ⵍⵃⴰⵔⴹ ⵏ ⴰⵢⵓⴱ ⵅ ⵉⵄⴻⴼⴼⴰⵏⴻⵏ
27
1 ⵢⴰⵔⵏⵉ ⴰⵢⵓⴱ ⴷⵉ ⵍⵀⴰⵔⴷ ⵏ ⵍⵎⴰⵜⴰⵍ ⵏⵏⴻⵙ, ⵉⵏⵏⴰ: 2 ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⴰⵔⴻⴱⴱⵉ ⵏⵏⵉ ⵉ ⴷ ⴰⵢⵉ ⵉⴽⴽⵙⴻⵏ ⵜⴰⵙⵖⴰⵔⵜ ⵉⵏⵓ,
ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⵏⵏⵉ ⵉⵙⵙⴰⵔⵥⴰⴳⴻⵏ ⵍⴻⵄⵎⴰⵔ ⵉⵏⵓ,
3 ⵎⵉⵏ ⵖⴰ ⵢⴻⴽⴽ ⵏⵏⴻⴼⵙ ⵄⴰⴷ ⴷⴰⵢⵉ,
ⵓ ⴰⵔⵔⵓⵃ ⵏ ⴰⵔⴻⴱⴱⵉ ⵄⴰⴷ ⴷⴻⴳ ⵡⴻⵏⵥⴰⵔⴻⵏ ⵉⵏⵓ,
4 ⵡⴰⵔ ⵇⵇⴰⵔⴻⵏ ⵉⵢⴻⵏⵛⵉⵛⴻⵏ ⵉⵏⵓ ⵍⵖⴻⵛⵛ,
ⵓ ⵉⵍⴻⵙ ⵉⵏⵓ ⵡⴰⵔ ⵉⵇⵇⴰⵔ ⵉⵅⴰⵔⵔⵉⵇⴻⵏ!
5 ⴷ ⵍⴻⴼⴹⵉⵃⴻⵜ ⵉ ⵏⴻⵛⵛ ⵎⴰⵍⴰ ⴳⴳⵉⵖ ⴽⴻⵏⵏⵉⵡ ⴷⵉ ⵜⵙⴻⵢⵢⴰⵔⴻⵙⵜ ⵏ ⵜⵉⴷⴻⵜ.
ⴰⵍ ⵖⴰ ⵙⵙⵓⴼⴼⵖⴻⵖ ⴱⵓⵃⴱⴻⵍ ⵉⵏⵓ,
ⵡⴰⵔ ⵜⵜⴻⵊⵊⵉⵖ ⴰⴷ ⵅⴰⴼⵉ ⴽⴽⵙⴻⵏ ⴰⵙⴻⴳⴳⴻⴷ ⵉⵏⵓ.
6 ⴰⴷ ⵟⵟⴼⴻⵖ ⴷⵉ ⵜⵙⴻⴳⴷⴰ ⵉⵏⵓ, ⵡⴰⵔ ⵥⵥⴰⵢⴻⵙ ⴰⵔⴻⵅⵅⵓⵖ ⵛⴰ.
ⵓⵍ ⵉⵏⵓ ⵡⴰⵔ ⴷ ⴰⵙ ⵢⴰⵔⴻⵅⵅⵓ ⵓⵍⴰ ⵅ ⵉⵊⵊⴻⵏ ⵥⴻⴳ ⵡⵓⵙⵙⴰⵏ ⵉⵏⵓ.
7 ⵎⵍⵉ ⴷⴷ-ⵉⴱⴰⵏ ⵍⴻⵄⴷⵓ ⵉⵏⵓ ⴷ ⴰⵄⴻⴼⴼⴰⵏ,
ⵡⴻⵏⵏⵉ ⴰⴽⵉⴷⵉ ⵉⵜⵜⵎⴻⵏⵖⴰⵏ ⴷ ⵎⵎⵉⵙ ⵏ ⵍⵎⵓⵄⵚⵉⵢⵢⴻⵜ.
8 ⵎⴰⵖⴰⵔ ⵎⴰⵏ ⴰⵙⵉⵜⴻⵎ ⵏ ⵓⵎⵏⴰⴼⴻⵇ,
ⵅⵎⵉ ⵉ ⵖⴰ ⵜᵉⵜⵜⵡⴰⵇⴹⴻⵄ ⵜⵓⴷⴰⵔⵜ ⵏⵏⴻⵙ,
ⵅⵎⵉ ⵥⵥⴰⵢⴻⵙ ⵉ ⵖⴰ ⵉⵇⵍⴻⵄ ⴰⵔⴻⴱⴱⵉ ⵍⴻⵄⵎⴰⵔ ⵏⵏⴻⵙ? ■
9 ⵎⴰ ⴰⴷ ⵉⵙⴻⵍ ⴰⵔⴻⴱⴱⵉ ⵉ ⵉⵖⵓⵢⵢⴰⵏ ⵏⵏⴻⵙ,
ⵅⵎⵉ ⵅⴰⵙ ⴷⴷ ⵖⴰ ⵉⵡⴹⴰ ⵍⵃⴻⵚⵔⴰⵏ? ■
10 ⵎⴰ ⴰⴷ ⵉⴼⴰⵔⵃ ⵖⴰⵔ ⵓⵎⵥⴻⵎⵎⴰⵔ ⵅ ⴽⵓⵍⵛⵉ?
ⵎⴰ ⴰⴷ ⵉⵍⴰⵖⴰ ⵅ ⴰⵔⴻⴱⴱⵉ ⵎⴻⵍⵎⵉ ⵎⴰ?
11 ⵏⴻⵛⵛ ⴰⴷ ⴰⵡⴻⵎ ⵙⵙⵍⴻⵎⴷⴻⵖ ⵅ ⵓⴼⵓⵙ ⵏ ⴰⵔⴻⴱⴱⵉ,
ⵎⵉⵏ ⵉⵄⴻⵡⵡⴻⵍ ⵓⵎⵥⴻⵎⵎⴰⵔ ⵅ ⴽⵓⵍⵛⵉ, ⵡⴰⵔ ⵜ ⵙⵙⵏⵓⴼⴼⴰⵔⴻⵖ.
12 ⵅⵥⴰⵔ, ⴽⴻⵏⵏⵉⵡ ⵎⴰⵔⵔⴰ ⵉⴷⵡⴻⵎ ⵜⴻⵥⵔⵉⵎ ⵜ.
ⵎⴰⵢⴻⵎⵎⵉ ⵜⴰⵔⴻⵏⵏⵢⴻⵎ ⵜⴻⵙⵙⵓⴼⴼⵓⵖⴻⵎ ⵎⵉⵏ ⵉⵅⵡⴰⵏ, ⵜⴻⵇⵇⴰⵔⴻⵎ:
13 “ⵜⴰ ⴷ ⵜⴰⵙⵖⴰⵔⵜ ⵏ ⴱⵏⴰⴷⴻⵎ ⴰⵄⴻⴼⴼⴰⵏ ⵖⴰⵔ ⵙⵉⴷⵉ,
ⵜⴰⵙⵖⴰⵔⵜ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⵏⵏⵉ ⵉ ⵖⴰ ⵟⵟⴼⴻⵏ ⵥⴻⴳ ⵓⵎⵥⴻⵎⵎⴰⵔ ⵅ ⴽⵓⵍⵛⵉ: ■
14 ⵅⵎⵉ ⵉ ⵖⴰ ⵎⵎⴰⵔⴻⵏⵢⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ, ⵉ ⵙⵙⵉⴼ ⵓⵎⵉ ⵓⵔⵉⵏ.
ⵉⵖⴻⴷⴷⵓⵜⴻⵏ ⵏⵏⴻⵙ ⵡⴰⵔ ⵜⵜⵢⴰⵡⴰⵏⴻⵏ ⴰⵖⵔⵓⵎ, □ ■
15 ⵡⵉ ⵥⵥⴰⵢⴻⵙ ⵉ ⵖⴰ ⵉⵇⵇⵉⵎⴻⵏ ⴰⴷ ⵜⵜⵡⴰⵏⴻⴹⵍⴻⵏ ⵙ ⵟⵟⴰⵄⵓⵏ,
ⵓ ⵜⵉⵊⵊⴰⵍ ⵏⵏⴻⵙ ⵡⴰⵔ ⵜⵜⵔⵓⵏⵜ ⵛⴰ. ■
16 ⵡⴰⵅⵅⴰ ⵉⵊⴰⵔⵔⵓⵡ ⵏⵏⵓⵇⴰⵔⵜ ⴰⵏⴻⵛⵜ ⵏ ⵓⵛⴰⵍ,
ⵓ ⵉⵙⵙⴻⵡⵊⴰⴷ ⴰⵔⵔⵓⴹ ⴰⵏⴻⵛⵜ ⵏ ⵓⵛⴰⵍ,
17 ⵉⵡⴰ ⴰⴷ ⵜ ⵉⵙⵙⴻⵡⵊⴻⴷ, ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵥⵥⴰⵢⴻⵙ ⵢⴰⵔⴹ,
ⵓ ⴰⵎⴻⵥⴷⴰⴳ ⴰⴷ ⵉⴱⴹⴰ ⵏⵏⵓⵇⴰⵔⵜ. ■
18 ⴰⴷ ⵉⴱⵏⴰ ⵜⴰⴷⴷⴰⵔⵜ ⵏⵏⴻⵙ ⴰⵎ ⵜⵛⵉⵏⴷⴰ,
ⴰⵎⴻⵛⵏⴰⵡ ⵜⴰⵏⵡⴰⵍⵜ ⵉ ⵉⵙⵙⴱⴻⴷⴷⴰ ⵓⵄⴻⵙⵙⴰⵙ ⵉ ⵢⵉⵅⴻⴼ ⵏⵏⴻⵙ.
19 ⴰⴷ ⴷⴰⵢⴻⵙ ⵉⵟⵟⴻⵙ ⴷ ⴱⵓ-ⵡⴰⴳⵍⴰ, ⵎⴰⵛⴰ ⵡⴰⵔ ⵢⴰⵔⴻⵏⵏⵉ ⴷⴻⴳ ⵡⴰⴳⵍⴰ ⵏⵏⴻⵙ.
ⵎⴰⵍⴰ ⵢⴰⵔⵥⴻⵎ ⵜⵉⵟⵟⴰⵡⵉⵏ ⵏⵏⴻⵙ, ⵡⴰⵔ ⴷⵉⵏ ⵉⵜⵜⵖⵉⵎⵉ ⵄⴰⴷ ⵡⴰⵍⵓ. ■
20 ⵉⵏⴻⵅⵍⵉⵄⴻⵏ ⴰⴷ ⵜ ⴰⵔⴻⵏⵢⴻⵏ ⴰⵎ ⵉⵖⴻⵥⵔⴰⵏ ⵏ ⵡⴰⵎⴰⵏ,
ⵜⴰⵃⴰⵔⵢⴰⴹⵜ ⴰⴷ ⵜ ⵉ-ⴷⴷ ⵜⴻⵇⴹⴻⵄ ⵙ ⴵⵉⵍⴻⵜ. ■
21 ⴰⵚⴻⵎⵎⵉⴹ ⵥⵉ ⵛⵛⴰⵔⵇ ⴰⴷ ⵜ ⵉⴽⵙⵉ, ⵉⵡⴰ ⴷⵉⵏⵏⵉ ⵉⵜⵜⵔⴰⵃ,
ⴰⴷ ⵜ ⵉ-ⴷⴷ ⵉⵇⵍⴻⵄ ⵥⴻⴳ ⵡⴻⵎⵛⴰⵏ ⵏⵏⴻⵙ.
22 ⴰⵔⴻⴱⴱⵉ ⴰⴷ ⵉⵙⵙⵉⵡⴻⴹ ⵎⴰⵔⵔⴰ ⴰⵢⴰ ⵅ ⵓⵥⴻⴵⵉⴼ ⵏⵏⴻⵙ ⵓ ⵡⴰⵔ ⵅⴰⵙ ⵉⵙⵙⵄⵉⵥⵥⵉ ⵛⴰ.
ⴰⴷ ⵢⴰⵔⵡⴻⵍ ⴷⴻⵖⵢⴰ ⵥⵉ ⵜⴻⵛⵜⵉ ⵏ ⵓⴼⵓⵙ ⵏⵏⴻⵙ.
23 ⵉⵡⴷⴰⵏ ⴰⴷ ⵅⴰⵙ ⵡⵡⵜⴻⵏ ⴷⴻⴳ ⵉⴼⴰⵙⵙⴻⵏ ⵏⵙⴻⵏ ⴰⵎ ⵥⵥⴰⵢⴻⵙ ⵙⵜⵀⴻⵥⵥⴰⵏ
ⵓⵛⴰ ⴰⴷ ⵅⴰⵙ ⴷⴷ-ⵚⴻⴼⴼⴰⵔⴻⵏ ⵥⴻⴳ ⵡⴻⵎⵛⴰⵏ ⵏ ⵜⵥⴻⴷⴷⵉⵖⵜ ⵏⵏⴻⵙ.”