ⴰⵢⵓⴱ ⵉⵙⵙⴻⵇⵙⴰ ⵉⵍⵉⴼⴰⵥ ⵅ ⵎⵉⵏ ⵜ ⵉⵛⵇⴰⵏ ⵉ ⴰⵔⴻⴱⴱⵉ ⵉⵏⵏⵉ ⵉⵜⵜⵡⴰⵃⵚⴰⵔⴻⵏ
24
1 ⵎⴰⵢⴻⵎⵎⵉ ⵡⴰⵔ ⵜⵜⵡⴰⵅⴻⵎⵎⵍⴻⵏⵜ ⵍⵎⵉⵊⴰⵍⴰⵜ ⵏ ⵓⵅⴻⴵⴻⵚ ⵥⴻⴳ ⵡⴻⵏⵏⵉ ⵉⴵⴰⵏ ⴷ ⴰⵎⵥⴻⵎⵎⴰⵔ ⵅ ⴽⵓⵍⵛⵉ,
ⵓ ⵉⵏⵏⵉ ⵜ ⵉⵙⵙⵏⴻⵏ,
ⵎⴰⵢⴻⵎⵎⵉ ⵅⴻⵏⵏⵉ ⵡⴰⵔ ⵜⵜⵡⵉⵍⵉⵏ ⵓⵙⵙⴰⵏ ⵏⵏⴻⵙ ⵏ ⵏⵏⴻⵇⵎⴻⵜ?
2 ⵏⵉⵜⵏⵉ ⵙⵙⵎⵓⵟⵟⵓⵢⴻⵏ ⵍⴻⵀⴷⵓⴷ,
ⵜⵜⴰⵛⴰⵔⴻⵏ ⵜⴰⵃⵉⵎⴰⵔⵜ ⵓⵛⴰ ⴰⵔⴻⴽⴽⵡⵙⴻⵏ ⵜⵜ. ■
3 ⴰⵖⵢⵓⵍ ⵏ ⵉⵢⵓⵊⵉⵍⴻⵏ ⵙⵙⴰⴳⴳⵯⴰⵊⴻⵏ ⵜ,
ⵜⵜⵃⴻⵡⵡⵙⴻⵏ ⴰⴼⵓⵏⴰⵙ ⵏ ⵜⴰⵊⵊⴰⵞ.
4 ⵏⵉⵜⵏⵉ ⵄⴰⵔⵔⵏⴻⵏ ⵉⵎⴻⵥⵍⴰⴹ ⵥⴻⴳ ⵡⴻⴱⵔⵉⴷ.
ⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⴷⵉ ⵜⴻⵎⵎⵓⵔⵜ ⵜⵜⵏⵓⴼⴼⴰⵔⴻⵏ ⵊⵎⵉⵄ. ■
5 ⵅⵥⴰⵔ, ⴰⵇⴰ ⴰⵜⴻⵏ ⴰⵎ ⵉⵖⵢⴰⵍ ⵏ ⵍⴻⵅⵍⴰ.
ⵜⵜⴻⴼⴼⵖⴻⵏ ⵖⴰⵔ ⵍⵅⴻⴷⵎⴻⵜ ⵏⵙⴻⵏ, ⴰⵔⴻⵥⵥⵓⵏ ⵜⴰⵏⴻⵢⵎⴰⵔⵜ.
ⵍⴻⵅⵍⴰ ⵉⵡⵛⴰ ⴰⵙ ⵎⴰⵛⵛⴰ ⵉ ⵉⵃⴻⵏⵊⵉⵔⴻⵏ ⵏⵙⴻⵏ.
6 ⴷⴻⴳ ⵉⵢⵢⴰⵔ ⵃⴻⵜⵜⵛⴻⵏ ⵍⴻⵃⵜⵉⵛ ⵏⵏⴻⵙ,
ⵍⴻⵇⵇⴹⴻⵏ ⴷⴻⴳ ⵉⵎⴰⵔⵊⴰⵄⴻⵏ ⵏ ⵓⴹⵉⵍ ⵏ ⵉⵄⴻⴼⴼⴰⵏⴻⵏ.
7 ⵙⵙⵄⴻⴷⴷⵓⵏ ⴵⵉⵍⴻⵜ ⴷ ⵉⵄⴰⵔⵢⴰⵏⴻⵏ, ⵏⵀⵍⴰ ⴰⵔⵔⵓⴹ,
ⵡⴰⵔ ⵖⴰⵔⵙⴻⵏ ⴱⵓ ⴷⴷⵓⵔⵉ ⴷⵉ ⵜⴻⵚⵎⴻⴹ.
8 ⵣⴻⴳ ⵡⴻⵏⵥⴰⵔ ⵉⵛⵛⴰⵜⴻⵏ ⵥⴻⴳ ⵉⴷⵓⵔⴰⵔ ⵜⵜⵓⴼⴼⴻⵏ,
ⵜⵜⵛⴻⴱⴱⴰⵔⴻⵏ ⴷⵉ ⵊⵊⴰⵔⴼ ⵎⴰⵖⴰⵔ ⵡⴰⵔ ⵖⴰⵔⵙⴻⵏ ⴰⴷⵓⵔⵔⵉ.
9 ⵣⴻⴳ ⵉⴼⴼⴰⵏ ⵏ ⵢⴻⵎⵎⴰⵜⵙⴻⵏ ⵜⵜⴻⴽⴽⵙⴻⵏ ⴰⵢⵓⵊⵉⵍ,
ⵓⵛⴰ ⵜⵜᵉⵟⵟⴼⴻⵏ ⴰⴹⵎⴰⵏ ⵥⴻⴳ ⵓⵎⴻⵥⵍⵓⴹ.
10 ⴳⴳⵓⵔⴻⵏ ⴷ ⵉⵄⴰⵔⵢⴰⵏⴻⵏ, ⵏⵀⵍⴰ ⴰⵔⵔⵓⴹ,
ⴰⵎ ⴵⵓⵥⴻⵏ ⴰⵔⴻⴱⴱⵓⵏ ⵉⵛⴻⵡⵡⴰⴼⴻⵏ ⵏ ⵉⵎⴻⵏⴷⵉ. ■
11 ⵊⴰⵔ ⵍⴻⵃⵢⵓⴹ ⵜⵜⵄⴻⵙⵙⴰⵔⴻⵏ ⵥⵥⴻⵛⵜ,
ⵄⴻⴼⴼⵙⴻⵏ ⵅ ⵜⵙⵉⵔⵜ ⵏ ⵓⴹⵉⵔ, ⵡⴰⵅⵅⴰ ⴰⵎⴻⵏⵏⵉ ⵎⴰⵛⴰ ⴼⴼⵓⴷⴻⵏ. ■
12 ⵣⵉ ⵜⴻⵏⴷⵉⵏⵜ ⵉⵜⵜⴻⴼⴼⴻⵖ-ⴷⴷ ⵍⵃⴻⵙⵙ ⵏ ⵓⵙⴻⵖⵏⴻⴼ ⵏ ⵢⴻⵔⵢⴰⵥⴻⵏ,
ⵍⴻⵄⵎⴰⵔ ⵏ ⵢⵉⵏⵏⵉ ⵉⵙⵙⵓⴼⴼⵖⴻⵏ ⴱⵓⵃⴱⴻⵍ ⵉⵙⵖⵓⵢⵢⵓ ⴷⴻⴳ ⵓⵊⴻⵏⵏⴰ.
ⵡⴰⵅⵅⴰ ⴰⵎⴻⵏⵏⵉ ⴰⵔⴻⴱⴱⵉ ⵡⴰⵔ ⵉⵃⴻⵟⵟⵉ ⵎⵉⵏ ⵡⴰⵔ ⵉⵃⵍⵉⵏ.
13 ⵉⵏⵏⴻⵖⵏⵉ ⴷ ⵉⵎⵖⴻⵡⵡⵖⴻⵏ ⵅ ⵜⴼⴰⵡⵜ,
ⵡⴰⵔ ⵙⵙⵉⵏⴻⵏ ⵉⴱⵔⵉⴷⴻⵏ ⵏⵏⴻⵙ,
ⵡⴰⵔ ⵜⵜⵖⵉⵎⵉⵏ ⴷⵉ ⵜⵉⴱⵔⵉⴷⵉⵏ ⵏⵏⴻⵙ.
14 ⵇⴱⴻⵍ ⵎⴰ ⴷⴷ-ⵜⴰⵙ ⵜⴼⴰⵡⵜ, ⵉⵜⵜⴻⴽⴽⴰⵔ ⵓⵎⴻⵏⵖⵉ,
ⵉⵏⴻⵇⵇ ⵍⵎⴻⵙⴽⵉⵏ ⴷ ⵓⵎⴻⵥⵍⵓⴹ,
ⵓ ⴷⵉ ⴵⵉⵍⴻⵜ ⵉⴳⴳⴰ ⴰⵎ ⵓⵅⴻⵡⵡⴰⵏ. ■
15 ⵜⵉⵟⵟ ⵏ ⵓⵥⴻⵏⵏⴰⵢ ⵜⵃⴻⵟⵟⴰ ⵜⴰⴵⴻⵙⵜ.
ⵉⵇⵇⴰⵔ: ‘ⵓⵍⴰ ⴷ ⵉⵛⵜ ⵏ ⵜⵉⵟⵟ ⵡⴰⵔ ⴷ ⴰⵢⵉ ⵜⵃⴻⵟⵟⵉ!’
ⵉⵍⴻⵃⵃⴻⴼ ⵉ ⵓⵖⴻⵎⴱⵓⴱ ⵏⵏⴻⵙ. ■
16 ⴷⵉ ⵜⴰⴵⴻⵙⵜ ⵜⵜⴰⴷⴼⴻⵏ ⵖⴰⵔ ⵜⵓⴷⵔⵉⵏ.
ⵙ ⵡⴰⵙⵙ ⵜⵜⵏⵓⴼⴼⴰⵔⴻⵏ,
ⵡⴰⵔ ⵙⵙⵉⵏⴻⵏ ⵡⴰⵍⵓ ⵅ ⵜⴼⴰⵡⵜ. ■
17 ⵎⴰⵖⴰⵔ ⵜⵓⴼⴼⵓⵜ ⵜⴱⴰⵏ ⴰⵙⴻⵏ-ⴷⴷ ⴰⵎ ⵜⵉⵍⵉ ⵏ ⵍⵎⴻⵡⵜ,
ⵎⴰⵖⴰⵔ ⵙⵙⵏⴻⵏ ⵉⵏⴻⵅⵍⵉⵄⴻⵏ ⵏ ⵜⵉⵍⵉ ⵏ ⵍⵎⴻⵡⵜ.
18 ⴰⵎ ⵓⴽⵓⴼⴼⵓ ⵅ ⵡⵓⴷⴻⵎ ⵏ ⵡⴰⵎⴰⵏ ⵉ ⵢⴻⴵⴰ.
ⵜⴻⵜⵜⵡⴰⵏⵄⴻⵍ ⵜⴻⵙⵖⴰⵔⵜ ⵏⵙⴻⵏ ⵅ ⵜⴻⵎⵎⵓⵔⵜ.
ⵡⴰⵔ ⵉⵜⵜⴻⵟⵟⴻⴼ ⵄⴰⴷ ⴰⴱⵔⵉⴷ ⵖⴰⵔ ⵉⵎⴰⵔⵊⴰⵄⴻⵏ ⵏ ⵓⴹⵉⵍ.
19 ⵍⴰⵥⴰⵖ ⴷ ⵍⴻⵃⵎⵓ ⵇⴻⵟⵟⴰⵏ ⵅ ⵡⴰⵎⴰⵏ ⵏ ⵡⴻⴷⴼⴻⵍ,
ⴰⵎⵎⵓ ⵉ ⵜᵉⵜⵜⴻⴽⴻⵙ ⵍⴰⵅⴰⵔⵜ ⵓⵍⴰ ⴷ ⵉⵏⵏⵉ ⵉⵅⴹⴰⵏ.
20 ⴰⵄⴻⴷⴷⵉⵙ ⵏ ⵢⴻⵎⵎⴰⵙ ⴰⴷ ⵜ ⵉⵜⵜⵓ,
ⵉⴽⴻⵛⵛⴰⵡⴻⵏ ⴰⴷ ⵥⵥⴰⵢⴻⵙ ⴰⵔⵔⴻⵏ ⵎⴻⵥⵔⵉ.
ⵄⴻⵎⵎⴰⵔⵚ ⵡⴰⵔ ⵜ ⵜⵜⵉⴷⴰⵔⴻⵏ ⵄⴰⴷ.
ⵉⵜⵜⵡⴰⵔⵥ ⵍⵖⴻⵛⵛ ⴰⵎ ⵉⵛⵜ ⵏ ⵜⴼⵔⴻⵡⵜ ⵏ ⵓⴽⴻⵛⵛⵓⴹ,
21 ⴰⵎⵎⵓ ⵉ ⵉⵜⵜⵡⴰⵔⵥ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ ⴷⵉ ⵜⴻⵎⵖⴰⵔⵜ ⴱⵍⴰ ⵜⴰⵔⵡⴰ,
ⴷⵉ ⵜⴻⵏⵏⵉ ⵡⴰⵔ ⵉⵜⵜⵉⵔⵡⴻⵏ,
ⵓⵍⴰ ⴷ ⵡⴻⵏⵏⵉ ⵡⴰⵔ ⵉⵜⵜⴻⴳⴳⴻⵏ ⵎⵉⵏ ⵉⵚⴻⴱⵃⴻⵏ ⴰⴽ-ⴷ ⵜⴰⵊⵊⴰⵞ.
22 ⵙ ⵊⵊⴻⵀⴷ ⵏⵏⴻⵙ ⵉⵙⵙⴱⴻⴷⴷⴰ ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ.
ⵎⴰⵍⴰ ⵉⴽⴽⴰⵔ ⵡⴰⵏⵉⵜⴰ, ⵡⴰⵔ ⵉⵙⵙⵉⵏ ⵏⵉⵛⴰⵏ ⴰⵇⴰ ⵜⵓⴷⴰⵔⵜ ⵏⵏⴻⵙ ⴷⵉ ⵍⴰⵎⴰⵏ,
23 ⵎⴰⵛⴰ ⵏⴻⵜⵜⴰ ⵉⵡⵛⴰ ⴰⵙ ⵍⴰⵎⴰⵏ, ⴰⵍⴰⵎⵉ ⵖⴰⵔⴻⵙ ⴷⴷ-ⵜⵓⴷⴻⴼ ⵜⵜⵉⵇⵇⴻⵜ,
ⵄⴰⴷ ⵜⵉⵟⵟⴰⵡⵉⵏ ⵏⵏⴻⵙ ⴰⵇⴰ ⴰⵜⴻⵏⵜ ⵅ ⵡⴻⴱⵔⵉⴷ ⵏⵙⴻⵏ.
24 ⵜⵜⵡⴰⵙⵙⵓⵄⵍⴰⵏ ⵉ ⵢⵉⵊⵊ ⵏ ⵍⵃⴰⵍ ⴷ ⴰⵇⵓⴹⴰⴹ, ⵅⴻⵏⵏⵉ ⵡⴰⵔ ⴵⵉⵏ ⵄⴰⴷ.
ⴰⴷ ⵀⵡⴰⵏ, ⴰⴷ ⵜⵜⵡⴰⴽⴽⵙⴻⵏ ⴰⵎ ⵎⴰⵔⵔⴰ ⵉⵡⴷⴰⵏ,
ⴰⵎ ⵉⵅⴼⴰⵡⴻⵏ ⵏ ⵜⵉⴷⵔⵉⵏ ⴰⴷ ⵜⵜⵡⴰⵇⴻⵙⵙⴻⵏ.
25 ⵎⴰ ⵡⴰⵔ ⵉⴵⵉ ⴰⵎⴻⵏⵏⵉ?!! ⵎⴰⵏ ⵡⴻⵏ ⵉ ⴷ ⴰⵢⵉ ⵖⴰ ⵉⵟⵟⴼⴻⵏ ⵉⵅⴰⵔⵔⵉⵇⴻⵏ,
ⵎⴰⵏ ⵡⴻⵏ ⵉ ⵖⴰ ⵉⵙⵙⴻⴱⴹⴻⵍ ⵍⵀⴰⵔⴹ ⵉⵏⵓ?