1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ:

2 ⵓⵍⴰ ⴷ ⴰⵙⵙ-ⴰ ⴰⵛⴻⵜⵛⵉ ⵉⵏⵓ ⴷ ⴰⵖⴻⵏⵏⴰⵏ,

ⵉⵙⵙⴻⴷⵇⴻⵍ ⴰⴼⵓⵙ ⵉⵏⵓ ⵅ ⵓⵏⴻⴼⴼⴻⵙ ⵉⵏⵓ.

3 ⵎⵍⵉ ⵙⵙⵏⴻⵖ ⵎⴰⵛⴰ, ⵎⴰⵏⵉ ⵥⴻⵎⵎⴰⵔⴻⵖ ⴰⴷ ⵜ ⴰⴼⴻⵖ,

ⵎⴰⵃⴻⵏⴷ ⴰⴷ ⴰⵡⴹⴻⵖ ⵖⴰⵔ ⵜⵥⴻⴷⴷⵉⵖⵜ ⵏⵏⴻⵙ.

4 ⵅⴻⵏⵏⵉ ⴰⴷ ⴱⴻⵥⵥⵄⴻⵖ ⵥⵥⴰⵜⴻⵙ ⴷⴷⴻⵄⵡⴻⵜ,

ⴰⴷ ⵛⵛⵓⵔⴻⵖ ⴰⵇⴻⵎⵎⵓⵎ ⵉⵏⵓ ⵙ ⵡⴰⵡⴰⵍⴻⵏ ⵉ ⵓⵛⴰⵔⵔⴻⵄ.

5 ⴰⴷ ⵙⵙⵏⴻⵖ ⴰⵡⴰⵍⴻⵏ ⵉ ⵅⴰⴼⵉ ⴷⴷ ⵖⴰ ⵢⴰⵔⵔ,

ⴰⴷ ⴼⴻⵀⵎⴻⵖ ⵎⵉⵏ ⵉ ⴷ ⴰⵢⵉ ⵖⴰ ⵢⵉⵏⵉ.

6 ⵎⴰ ⵉⵜⵜⵅⴻⵚⵚⴰ ⴰⵙ ⴰⴷ ⵉⵎⵛⴰⵔⵔⴻⵄ ⴰⴽⵉⴷⵉ ⵙ ⵊⵊⵀⴻⴷ ⴰⵎⴻⵇⵇⵔⴰⵏ?

ⵍⵍⴰ, ⴻⵊⵊ ⵉ-ⵜ ⴰⴷ ⴰⵢⵉ ⵉⵡⵛ ⵜⴰⵢⵏⵉⵜ ⵡⴰⵀⴰ.

7 ⴷⵉⵏⵏⵉ ⴰⴷ ⴽⵉⴷⴻⵙ ⵉⵎⵛⴰⵔⵔⴻⵄ ⵡⴻⵏⵏⵉ ⵉⵛⵏⴰⵏ,

ⵓ ⵏⴻⵛⵛ ⴰⴷ ⵏⵏⵓⴼⵙⵍⴻⵖ ⵉ ⵍⴻⴱⴷⴰ ⵥⵉ ⵍⵇⴰⴹⵉ ⵉⵏⵓ.

8 ⵎⴰⵛⴰ ⵅⵥⴰⵔ, ⵎⴰⵍⴰ ⵓⵢⵓⵔⴻⵖ ⵖⴰⵔ ⵛⵛⴰⵔⵇ, ⴰⵎⵎⵓ ⵡⴰⵔ ⴷⵉⵏ ⵉⴵⵉ ⵏⴻⵜⵜⴰ,

ⵓ ⵎⴰⵍⴰ ⵓⵢⵓⵔⴻⵖ ⵖⴰⵔ ⵍⵖⴰⵔⴱ, ⴰⵎⵎⵓ ⵡⴰⵔ ⴷ ⴰⵙ ⵜⵜⵃⴻⴽⴽⴰⵔⴻⵖ.

9 ⵎⴰⵍⴰ ⵖⴰⵔⴻⵙ ⵛⵖⴻⵍ ⴷⵉ ⵛⵛⴰⵎⴰⵍ, ⵡⴰⵔ ⵜ ⵜⵜⵡⵉⵍⵉⵖ,

ⵎⴰⵍⴰ ⵉⵏⵏⴻⵇⵍⴻⴱ-ⴷⴷ ⵖⴰⵔ ⵍⵊⴰⵏⵓⴱ, ⵡⴰⵔ ⵜ ⵥⴰⵔⵔⴻⵖ.

10 ⵎⴰⵛⴰ ⵏⴻⵜⵜⴰ ⵉⵙⵙⴻⵏ ⴰⴱⵔⵉⴷ ⵉ ⴳⴳⵓⵔⴻⵖ,

ⵉⵜⵜⵇⴻⴵⴻⴱ ⴰⵢⵉ, ⴰⴷ ⴼⴼⵖⴻⵖ ⴰⵎ ⵡⵓⵔⴻⵖ.

11 ⵉⵎⵏⴻⵄ ⵓⴹⴰⵔ ⵉⵏⵓ ⴷⵉ ⵊⵊⵓⵔⵔⴰⵜ ⵏⵏⴻⵙ,

ⴰⴱⵔⵉⴷ ⵏⵏⴻⵙ ⴹⴼⴰⵔⴻⵖ ⵜ, ⵡⴰⵔ ⵥⵥⴰⵢⴻⵙ ⴼⴼⵉⵖⴻⵖ. ^■  

12 ⵜⴰⵡⵚⵉⵢⵢⴻⵜ ⵥⴻⴳ ⵓⵇⴻⵎⵎⵓⵎ ⵏⵏⴻⵙ ⵡⴰⵔ ⵥⵥⴰⵢⴻⵙ ⴰⵔⵅⵓⵖ.

ⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵏⵏⴻⵙ ⵅⴻⵎⵎⵍⴻⵖ ⵜⴻⵏ ⵎⴰⵀⵓ ⵎⵉⵏ ⵅⴻⴼ ⵜⵜⵡⴰⵡⴻⵚⵚⵉⵖ.

13 ⵎⴰⵛⴰ ⵎⴰⵍⴰ ⵏⴻⵜⵜⴰ ⴹⵉⴷⴷ ⵏ ⵛⴰ ⵏ ⵢⵉⵊⵊⴻⵏ, ⵎⴰⵏ ⵡⴻⵏ ⵉ ⵜ ⵖⴰ ⵉⵎⴻⵏⵄⴻⵏ ⵥⵉ ⵎⴰⵏ ⴰⵢⴰ?

ⵎⵉⵏ ⵉⵅⵙ ⵍⴻⵄⵎⴰⵔ ⵏⵏⴻⵙ, ⴰⴷ ⵜ ⵢⴻⴳⴳ. ^■  

14 ⵎⴰⵖⴰⵔ ⵏⴻⵜⵜⴰ ⵉⵙⵙⴻⵇⴼⴰⵍ ⵎⵉⵏ ⵉ ⴷ ⴰⵢⵉ ⵢⵓⵔⴰ,

ⵓ ⴰⵇⴰ ⴷⵉⵏ ⴰⵟⵟⴰⵙ ⵏ ⵜⵎⴻⵙⵍⴰⵢⵉⵏ ⴰⵎ ⵜⵉⵏⴰ ⵖⴰⵔⴻⵙ ⴷⵉ ⵍⴱⴰⵍ.

15 ⵙ ⵓⵢⴰ ⵜⵜⵏⴻⵅⵍⴰⵄⴻⵖ ⵥⵥⴰⵜ ⵉ ⵓⵖⴻⵎⴱⵓⴱ ⵏⵏⴻⵙ,

ⴰⵇⴰ ⴼⴻⵀⵎⴻⵖ ⵜⵜ ⵎⵍⵉⵃ, ⵓ ⵜⵜⴻⴳⴳⵯⴻⴷⴻⵖ ⵥⵥⴰⵢⴻⵙ.

16 ⵎⴰⵖⴰⵔ ⴰⵔⴻⴱⴱⵉ ⵉⵙⵙⴻⴼⵛⵉⵍ ⵓⵍ ⵉⵏⵓ,

ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⵉⵙⵙⵏⴻⵅⵍⴰⵄ ⴰⵢⵉ.

17 ⵎⴰⵖⴰⵔ ⵡⴰⵔ ⵜⵜⵏⴻⵅⵍⵉⵄⴻⵖ ⵥⵉ ⵜⴰⴵⴻⵙⵜ,

ⵓⵍⴰ ⵥⴻⴳ ⵡⵓⴷⴻⵎ ⵉⵏⵓ ⵏⵏⵉ ⵉⵜⵜⵍⴻⵃⵃⴻⴼ ⵙ ⵜⵓⴱⴱⴰⵔⵛⴻⵏⵜ.