ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⵚⵓⴼⴰⵔ: ⵍⴻⴼⵍⴻⵃ ⵏ ⵡⴻⵔⵢⴰⵥ ⴰⵄⴻⴼⴼⴰⵏ
21
1 ⵅⴻⵏⵏⵉ ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ: 2 ⵙⵍⴻⵎ ⵎⵍⵉⵃ ⵉ ⵡⴰⵡⴰⵍⴻⵏ ⵉⵏⵓ,
ⵃⵉⵎⴰ ⴰⴷ ⴰⵡⴻⵎ ⵉⵍⵉⵏ ⵉ ⵓⵙⴼⴻⵡⵡⴻⵊ.
3 ⴽⵙⵉⵎ ⴰⵢⵉ, ⵅⴻⵏⵏⵉ ⴰⴷ ⵙⵙⵉⵡⵍⴻⵖ,
ⵓ ⴰⵡⴰⵔⵏⵉ ⵍⴰⵎⵉ ⵙⵙⵉⵡⵍⴻⵖ, ⵅⴻⵏⵏⵉ ⵜⵥⴻⵎⵎⴰⵔⴻⵎ ⴰⴷ ⵜⵄⴻⴼⴼⴰⵔⴻⵎ.
4 ⵅⴰⴼⵉ ⵏⴻⵛⵛ, ⵎⴰ ⴰⵛⴻⵜⵛⵉ ⵉⵏⵓ ⵅ ⵉⵊⵊ ⵏ ⴱⵏⴰⴷⴻⵎ?
ⵏⵉⵖ ⵎⴰⵢⴻⵎⵎⵉ ⵡⴰⵔ ⴷ ⴰⵢⵉ ⴷⴷ-ⵉⴽⴽⴰⵔ ⴰⴷ ⵢⵉⵍⵉ ⴱⵓⵃⴱⴻⵍ ⵉⵏⵓ ⴱⵍⴰ ⵜⵜⴰⵙⵉⵄ ⵏ ⵍⵅⴰⴹⴰⵔ?
5 ⵇⴻⵍⴱⴻⵎ-ⴷⴷ ⵖⴰⵔⵉ ⵓⵛⴰ ⵊⵄⴰⵔⴻⵎ,
ⵙⴰⵔⵙⴻⵎ ⴰⴼⵓⵙ ⵅ ⵓⵇⴻⵎⵎⵓⵎ.
6 ⵎⴰⵍⴰ ⵅⴻⵎⵎⴻⵖ ⵡⴰⵀⴰ ⴷⴻⴳ ⵓⵢⴰ, ⵜⵜⵏⴻⵅⵍⵉⵄⴻⵖ,
ⵓ ⵜⵎⴻⵏⵏⴻⵄ ⵜⴰⵔⵊⵉⵊⵉⵜ ⴰⵔⵔⵉⵎⴻⵜ ⵉⵏⵓ.
7 ⵎⴰⵢⴻⵎⵎⵉ ⵜⵜⵖⵉⵎⴰⵏ ⵉⵄⴻⴼⴼⴰⵏⴻⵏ ⴷⴷⴰⵔⴻⵏ,
ⵎⴰⵢⴻⵎⵎⵉ ⴷⴷⴰⴽⴽⵡⴰⵍⴻⵏ ⵉⵡⴻⵙⵙⵓⵔⴰ, ⵜⵜⵎⴰⵔⵏⵉⵏ ⵄⴰⴷ ⴷⵉ ⵊⵊⴻⵀⴷ ⵏⵙⴻⵏ? ■
8 ⵜⴰⵔⵡⴰ ⵏⵙⴻⵏ ⵜⵜⵖⵉⵎⴰⵏ ⴱⴻⴷⴷⴻⵏ ⵥⵥⴰⵜ ⵉ ⵓⵖⴻⵎⴱⵓⴱ ⵏⵙⴻⵏ, ⴰⵇⴰ ⴰⵜⴻⵏ ⵖⴰⵔⵙⴻⵏ,
ⵓ ⵉⵃⴻⵏⵊⵉⵔⴻⵏ ⵉⵖⴻⴷⴷⵓⵜⴻⵏ ⵏⵙⴻⵏ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ. □
9 ⵜⵓⴷⵔⵉⵏ ⵏⵙⴻⵏ ⴰⵇⴰ ⴰⵜⴻⵏⵜ ⴷⵉ ⵍⴻⵀⵏⴰ ⵏⵀⵍⴰ ⴰⵏⴻⵅⵍⵉⵄ,
ⴰⵄⵎⵓⴷ ⵏ ⴰⵔⴻⴱⴱⵉ ⵡⴰⵔ ⵜⴻⵏ ⵉⵛⵛⵉⵜ.
10 ⴰⴼⵓⵏⴰⵙ ⵏⵏⴻⵙ ⵉⵜⵜⴰⵔⵔⴰ ⵓ ⵡⴰⵔ ⵉⵅⴻⵟⵟⵉ,
ⵜⴰⵢⴻⵏⴷⵓⵥⵜ ⵏⵏⴻⵙ ⵜᵉⵜⵜⴰⵔⵓ ⵓ ⵄⴻⵎⵎⴰⵔⵚ ⵡⴰⵔ ⵜⵖⴻⵟⵟⴻⵍ ⴰⵄⴻⴷⴷⵉⵙ.
11 ⵜⵜⴻⵊⵊⴰⵏ ⵉⵎⴻⵥⵢⴰⵏⴻⵏ ⵏⵙⴻⵏ ⴳⴳⵓⵔⴻⵏ ⴰⵎ ⵉⵛⵜ ⵏ ⵜⵃⵉⵎⴰⵔⵜ,
ⵉⵃⴻⵏⵊⵉⵔⴻⵏ ⵏⵙⴻⵏ ⵜⵜⴻⵊⵊⴰⵏ ⵜⴻⵏ ⵏⴻⴳⴳⵥⴻⵏ.
12 ⵏⵉⵜⵏⵉ ⵙⵙⴳⴻⵄⵄⴰⴷⴻⵏ ⵜⵎⵉⵊⵊⴰ ⵏⵙⴻⵏ ⵖⴰⵔ ⵓⴱⴻⵏⴷⵉⵔ ⴷ ⵍⴳⴰⵎⴱⵔⵉ,
ⵓⵛⴰ ⴼⴰⵔⵔⵃⴻⵏ ⵖⴰⵔ ⵜⵎⵉⵊⵊⴰ ⵏ ⵜⴻⵎⵊⴰ.
13 ⵙⵙⵄⴻⴷⴷⵓⵏ ⵓⵙⵙⴰⵏ ⵏⵙⴻⵏ ⴷⵉ ⵥⵥⵀⴰⵔ,
ⵎⴰⵛⴰ ⵀⴻⴽⴽⵡⴰⵏ ⵖⴰⵔ ⵍⴰⵅⴰⵔⵜ ⴷⴻⴳ ⵡⴻⵔⵎⴰⵛ ⵏ ⵡⴰⴱⵍⵉⵡⴻⵏ.
14 ⵇⵇⴰⵔⴻⵏ ⵉ ⴰⵔⴻⴱⴱⵉ: ‘ⵃⴻⵢⵢⴻⴷ ⵅⴰⵏⴻⵖ,
ⵎⴰⵖⴰⵔ ⵡⴰⵔ ⴷ ⴰⵏⴻⵖ ⵉⵄⵊⵉⴱ ⴰⴷ ⵏⴻⵙⵙⴻⵏ ⵉⴱⵔⵉⴷⴻⵏ ⵏⵏⴻⴽ. ■
15 ⵎⴰⵏ ⵡⴻⵏ ⵉⴵⴰⵏ ⴷ ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⵎⴰⵃⴻⵏⴷ ⵏⴻⵛⵛⵉⵏ ⴰⴷ ⴰⵙ ⵏⵙⴻⵅⵅⴰⵔ?
ⵎⴰⵏ ⵍⴼⴰⵢⴷⴰ ⵉ ⵖⴰⵔⵏⴻⵖ ⵎⴰⵍⴰ ⵏⵥⵉⵢⵢⴰⵔ ⵅⴰⵙ ⵙ ⵜⵥⴰⴵⵉⵜ ⵏⵏⴻⵖ?’ ■
16 ⵅⵥⴰⵔ, ⵥⵥⵀⴰⵔ ⵏⵙⴻⵏ ⵡⴰⵔ ⵉⴵⵉ ⴷⴻⴳ ⵓⴼⵓⵙ ⵏⵙⴻⵏ.
ⵛⵛⵡⴰⵔ ⵏ ⵉⵄⴻⴼⴼⴰⵏⴻⵏ ⵉⴳⴳⵯⴻⵊ ⵅⴰⴼⵉ. ■
17 ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ ⵜⵅⴻⵙⵙⵉ ⵉ ⵉⵄⴻⴼⴼⴰⵏⴻⵏ ⵙ ⵜⵉⴷⴻⵜⵜ ⵜⴼⴰⵡⵜ ⵏⵙⴻⵏ,
ⵓⵛⴰ ⵉⵍⴻⵇⵇⴻⴼ ⵉ-ⵜⴻⵏ ⵓⴹⴻⵢⵢⴻⵄ,
ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ ⵉⴱⴻⵟⵟⴰ ⵏⴻⵜⵜⴰ ⵅⴰⵙⴻⵏ ⵍⴻⵃⵍⵉⵇ ⴷⴻⴳ ⵡⴻⵖⴹⴰⴱ ⵏⵏⴻⵙ, ■
18 ⴰⵍⴰⵎⵉ ⵉ ⵖⴰ ⴷⴻⵡⵍⴻⵏ ⴰⵎ ⵓⵍⵓⵎ ⵥⵥⴰⵜ ⵉ ⵓⵚⴻⵎⵎⵉⴹ,
ⴰⵎ ⵉⵖⴻⴵ ⵜⴻⵅⴹⴻⴼ ⵉ-ⵜ ⵜⵃⴰⵔⵢⴰⴹⵜ?
19 ⵎⴰ ⵜⴻⵇⵇⴰⵔⴻⵎ: ‘ⴰⵔⴻⴱⴱⵉ ⵉⵜⵜⵅⴻⵎⵎⴻⵍ ⵍⵄⵉⵇⴰⴱ ⵉ ⵍⵎⵓⵄⵚⵉⵢⵢⴻⵜ ⵏⵏⴻⵙ ⵉ ⵉⵃⴻⵏⵊⵉⵔⴻⵏ ⵏⵏⴻⵙ!’ ?
ⴻⵊⵊ ⵉ-ⵜ ⴰⴷ ⴰⵙ ⵜⵜ ⵉⵅⴻⴵⴻⵚ ⴰⵍ ⵖⴰ ⵢⴰⵛⴰ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ!
20 ⴻⵊⵊ ⵜⵉⵟⵟⴰⵡⵉⵏ ⵏⵏⴻⵙ ⴰⴷ ⵥⴰⵔⴻⵏⵜ ⴰⵀⴻⵍⵍⴻⴽ ⵏⵏⴻⵙ,
ⴻⵊⵊ ⵉ-ⵜ ⴰⴷ ⵉⵙⵓ ⵙ ⵢⵉⵅⴻⴼ ⵏⵏⴻⴽ ⵥⴻⴳ ⵡⴻⵙⵄⴰⵔ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ.
21 ⵎⴰⵖⴰⵔ ⵎⴰⵎⵎⴻⵛ ⵉ ⵖⴰ ⵉⴼⴰⵔⵃ ⵄⴰⴷ ⴷⵉ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵙ ⴰⵡⴰⵔⵏⵉ ⵉ ⵍⵎⴻⵡⵜ ⵏⵏⴻⵙ,
ⵎⴰⵍⴰ ⵜᵉⵜⵜⵡⴰⴳⴳ ⵄⴰⴷ ⵇⴻⴷⴷⴰ ⵏ ⵉⵢⵓⵔⴻⵏ ⵏⵏⴻⵙ? □
22 ⵎⴰ ⵥⴻⵎⵎⴰⵔⴻⵏ ⴰⴷ ⵙⵙⵍⴻⵎⴷⴻⵏ ⵜⵓⵙⵙⵏⴰ ⵉ ⴰⵔⴻⴱⴱⵉ,
ⵡⴻⵏⵏⵉ ⵉⵃⴻⴽⴽⵎⴻⵏ ⵅ ⵢⴻⵏⵏⵉ ⵉⴵⴰⵏ ⴷⴻⴳ ⵓⵊⴻⵏⵏⴰ ⵢⵓⵄⵍⴰⵏ? ■
23 ⴰⵇⴰ ⴷⵉⵏ ⵉⵊⵊⴻⵏ ⵉⵎⵎⵓⵜ ⴷⵉ ⵥⵥⵀⴰⵔ ⵉⵎⵓⵏ,
ⴰⵎ ⵉⴷⴷⴰⵔ ⵄⴰⴷ ⵇⴰⵄ ⵏⵀⵍⴰ ⴰⵎⵏⵓⵙ ⵓ ⴷⵉ ⵍⵀⵓⴷⵏⴻⵜ.
24 ⴰⵎ ⵄⴻⵎⵎⴰⵔⴻⵏ ⵍⴻⵎⴷⴰⵡⴻⴷ ⵏⵏⴻⵙ ⵙ ⵓⵖⵉ,
ⵓ ⵉⵜⵜⵡⴰⴱⴻⵥⵥⴻⴳ ⵡⴰⴷⵓⴼ ⵏ ⵢⴻⵅⵙⴰⵏ ⵏⵏⴻⵙ.
25 ⵡⴻⵏⵏⴻⵖⵏⵉ ⵉⵎⵎⵓⵜ ⵙ ⵍⴻⵄⵎⴰⵔ ⴷ ⴰⵎⴰⵔⵥⴰⴳ,
ⵡⴰⵔ ⴷⴷ-ⵢⵉⵡⵉ ⵍⵉⵇⵇⵉ ⵉ ⵡⴰⵍⵓ ⵏ ⵍⵅⴰⵔ.
26 ⵎⵓⵏⴻⵏ ⵥⵥⵍⴻⵏ ⵏⵉⵜⵏⵉ ⴷⴻⴳ ⵓⵛⴰⵍ,
ⵓ ⵉⴽⴻⵛⵛⴰⵡⴻⵏ ⴷⵍⵉⵏ ⵜⴻⵏ. ■
27 ⵅⵥⴰⵔ, ⵙⵙⵏⴻⵖ ⵉⵅⴰⵔⵔⵉⵚⴻⵏ ⵏⵡⴻⵎ,
ⵓⵍⴰ ⴷ ⵜⵉⵎⴻⵄⵎⴰⵞ ⵏⵏⵉ ⵥⵉ ⴷ ⴰⵢⵉ ⵜⴷⴻⵍⵎⴻⵎ,
28 ⵅⵎⵉ ⵜⴻⵇⵇⴰⵔⴻⵎ: ‘ⵎⴰⵏⵉ ⵜⴻⴵⴰ ⵜⴰⴷⴷⴰⵔⵜ ⵏ ⴱⵓ-ⵚⵚⵓⵍⵟⴰ,
ⵓ ⵎⴰⵏⵉ ⵜⴻⴵⴰ ⵜⵇⵉⴹⵓⵏⵜ ⵏ ⵜⵥⴻⴷⴷⵉⵖⵉⵏ ⵏ ⵓⵄⴻⴼⴼⴰⵏ?’
29 ⵎⴰ ⵄⴻⵎⵎⴰⵔⵚ ⵡⴰⵔ ⵜⴻⵙⵙⴻⵇⵙⵉⵎ ⵉⵎⵙⴻⴱⵔⵉⴷⴻⵏ?
ⴰⵇⴰ ⵉⵛⴻⵢⵢⴰⵔⴻⵏ ⵏⵙⴻⵏ ⵉⵜⵜⵇⴰⵔⵔⴰⵏ ⵡⴰⵔ ⵜⵥⴻⵎⵎⴰⵔⴻⵎ ⴰⴷ ⵜⴻⵏ ⵜⴻⵏⴽⴰⵔⴻⵎ:
30 ⵎⴰⵖⴰⵔ ⴰⵄⴻⴼⴼⴰⵏ ⴰⴷ ⵉⵜⵜⵡⴰⵃⴹⴰ ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ,
ⴷⴻⴳ ⵡⴰⵙⵙ ⵏ ⵓⴷⵓⵇⵇⴻⵥ ⵏ ⵓⴼⵓⴳⴻⵎ ⴰⴷ ⵜⵜⵡⴰⵡⵢⴻⵏ ⵏⵉⵜⵏⵉ ⴷⵉ ⵍⴰⵎⴰⵏ. ■
31 ⵎⴰⵏ ⵡⴻⵏ ⵉ ⵜ ⵖⴰ ⵉⵙⵙⴻⵛⵏⴻⵏ ⴰⴱⵔⵉⴷ ⵏⵏⴻⵙ ⴷⴻⴳ ⵓⵖⴻⵎⴱⵓⴱ ⵏⵏⴻⵙ?
ⵎⴰⵍⴰ ⵉⴳⴳⴰ ⵛⴰ ⵏ ⵜⵓⵄⴻⴼⴼⵏⴰ, ⵡⵉ ⵜ ⵉ ⵖⴰ ⵉⵅⴻⴵⵚⴻⵏ?
32 ⵏⴻⵜⵜⴰ ⵎⴰⵛⴰ ⴰⴷ ⵉⵜⵜⵡⴰⴽⵙⵉ ⵖⴰⵔ ⵡⴻⵏⴹⴻⵍ ⵏⵏⴻⵙ ⴷ ⴰⵎⴻⵇⵇⵔⴰⵏ,
ⵓ ⵖⴰⵔ ⵜⴻⵡⵔⵉⵔⵜ ⵏ ⵡⴻⵏⴹⴻⵍ ⵏⵏⴻⵙ ⵉⵜⵜⵄⴻⵙⵙ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ.
33 ⵜⵜⵄⴻⵊⵉⴱⴻⵏ ⴰⵙ ⵉⴱⵓⵔⵙⴰ ⵏ ⵜⴻⵖⵥⵓⵔⵜ,
ⵓ ⴹⴻⴼⴼⴰⵔⴻⵏ ⵜ ⵎⴰⵔⵔⴰ ⵉⵡⴷⴰⵏ,
ⵓ ⵉⵏⵏⵉ ⴷ ⴰⵙ ⵉⵜⵜⵉⵥⵡⴰⵔⴻⵏ, ⵡⴰⵔ ⴳⴳⵓⵔ ⴰⴷ ⵜⵜⵡⴰⵃⴻⵙⴱⴻⵏ.
34 ⵎⴰⵎⵎⴻⵛ ⵜⴻⵅⵙⴻⵎ ⴰⴷ ⴰⵢⵉ ⵜⵄⴻⵥⵥⴰⵎ ⵙ ⵡⴰⵡⴰⵍⴻⵏ ⵉⵅⵡⴰⵏ?
ⵣⵉ ⵜⴻⵎⵡⴰⵔⵔⵉⵜ ⵏⵡⴻⵎ ⵡⴰⵔ ⵉⵜⵜⵖⵉⵎⵉ ⵡⴰⵍⵓ ⵎⵖⵉⵔ ⵍⴻⵖⴹⴰⵔ ⵡⴰⵀⴰ.