ⵍⵃⴰⵔⴹ ⵏ ⴰⵢⵓⴱ ⵅ ⵜⵉⵖⵉⵜ
28
1 ⵙ ⵜⵉⴷⴻⵜⵜ, ⴰⵇⴰ ⴷⵉⵏ ⴰⵎⵛⴰⵏ ⵎⴰⵏⵉ ⵜᵉⵜⵜⵡⴰⴼ ⵏⵏⵓⵇⴰⵔⵜ, ⵓⵍⴰ ⴷⵉⵏ ⴰⵎⵛⴰⵏ ⵉ ⵡⵓⵔⴻⵖ ⵎⴰⵏⵉ ⵜ ⵙⵙⵉⵥⴷⵉⴳⴻⵏ.
2 ⵓⵥⵥⴰⵍ ⵜⵜⴰⵡⵢⴻⵏ ⵜ-ⵉ-ⴷⴷ ⵥⴻⴳ ⵓⵛⴰⵍ,
ⵓ ⵥⴻⴳ ⵡⴻⵥⵔⵓ ⵙⵙⴼⴻⵙⵙⵢⴻⵏ ⵏⵏⵃⴰⵙ.
3 ⵉⴳⴳⴰ ⴱⵏⴰⴷⴻⵎ ⵇⴻⵟⵟⵓ ⵉ ⵜⴰⴵⴻⵙⵜ,
ⵏⴻⵜⵜⴰ ⵢⴰⵔⴻⵥⵥⵓ ⴷⵉ ⵎⴽⵓⵍ ⴰⵎⵛⴰⵏ ⵎⴰⵏⵉ ⵎⵎⴰ,
ⵅ ⵡⴻⵥⵔⵓ ⵉ ⴷⴷ-ⵉⵜⵜⴻⴼⴼⵖⴻⵏ ⵥⵉ ⵜⵓⴱⴱⴰⵔⵛⴻⵏⵜ ⴷ ⵜⵉⵍⵉ ⵏ ⵍⵎⴻⵡⵜ.
4 ⵢⴰⵔⵥⴻⵎ ⵉⵊⵊ ⵏ ⵡⴻⵅⵊⵉⴹ ⴱⵍⴰ ⵎⴰ ⴰⴷ ⴷⵉⵏ ⵢⵉⵍⵉ ⵃⴻⴷ ⴰⴽⵉⴷⴻⵙ.
ⵜⵜⵡⴰⵜⵜⵓⵏ ⵥⴻⴳ ⵉⴹⴰⵔⴻⵏ ⵏ ⵢⵉⵏⵏⵉ ⵙⴻⵏⵏⴻⵊ ⵏⵙⴻⵏ,
ⵓⵢⵍⴻⵏ ⵜⵜⵔⴰⵃⴻⵏ ⵜⴰⵙⴻⵏ-ⴷⴷ ⴱⵍⴰ ⵎⴰ ⵢⴰⵔⵔⴰ ⴰⵙⴻⵏ-ⴷⴷ ⵃⴻⴷ ⵍⴱⴰⵍ.
5 ⵉⵜⵜⴻⴼⴼⴻⵖ-ⴷⴷ ⵡⴻⵖⵔⵓⵎ ⵥⵉ ⵜⴻⵎⵎⵓⵔⵜ,
ⴰⵎ ⵙⵡⴰⴷⴷⴰⵢ ⵏⵏⴻⵙ ⵎⴰⵔⵔⴰ ⴰⵅⵎⵉ ⵙ ⵜⵎⴻⵙⵙⵉ ⵉⵏⵏⴻⵇⵍⴻⴱ.
6 ⵉⵥⵔⴰ ⵏⵏⴻⵙ ⴷ ⴰⵎⵛⴰⵏ ⵎⴰⵏⵉ ⵜⵜⴰⴼⴻⵏ ⵚⴰⴼⴼⵉⵔ,
ⵓ ⴷⴰⵢⴻⵙ ⵉ ⵜⴻⴵⴰ ⵓⵍⴰ ⴷ ⵜⴰⵄⴻⵊⵊⴰⵛⵜ ⵏ ⵡⵓⵔⴻⵖ.
7 ⴰⵊⴹⵉⴹ ⵉⵜⵜⴽⴻⵛⵛⴰⴹⴻⵏ ⵡⴰⵔ ⵉⵙⵙⵉⵏ ⴰⵎⴻⵙⵔⵓⵇ ⵉ ⵖⴰⵔⴻⵙ ⵉⴵⴰⵏ,
ⵓ ⵜⵉⵟⵟ ⵏ ⵓⵊⴹⵉⴷ ⴰⵎⴻⵙⵙⵖⵓⵢ ⴰⵎⵓⵇⴹⵉⵄ ⵏ ⵜⵉⵟⵟⴰⵡⵉⵏ ⵄⴻⵎⵎⴰⵔⵚ ⵡⴰⵔ ⵜ ⵜⴻⵃⴹⵉ.
8 ⵉⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵉⵏⴻⴼⴼⵅⴻⵏ ⵡⴰⵔ ⴷⴰⵢⴻⵙ ⵓⵢⵓⵔⴻⵏ,
ⵓⵍⴰ ⴷ ⴰⵢⵔⴰⴷ ⵉⵥⴻⵀⵀⴰⵔⴻⵏ ⵡⴰⵔ ⵜ ⵉⵜⵜⵛⵓⵇⵉ.
9 ⵎⴰⵛⴰ ⴱⵏⴰⴷⴻⵎ ⵉⵙⴰⵔⵔⴻⵃ ⴰⴼⵓⵙ ⵏⵏⴻⵙ ⵖⴰⵔ ⵙⵙⴻⴵⴰⵃ ⵉⵇⴻⵙⵃⴻⵏ,
ⵉⵙⵙⵏⴻⵇⵍⴰⴱ ⵉⴷⵓⵔⴰⵔ ⴽⵓⵍⵛⵉ.
10 ⴷⵉ ⵍⴻⵊⵔⵓⴼ ⵉⵇⵇⴰⵥ ⵉⵖⴻⵥⵔⴰⵏ,
ⵓ ⵜⵉⵟⵟ ⵏⵏⴻⵙ ⵜᵉⵜⵜⵡⴰⵍⴰ ⵎⴰⵔⵔⴰ ⵎⵉⵏ ⵉⵖⵍⴰⵏ.
11 ⵉⵃⴻⵡⵡⴻⵇ-ⴷⴷ ⵉ ⵉⵖⴻⵥⵔⴰⵏ ⴰⵍⴰⵎⵉ ⴰⵎⴰⵏ ⵡⴰⵔ ⵇⵇⵉⵎⴻⵏ ⵜⵜⴻⴼⴼⵖⴻⵏ-ⴷⴷ,
ⵓ ⵎⵉⵏ ⴷⴰⵢⴻⵙ ⵉⵏⵓⴼⴼⴰⵔⴻⵏ ⵉⵜⵜⴰⵡⵢⵉ ⵜ-ⵉ-ⴷⴷ ⵖⴰⵔ ⵜⴼⴰⵡⵜ.
12 ⵜⵉⵖⵉⵜ ⵎⴰⵛⴰ, ⵎⴰⵏⵉ ⵜᵉⵜⵜⵡⴰⴼ?
ⵓ ⵎⴰⵏⵉ ⵜⴻⴵⴰ ⵜⵥⴻⴷⴷⵉⵖⵜ ⵏ ⵍⴻⴼⵀⴰⵎⴻⵜ?
13 ⴱⵏⴰⴷⴻⵎ ⵡⴰⵔ ⵉⵙⵙⵉⵏ ⵍⵇⵉⵎⴻⵜ ⵏⵏⴻⵙ,
ⵡⴰⵔ ⵜᵉⵜⵜⵡⵉⴼ ⵜⵉⵖⵉⵜ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.
14 ⴰⵎⴰⵏ ⵢⵓⴵⵖⴻⵏ ⵇⵇⴰⵔⴻⵏ: ‘ⴷⴰⵢⵏⴻⵖ ⵡⴰⵔ ⵜⴻⴵⵉ ⵛⴰ!’,
ⵍⴻⴱⵃⴰⵔ ⵉⵇⵇⴰⵔ: ‘ⵖⴰⵔⵉ ⵡⴰⵔ ⴷⴰ ⵜⴻⴵⵉ ⵛⴰ!’ ■
15 ⵡⴰⵔ ⵉⵥⴻⵎⵎⴰⵔ ⴰⴷ ⵉⵎⵎⴻⵡⵛ ⵡⵓⵔⴻⵖ ⵉⵇⵇⵓⵔⴻⵏ ⴷⴻⴳ ⵡⴻⵎⵛⴰⵏ ⵏⵏⴻⵙ,
ⵓ ⵙⵙⵓⵎ ⵏⵏⴻⵙ ⵡⴰⵔ ⵥⴻⵎⵎⴰⵔⴻⵏ ⴰⴷ ⵜ ⵡⴻⵥⵏⴻⵏ ⵙ ⵏⵏⵓⵇⴰⵔⵜ. ■
16 ⵡⴰⵔ ⵥⴻⵎⵎⴰⵔⴻⵏ ⴰⴷ ⵡⴻⵥⵏⴻⵏ ⵙⵙⵓⵎ ⵏⵏⴻⵙ ⵙ ⵡⵓⵔⴻⵖ ⵉⵖⵍⴰⵏ ⵥⵉ ⵓⴼⵉⵔ,
ⵙ ⵡⴻⵥⵔⵓ ⵏ ⴱⵉⵔⵉⵍ ⵉⵖⵍⴰⵏ ⴷ ⵚⴰⴼⴼⵉⵔ ⴰⵥⵉⵥⴰ.
17 ⵡⴰⵔ ⵥⴻⵎⵎⴰⵔⴻⵏ ⴰⴷ ⵎⵎⵇⵓⴷⴷⴰⵏ ⵍⵇⵉⵎⴻⵜ ⵏⵏⴻⵙ ⴰⴽ-ⴷ ⵡⵓⵔⴻⵖ ⵏⵉⵖ ⴽⵔⵉⵙⵜⴰⵍ,
ⵏⵉⵖ ⴰⴷ ⵜⵜ ⴱⴻⴷⴷⵍⴻⵏ ⵙ ⵉⵛⵜ ⵏ ⵍⵇⴻⵛⵄⴻⵜ ⵏ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ.
18 ⵡⴰⵔ ⵜⵜⴻⵄⵇⵉⵍⴻⵏ ⵄⴰⴷ ⵅ ⵜⵢⴰⵇⵓⵜⵉⵏ ⴷ ⵡⴻⵥⵔⵓ ⵏ ⵓⴽⵔⵉⵙⵜⴰⵍ,
ⵎⴰⵖⴰⵔ ⵜⵡⴰⴼⵉⵜ ⵏ ⵜⵉⵖⵉⵜ ⵜⵓⵄⵄⵍⴰ ⵅ ⵜⵡⴰⴼⵉⵜ ⵏ ⵍⵎⴰⵔⵊⴰⵏ.
19 ⵍⴻⵄⵇⵉⵇ ⴰⵥⴻⴳⴳⵡⴰⵖ ⵥⵉ ⴽⵓⵛ ⵡⴰⵔ ⴷⴰⵢⴻⵙ ⵢⴰⵔⵡⵉⵙ,
ⵓ ⵡⴰⵔ ⵉⵥⴻⵎⵎⴰⵔ ⴰⴷ ⵜᵉⵜⵜⵡⴰⵡⵥⴻⵏ ⵜⵉⵖⵉⵜ ⵙ ⵡⵓⵔⴻⵖ ⵉⵚⴼⴰⵏ ⵉⵖⵍⴰⵏ.
20 ⵎⴰⵏⵉⵙ ⴷⴷ-ⵜⵓⵙⴰ ⵅⴻⵏⵏⵉ ⵜⵉⵖⵉⵜ,
ⵓ ⵎⴰⵏⵉ ⵜⴻⴵⴰ ⵜⵥⴻⴷⴷⵉⵖⵜ ⵏ ⵍⴻⴼⵀⴰⵎⴻⵜ? ■
21 ⴰⵇⴰ-ⵜⵜ ⵜⵏⵓⴼⴼⴰⵔ ⵅ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ,
ⵜᵉⵜⵜⵡⴰⵍⴻⵃⵃⴻⴼ ⵅ ⵉⵊⴹⴰⴹ ⵏ ⵓⵊⴻⵏⵏⴰ.
22 ⴰⵀⴻⵍⵍⴻⴽ ⴷ ⵍⵎⴻⵡⵜ ⵇⵇⴰⵔⴻⵏ:
‘ⵙ ⵉⵎⴻⵥⵥⵓⵖⴻⵏ ⵏⵏⴻⵖ ⵏⴻⵙⵍⴰ ⵅⴰⵙ ⵍⴻⵅⴱⴰⵔ!’ ■
23 ⴰⵔⴻⴱⴱⵉ ⵉⴼⴻⵀⵀⴻⵎ ⴰⴱⵔⵉⴷ ⵏⵏⴻⵙ,
ⵏⴻⵜⵜⴰ ⵉⵙⵙⴻⵏ ⵜⴰⵥⴻⴷⴷⵉⵖⵜ ⵏⵏⴻⵙ,
24 ⵎⴰⵖⴰⵔ ⵉⵜⵜⵡⴰⵍⴰ ⵖⴰⵔⴻⵙ ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ,
ⵉⵥⴰⵔⵔ ⵎⴰⵔⵔⴰ ⵎⵉⵏ ⵉⴵⴰⵏ ⵙⴰⴷⵓ ⵉⵊⴻⵏⵡⴰⵏ.
25 ⵓⵎⵉ ⵉⴳⴳⴰ ⵉ ⵓⵚⴻⵎⵎⵉⴹ ⵊⵊⴻⵀⴷ ⵏⵏⴻⵙ,
ⵓⵎⵉ ⵉⵄⴱⴰⵔ ⵍⴻⵄⴱⴰⵔ ⵏ ⵡⴰⵎⴰⵏ, ■
26 ⵓⵎⵉ ⵉⴳⴳⴰ ⵉ ⵡⴻⵏⵥⴰⵔ ⵇⴻⵟⵟⵓ,
ⵉⵊⵊ ⵏ ⵡⴻⴱⵔⵉⴷ ⵉ ⵡⴰⵙⵙⴰⵎ ⵏ ⵡⴰⵊⵊⴰⵊⴻⵏ,
27 ⵅⴻⵏⵏⵉ ⵉⵥⵔⴰ ⵉ-ⵜⵜ, ⵉⵙⵙⴰⵔⴳⴻⴱ ⵉ-ⵜⵜ,
ⵓⵛⴰ ⵉⵙⵙⴱⴻⴷⴷ ⵉ-ⵜⵜ ⴷⴻⴳ ⵡⴻⵎⵛⴰⵏ ⵏⵏⴻⵙ ⵓⵛⴰ ⵉⴱⴻⵇⵇⴻⵛ ⴷⴰⵢⴻⵙ,
28 ⵓⵛⴰ ⵉⵏⵏⴰ ⵉ ⴱⵏⴰⴷⴻⵎ:
‘ⵅⵥⴰⵔ, ⵜⵉⴳⴳⵯⵓⴷⵉ ⵥⵉ ⵙⵉⴷⵉ ⴷ ⵜⵉⵖⵉⵜ,
ⵓ ⴰⴱⴻⵄⵄⴻⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷ ⵍⴻⴼⵀⴰⵎⴻⵜ.’ □ ■