1 ⵅⴻⵏⵏⵉ ⵙⵙⴱⴻⴷⴷⴻⵏ ⵜⵍⴰⵜⴰ ⵏ ⵢⴻⵔⵢⴰⵥⴻⵏ ⵏⵏⵉ ⵎⴰⵃⴻⵏⴷ ⴰⴷ ⴷⴷ-ⴰⵔⵔⴻⵏ ⵅ ⴰⵢⵓⴱ, ⵎⵉⵏⵥⵉ ⵜⵓⵖⴰ ⴷ ⴰⵎⵙⴻⴳⴳⴻⴷ ⵊⴰⵔ ⵜⵉⵟⵟⴰⵡⵉⵏ ⵏ ⵢⵉⵅⴻⴼ ⵏⵏⴻⵙ. 2 ⵅⴰⵙ ⵓⵛⴰ ⵢⴰⵔⵖⴰ ⵓⵅⴻⵢⵢⴻⵇ ⵏ ⵉⵍⵉⵀⵓ, ⵎⵎⵉⵙ ⵏ ⴱⴰⵔⴰⵅⵢⵉⵍ, ⵥⵉ ⵜⴻⵎⵎⵓⵔⵜ ⵏ ⴱⵓⵥ, ⵥⵉ ⵍⴰⴵ ⵏ ⵔⴰⵎ. ⵢⴰⵔⵖⴰ ⵓⵅⴻⵢⵢⴻⵇ ⵏⵏⴻⵙ ⵅ ⴰⵢⵓⴱ ⵎⵉⵏⵥⵉ ⵉⴳⴳⴰ ⵡⴰⵏⵉⵜⴰ ⵉⵅⴻⴼ ⵏⵏⴻⵙ ⴷ ⴰⵎⵙⴻⴳⴳⴻⴷ ⵅ ⴰⵔⴻⴱⴱⵉ. 3 ⵢⴰⵔⵖⴰ ⵓⵅⴻⵢⵢⴻⵇ ⵏⵏⴻⵙ ⵓⵍⴰ ⵅ ⵜⵍⴰⵜⴰ ⵏ ⵉⵎⴻⴷⴷⵓⴽⴽⴰⵍ ⵏⵏⴻⵙ, ⵎⴰⵖⴰⵔ ⵏⵉⵜⵏⵉ, ⵡⴰⵅⵅⴰ ⵡⴰⵔ ⵓⴼⵉⵏ ⵎⵉⵏ ⵥⵉ ⵅⴰⵙ ⵉ ⴷⴷ ⵖⴰ ⵢⴰⵔⵔⴻⵏ, ⴰⵎⴻⵏⵏⵉ ⴰⵔⵔⵉⵏ ⵍⵄⵉⴱ ⴷⵉ ⴰⵢⵓⴱ.

4 ⵉⵍⵉⵀⵓ ⵎⴰⵛⴰ ⵜⵓⵖⴰ ⵉⵔⴰⵊⴰ ⵙ ⵡⴰⵡⴰⵍⴻⵏ ⵇⵉⴱⴰⵞ ⵉ ⴰⵢⵓⴱ, ⵎⵉⵏⵥⵉ ⵏⵉⵜⵏⵉ ⵜⵓⵖⴰ ⵎⵖⴰⵔⴻⵏ ⵅⴰⵙ. 5 ⵓⵎⵉ ⵉⵥⵔⴰ ⵉⵍⵉⵀⵓ, ⴰⵇⴰ ⵜⵍⴰⵜⴰ ⵏ ⵢⴻⵔⵢⴰⵥⴻⵏ ⵏⵏⵉ ⵡⴰⵔ ⵓⴼⵉⵏ ⵎⵉⵏ ⵥⵉ ⴷⴷ ⵖⴰ ⵢⴰⵔⵔⴻⵏ ⵄⴰⴷ, ⵢⴰⵔⵖⴰ ⵓⵅⴻⵢⵢⴻⵇ ⵏⵏⴻⵙ. 6 ⵓⵛⴰ ⵉⵟⵟⴻⴼ ⵉⵍⵉⵀⵓ, ⵎⵎⵉⵙ ⵏ ⴱⴰⵔⴰⵅⵉⵍ, ⵥⵉ ⴱⵓⵥ, ⴷⴻⴳ ⵡⴰⵡⴰⵍ, ⵉⵏⵏⴰ:

ⵏⴻⵛⵛ ⴷ ⴰⵎⴻⵥⵢⴰⵏ ⴷⴻⴳ ⵉⵙⴻⴳⴳⵯⵓⵙⴰ ⵓ ⴽⴻⵏⵏⵉⵡ ⴷ ⵉⵎⴻⵛⵛⴰⵢⴱⵓⵜⴻⵏ.

ⵙ ⵓⵢⴻⵏⵏⵉ ⵔⴰⵊⵉⵖ ⵓ ⴱⴱⵓⵔⵔⵏⴻⵖ

ⵎⴰⵃⴻⵏⴷ ⴰⴷ ⴰⵡⴻⵎ ⵙⵙⴻⵛⵏⴻⵖ ⵜⵓⵙⵙⵏⴰ ⵉⵏⵓ. ^■  

7 ⵏⴻⵛⵛ ⵏⵏⵉⵖ: ‘ⴻⵊⵊ ⵉⵏⵏⵉ ⵉⵎⵖⴰⵔⴻⵏ ⴷⴻⴳ ⵡⵓⵙⵙⴰⵏ ⴰⴷ ⵙⵙⵉⵡⵍⴻⵏ,

ⴻⵊⵊ ⵍⵇⴻⴷⴷ ⴰⵎⴻⵇⵇⵔⴰⵏ ⵏ ⵉⵙⴻⴳⴳⵯⵓⵙⴰ ⵏ ⵓⵎⴻⵛⵛⴰⵢⴱⵓ ⴰⴷ ⵉⵙⵙⴰⵔⴳⴻⴱ ⵜⵉⵖⵉⵜ.’

8 ⵙ ⵜⵉⴷⴻⵜⵜ, ⴱⵓⵃⴱⴻⵍ ⵉⵥⴷⴻⵖ ⴷⵉ ⴱⵏⴰⴷⴻⵎ,

ⴰⵚⵓⴹⵉ ⵏ ⵏⵏⴻⴼⵙ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⵉⵜⵜⵉⵛ ⴰⵙⴻⵏ ⵍⴻⴼⵀⴰⵎⴻⵜ. ^■  

9 ⵉⵏⵏⵉ ⵉⵎⵖⴰⵔⴻⵏ ⴷⴻⴳ ⵉⵙⴻⴳⴳⵯⵓⵙⴰ ⵡⴰⵔ ⴷⴰⵢⵙⴻⵏ ⵜⴻⴵⵉ ⵜⵉⵖⵉⵜ,

ⵓ ⵉⵡⴻⵙⵙⵓⵔⴰ ⵡⴰⵔ ⴼⴻⵀⵀⵎⴻⵏ ⵉ ⵛⵛⵔⴻⵄ. ^■  

10 ⵙ ⵓⵢⴻⵏⵏⵉ ⵇⵇⴰⵔⴻⵖ: ‘ⵙⵍⴻⵎ-ⴷⴷ ⵖⴰⵔⵉ,

ⵅⴻⵏⵏⵉ ⵓⵍⴰ ⴷ ⵏⴻⵛⵛ ⴰⴷ ⵙⵙⴻⵛⵏⴻⵖ ⵜⵓⵙⵙⵏⴰ ⵉⵏⵓ.’

11 ⵅⵥⴰⵔ, ⵔⴰⵊⵉⵖ ⴰⵡⴰⵍⴻⵏ ⵏⵡⴻⵎ,

ⵙⵙⵃⴻⵙⵙⴻⵖ ⵖⴰⵔ ⵍⴻⴼⵀⴰⵎⴻⵜ ⵏⵡⴻⵎ,

ⴰⵎ ⵜⵓⵖⴰ ⵜⴰⵔⴻⵥⵥⵓⵎ ⵅ ⵡⴰⵡⴰⵍⴻⵏ ⵉⵙⴻⴳⴳⵎⴻⵏ.

12 ⵏⴻⵛⵛ ⵃⴹⵉⵖ ⴽⴻⵏⵏⵉⵡ ⵎⵍⵉⵃ,

ⴰⵇⴰ ⴷⴰ, ⵓⵍⴰ ⴷ ⵉⵊⵊⴻⵏ ⵎⴰ ⵜⵓⵖⴰ ⵉⵥⴻⵎⵎⴰⵔ ⴰⴷ ⵉⵙⵙⴻⵇⵏⴻⵄ ⴰⵢⵓⴱ,

ⵓⵍⴰ ⴷ ⵉⵊⵊⴻⵏ ⵥⵥⴰⵢⵡⴻⵎ ⵡⴰⵔ ⵉⵥⴻⵎⵎⴰⵔ ⴰⴷ ⴷⴷ-ⵢⴰⵔⵔ ⵅ ⵡⴰⵡⴰⵍⴻⵏ ⵏⵏⴻⵙ.

13 ⵙ ⵓⵢⴰ ⵡⴰⵔ ⵇⵇⴰⵔⴻⵎ: ‘ⵏⴻⵛⵛⵉⵏ ⵏⵓⴼⴰ ⵜⵉⵖⵉⵜ!

ⴰⵔⴻⴱⴱⵉ ⵉ ⵉⵥⴻⵎⵎⴰⵔⴻⵏ ⴰⴷ ⵜ ⵉⵏⴹⴰⵔ, ⵡⴰⵔ ⵉⴵⵉ ⴱⵏⴰⴷⴻⵎ.’

14 ⵡⴰⵔ ⴵⵉⵏ ⵡⴰⵡⴰⵍⴻⵏ ⵏⵏⴻⵙ ⵅⴰⴼⵉ,

ⵓ ⵙ ⵡⴰⵡⴰⵍⴻⵏ ⵏⵡⴻⵎ ⵡⴰⵔ ⵅⴰⵙ ⴷⴷ-ⴰⵔⵔⵉⵖ.

15 ⵜⵜⵡⴰⵔⵏⴰⵏ ⵏⵉⵜⵏⵉ, ⵡⴰⵔ ⴷⴷ-ⵜⵜⴰⵔⵔⵉⵏ ⵄⴰⴷ,

ⴰⵡⴰⵍⴻⵏ ⵜⵜⵡⴰⴽⴽⵙⴻⵏ ⵥⵥⴰⵢⵙⴻⵏ.

16 ⵍⴰⵊⵉⵖ, ⵎⴰⵛⴰ ⵡⴰⵔ ⵙⵙⵉⵡⵍⴻⵏ,

ⵎⴰⵖⴰⵔ ⵙⵙⴱⴻⴷⴷⴻⵏ ⴰⵡⴰⵍ, ⵡⴰⵔ ⴷⴷ-ⵜⵜⴰⵔⵔⵉⵏ ⵄⴰⴷ.

17 ⵓⵍⴰ ⴷ ⵏⴻⵛⵛ ⵅⵙⴻⵖ ⴰⴷ ⵙⵙⵉⵡⵍⴻⵖ ⴷⵉ ⵏⵏⵓⴱⴻⵜ ⵉⵏⵓ,

ⵓⵍⴰ ⴷ ⵏⴻⵛⵛ ⴰⴷ ⵙⵙⴻⵛⵏⴻⵖ ⵜⵓⵙⵙⵏⴰ ⵉⵏⵓ.

18 ⵎⴰⵖⴰⵔ ⵛⵛⵓⵔⴻⵖ ⵙ ⵡⴰⵡⴰⵍⴻⵏ,

ⵉⵃⴻⵙⵙⴰⵔ ⴰⵢⵉ ⴱⵓⵃⴱⴻⵍ ⴷⵉ ⴷⴰⵅⴻⵍ ⵉⵏⵓ.

19 ⵅⵥⴰⵔ, ⴰⵄⴻⴷⴷⵉⵙ ⵉⵏⵓ ⵉⵜⵜⴻⴳⴳ ⴰⵎ ⵜⵥⵉⵢⵢⴰⵜ ⵏ ⴱⵉⵏⵓ ⵡⴰⵔ ⵢⴰⵔⵥⵉⵎⴻⵏ ⵄⴰⴷ,

ⴰⵎ ⵜⵅⵓⵏⵛⴰⵢ ⵏ ⵢⵉⵍⴻⵎ ⵏ ⵊⴷⵉⴷ ⴰⵇⴰ ⵏⴻⵜⵜⴰ ⵉⵜⵜⴻⴳⴳ ⴰⵅⵎⵉ ⴳⴳⵓⵔ ⴰⴷ ⵉⴷⴷⵓⵇⵇⴻⵥ.

20 ⴰⴷ ⵙⵙⵉⵡⵍⴻⵖ ⵃⵉⵎⴰ ⴰⴷ ⴼⵙⵓⵙⴻⵖ,

ⴰⴷ ⴰⵔⵥⵎⴻⵖ ⵉⵢⴻⵏⵛⵉⵛⴻⵏ ⵉⵏⵓ, ⴰⴷ ⴷⴷ-ⴰⵔⵔⴻⵖ.

21 ⵡⴰⵔ ⵜⵜⴻⴳⴳⵉⵖ ⵙ ⵡⵓⴷⵎⴰⵡⴻⵏ ⴰⴽ-ⴷ ⵓⵍⴰ ⴷ ⵉⵊⵊ,

ⵡⴰⵔ ⵙⵙⵉⵡⵍⴻⵖ ⵓⵍⴰ ⴰⴽ-ⴷ ⵉⵊⵊ ⵏ ⴱⵏⴰⴷⴻⵎ ⵙ ⵡⴰⵡⴰⵍⴻⵏ ⵉⵎⵉⵥⵉⴷⴻⵏ.

22 ⵎⴰⵖⴰⵔ ⵡⴰⵔ ⵥⴻⵎⵎⴰⵔⴻⵖ ⴰⴷ ⴳⴳⴻⵖ ⵙ ⵡⴰⵡⴰⵍⴻⵏ ⵉⵎⵉⵥⵉⴹⴻⵏ,

ⵎⴰⵖⴰⵔ ⵅⴻⵏⵏⵉ ⴰⴷ ⴰⵢⵉ ⵉⴽⴽⴻⵙ ⵡⴻⵏⵏⵉ ⵉ ⴷ ⴰⵢⵉ ⵉⴳⴳⵉⵏ.