ⵍⵀⴰⵔⴷ ⵡⵉⵙⵙ ⵜⵍⴰⵜⴰ ⵏ ⵉⵍⵉⴼⴰⵥ ⵅ ⴷⴷⴻⵏⴱ ⴷ ⵡⴻⴷⵡⴰⵍ ⵖⴰⵔ ⴰⵔⴻⴱⴱⵉ
22
1 ⵅⴻⵏⵏⵉ ⵢⴰⵔⵔⴰ-ⴷⴷ ⵉⵍⵉⴼⴰⵥ, ⵡⴻⵏⵏⵉ ⴷⴷ-ⵢⵓⵙⵉⵏ ⵥⵉ ⵜⴰⵢⵎⴰⵏ, ⵉⵏⵏⴰ: 2 ⵎⴰ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⵉⵏⴼⴻⵄ ⴰⵔⴻⴱⴱⵉ?
ⵡⴻⵏⵏⵉ ⵉⴳⴳⵉⵏ ⵙ ⵍⴻⵄⵇⴻⵍ ⵉⵏⴻⴼⴼⴻⵄ ⵎⵖⵉⵔ ⵉ ⵢⵉⵅⴻⴼ ⵏⵏⴻⵙ.
3 ⵎⴰ ⴰⵇⴰ-ⵜ ⴷ ⵍⴼⴰⵢⴷⴰ ⵉ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⴰⵇⴰ ⵛⴻⴽ ⵜⵙⴻⴳⴳⴷⴻⴷ,
ⵏⵉⵖ ⴷ ⵍⴻⴼⴹⴻⵍ ⵎⴰⵍⴰ ⵛⴻⴽ ⵜⴻⴳⴳⵓⵔⴻⴷ ⴷⴻⴳ ⵉⴱⵔⵉⴷⴻⵏ ⵏⵏⴻⴽ ⵙ ⵍⴻⵚⴼⴰⵢⴻⵜ?
4 ⵎⴰ ⵉⵡⵜⵉ ⵉ ⵛⴻⴽ ⵥⵉ ⵙⵙⵉⴱⴱⴻⵜ ⵏ ⵜⵉⴳⴳⵯⵓⴷⵉ ⵏⵏⴻⴽ ⵥⵥⴰⵢⴻⵙ,
ⵏⵉⵖ ⴰⴷ ⵢⴰⴷⴻⴼ ⴰⴽⵉⴷⴻⴽ ⵖⴰⵔ ⵜⴰⴷⴷⴰⵔⵜ ⵏ ⵛⵛⵔⴻⵄ?
5 ⵎⴰ ⵡⴰⵔ ⵜⴻⴵⵉ ⵜⵓⵄⴻⴼⴼⵏⴰ ⵏⵏⴻⴽ ⴷ ⵜⴰⵎⴻⵇⵇⵔⴰⵏⵜ,
ⵓ ⵍⵎⵓⵄⵚⵉⵢⵢⴰⵜ ⵏⵏⴻⴽ ⵎⴰ ⵡⴰⵔ ⴵⵉⵏⵜ ⵏⵀⵍⴰ ⴰⵙⴱⴻⴷⴷⵉ?
6 ⵎⴰⵖⴰⵔ ⵜⵃⴻⵡⵡⵙⴻⴷ ⴷⴷⵉⵢⵢⴻⵜ ⵥⴻⴳ ⴰⵢⵜⵎⴰⵛ ⴱⴰⵟⴻⵍ,
ⵓ ⵜⴻⴽⴽⵙⴻⴷ ⵉ ⵢⴻⵏⵏⵉ ⵙ ⴷⵔⵓⵙ ⵏ ⵡⴻⵔⵔⵓⴹ ⵡⴰⵀⴰ ⴰⵔⵔⵓⴹ ⵏⵙⴻⵏ. ■
7 ⵡⴻⵏⵏⵉ ⵢⵓⵃⵍⴻⵏ ⵡⴰⵔ ⴷ ⴰⵙ ⵜⴻⵡⵛⵉⴷ ⴰⴷ ⵉⵙⵓ,
ⵡⴻⵏⵏⵉ ⵉⴵⵓⵥⴻⵏ ⵜⵇⴻⴹⵄⴻⴷ ⴰⵙ ⴰⵖⵔⵓⵎ.
8 ⵎⴰⵛⴰ ⵎⴰⵍⴰ ⴷⵉⵏ ⴰⵔⵢⴰⵥ ⵙ ⵓⵖⵉⵍ ⵉⵊⵀⴻⴷ, ⵅⴻⵏⵏⵉ ⵜⴰⵎⵎⵓⵔⵜ ⴰⵇⴰ-ⵜⵜ ⵉ ⵡⴰⵏⵉⵜⴰ,
ⵓⵛⴰ ⴰⴷ ⴷⴰⵢⴻⵙ ⵉⵥⴷⴻⵖ ⵛⴰ ⵏ ⵡⴻⵔⵢⴰⵥ ⵏ ⵛⵛⴰⵏ.
9 ⵜⵉⵊⵊⴰⵍ ⵜⵙⴻⴽⴽⴻⴷ ⵜⴻⵏⵜ ⵙ ⵉⴼⴰⵙⵙⴻⵏ ⵅⵡⴰⵏ,
ⵉⵖⴰⴵⴻⵏ ⵏ ⵓⵢⵓⵊⵉⵍ ⵜⵜⵡⴰⵍⴻⴱⵥⴻⵏ.
10 ⵙ ⵓⵢⴻⵏⵏⵉ ⵏⵏⴹⴻⵏⵜ ⴰⵛ ⵜⵅⴻⵛⴼⵉⵏ,
ⵓⵛⴰ ⵜⴻⵡⴹⴰⴷ-ⴷⴷ ⵅⴰⴽ ⵜⵉⴳⴳⵯⵓⴷⵉ.
11 ⵏⵉⵖ ⵡⴰⵔ ⵜᵉⵜⵜⵡⵉⵍⵉⴷ ⵜⴰⴵⴻⵙⵜ,
ⴷ ⵍⵃⴻⵎⵍⴻⵜ ⵏ ⵡⴰⵎⴰⵏ ⵏⵏⵉ ⵛⴻⴽ ⵢⴻⴷⵍⵉⵏ?
12 ⵎⴰ ⵡⴰⵔ ⵉⴵⵉ ⴰⵔⴻⴱⴱⵉ ⵢⵓⵄⵍⴰ ⴷⴻⴳ ⵓⵊⴻⵏⵏⴰ?
ⵅⵥⴰⵔ ⵉⵜⵔⴰⵏ ⵏⵏⵉ ⵉⴵⴰⵏ ⵙⴻⵏⵏⴻⵊ ⵇⴰⵄ, ⵎⴰⵎⵎⴻⵛ ⵄⵓⴵⴻⵏ!
13 ⵎⴰⵛⴰ ⵜⴻⵇⵇⴰⵔⴻⴷ: ‘ⵎⵉⵏ ⵉⵙⵙⴻⵏ ⴰⵔⴻⴱⴱⵉ?
ⵎⴰ ⵉⵥⴻⵎⵎⴰⵔ ⴰⴷ ⵉⵃⴽⴻⵎ ⵏⵉⵛⴰⵏ ⵥⴻⴳ ⵓⵙⴻⵢⵏⵓ ⵉⴱⴱⵓⵎⴱⵙⴻⵏ?
14 ⵉⵙⴻⵢⵏⵓⵜⴻⵏ ⴷ ⴰⵍⴻⵃⵃⴻⴼ ⵉ ⵏⴻⵜⵜⴰ ⴰⵍⴰⵎⵉ ⵡⴰⵔ ⵉⵜⵜⵡⵉⵍⵉ,
ⵓ ⵅ ⵍⵇⵓⴱⴱⴻⵜ ⵏ ⵓⵊⴻⵏⵏⴰ ⵉⴳⴳⵓⵔ ⵏⴻⵜⵜⴰ.’
15 ⵎⴰ ⵜⴻⵅⵙⴻⴷ ⴰⴷ ⵜⴻⴹⴼⴰⵔⴻⴹ ⴰⵎⴻⵙⵔⵓⵇ ⵏ ⵡⴻⵛⵃⴰⵍ ⵓⵢⴰ,
ⴰⵎⴻⵙⵔⵓⵇ ⵏⵏⵉ ⴽⴽⵉⵏ ⵢⴻⵔⵢⴰⵥⴻⵏ ⵉⵛⵛⵓⵔⴻⵏ ⵙ ⵍⵎⵓⵄⵚⵉⵢⵢⴻⵜ,
16 ⵉⵏⵏⵉ ⵉⵜⵜⵡⴰⴽⴽⵙⴻⵏ ⴰⵎ ⵡⴰⵔ ⴷⴷ-ⵢⵉⵡⵉⴹ ⵄⴰⴷ ⵍⵎⵉⵊⴰⵍ ⵏⵙⴻⵏ,
ⵓⵎⵉ ⵜⴼⴻⵢⵢⴻⴹ ⵍⵃⴻⵎⵍⴻⵜ ⴷⵙⴰⵙ ⵏⵙⴻⵏ,
17 ⵉⵏⵏⵉ ⵉⵏⵏⴰⵏ ⵉ ⴰⵔⴻⴱⴱⵉ: ‘ⴰⴳⴳⵯⴻⵊ ⵅⴰⵏⴻⵖ!’
ⵎⵉⵏ ⵉⵥⴻⵎⵎⴰⵔ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⴰⴷ ⵢⴻⴳⴳ ⵄⴰⴷ ⵉ ⵏⵉⵜⵏⵉ? ■
18 ⵉⵡⴰ, ⵡⴰⵅⵅⴰ ⵏⴻⵜⵜⴰ ⵉⵛⵛⵓⵔ ⵜⵓⴷⵔⵉⵏ ⵏⵙⴻⵏ ⵙ ⵍⵅⴰⵔ!
ⵛⵛⵡⴰⵔ ⵏ ⵉⵄⴻⴼⴼⴰⵏⴻⵏ ⵉⴳⴳⵯⴻⵊ ⵅⴰⴼⵉ. ■
19 ⵥⵔⵉⵏ ⵜ ⵉⵎⵙⴻⴳⴳⴰⴷⴻⵏ ⵓⵛⴰ ⴼⴰⵔⵃⴻⵏ,
ⴰⵎⴻⵥⴷⴰⴳ ⵉⵙⵜⴻⵀⵥⴰ ⵥⵥⴰⵢⵙⴻⵏ. ■
20 ‘ⴰⵖⵔⵉⵎ ⵏⵏⴻⵖ ⵉⵜⵜⵡⴰⴽⴻⵃⵃⴻⴹ,
ⵓ ⵎⵉⵏ ⵥⵥⴰⵢⵙⴻⵏ ⵉⵇⵇⵉⵎⴻⵏ ⵜⴻⵛⵛⴰ ⵉ-ⵜ ⵜⵎⴻⵙⵙⵉ.’
21 ⵇⵇⴻⵏ ⵖⴰⵔⴻⵙ, ⴰⴷ ⵖⴰⵔⴻⴽ ⵜⵉⵍⵉ ⵍⵀⵓⴷⵏⴻⵜ,
ⵙ ⵓⵢⴰ ⴰⴷ ⵖⴰⵔⴻⴽ ⴷⴷ-ⵢⴰⵙ ⵎⵉⵏ ⵉⵚⴻⴱⵃⴻⵏ.
22 ⴽⵙⵉ ⵅⴻⵏⵏⵉ ⵜⴰⵖⵓⵔⵉ ⵥⴻⴳ ⵓⵇⴻⵎⵎⵓⵎ ⵏⵏⴻⵙ,
ⴻⴳⴳ ⴰⵡⴰⵍⴻⵏ ⵏⵏⴻⵙ ⴷⴻⴳ ⵡⵓⵍ ⵏⵏⴻⴽ.
23 ⵎⴰⵍⴰ ⵜⴷⴻⵡⵍⴻⴷ-ⴷⴷ ⵖⴰⵔ ⵓⵎⵥⴻⵎⵎⴰⵔ ⵅ ⴽⵓⵍⵛⵉ, ⴰⴷ ⵜ˚ⵜⵜᵉⵡⴰⵙⴱⴻⴷⴷⴻⴷ.
ⵙⵉⴳⴳⵯⴻⵊ ⵎⵉⵏ ⵡⴰⵔ ⵉⵙⴻⴳⴳⴷⴻⵏ ⵅ ⵜⵇⵉⴹⵓⵏⵉⵏ ⵏⵏⴻⴽ. ■
24 ⵙⴰⵔⵙ ⵓⵔⴻⵖ ⵉⵇⵇⵓⵔⴻⵏ ⴷⴻⴳ ⵓⵛⴰⵍ,
ⵓⵔⴻⵖ ⵥⵉ ⵓⴼⵉⵔ ⵊⴰⵔ ⵉⵥⵔⴰ ⵏ ⵜⵖⴻⵥⵔⴰⵜⵉⵏ.
25 ⵅⴻⵏⵏⵉ ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⴰⴷ ⵢⵉⵍⵉ ⴷ ⵡⵓⵔⴻⵖ ⵉⵇⵇⵓⵔⴻⵏ ⵏⵏⴻⴽ,
ⵓⵍⴰ ⴷ ⵉⴷⵓⵔⴰⵔ ⵏⵏⴻⴽ ⵏ ⵏⵏⵓⵇⴰⵔⵜ!
26 ⵎⴰⵖⴰⵔ ⵅⴻⵏⵏⵉ ⴰⴷ ⵜⴼⴰⵔⵃⴻⴹ ⵥⴻⴳ ⵓⵎⵥⴻⵎⵎⴰⵔ ⵅ ⴽⵓⵍⵛⵉ,
ⵓ ⵖⴰⵔ ⴰⵔⴻⴱⴱⵉ ⴰⴷ ⵜⴻⵙⵙⴳⴻⵄⵄⴷⴻⴷ ⴰⵖⴻⵎⴱⵓⴱ ⵏⵏⴻⴽ.
27 ⴰⴷ ⴰⵙ ⵜᵉⵜⵜⴰⵔⴻⴷ ⵙ ⵜⵥⴰⴵⵉⵜ ⵢⵓⴵⵖⴻⵏ
ⵓ ⵏⴻⵜⵜⴰ ⴰⴷ ⴰⵛ ⵉⵙⴻⵍ ⵓ ⵛⴻⴽ ⴰⴷ ⵜⴽⴻⵎⵎⵍⴻⴷ ⵍⵡⵓⵄⵓⴷ ⵏⵏⴻⴽ.
28 ⵎⴰⵍⴰ ⵜⴻⴽⴽⵙⴻⴷ ⴰⵡⴰⵍ, ⵅⴻⵏⵏⵉ ⴰⴷ ⴰⵛ ⴷⴷ-ⵜⴻⴼⴼⴻⵖ ⵜⵎⴻⵙⵍⴰⵛⵜ,
ⵓ ⵜⴰⴼⴰⵡⵜ ⴰⴷ ⵜⴰⵔⴻⵖ ⴷⴻⴳ ⵉⴱⵔⵉⴷⴻⵏ ⵏⵏⴻⴽ.
29 ⵎⴰⵍⴰ ⵛⴻⴽ ⵙⵙⴻⵀⵡⴰⵏ ⵏⵉⵜⵏⵉ, ⴰⴷ ⵜⵉⵏⵉⴷ: ‘ⵙⴳⴻⵄⵄⴻⴷ ⴰⵥⴻⴵⵉⴼ ⵏⵏⴻⴽ!’,
ⵏⴻⵜⵜⴰ ⴰⴷ ⵉⵙⵙⴻⵏⵊⴻⵎ ⵡⴻⵏⵏⵉ ⵉⵙⵙⵀⴻⴽⴽⵡⴰⵏ ⵜⵉⵟⵟⴰⵡⵉⵏ ⵏⵏⴻⵙ. ■
30 ⵏⴻⵜⵜⴰ ⴰⴷ ⵉⵙⵙⴻⵏⵊⴻⵎ ⵡⴻⵏⵏⵉ ⵡⴰⵔ ⵉⴵⵉⵏ ⴱⵍⴰ ⵍⵄⵉⴱ,
ⵎⵉⵏⵥⵉ ⵏⴻⵜⵜⴰ ⴰⴷ ⵉⵏⵊⴻⵎ ⵙ ⵜⴻⵥⴷⵓⴳⵉ ⵏ ⵉⴼⴰⵙⵙⴻⵏ ⵏⵏⴻⴽ!