ⵉⵍⵉⵀⵓ ⵢⴰⵔⴻⵏⵏⵉ ⴷⵉ ⵍⵃⴰⵔⴹ ⴰⵎⴻⵥⵡⴰⵔⵓ ⵏⵏⴻⵙ
33
1 ⵙⴻⵍ ⵍⴻⵅⵅⵓ ⵖⴰⵔ ⵍⵀⴰⵔⴹ ⵉⵏⵓ, ⴰⵢⵓⴱ, ⴻⵡⵛ ⴰⵎⴻⵥⵥⵓⵖ ⵉ ⵡⴰⵡⴰⵍⴻⵏ ⵉⵏⵓ ⵎⴰⵔⵔⴰ.
2 ⵅⵥⴰⵔ, ⴰⵔⵥⵎⴻⵖ ⴰⵇⴻⵎⵎⵓⵎ ⵉⵏⵓ,
ⵉⵙⵙⴰⵡⴰⵍ ⵢⵉⵍⴻⵙ ⵉⵏⵓ ⵙⴰⴷⵓ ⵡⴰⵏⴻⵖ ⵉⵏⵓ.
3 ⵜⵜⴻⴼⴼⵖⴻⵏ ⵡⴰⵡⴰⵍⴻⵏ ⵉⵏⵓ ⵥⵉ ⵍⴻⵚⴼⴰⵢⴻⵜ ⵏ ⵡⵓⵍ ⵉⵏⵓ,
ⵜⵓⵙⵙⵏⴰ ⵜⴻⵇⵇⵓⵔ ⴰⴷ ⵅⴰⵙ ⵀⴰⵔⵔⴷⴻⵏ ⵉⵢⴻⵏⵛⵉⵛⴻⵏ ⵉⵏⵓ.
4 ⴰⵔⵔⵓⵃ ⵏ ⴰⵔⴻⴱⴱⵉ ⵉⴳⴳⴰ ⴰⵢⵉ,
ⴰⵚⵓⴹⵉ ⵏ ⵏⵏⴻⴼⵙ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⵉⵡⵛⴰ ⴰⵢⵉ ⵜⵓⴷⴰⵔⵜ.
5 ⵎⴰⵍⴰ ⵜⵥⴻⵎⵎⴰⵔⴻⴷ, ⴰⵔⵔ-ⴷⴷ ⵅⴰⴼⵉ.
ⵙⴰⵔⵙ ⴰⵢⵉ ⵜⴰⵎⴻⵙⵍⴰⵛⵜ, ⴱⴻⴷⴷ ⵥⵥⴰⵜⵉ!
6 ⵅⵥⴰⵔ, ⵏⴻⵛⵛ ⴰⵎ ⵛⴻⴽ ⵥⵥⴰⵜ ⵉ ⴰⵔⴻⴱⴱⵉ,
ⵓⵍⴰ ⴷ ⵏⴻⵛⵛ ⵜⵜⵡⴰⴳⴳⴻⵖ ⵥⴻⴳ ⵓⴱⴻⴵⴰⵄ. ■
7 ⵅⵥⴰⵔ, ⴰⵀⵓⴷⴷⵉ ⵉⵏⵓ ⵡⴰⵔ ⵛⴻⴽ ⵉⵙⵙⵉⴳⴳⵯⵉⴷ ⵛⴰ,
ⵡⴰⵔ ⵅⴰⴽ ⵜⵜⵥⴻⵢⵢⴰⵔⴻⵖ ⵛⴰ ⴰⵟⵟⴰⵙ.
8 ⵙ ⵜⵉⴷⴻⵜⵜ, ⴰⵇⴰ ⵜⴻⵏⵏⵉⴷ ⵜ ⴷⴻⴳ ⵉⵎⴻⵥⵥⵓⵖⴻⵏ ⵉⵏⵓ,
ⵙⵍⵉⵖ ⵉ ⵍⵃⴻⵙⵙ ⵏ ⵡⴰⵡⴰⵍⴻⵏ-ⴰ: ■
9 ‘ⵏⴻⵛⵛ ⴷ ⴰⵎⴻⵥⴷⴰⴳ, ⴱⵍⴰ ⴷⴷⴻⵏⴱ,
ⴷ ⴰⴼⵓⵔⵔⵉ ⵉ ⴵⵉⵖ ⵓ ⵡⴰⵔ ⴷⴰⵢⵉ ⵛⴰ ⵏ ⵍⵎⵓⵄⵚⵉⵢⵢⴻⵜ.
10 ⵅⵥⴰⵔ, ⵢⴰⵔⴻⵥⵥⵓ ⵙⵙⵉⴱⴱⴻⵜ ⵃⵉⵎⴰ ⴰⴷ ⵥⵥⴰⵢⵉ ⵉⵛⴻⵜⵛⴰ,
ⵉⵃⴻⵙⵙⴻⴱ ⴰⵢⵉ ⴷ ⵍⴻⵄⴷⵓ ⵏⵏⴻⵙ. ■
11 ⵉⴹⴰⵔⴻⵏ ⵉⵏⵓ ⵉⵇⵇⴻⵏ ⵉ-ⵜⴻⵏ ⵖⴰⵔ ⵓⴽⴻⵛⵛⵓⴹ,
ⵉⵃⴻⵟⵟⴰ ⵎⴰⵔⵔⴰ ⵉⵎⴻⵙⵔⴰⵇ ⵉⵏⵓ.’ ■
12 ⵅⵥⴰⵔ, ⴰⴷ ⴰⵛ ⵉⵏⵉⵖ, ⵡⴰⵔ ⵜⴻⴵⵉⴷ ⵛⴰ ⴷ ⴰⵎⵙⴻⴳⴳⴻⴷ ⴷⴻⴳ ⵓⵢⴰ,
ⵎⴰⵖⴰⵔ ⴰⵔⴻⴱⴱⵉ ⴷ ⴰⵎⴻⵇⵇⵔⴰⵏ ⵅ ⴱⵏⴰⴷⴻⵎ.
13 ⵎⵉⵏ ⵅⴻⴼ ⴽⵉⴷⴻⵙ ⵜᵉⵜⵜⴻⵎⵄⴰⵔⵔⵉⴷ?
ⴰⵇⴰ ⵏⴻⵜⵜⴰ ⵡⴰⵔ ⵉⵜⵜⴻⴳⴳ ⵍⴻⵃⵙⴰⴱ ⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ!
14 ⵎⴰⵖⴰⵔ ⴰⵔⴻⴱⴱⵉ ⵉⵙⵙⴰⵡⴰⵍ ⵉⵛⵜ ⵏ ⵜⵡⴰⵍⴰ ⵏⵉⵖ ⵜⵏⴰⵢⴻⵏ ⵏ ⵜⵡⴰⵍⴰⵡⵉⵏ,
ⵎⴰⵛⴰ ⴱⵏⴰⴷⴻⵎ ⵡⴰⵔ ⵉⵃⴻⵟⵟⵉ:
15 ⴷⵉ ⵜⵉⵔⵊⴰ, ⵙ ⵉⵛⵜ ⵏ ⵜⵎⴻⵥⵔⵉⵡⵜ ⴷⵉ ⴵⵉⵍⴻⵜ,
ⵅⵎⵉ ⴷⴷ-ⵉⵡⴻⵟⵟⴰ ⵢⵉⴹⴻⵙ ⵢⵓⴵⵖⴻⵏ ⵅ ⵉⵡⴷⴰⵏ,
ⴷⴻⴳ ⵓⵏⵓⴷⴻⵎ ⴷⵉ ⵔⴻⵛⵜⵓ.
16 ⵢⴰⵔⴻⵥⵥⴻⵎ ⵏⴻⵜⵜⴰ ⴰⵎⴻⵥⵥⵓⵖ ⵏ ⵉⵡⴷⴰⵏ,
ⵉⵜⵜⵛⴻⵎⵎⴻⵄ ⵙ ⵓⵛⴻⵎⵎⵉⵄ ⵏⵏⴻⵙ ⵅ ⵓⵡⴻⴷⴷⴻⴱ ⵏⵙⴻⵏ,
17 ⵃⵉⵎⴰ ⴰⴷ ⵉⵙⵙⵃⴻⵢⵢⴻⴷ ⴱⵏⴰⴷⴻⵎ ⵅ ⵜⵎⴻⴳⴳⵉⵜ ⵏⵏⴻⵙ ⵜⴰⵄⴻⴼⴼⴰⵏⵜ,
ⵃⵉⵎⴰ ⴰⴷ ⵉⵙⵙⴱⴻⴷⴷ ⵏⵏⴼⴰⵅⴻⵜ ⵅ ⵡⴻⵔⵢⴰⵥ.
18 ⵏⴻⵜⵜⴰ ⵉⵎⴻⵏⵏⴻⵄ ⵍⴻⵄⵎⴰⵔ ⵏ ⴱⵏⴰⴷⴻⵎ ⵥⴻⴳ ⵓⵡⴻⵟⵟⵓ ⴷⴻⴳ ⵡⴻⵏⴹⴻⵍ,
ⵜⵓⴷⴰⵔⵜ ⵏⵏⴻⵙ ⵥⴻⴳ ⵓⵀⴻⵍⵍⴻⴽ ⵙ ⵍⴰⵏⵙⴰ.
19 ⵉⵊⴻⵢⵢⴻⵃ ⵉ-ⵜ ⵍⴻⵃⵔⵉⵇ ⴷⵉ ⵇⴰⵎⴰ ⵏⵏⴻⵙ,
ⵓⵍⴰ ⴷ ⴰⵎⴻⵏⵖⵉ ⵍⴻⴱⴷⴰ ⴷⴻⴳ ⵉⵅⵙⴰⵏ ⵏⵏⴻⵙ.
20 ⵜⵓⴷⴰⵔⵜ ⵏⵏⴻⵙ ⵜⴰⵔⵔⴰ ⵉ-ⵜ ⵉⵜⵜⵄⵉⴼⴼⴰ ⴰⵖⵔⵓⵎ,
ⵓ ⵍⴻⵄⵎⴰⵔ ⵏⵏⴻⵙ ⵢⴰⵔⵔⴰ ⵉ-ⵜ ⵉⵜⵜⵄⵉⴼⴼⴰ ⵎⴰⵛⵛⴰ ⵉⵚⴻⴱⵃⴻⵏ ⴰⵟⵟⴰⵙ. ■
21 ⵉⵇⴻⵟⵟⴰ ⵡⴻⵢⵙⵓⵎ ⵏⵏⴻⵙ ⵥⴻⴳ ⵡⵓⴷⴻⵎ ⵏⵏⴻⵙ,
ⵉⵅⵙⴰⵏ ⵏⵏⴻⵙ ⵏⵏⵉ ⵡⴰⵔ ⵜⵜⵡⴰⵥⴰⵔⴻⵏ ⵄⴻⵎⵎⴰⵔⵚ, ⴰⵇⴰ ⵜⵜⴱⴰⵏⴻⵏ ⵍⴻⵅⵅⵓ.
22 ⵉⵜⵜⵇⴰⵔⵔⴰⴱ ⵍⴻⵄⵎⴰⵔ ⵏⵏⴻⵙ ⵖⴰⵔ ⵡⴻⵏⴹⴻⵍ,
ⵜⵓⴷⴰⵔⵜ ⵏⵏⴻⵙ ⵖⴰⵔ ⵉⵊⴰⵔⵔⴰⵢⴻⵏ ⵏ ⵍⵎⴻⵡⵜ.
23 ⵎⴰⵍⴰ ⵅⴻⵏⵏⵉ ⴷⵉⵏ ⵉⵊⵊ ⵏ ⵍⵎⴰⵍⴰⴽ ⵉⴱⴻⴷⴷ ⴰⵙ-ⴷⴷ ⵖⴰⵔ ⵓⵖⴻⵥⴷⵉⵙ, ⵉⵊⵊ ⵏ ⵍⵄⴰⴷⴻⵍ,
ⵉⵊⵊⴻⵏ ⵥⴻⴳ ⵡⴰⵍⴻⴼ,
ⵃⵉⵎⴰ ⴰⴷ ⵉⵙⵙⵛⴻⵏ ⵉ ⴱⵏⴰⴷⴻⵎ ⵜⴰⵙⴻⴳⴷⴰ ⵏⵏⴻⵙ,
24 ⵅⴻⵏⵏⵉ ⴰⴷ ⵅⴰⵙ ⵉⵃⵉⵏⵏ, ⴰⴷ ⵢⵉⵏⵉ:
‘ⴼⴻⴽⴽ ⵉ-ⵜ, ⴰⵍⴰⵎⵉ ⵏⴻⵜⵜⴰ ⵡⴰⵔ ⵉⵀⴻⴽⴽⵡⵉ ⴷⴻⴳ ⵡⴻⵏⴹⴻⵍ,
ⴰⵇⴰ ⵏⴻⵛⵛ ⵓⴼⵉⵖ ⴰⵚⵍⴰⵃ ⵅⴰⵙ!’
25 ⵅⴻⵏⵏⵉ ⴰⴷ ⵜⵏⴻⵄⵏⴻⵄ ⴰⵔⵔⵉⵎⴻⵜ ⵏⵏⴻⵙ ⴽⵜⴰⵔ ⵥⵉ ⵟⵟⵔⵉ ⵏ ⵜⴻⵎⵥⵉ,
ⴰⴷ ⴷⴷ-ⵉⴷⵡⴻⵍ ⵖⴰⵔ ⵡⵓⵙⵙⴰⵏ ⵏ ⵜⴻⵎⵥⵉ ⵏⵏⴻⵙ.
26 ⵏⴻⵜⵜⴰ ⴰⴷ ⵉⵜⵜⴰⵔ ⴰⵔⴻⴱⴱⵉ ⵙ ⵜⵓⵜⵔⴰ ⵢⵓⴵⵖⴻⵏ ⵓ ⵏⴻⵜⵜⴰ ⴰⴷ ⵅⴰⵙ ⵢⴰⵔⴹⴰ,
ⴰⵍⴰⵎⵉ ⵡⴰⵏⵉⵜⴰ ⴰⴷ ⵉⵥⴰⵔ ⵓⴷⴻⵎ ⵏⵏⴻⵙ ⴷⴻⴳ ⵓⵙⵍⵉⵡⵍⴻⵡ ⵏ ⵍⴻⴼⵔⴰⵃⴻⵜ,
ⵓ ⴰⵎⵎⵓ ⵉ ⵖⴰ ⵢⴰⵔⵔ ⵏⴻⵜⵜⴰ ⵉ ⴱⵏⴰⴷⴻⵎ ⵜⴰⵙⴻⴳⴷⴰ ⵏⵏⴻⵙ. ■
27 ⴰⴷ ⵉⵖⴻⵏⵏⴻⵊ ⵉ ⵢⴻⵡⴷⴰⵏ, ⴰⴷ ⵢⵉⵏⵉ:
‘ⵏⴻⵛⵛ ⵅⴹⵉⵖ, ⵙⵙⴼⴰⵔⵖⴻⵖ ⵎⵉⵏ ⵉⵙⴻⴳⴳⴷⴻⵏ,
ⵎⴰⵛⴰ ⵏⴻⵜⵜⴰ ⵡⴰⵔ ⵥⵥⴰⵢⵉ ⵜⵜ ⵢⴻⵅⵍⵉⴼ.
28 ⵉⴼⴻⴽⴽ ⴰⵔⴻⴱⴱⵉ ⵍⴻⵄⵎⴰⵔ ⵉⵏⵓ ⵥⴻⴳ ⵡⴻⵏⴹⴻⵍ,
ⵜⵓⴷⴰⵔⵜ ⵉⵏⵓ ⵜⵅⴻⵥⵥⴰⵔ ⴰⵎⵎⵓ ⴷ ⵡⴰⵎⵎⵓ ⴷⵉ ⵜⴼⴰⵡⵜ.’
29 ⵅⵥⴰⵔ, ⵎⴰⵔⵔⴰ ⴰⵢⴰ ⵉⵜⵜⴻⴳⴳ ⵉ-ⵜ ⴰⵔⴻⴱⴱⵉ,
ⵜⵏⴰⵢⴻⵏ ⵏⵉⵖ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⴰⴽ-ⴷ ⵡⴻⵔⵢⴰⵥ,
30 ⵃⵉⵎⴰ ⴰⴷ ⵉⵙⵙⴻⵄⵇⴻⴱ ⵍⴻⵄⵎⴰⵔ ⵏⵏⴻⵙ ⵥⴻⴳ ⵡⴻⵏⴹⴻⵍ,
ⵃⵉⵎⴰ ⴰⴷ ⵜ ⵢⴰⵔⵔ ⵢⴰⵔⴻⵇⵇ ⵙ ⵜⴼⴰⵡⵜ ⵏ ⵜⵓⴷⴰⵔⵜ. ■
31 ⵃⴹⴰ, ⴰⵢⵓⴱ! ⵙⴻⵍ-ⴷⴷ ⵖⴰⵔⵉ!
ⵙⵇⴰⵔ, ⵅⴻⵏⵏⵉ ⵏⴻⵛⵛ ⴰⴷ ⵙⵙⵉⵡⵍⴻⵖ.
32 ⵎⴰⵍⴰ ⵖⴰⵔⴻⴽ ⴰⵡⴰⵍⴻⵏ ⵡⴻⵊⴷⴻⵏ, ⴰⵔⵔ-ⴷⴷ ⵅⴰⴼⵉ,
ⵙⵉⵡⴻⵍ, ⵎⴰⵖⴰⵔ ⵖⴰⵔⵉ ⵙ ⵍⵅⴰⴹⴰⵔ ⴰⴷ ⵅⴰⴽ ⴱⴰⵔⵔⵉⵖ.
33 ⵎⴰⵍⴰ ⵍⵍⴰ, ⵙⴻⵍ-ⴷⴷ ⵖⴰⵔⵉ!
ⵙⵇⴰⵔ, ⵓ ⴰⴷ ⴰⵛ ⵙⵙⵖⴰⵔⴻⵖ ⵜⵉⵖⵉⵜ.