1 ⴱⵓⵃⴱⴻⵍ ⵉⵏⵓ ⵢⴰⵔⵊⴻⴼ,

ⵓⵙⵙⴰⵏ ⵉⵏⵓ ⵉⵏⴻⴳⴳⵓⵔⴰ ⵅⴻⵙⵢⴻⵏ,

ⵎⵖⵉⵔ ⵉⵎⴻⴹⵍⴰⵏ ⴷ ⴰⵢⵉ ⵉⵇⵇⵉⵎⴻⵏ.

2 ⵙ ⵜⵉⴷⴻⵜⵜ, ⵉⵏⵏⵉ ⵉⵙⵜⴻⵀⵥⴰⵏ ⴰⵇⴰ ⴰⵜⴻⵏ ⵖⴰⵔⵉ,

ⵓ ⵜⵉⵟⵟ ⵉⵏⵓ ⵜⴻⵙⵙⵄⴻⴷⴷⵓ ⴵⵉⵍⴻⵜ ⵊⴰⵔ ⵉⵅⴰⵔⵔⵉⵚⴻⵏ ⵏⵙⴻⵏ ⵉⵎⴰⵔⵥⴰⴳⴻⵏ!

3 ⴻⴳⴳ ⵉⵅⴻⴼ ⵏⵏⴻⴽ ⴷ ⴰⴹⵎⴰⵏ ⵉ ⵏⴻⵛⵛ ⴷⵉⵏ ⵖⴰⵔⴻⴽ.

ⵎⴰⵏ ⵡⴻⵏ ⵅⴻⵏⵏⵉ ⵉ ⵖⴰ ⵉⵡⵜⴻⵏ ⴰⴼⵓⵙ ⵏⵏⴻⵙ ⴷⴻⴳ ⵓⴼⵓⵙ ⵉⵏⵓ ⵉ ⵎⴰⵏ ⴰⵢⴰ?

4 ⵎⴰⵖⴰⵔ ⵛⴻⴽ ⵜⴻⴽⴽⵙⴻⴷ ⵎⴰⵔⵔⴰ ⵍⴻⴼⵀⴰⵎⴻⵜ ⵅ ⵡⵓⵍ ⵏⵙⴻⵏ,

ⵅ ⵓⵢⴻⵏⵏⵉ ⵛⴻⴽ ⵡⴰⵔ ⵜⴻⵏ ⵜⴻⵙⵙⵄⵓⴵⵉⴷ ⵛⴰ.

5 ⵡⵉ ⵉ ⵖⴰ ⵉⵖⴷⴰⵔⴻⵏ ⵉⵎⴻⴷⴷⵓⴽⴽⴰⵍ ⵏⵏⴻⵙ ⴷⵉ ⵟⵟⵡⴻⵄ ⵏ ⵜⴽⴻⵛⵛⴰⴹⵜ,

ⵜⵉⵟⵟⴰⵡⵉⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴷ ⵏⵄⴻⴷⵎⴻⵏⵜ.

6 ⵏⴻⵜⵜⴰ ⵉⴳⴳⴰ ⴰⵢⵉ ⴷ ⵍⵎⴰⵜⴰⵍ ⵊⴰⵔ ⵍⴻⴳⵏⵓⵙ,

ⴰⵍⴰⵎⵉ ⴷⴻⵡⵍⴻⵖ ⴰⵎ ⵉⵊⵊⴻⵏ ⵙⵙⵓⵙⵓⴼⴻⵏ ⴰⵙ ⵅ ⵓⵖⴻⵎⴱⵓⴱ. ^■  

7 ⵙ ⵓⵢⴰ ⵉ ⵜⴻⵄⵎⴻⵛ ⵜⵉⵟⵟ ⵉⵏⵓ ⵥⴻⴳ ⵡⴻⵛⴹⴰⵏ,

ⵎⴰⵔⵔⴰ ⵉⵖⴻⵥⴷⵉⵙⴻⵏ ⵉⵏⵓ ⴰⵇⴰ ⴰⵜⴻⵏ ⴰⵎ ⵜⵉⵍⵉ.

8 ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⵜⵜⵏⴻⵅⵍⴰⵄⴻⵏ ⵥⵉ ⵎⴰⵏ ⴰⵢⴰ,

ⵓ ⴰⵎⴻⵥⴷⴰⴳ ⵉⵜⵜⵏⴻⵇⵍⴰⴱ ⵅ ⵓⵎⵏⴰⴼⴻⵇ.

9 ⴰⵎⵙⴻⴳⴳⴻⴷ ⵉⵎⴻⵏⵏⴻⵄ ⴷⴻⴳ ⵡⴻⴱⵔⵉⴷ ⵏⵏⴻⵙ,

ⵡⴻⵏⵏⵉ ⵖⴰⵔ ⵉⴵⴰ ⵉⴼⴰⵙⵙⴻⵏ ⵉⵎⴻⵥⴷⴰⴳⴻⵏ, ⵢⴰⵔⴻⵏⵏⵉ ⴷⵉ ⵊⵊⵀⴻⴷ.

10 ⵙ ⵓⵢⴰ ⵎⴰⵔⵔⴰ ⴽⴻⵏⵏⵉⵡ, ⴷⴻⵡⵍⴻⵎ-ⴷⴷ, ⴰⵙⴻⵜⵜⵉⵡ-ⴷⴷ ⴷⴰ,

ⵎⴰⵖⴰⵔ ⵡⴰⵔ ⵓⴼⵉⵖ ⵓⵍⴰ ⴷ ⵉⵊⵊ ⵏ ⵓⵎⵉⵖⵉⵙ ⵊⴰⵔ ⴰⵡⴻⵎ. ^■  

11 ⵄⴷⵓⵏ ⵡⵓⵙⵙⴰⵏ ⵉⵏⵓ,

ⵜⵜⵡⴰⵇⴻⴹⵄⴻⵏ ⵉⵏⵡⴰⵢⴻⵏ ⵉⵏⵓ,

ⵎⴰⵔⵔⴰ ⵎⴻⵥⵔⵉ ⵏ ⵡⵓⵍ ⵉⵏⵓ. ^■  

12 ⴵⵉⵍⴻⵜ ⵜⵜⴻⴳⴳⴻⵏ ⵜⵜ ⴷ ⴰⵙⵙ,

ⵇⵇⴰⵔⴻⵏ: ⴰⵇⴰ ⵜⴰⴼⴰⵡⵜ ⵜᵉⵜⵜⴰⴷⴻⵙ-ⴷⴷ ⵅⵎⵉ ⴷⴷ ⵖⴰ ⵜⴻⵡⴹⴰ ⵜⴰⴵⴻⵙⵜ.

13 ⵎⴰⵍⴰ ⵙⵙⵉⵜⵎⴻⵖ ⵄⴰⴷ, ⵙⵙⵉⵜⵉⵎⴻⵖ ⴰⵇⴰ ⵍⴰⵅⴰⵔⵜ ⴰⴷ ⵜⵉⵍⵉ ⴷ ⵜⴰⴷⴷⴰⵔⵜ ⵉⵏⵓ,

ⴰⴷ ⴱⴻⵥⵥⵄⴻⵖ ⵜⴰⵙⵙⵓⵜ ⵉⵏⵓ ⴷⵉ ⵜⴰⴵⴻⵙⵜ.

14 ⵖⴰⵔ ⵡⴻⵏⴹⴻⵍ ⵍⴰⵖⵉⵖ: ‘ⵛⴻⴽ ⴷ ⴱⴰⴱⴰ!’,

ⵖⴰⵔ ⵉⴽⴻⵛⵛⴰ: ‘ⵢⴻⵎⵎⴰ!’ ⴷ: ‘ⵓⵞⵎⴰ!’

15 ⵎⴰⵏⵉ ⵉⴵⴰ ⵅⴻⵏⵏⵉ ⵍⴰⵢⴰⵙ ⵉⵏⵓ?

ⵍⴰⵢⴰⵙ ⵉⵏⵓ, ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⵜ ⵉⵥⴰⵔ?

16 ⵉⵀⵡⴰ ⵖⴰⵔ ⵟⵟⵔⵓⴼⴰ ⵏ ⵍⴰⵅⴰⵔⵜ,

ⵎⴰⵖⴰⵔ ⵎⴰⵍⴰ ⵏⵎⵓⵎ ⴷⴻⴳ ⵓⵛⴰⵍ, ⴰⵇⴰ ⴷⵉⵏ ⴰⵔⵔⴰⵃⴻⵜ. ^■