ⵍⵃⴰⵔⴹ ⵡⵉⵙⵙ ⵜⵏⴰⵢⴻⵏ ⵏ ⵚⵓⴼⴰⵔ ⵅ ⵍⴻⴼⵍⴻⵃ ⴷ ⵍⵃⵓⴽⵎ
20
1 ⵅⴻⵏⵏⵉ ⵢⴰⵔⵔⴰ-ⴷⴷ ⵚⵓⴼⴰⵔ, ⵡⴻⵏⵏⵉ ⴷⴷ-ⵢⵓⵙⵉⵏ ⵥⵉ ⵏⴰⵄⵎⴰ, ⵉⵏⵏⴰ: 2 ⵉⵅⴰⵔⵔⵉⵚⴻⵏ ⵉⵏⵓ ⵜⵜⵖⵉⵎⴰⵏ ⴷⴻⴽⴽⵡⴰⵍⴻⵏ-ⴷⴷ ⵖⴰⵔⵉ,
ⵥⵉ ⵙⵙⵉⴱⴱⴻⵜ ⵏ ⵓⵇⴻⴵⴻⵇ ⵉ ⵡⴰⵔ ⵉⵜⵜⴱⴻⴷⴷⵉⵏ ⴷⵉ ⵍⴱⴰⵍ ⵉⵏⵓ.
3 ⵙⵍⵉⵖ ⵉⵊⵊ ⵏ ⵓⵡⴻⴱⴱⴻⵅ ⵉ ⴷ ⴰⵢⵉ ⵉⵙⵙⴱⴻⵀⴷⴰⵍⴻⵏ,
ⵎⴰⵛⴰ ⴱⵓⵃⴱⴻⵍ ⴰⴷ ⵅⴰⴼⵉ ⴷⴷ-ⵢⴰⵔⵔ ⵙ ⵍⴻⴼⵀⴰⵎⴻⵜ ⵉⵏⵓ.
4 ⵉⵡⴰ ⵜⴻⵙⵙⵏⴻⴷ ⴰⵢⴰ, ⴰⵇⴰ-ⵜ ⴷⵉⵏ ⵥⴻⴳ ⵡⴻⵛⵃⴰⵍ ⵓⵢⴰ,
ⵥⴻⴳ ⵡⴰⵎⵉ ⵉⵜⵜⵡⴰⵙⵙⴰⵔⵙ ⴱⵏⴰⴷⴻⵎ ⵅ ⵜⴻⵎⵎⵓⵔⵜ,
5 ⴰⵇⴰ ⴰⵙⵍⵉⵡⵍⴻⵡ ⵏ ⵉⵄⴻⴼⴼⴰⵏⴻⵏ ⵉⵜⵜⴻⴽⴽ ⴷⵔⵓⵙ ⵡⴰⵀⴰ,
ⵍⴻⴼⵔⴰⵃⴻⵜ ⵏ ⵓⵎⵏⴰⴼⴻⵇ ⵎⵖⵉⵔ ⵉⵛⵜ ⵏ ⵜⵥⴻⵃⵥⵉⵃⵜ. ■
6 ⵡⴰⵅⵅⴰ ⵜᵉⵜⵜⴳⴻⵄⵄⴰⴷ ⵏⵏⴼⴰⵅⴻⵜ ⵏⵏⴻⵙ ⴰⵍ ⵉⵊⴻⵏⵡⴰⵏ,
ⵡⴰⵅⵅⴰ ⵉⵜⵜⵃⴰⴷⴰ ⴰⵥⴻⴵⵉⴼ ⵏⵏⴻⵙ ⴰⵍ ⵉⵙⴻⵢⵏⵓⵜⴻⵏ,
7 ⴰⵎ ⵉⵙⵓⴼⵖⴰⵏ ⵏⵏⴻⵙ ⴰⴷ ⵇⴹⴰⵏ ⵉ ⵍⴻⴱⴷⴰ.
ⵉⵏⵏⵉ ⵜ ⵉⵥⵔⵉⵏ, ⴰⴷ ⵉⵏⵉⵏ: ‘ⵎⴰⵏⵉ ⵉⴵⴰ ⵏⴻⵜⵜⴰ?’
8 ⴰⵎ ⵉⵛⵜ ⵏ ⵜⵉⵔⵊⴰ ⴰⴷ ⵉⴹⵓⵡ, ⵡⴰⵔ ⵉⵜⵜⵡⵉⴼⵉ ⵄⴰⴷ,
ⴰⴷ ⵉⵜⵜⵡⴰⵙⵙⴻⵜⵍⴻⵄ ⴰⵎ ⵜⵎⴻⵥⵔⵉⵡⵜ ⵏ ⴵⵉⵍⴻⵜ.
9 ⵜⵉⵟⵟ ⵉ ⵜ ⵉⵥⵔⵉⵏ ⵡⴰⵔ ⵜ ⵜⵥⴰⵔⵔ ⵄⴰⵡⴻⴷ,
ⵓ ⴰⵎⵛⴰⵏ ⵏⵏⴻⵙ ⵡⴰⵔ ⵜ ⵉⵥⴰⵔⵔ ⵄⴻⵎⵎⴰⵔⵚ.
10 ⵉⵃⴻⵏⵊⵉⵔⴻⵏ ⵏⵏⴻⵙ ⴰⴷ ⵙⵙⵊⵉⵡⵏⴻⵏ ⵉⵎⴻⵥⵍⴰⴹ,
ⴰⵎⵎⵓ ⵉ ⴷⴷ ⵖⴰ ⵢⴰⵔⵔⴻⵏ ⵉⴼⴰⵙⵙⴻⵏ ⵏⵙⴻⵏ ⴰⴳⵍⴰ ⵏⵏⴻⵙ.
11 ⵉⵅⵙⴰⵏ ⵏⵏⴻⵙ ⵉⵛⵛⵓⵔⴻⵏ ⵙ ⵜⴻⵎⵥⵉ,
ⴳⴳⵓⵔ ⴰⴷ ⵥⵥⵍⴻⵏ ⴰⴽⵉⴷⴻⵙ ⴷⴻⴳ ⵓⵛⴰⵍ.
12 ⵎⴰⵍⴰ ⵍⵖⴰⵔ ⴷⴻⴳ ⵓⵇⴻⵎⵎⵓⵎ ⵏⵏⴻⵙ ⴷ ⴰⵎⵉⵥⵉⴷ,
ⵎⴰⵍⴰ ⵉⵙⵙⵏⵓⴼⴼⴰⵔ ⵉ-ⵜ ⵙⴰⴷⵓ ⵉⵍⴻⵙ ⵏⵏⴻⵙ,
13 ⵎⴰⵍⴰ ⵉⵃⴹⴰ ⵉ-ⵜ, ⵡⴰⵔ ⵉⵅⵙ ⴰⴷ ⵅⴰⵙ ⵉⵃⴻⵢⵢⴻⴹ,
ⵎⴰⵛⴰ ⵉⵎⴻⵏⵏⴻⵄ ⵉ-ⵜ ⴷⴻⴳ ⵡⴰⵏⴻⵖ ⵏⵏⴻⵙ,
14 ⵅⴻⵏⵏⵉ ⴰⴷ ⵜⴱⴻⴷⴷⴻⵍ ⵎⴰⵛⵛⴰ ⵏⵏⴻⵙ ⴷⴻⴳ ⵓⵄⴻⴷⴷⵉⵙ ⵏⵏⴻⵙ,
ⴷⵉ ⴷⴰⵅⴻⵍ ⵏⵏⴻⵙ ⴰⴷ ⵜⴻⴷⵡⴻⵍ ⴷ ⴰⵔⵔⵀⴰⵊ ⵏ ⵜⵔⴻⴼⵙⵉⵡⵉⵏ.
15 ⵉⵚⴰⵔⴹ ⴰⴳⵍⴰ, ⵎⴰⵛⴰ ⴰⴷ ⵜ-ⵉ-ⴷⴷ-ⵉⵄⵓⵇⵇ ⵄⴰⵡⴻⴷ.
ⴰⴷ ⵜ-ⵉ-ⴷⴷ-ⵉⵏⴹⴰⵔ ⴰⵔⴻⴱⴱⵉ ⵖⴰⵔ ⴱⴰⵔⵔⴰ ⵥⴻⴳ ⵓⵄⴻⴷⴷⵉⵙ ⵏⵏⴻⵙ.
16 ⴰⵔⵔⵀⴰⵊ ⵏ ⵜⵔⴻⴼⵙⵉⵡⵉⵏ ⴰⴷ ⵜ ⵉⵟⵟⴻⴹ,
ⵉⵍⴻⵙ ⵏ ⵓⴼⵉⵖⴰⵔ ⴰⴷ ⵜ ⵉⵏⴻⵖ.
17 ⵡⴰⵔ ⵉⵥⴰⵔⵔ ⵉⵖⴻⵥⵔⴰⵏ,
ⵜⵉⵖⴻⵥⵔⴰⵜⵉⵏ ⴷ ⵜⴰⵔⵢⴰⵡⵉⵏ ⵉⵜⵜⴰⵥⵥⵍⴻⵏⵜ ⵙ ⵜⴰⵎⵎⴻⵏⵜ ⴷ ⵓⵖⵉ.
18 ⴰⴷ ⴷⴷ-ⵢⴰⵔⵔ ⵍⴻⴼⴹⴻⵍ ⵏ ⵓⵎⴰⵔⵔⴻⵜ ⵏⵏⴻⵙ, ⵡⴰⵔ ⵜ ⵉⵙⵙⴻⵖⵍⴰⵢ,
ⵡⴰⵔ ⵉⵏⴻⴳⴳⴻⵥ ⵙ ⵍⴻⴼⵔⴰⵃⴻⵜ ⵥⵉ ⵙⵙⵉⴱⴱⴻⵜ ⵏ ⵡⴰⴳⵍⴰ ⵉ ⴷⴷ-ⵉⴽⵙⴻⴱ,
19 ⵎⴰⵖⴰⵔ ⵉⴷⴻⴵ ⵉⵎⴻⵥⵍⴰⴹ, ⵉⵊⵊⴰ ⵉ-ⵜⴻⵏ ⴱⵍⴰ ⵜⵡⵉⵥⴰ,
ⵢⵓⵛⴰⵔ ⵜⴰⴷⴷⴰⵔⵜ ⵏⵏⵉ ⵡⴰⵔ ⵉⵙⵙⴱⴻⴷⴷ,
20 ⵎⴰⵖⴰⵔ ⵡⴰⵔ ⵉⵙⵙⵉⵏ ⵍⵀⵓⴷⵏⴻⵜ ⴷⵉ ⴷⴰⵅⴻⵍ ⵏⵏⴻⵙ,
ⵙ ⵓⵢⴰ ⵡⴰⵔ ⵉⵏⴻⵊⵊⴻⵎ ⵙ ⵎⴰⵔⵔⴰ ⵎⵉⵏ ⴷⵉ ⵜⵓⵖⴰ ⵉⵎⵎⴻⵥⵔⵉ ⴰⵎⵎⵓ.
21 ⵡⴰⵔ ⵉⵜⵜⵛⴻⵟⵟⵉ ⵡⴰⵍⵓ ⵉ ⵓⵎⴻⵔⵄⵉⵇ ⵏⵏⴻⵙ,
ⵙ ⵓⵢⴻⵏⵏⵉ ⵡⴰⵔ ⵉⵜⵜⵖⵉⵎⵉ ⵥⵥⵀⴰⵔ ⵏⵏⴻⵙ ⵉⴱⴻⴷⴷ.
22 ⵎⴰⵍⴰ ⵖⴰⵔⴻⵙ ⵄⴰⴷ ⴰⴼⴻⵢⵢⴻⴹ ⵉⵎⵓⵏ, ⴰⴷ ⵉⵜⵜⵡⴰⵃⵙⴰⵔ,
ⴰⴷ ⵅⴰⵙ ⵢⵉⵍⵉ ⵓⴼⵓⵙ ⵏ ⴽⵓⵍ ⵍⵎⴻⵙⴽⵉⵏ.
23 ⴰⵢⴰ ⴰⴷ ⵢⵉⵍⵉ ⵃⵉⵎⴰ ⴰⴷ ⵉⵛⵛⵓⵔ ⴰⵄⴻⴷⴷⵉⵙ ⵏⵏⴻⵙ ⵉ ⵜⵢⴰⵡⴰⵏⵜ:
ⴰⵇⴰ ⵏⴻⵜⵜⴰ ⴰⴷ ⵅⴰⵙ ⵉⵙⵙⴻⴽⴽ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ,
ⴰⴷ ⵜ ⵢⴰⵔⵔ ⴰⴷ ⵅⴰⵙ ⵉⵡⵡⴻⵜ ⴰⵎ ⵡⴻⵏⵥⴰⵔ ⵅⵎⵉ ⵉ ⵖⴰ ⵉⵛⵓⵇⵇ ⴷⵉ ⴰⵔⵔⵉⵎⴻⵜ ⵏⵏⴻⵙ.
24 ⵡⴰⵅⵅⴰ ⴰⴷ ⵢⴰⵔⵡⴻⵍ ⵥⵉ ⵍⴻⵙⵏⴰⵃ ⵏ ⵡⵓⵥⵥⴰⵍ,
ⴰⴷ ⵜ ⵉⵙⵙⵏⵓⵇⵇⴻⴱ ⵍⵇⴻⵡⵙ ⵏ ⵏⵏⵃⴰⵙ.
25 ⵉⵊⴻⴱⴱⴻⴷ ⵉⵊⵊⴻⵏ ⵥⵥⴰⵢⴻⵙ ⴼⵍⵉⵜⵛⴰ, ⴰⵇⴰ ⵜⴻⴼⴼⴻⵖ-ⴷⴷ ⵥⵉ ⴰⵔⵔⵉⵎⴻⵜ ⵏⵏⴻⵙ,
ⵍⵎⴰⵛⴰⵎ ⵢⴰⵔⴻⵇⵇⴻⵏ ⵉⵜⵜⴻⴼⴼⴻⵖ-ⴷⴷ ⵥⴻⴳ ⵉⵥⵉ ⵏⵏⴻⵙ,
ⵡⴰⵀ ⵉⵏⴻⵅⵍⵉⵄⴻⵏ ⴰⴷ ⵅⴰⵙ ⴽⴽⴻⵏ.
26 ⵜⴰⴵⴻⵙⵜ ⵜⴻⴽⵎⴻⵍ ⵜᵉⵜⵜⵃⴰⵎⴰ ⵖⴰⵔ ⵜⵅⵓⴱⴰⵢ ⵏⵏⴻⵙ,
ⵜⵉⵎⴻⵙⵙⵉ ⵡⴰⵔ ⵜⵜ ⵉⵙⵙⵉⵖ ⵓⵍⴰ ⴷ ⵉⵊⵊ, ⴰⴷ ⵜ ⵜⴻⵛⵛ,
ⴰⴷ ⵜⴰⵔⵔ ⵎⴻⵥⵔⵉ ⴰⴽ-ⴷ ⵢⴻⵏⵏⵉ ⵉⵛⴻⵟⵟⴻⵏ ⴷⵉ ⵜⵇⵉⴹⵓⵏⵜ ⵏⵏⴻⵙ.
27 ⴰⵊⴻⵏⵏⴰ ⴰⴷ ⵉⵄⴰⵔⵔⴰ ⵍⵎⵓⵄⵚⵉⵢⵢⴻⵜ ⵏⵏⴻⵙ,
ⵓ ⵜⴰⵎⵎⵓⵔⵜ ⴰⴷ ⵅⴰⵙ ⵜⵖⴻⵡⵡⴻⵖ.
28 ⵍⵖⵉⴵⴻⵜ ⵏ ⵜⴰⴷⴷⴰⵔⵜ ⵏⵏⴻⵙ ⴰⴷ ⵜⵔⴰⵃ,
ⴰⴷ ⵜⴰⵥⵥⴻⵍ ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏⵏⴻⵙ.
29 ⵡⴰ ⴷ ⵎⵉⵏ ⵉ ⴷⴷ-ⵉⴽⴽⴰⵔⴻⵏ ⵉ ⵉⵄⴻⴼⴼⴰⵏⴻⵏ ⵥⵉ ⴰⵔⴻⴱⴱⵉ,
ⵜⴰⵙⵖⴰⵔⵜ ⵉ ⴷ ⴰⵙ ⵉⵏⵏⴰ ⴰⵔⴻⴱⴱⵉ.