ⵍⵃⴰⵔⴷ ⵡⵉⵙⵙ ⵜⵏⴰⵢⴻⵏ ⵏ ⵉⵍⵉⵀⵓ ⵅ ⵎⴰⵎⵎⴻⵛ ⵉⵜⵜⴻⴳⴳ ⴰⵔⴻⴱⴱⵉ ⵍⴻⴱⴷⴰ ⵙ ⵍⵃⴻⵇⵇ
34
1 ⵉⵟⵟⴻⴼ ⵉⵍⵉⵀⵓ ⵄⴰⵡⴻⴷ ⴷⴻⴳ ⵡⴰⵡⴰⵍ, ⵉⵏⵏⴰ: 2 ⵙⵍⴻⵎ-ⴷⴷ ⵖⴰⵔ ⵡⴰⵡⴰⵍⴻⵏ ⵉⵏⵓ, ⴰ ⵉⵎⵉⵖⵉⵙⴻⵏ,
ⵡⵛⴻⵎ ⴰⵢⵉ ⴰⵎⴻⵥⵥⵓⵖ, ⴰ ⴽⴻⵏⵏⵉⵡ, ⴰⵢⵜ ⵏ ⵜⵓⵙⵙⵏⴰ.
3 ⵎⴰⵖⴰⵔ ⴰⵎⴻⵥⵥⵓⵖ ⵉⵏⴻⴱⴱⴻⵛ ⴷⴻⴳ ⵡⴰⵡⴰⵍⴻⵏ,
ⴰⵎ ⵎⴰⵎⵎⴻⵛ ⵉⵜⵜⵇⴰⵙⴰ ⵡⴰⵏⴻⵖ ⵎⴰⵛⵛⴰ. ■
4 ⵊⵊⴻⵎ ⴰⵏⴻⵖ ⴰⴷ ⵏⵉⵅⴹⴰⵔ ⵊⴰⵔ ⴰⵏⴻⵖ ⵎⵉⵏ ⵉⴵⴰⵏ ⵏⵉⵛⴰⵏ,
ⵊⵊⴻⵎ ⴰⵏⴻⵖ ⴰⴷ ⵏⴻⵙⵙⴻⵏ ⵊⴰⵔ ⴰⵏⴻⵖ ⵎⵉⵏ ⵉⴵⴰⵏ ⴷ ⴰⵚⴻⴱⵃⴰⵏ.
5 ⵎⴰⵖⴰⵔ ⴰⵢⵓⴱ ⵉⵏⵏⴰ: ‘ⵏⴻⵛⵛ ⴷ ⴰⵎⵙⴻⴳⴳⴻⴷ,
ⴰⵔⴻⴱⴱⵉ ⵉⴽⴽⴻⵙ ⴰⵢⵉ ⵜⴰⵙⵖⴰⵔⵜ ⵉⵏⵓ! ■
6 ⵡⴰⵅⵅⴰ ⵖⴰⵔⵉ ⵍⵃⴻⵇⵇ, ⵡⴰⵅⵅⴰ ⴰⵎⴻⵏⵏⵉ ⵜⵜⴱⴰⵏⴻⵖ ⴰⵎ ⵉⵊⵊ ⵏ ⴱⵓ-ⵉⵅⴰⵔⵔⵉⵇⴻⵏ!
ⴰⵢⴻⵥⵥⵉⵎ ⵏ ⴼⵍⵉⵜⵛⴰ ⵉ ⴷⴰⵢⵉ ⵉⴵⴰ,
ⵡⴰⵔ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵙⴳⴻⵏⴼⴰ ⴰⵎ ⵡⴰⵔ ⴷⵉⵏ ⵉⴵⵉ ⵓⵄⴻⴷⴷⵉ.’ ■
7 ⵎⴰⵏ ⵡⴻⵏ ⵉⴵⴰⵏ ⴷ ⴰⵔⵢⴰⵥ ⴰⵎ ⴰⵢⵓⴱ,
ⵡⴻⵏⵏⵉ ⵉⵙⴻⵙⵙⴻⵏ ⴰⵙⵜⴻⵀⵥⵉ ⴰⵎ ⵡⴰⵎⴰⵏ?
8 ⵏⴻⵜⵜⴰ ⵉⴳⴳⵓⵔ ⴷⴻⴳ ⵡⴻⴱⵔⵉⴷ ⴰⵎ ⵉⵜⵜⵄⴰⵛⴰⵔ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ,
ⵉⴳⴳⵓⵔ ⴰⴽ-ⴷ ⵉⵔⵢⴰⵥⴻⵏ ⵉⵄⴻⴼⴼⴰⵏⴻⵏ.
9 ⵎⴰⵖⴰⵔ ⵉⵏⵏⴰ: ‘ⵡⴰⵔ ⵉⵏⴻⴼⴼⴻⵄ ⵡⴰⵍⵓ ⵉ ⴱⵏⴰⴷⴻⵎ,
ⵎⴰⵍⴰ ⵏⴻⵜⵜⴰ ⴷ ⴰⵎⴰⵔⴹⵉ ⵖⴰⵔ ⴰⵔⴻⴱⴱⵉ.’
10 ⵙ ⵓⵢⴻⵏⵏⵉ ⵙⵍⴻⵎ-ⴷⴷ ⵖⴰⵔⵉ,
ⴽⴻⵏⵏⵉⵡ ⵉⵔⵢⴰⵥⴻⵏ ⵉ ⴷⵉ ⵜⴻⴵⴰ ⵍⴻⴼⵀⴰⵎⴻⵜ:
‘ⵉⴳⴳⵯⴻⵊ ⵅ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵢⴻⴳⴳ ⵜⵓⵄⴻⴼⴼⵏⴰ
ⵓⵍⴰ ⵅ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⵎⴰⵃⴻⵏⴷ ⴰⴷ ⵢⴻⴳⴳ ⵎⵉⵏ ⵉⴼⴰⵔⵖⴻⵏ.’ ■
11 ⵎⴰⵖⴰⵔ ⵏⴻⵜⵜⴰ ⵉⵅⵍⴻⴼ ⵥⵉ ⴱⵏⴰⴷⴻⵎ ⵄⵍⴰⵃⵙⴰⴱ ⵜⵉⵎⴻⴳⴳⴰ ⵏⵏⴻⵙ,
ⵓ ⴰⵎ ⵎⴰⵎⵎⴻⵛ ⵉⴵⴰ ⵡⴻⴱⵔⵉⴷ ⵏ ⵡⴻⵔⵢⴰⵥ,
ⴰⵎⵎⵓ ⵜ ⵉ ⵖⴰ ⵢⴰⴼ. ■
12 ⵙ ⵜⵉⴷⴻⵜⵜ, ⵄⴻⵎⵎⴰⵔⵚ ⵡⴰⵔ ⵉⵜⵜⴻⴳⴳ ⴰⵔⴻⴱⴱⵉ ⵜⵓⵄⴻⴼⴼⵏⴰ,
ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⵡⴰⵔ ⵉⵙⵙⴼⴰⵔⵔⵉⵖ ⵛⵛⵔⴻⵄ.
13 ⵎⴰⵏ ⵡⴻⵏ ⵜ ⵉⵡⴻⴽⴽⵍⴻⵏ ⵅ ⵜⴻⵎⵎⵓⵔⵜ,
ⵎⴰⵏ ⵡⴻⵏ ⵉⵙⵙⴰⵔⵙⴻⵏ ⵎⴰⵔⵔⴰ ⴷⴷⵓⵏⴻⵛⵜ?
14 ⵎⴰⵍⴰ ⵏⴻⵜⵜⴰ ⴰⴷ ⵅⴰⵙ ⵉⵙⵙⵏⴻⵇⵍⴻⴱ ⵓⵍ ⵏⵏⴻⵙ,
ⵎⴰⵍⴰ ⴰⴷ ⵖⴰⵔⴻⵙ ⴷⴷ-ⵢⴰⵡⵉ ⵄⴰⵡⴻⴷ ⴱⵓⵃⴱⴻⵍ ⵏⵏⴻⵙ ⴷ ⵏⵏⴻⴼⵙ ⵏⵏⴻⵙ, ■
15 ⵎⴰⵔⵔⴰ ⴱⵏⴰⴷⴻⵎ ⴷ ⵍⵎⴰⵍ ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ,
ⵓ ⴱⵏⴰⴷⴻⵎ ⴰⴷ ⵉⵄⵇⴻⴱ ⵖⴰⵔ ⵓⵛⴰⵍ. ■
16 ⵎⴰⵍⴰ ⴷⴰⵢⴻⴽ ⵍⴻⴼⵀⴰⵎⴻⵜ, ⵙⴻⵍ ⵅⴻⵏⵏⵉ ⵉ ⵎⴰⵏ ⴰⵢⴰ,
ⴻⵡⵛ ⴰⵎⴻⵥⵥⵓⵖ ⵏⵏⴻⴽ ⵉ ⵍⵃⴻⵙⵙ ⵏ ⵡⴰⵡⴰⵍⴻⵏ ⵉⵏⵓ.
17 ⵎⴰ ⵉⵥⴻⵎⵎⴰⵔ ⵡⴻⵏⵏⵉ ⵉⵛⴰⵔⵔⵀⴻⵏ ⵍⵃⴻⵇⵇ ⴰⴷ ⵉⵃⴽⴻⵎ,
ⵏⵉⵖ ⵜⴻⵅⵙⴻⴷ ⵛⴻⴽ ⴰⴷ ⵜⴻⴷⵄⵉⴷ ⵅ ⵡⴻⵏⵏⵉ ⵉⴵⴰⵏ ⴷ ⴰⵎⵙⴻⴳⴳⴻⴷ ⴰⵎⴻⵇⵇⵔⴰⵏ? ■
18 ⵎⴰ ⴰⴷ ⵉⵏⵉⵏ ⵉ ⵓⵊⴻⴵⵉⴷ: ‘ⵛⴻⴽ ⵡⴰⵔ ⵜⵙⴻⴽⴽⵯⵉⴷ ⵡⴰⵍⵓ!’
ⵓ ⵉ ⵜⴰⵔⵡⴰ ⵏ ⵜⴰⵚⵉⵍⴻⵜ: ‘ⴽⴻⵏⵏⵉⵡ ⴷ ⵉⵄⴻⴼⴼⴰⵏⴻⵏ!’?
19 ⵎⴰⵎⵎⴻⵛ ⵅⴻⵏⵏⵉ ⵉ ⵡⴻⵏⵏⵉ ⵡⴰⵔ ⵉⵙⵙⵉⵥⵡⵉⵍⵉⵏ ⵍⵃⵓⴽⴽⴰⵎ,
ⵓ ⵡⴰⵔ ⵉⵜⵜⵔⵉⵃ ⴰⴽ-ⴷ ⴱⵓ-ⵡⴰⴳⵍⴰ ⵅ ⵓⵎⴻⵥⵍⵓⴹ,
ⵎⴰⵖⴰⵔ ⵎⴰⵔⵔⴰ ⵏⵉⵜⵏⵉ ⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ. ■
20 ⵎⵎⵓⵜⴻⵏ ⴷⴻⴳ ⵡⴻⵔⵎⴰⵛ ⵏ ⵡⴰⴱⵍⵉⵡⴻⵏ, ⴷⴻⴳ ⵡⴻⵥⵢⴻⵏ ⵏ ⴵⵉⵍⴻⵜ.
ⵜⵜⵡⴰⵏⵀⴻⵥⵥⴻⵏ ⵏⵉⵜⵏⵉ, ⵍⴳⴻⵏⵙ ⵏⵏⵉ, ⵓⵛⴰ ⵀⴻⵍⵍⴽⴻⵏ.
ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⵜⵜⵡⴰⵄⴰⵔⵔⵏⴻⵏ ⵖⴰⵔ ⵓⵖⴻⵥⴷⵉⵙ,
ⴱⵍⴰ ⵎⴰ ⵉⵃⴰⴷⴰ ⵜⴻⵏ ⵓⴼⵓⵙ ⵏ ⴱⵏⴰⴷⴻⵎ.
21 ⵎⴰⵖⴰⵔ ⵜⵉⵟⵟⴰⵡⵉⵏ ⵏⵏⴻⵙ ⵅⴻⵥⵥⴰⵔⴻⵏⵜ ⵖⴰⵔ ⵉⴱⵔⵉⴷⴻⵏ ⵏ ⵎⴽⵓⵍ ⵉⵊⵊ,
ⵏⴻⵜⵜⴰ ⵉⵜⵜⵡⴰⵍⴰ ⵎⵍⵉⵃ ⵎⴰⵔⵔⴰ ⵉⵚⵓⵔⴰⴼ ⵏⵙⴻⵏ. ■
22 ⵡⴰⵔ ⵜⴻⴵⵉ ⵜⵓⴱⴱⴰⵔⵛⴻⵏⵜ ⵓ ⵡⴰⵔ ⵜⴻⴵⵉ ⵜⵉⵍⵉ ⵏ ⵍⵎⴻⵡⵜ,
ⵎⴰⵏⵉ ⵥⴻⵎⵎⴰⵔⴻⵏ ⴰⴷ ⵏⵏⵓⴼⴼⴰⵔⴻⵏ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ. ■
23 ⵡⴰⵔ ⴷ ⴰⵙ ⵉⵜⵜⵅⴻⵚⵚⵉ ⴰⴷ ⵉⵅⵥⴰⵔ ⴷⵉ ⴱⵏⴰⴷⴻⵎ ⴰⵟⵟⴰⵙ ⵏ ⵍⵡⴻⵇⵜ,
ⵇⴱⴻⵍ ⵎⴰ ⵉ ⴷⴷ ⵖⴰ ⵢⴰⴷⴻⴼ ⵖⴰⵔ ⴷⴷⴻⵄⵡⴻⵜ ⵥⵥⴰⵜ ⵉ ⵓⵖⴻⵎⴱⵓⴱ ⵏ ⴰⵔⴻⴱⴱⵉ.
24 ⵉⵍⴻⴱⴱⴻⵥ ⵊⵊⵡⴰⵃⴻⵍ ⴱⵍⴰ ⴰⵙⴻⵇⵙⵉ,
ⵓⵛⴰ ⵉⴳⴳⴰ ⵉⵏⵏⴻⵖⵏⵉ ⴷⴻⴳ ⵡⴻⵎⵛⴰⵏ ⵏⵙⴻⵏ.
25 ⵎⴰⵖⴰⵔ ⵏⴻⵜⵜⴰ ⵉⵙⵙⴻⵏ ⵜⵉⵎⴻⴳⴳⴰ ⵏⵙⴻⵏ,
ⵉⵙⵙⵏⴻⵇⵍⴰⴱ ⵉ-ⵜⴻⵏ ⴷⵉ ⴵⵉⵍⴻⵜ ⵓⵛⴰ ⵜⵜⵡⴰⵍⴻⴱⵥⴻⵏ.
26 ⵉⵛⵛⴰⵜ ⵉ-ⵜⴻⵏ ⵊⴰⵔ ⵉⵄⴻⴼⴼⴰⵏⴻⵏ,
ⴷⴻⴳ ⵉⵊⵊ ⵡⴻⵎⵛⴰⵏ ⵎⴰⵏⵉ ⵜⵜⴱⴻⴷⴷⴰⵏ ⵉⵡⴷⴰⵏ ⵜⵜⵡⴰⵍⴰⵏ,
27 ⵎⵉⵏⵥⵉ ⵏⵉⵜⵏⵉ ⵃⴻⵢⵢⴷⴻⵏ ⵅⴰⵙ,
ⵡⴰⵔ ⵜⵜⵃⴻⴽⴽⵉⵔⴻⵏ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ, ■
28 ⵎⴰⵃⴻⵏⴷ ⴰⴷ ⵅⴰⵙ ⵉⵙⵙⵉⵡⴻⴹ ⵜⵖⵓⵢⵢⵉⵜ ⵏ ⵉⵎⴻⵥⵍⴰⴹ,
ⵓ ⵎⴰⵃⴻⵏⴷ ⴰⴷ ⵉⵙⵜⴰⵊⴻⴱ ⵉ ⵉⵖⵓⵢⵢⴰⵏ ⵏ ⵍⵎⵓⵙⴰⴽⵉⵏ.
29 ⵎⴰⵍⴰ ⵏⴻⵜⵜⴰ ⵢⵉⵡⵉ-ⴷⴷ ⵍⵀⵓⴷⵏⴻⵜ, ⵎⴰⵏ ⵡⴻⵏ ⴷⴰⵢⴻⵙ ⵉ ⵖⴰ ⵉⴳⴳⴻⵏ ⵍⵄⵉⴱ?
ⵎⴰⵍⴰ ⵉⵙⵙⵏⵓⴼⴼⴰⵔ ⴰⵖⴻⵎⴱⵓⴱ ⵏⵏⴻⵙ, ⵡⵉ ⵜ ⵖⴰ ⵉⵥⴰⵔⴻⵏ?
ⵉⵃⴻⴽⴽⴻⵎ ⵍⴰ ⵅ ⵍⴳⴻⵏⵙ ⴰⵎ ⵅ ⴱⵏⴰⴷⴻⵎ,
30 ⵃⵉⵎⴰ ⵡⴰⵔ ⵉⵃⴻⴽⴽⴻⵎ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵉ ⵉⵜⵜⴻⴳⴳⴻⵏ ⵙ ⵜⵏⴰⵢⴻⵏ ⵏ ⵡⵓⴷⵎⴰⵡⴻⵏ,
ⵓ ⵃⵉⵎⴰ ⵡⴰⵔ ⵜⵜⵉⵍⵉⵏⵜ ⵄⴰⴷ ⵜⵅⴻⵛⴼⵉⵏ ⵉ ⵍⴳⴻⵏⵙ.
31 ⵎⵍⵉ ⵉⵏⵏⴰ ⴱⵏⴰⴷⴻⵎ ⵏⵏⵉ ⵉ ⴰⵔⴻⴱⴱⵉ
‘ⵙⵙⴳⴻⵄⵄⴷⴻⵖ ⵉⵅⴻⴼ ⵉⵏⵓ, ⵡⴰⵔ ⵜⵜⵄⵉⵡⵉⴷⴻⵖ ⴰⴷ ⵙⵙⴼⴻⵙⴷⴻⵖ.
32 ⵎⵉⵏ ⵡⴰⵔ ⵜⵜⵡⵉⵍⵉⵖ, ⵙⵖⴰⵔ ⴰⵢⵉ ⵜ ⵛⴻⴽ!
ⵎⴰⵍⴰ ⴳⴳⵉⵖ ⵎⵉⵏ ⵡⴰⵔ ⵉⵙⴻⴳⴳⴷⴻⵏ, ⵡⴰⵔ ⵜ ⵜⵜⴻⴳⴳⴻⵖ ⵄⴰⴷ.’
33 ⵎⴰ ⵉⵜⵜⵅⴻⵚⵚⴰ ⴰⴷ ⵉⵅⵍⴻⴼ ⵏⴻⵜⵜⴰ ⴰⵎ ⵎⴰⵎⵎⴻⵛ ⵜ ⵜⴻⵅⵙⴻⴷ ⵛⴻⴽ?
ⴰⵇⴰ ⵜⴻⵙⵙⴻⵃⵇⴰⵔⴻⴷ ⵜ!
ⵎⴰⵖⴰⵔ ⵜⴻⵅⵙⴻⴷ ⴰⴷ ⵜⵉⵅⴹⴰⵔⴻⴷ ⵙ ⵢⵉⵅⴻⴼ ⵏⵏⴻⴽ, ⵏⴻⵛⵛ ⵎⴰⵛⴰ ⵍⵍⴰ!
ⵎⴰⵍⴰ ⵉⵜⵜⵖⵉⵍ ⴰⵛ ⴰⵇⴰ ⵜⴻⵙⵙⵏⴻⴷ ⵜⵜ, ⵉⵏⵉ ⵜⵜ!
34 ⵉⵔⵢⴰⵥⴻⵏ ⵙ ⵍⴻⴼⵀⴰⵎⴻⵜ ⴰⴷ ⴰⵢⵉ ⵉⵏⵉⵏ,
ⴰⵎ ⵇⴰⵄ ⴰⵔⵢⴰⵥ ⴰⵎⵉⵖⵉⵙ ⵉⵜⵜⴻⵙⵍⴰ-ⴷⴷ ⵖⴰⵔⵉ,
35 ⴰⵇⴰ ⴰⵢⵓⴱ ⵡⴰⵔ ⵉⵙⵙⵉⵡⴻⵍ ⵙ ⵜⵓⵙⵙⵏⴰ,
ⴰⵇⴰ ⴰⵡⴰⵍⴻⵏ ⵏⵏⴻⵙ ⴱⵍⴰ ⵍⴻⴼⵀⴰⵎⴻⵜ ⵉ ⵢⴻⴵⴰⵏ.
36 ⵉⵡⴰ, ⴻⵊⵊ ⴰⵢⵓⴱ ⴰⴷ ⵉⵜⵜⵡⴰⵇⴻⴵⴻⴱ ⴰⵍ ⴰⵏⴻⴳⴳⴰⵔ,
ⵎⵉⵏⵥⵉ ⵉⵜⵜⴰⵔⵔⴰ-ⴷⴷ ⴰⵎ ⵉⵔⵢⴰⵥⴻⵏ ⵛⵛⵓⵔⴻⵏ ⵙ ⵍⵎⵓⵄⵚⵉⵢⵢⴻⵜ.
37 ⵎⴰⵖⴰⵔ ⵉ ⴷⴷⴻⵏⴱ ⵏⵏⴻⵙ ⵢⴰⵔⴻⵏⵏⵉ ⵄⴰⴷ ⴰⵄⴻⴷⴷⵉ,
ⵊⴰⵔ ⴰⵏⴻⵖ ⵉⵛⵛⴰⵜ ⵛⴰⵎⵅⴰ ⵙ ⵉⴼⴰⵙⵙⴻⵏ,
ⵓ ⵜⵜⵎⴰⵔⴻⵏⵢⴻⵏ ⵡⴰⵡⴰⵍⴻⵏ ⵏⵏⴻⵙ ⴹⵉⴷⴷ ⵉ ⴰⵔⴻⴱⴱⵉ.