ⴰⵢⵜ ⵏ ⴱⵓ-ⵚⵚⵓⵍⵟⴰ.
10 ⵎⴰⵛⴰ ⵓⵍⴰ ⴷ ⵉⵊⵊⴻⵏ ⵎⴰ ⵉⵇⵇⴰⵔ: ‘ⵎⴰⵏⵉ ⵉⴵⴰ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵢⵉ ⵉⴳⴳⵉⵏ,
ⵡⴻⵏⵏⵉ ⵉⵜⵜⵉⵛⴻⵏ ⵉⵥⵍⴰⵏ ⵏ ⵓⵚⴻⴱⴱⴻⵃ ⴷⵉ ⴵⵉⵍⴻⵜ,
11 ⵡⴻⵏⵏⵉ ⴷ ⴰⵏⴻⵖ ⵉⵙⵙⴻⵍⵎⴰⴷⴻⵏ ⵙ ⵍⵎⴰⵍ ⵏ ⵜⴻⵎⵎⵓⵔⵜ,
ⴷ ⵡⴻⵏⵏⵉ ⴷ ⴰⵏⴻⵖ ⵉⵜⵜⴻⴳⴳⴻⵏ ⴷ ⵉⵎⵉⵖⵉⵙⴻⵏ ⵙ ⵉⵊⴹⴰⴹ ⵏ ⵓⵊⴻⵏⵏⴰ?’
12 ⴷⵉⵏⵏⵉ ⵙⵖⵓⵢⵢⵓⵏ ⵏⵉⵜⵏⵉ, ⵎⴰⵛⴰ ⵏⴻⵜⵜⴰ ⵡⴰⵔ ⴷⴷ-ⵉⵜⵜⴰⵔⵔⵉ,
ⵥⵉ ⵙⵙⵉⴱⴱⴻⵜ ⵏ ⵏⵏⴼⴰⵅⴻⵜ ⵏ ⵉⵄⴻⴼⴼⴰⵏⴻⵏ. ■
13 ⵙ ⵜⵉⴷⴻⵜⵜ, ⴰⵔⴻⴱⴱⵉ ⵡⴰⵔ ⵉⵜⵜⴻⵙⵍⵉ ⵖⴰⵔ ⵉⵖⵓⵢⵢⴰⵏ ⵉⴱⴻⵟⵟⵍⴻⵏ,
ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⵡⴰⵔ ⴽⵉⴷⴻⵙ ⵉⵍⴻⵀⵀⵉ.
14 ⵛⴻⴽ ⵜⴻⵇⵇⴰⵔⴻⴷ, ⴰⵇⴰ ⵛⴻⴽ ⵡⴰⵔ ⵜ ⵜᵉⵜⵜⵡⵉⵍⵉⴷ,
ⵡⴰⵅⵅⴰ ⴰⵎⴻⵏⵏⵉ ⵜⴰⵎⴻⵙⵍⴰⵛⵜ ⴰⵇⴰ-ⵜⵜ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ.
ⵔⴰⵊⴰ ⵜ ⵅⴻⵏⵏⵉ.
15 ⵎⴰⵍⴰ ⵍⴻⵅⵅⵓ ⴰⵅⴻⵢⵢⴻⵇ ⵏⵏⴻⵙ ⵡⴰⵔ ⵉⵛⵛⵉⵜ ⵄⴰⴷ,
ⵎⴰ ⵅⴻⵏⵏⵉ ⵏⴻⵜⵜⴰ ⵡⴰⵔ ⵉⵙⵙⵉⵏ ⵡⴰⵍⵓ ⵅ ⵥⵥⵄⴰⵎⴻⵜ? ■
16 ⴰⵢⵓⴱ ⵉⵛⴰⵔⵔⴻⴳ ⴰⵇⴻⵎⵎⵓⵎ ⵏⵏⴻⵙ ⴱⴰⵟⴻⵍ,
ⵉⵜⵜⴻⴳⴳ ⴰⵡⴰⵍⴻⵏ ⵉⵎⴻⵇⵇⵔⴰⵏⴻⵏ ⵏⵀⵍⴰ ⵜⵓⵙⵙⵏⴰ.