ⵍⵃⴰⵔⴹ ⵡⵉⵙⵙ ⵜⵏⴰⵢⴻⵏ ⵏ ⵉⵍⵉⴼⴰⵥ ⵅ ⵓⵄⴻⴼⴼⴰⵏ
15
1 ⵅⴻⵏⵏⵉ ⵢⴰⵔⵔⴰ-ⴷⴷ ⵉⵍⵉⴼⴰⵥ, ⵡⴻⵏⵏⵉ ⴷⴷ-ⵢⵓⵙⵉⵏ ⵥⵉ ⵜⴰⵢⵎⴰⵏ, ⵉⵏⵏⴰ: 2 ⵎⴰ ⵉⵜⵜⴰⵔⵔⴰ-ⴷⴷ ⵉⵊⵊ ⵏ ⵓⵎⵉⵖⵉⵙ ⵙ ⵜⵓⵙⵙⵏⴰ ⵉⵅⵡⴰⵏ?
ⵎⴰ ⴰⴷ ⵉⵛⵛⵓⵔ ⴰⵄⴻⴷⴷⵉⵙ ⵏⵏⴻⵙ ⵙ ⵓⵙⴻⵎⵎⵉⴹ ⵉ ⴷⴷ-ⵉⵜⵜⴰⵙⴻⵏ ⵥⵉ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ?
3 ⵎⴰ ⵉⵜⵜⵛⴰⵔⵔⴰⵄ ⵙ ⵍⵀⴰⵔⴹ ⵡⴰⵔ ⵉⵏⴻⴼⴼⵄⴻⵏ,
ⵙ ⵡⴰⵡⴰⵍⴻⵏ ⵏⵏⵉ ⵡⴰⵔ ⵉⵜⵜⴰⴽⴽⵡⴰⴹⴻⵏ?
4 ⵛⴻⴽ ⵎⴰⵛⴰ, ⵜⴰⵔⵥⵉⴷ ⵜⵉⴳⴳⵯⵓⴷⵉ ⵏ ⴰⵔⴻⴱⴱⵉ,
ⵓ ⵜⴻⴽⴽⵙⴻⴷ ⵜⴰⵥⴰⴵⵉⵜ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ.
5 ⵎⴰⵖⴰⵔ ⴰⵇⴻⵎⵎⵓⵎ ⵏⵏⴻⴽ ⵉⵙⵙⴰⵔⴳⴻⴱ ⵍⵎⵓⵄⵚⵉⵢⵢⴻⵜ ⵏⵏⴻⴽ,
ⴰⵇⴰ ⵉⵜⵜⴻⵄⵊⵉⴱ ⴰⵛ ⵍⵀⴰⵔⴷ ⵙ ⵜⵃⵔⴰⵢⵎⴻⵛⵜ ⵙ ⵢⵉⵍⴻⵙ ⵏⵏⴻⴽ.
6 ⴰⵇⴻⵎⵎⵓⵎ ⵏⵏⴻⴽ ⴰⴷ ⵛⴻⴽ ⵉⵃⴽⴻⵎ, ⵡⴰⵔ ⵉⴵⵉ ⵏⴻⵛⵛ,
ⵉⵢⴻⵏⵛⵉⵛⴻⵏ ⵏⵏⴻⴽ ⴰⴷ ⵅⴰⴽ ⵛⴻⵀⴷⴻⵏ.
7 ⵎⴰ ⵛⴻⴽ ⴷ ⴱⵏⴰⴷⴻⵎ ⴷ ⴰⵎⴻⵥⵡⴰⵔⵓ ⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ?
ⵏⵉⵖ ⵜᵉⵜⵜⵡⴰⵔⵡⴻⴷ-ⴷⴷ ⵇⴱⴻⵍ ⵜⵉⵡⵔⵉⵔⵉⵏ?
8 ⵎⴰ ⵜⴻⵙⵙⵃⴻⵙⵙⴻⴷ ⵉ ⵡⴻⴳⵔⴰⵡ ⵏ ⵉⵎⵛⴰⵡⴰⵔⴻⵏ ⵉⵎⵜⵉⵇⵇⴰⵏ ⵏ ⴰⵔⴻⴱⴱⵉ,
ⵎⴰ ⵜⵊⴻⴱⴱⴷⴻⴷ ⵜⵉⵖⵉⵜ ⵖⴰⵔⴻⴽ? ■
9 ⵎⵉⵏ ⵜⴻⵙⵙⵏⴻⴷ ⵛⴻⴽ, ⵏⴻⵛⵛⵉⵏ ⵡⴰⵔ ⵜ ⵏⴻⵙⵙⵉⵏ?
ⵎⵉⵏ ⵜⴼⴻⵀⵀⵎⴻⴷ ⵛⴻⴽ ⵉⵏⵇⴻⵙ ⴰⵔⵏⴻⵖ?
10 ⵓⵍⴰ ⵊⴰⵔ ⴰⵏⴻⵖ ⴷ ⴰⵎⵛⴰⵢⴱⵓ ⴷ ⵓⵡⴻⵙⵙⴰⵔ,
ⵏⵉⵜⵏⵉ ⴷ ⵉⵎⵖⴰⵔⴻⵏ ⴷⴻⴳ ⵡⵓⵙⵙⴰⵏ ⵅ ⴱⴰⴱⴰⵛ. ■
11 ⵎⴰ ⴰⵙⴼⴻⵡⵡⴻⵊ ⵏ ⴰⵔⴻⴱⴱⵉ ⴷⵔⵓⵙ ⵖⴰⵔⴻⴽ,
ⵏⵉⵖ ⵉⵊⵊ ⵏ ⵡⴰⵡⴰⵍ ⵙⵙⵉⵡⵍⴻⵏ ⵜ ⴰⴽⵉⴷⴻⴽ ⵙ ⵜⴻⵔⵖⴻⵖ?
12 ⵎⴰⵢⴻⵎⵎⵉ ⵛⴻⴽ ⵉⵙⵙⴻⵜⵍⴰⵄ ⵡⵓⵍ ⵏⵏⴻⴽ,
ⵎⴰⵢⴻⵎⵎⵉ ⵇⴻⴵⵄⴻⵏⵜ ⵜⵉⵟⵟⴰⵡⵉⵏ ⵏⵏⴻⴽ,
13 ⴰⵇⴰ ⵛⴻⴽ ⵜⴻⵙⵙⵏⴻⵇⵍⴰⴱⴻⴷ ⴱⵓⵃⴱⴻⵍ ⵏⵏⴻⴽ ⵅ ⴰⵔⴻⴱⴱⵉ,
ⴰⵍⴰⵎⵉ ⵜⴻⵙⵙⵓⴼⴼⵓⵖⴻⴷ ⵎⴰⵔⵔⴰ ⴰⵡⴰⵍⴻⵏ ⵏⵏⵉ ⵥⴻⴳ ⵓⵇⴻⵎⵎⵓⵎ ⵏⵏⴻⴽ?
14 ⵎⵉⵏ ⵉⵄⵏⴰ ⴱⵏⴰⴷⴻⵎ ⴰⵇⴰ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⴻⵥⴷⴰⴳ,
ⵓ ⵎⵉⵏ ⵉⵄⵏⴰ ⵡⴻⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵥⵉ ⵜⴻⵎⵖⴰⵔⵜ,
ⴰⵇⴰ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⵙⴻⴳⴳⴻⴷ? ■
15 ⵅⵥⴰⵔ, ⵉⵎⵇⴻⴷⴷⴰⵙⴻⵏ ⵏⵏⴻⵙ ⵡⴰⵔ ⵅⴰⵙⴻⵏ ⵉⵜⵜⵛⵉⵍ,
ⵓⵍⴰ ⴷ ⵉⵊⴻⵏⵡⴰⵏ ⵡⴰⵔ ⴵⵉⵏ ⵚⴼⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ. ■
16 ⴰⵀⵜⴰⵜ ⵄⴰⴷ ⵉⵊⵊ ⵏ ⵏⵏⵄⵉ ⵏ ⴱⵏⴰⴷⴻⵎ ⴷ ⴱⵓ-ⵓⴼⴻⵙⵙⴰⴷ,
ⵡⴻⵏⵏⵉ ⵉⵙⴻⵙⵙⴻⵏ ⵎⵉⵏ ⵡⴰⵔ ⵉⵃⵍⵉⵏ ⴰⵎ ⵡⴰⵎⴰⵏ!
17 ⵏⴻⵛⵛ ⵅⵙⴻⵖ ⴰⴷ ⴰⵛ ⵜ ⵙⵙⴻⵛⵏⴻⵖ, ⵙⴻⵍ-ⴷⴷ ⵖⴰⵔⵉ,
ⵅⴻⵏⵏⵉ ⴰⴷ ⵄⴰⵡⴷⴻⵖ ⵎⵉⵏ ⵥⵔⵉⵖ,
18 ⵎⵉⵏ ⵄⴰⵡⴷⴻⵏ ⵉⵎⵉⵖⵉⵙⴻⵏ,
ⵓⵛⴰ ⵡⴰⵔ ⵜ ⵙⵙⵏⵓⴼⴼⴰⵔⴻⵏ ⵏ ⵉⴱⴰⴱⴰⵜⴻⵏ ⵏⵙⴻⵏ.
19 ⵉ ⵏⵉⵜⵏⵉ ⵡⴰⵀⴰ ⵓⵎⵉ ⵜⴻⵎⵎⴻⵡⵛ ⵜⴻⵎⵎⵓⵔⵜ,
ⵓⵍⴰ ⴷ ⵉⵊⵊ ⵏ ⵍⴱⴰⵔⵔⴰⵏⵉ ⵡⴰⵔ ⵅⴰⵙ ⵉⵄⴷⵓ.
20 ⵎⴰⵔⵔⴰ ⵓⵙⵙⴰⵏ ⵉ ⵉⴷⴷⴰⵔ ⵓⵄⴻⴼⴼⴰⵏ, ⵉⵎⴰⵔⵔⴻⵜ ⵉⵅⴻⴼ ⵏⵏⴻⵙ,
ⵓ ⵉⵜⵜⵡⴰⴳⴳ ⴰⵢⵎⵉⵔ ⵉ ⵍⵇⴻⴷⴷ ⵏ ⵉⵙⴻⴳⴳⵯⵓⵙⴰ ⵉ ⵉⵜⵜⵡⴰⵅⴻⵎⵎⵍⴻⵏ ⵉ ⴱⵓ-ⵍⴻⵅⵛⵓⵏⴻⵜ.
21 ⵢⵓⴷⴻⴼ-ⴷⴷ ⵍⵃⴻⵙⵙ ⵏ ⵉⵖⵓⵢⵢⴰⵏ ⵉⵙⵙⵏⴻⵅⵍⴰⵄⴻⵏ ⵖⴰⵔ ⵉⵎⴻⵥⵥⵓⵖⴻⵏ ⵏⵏⴻⵙ.
ⵄⴰⴷ ⴷⵉ ⵍⵡⴻⵇⵜ ⵏ ⵍⴻⵀⵏⴰ ⴰⴷ ⵅⴰⵙ ⵉⵡⴹⴰ ⵓⵎⵜⴻⵃⵃⴰⵢ. ■
22 ⵏⴻⵜⵜⴰ ⵡⴰⵔ ⵉⵜⵜⵔⵉⵊⵉ ⴰⴷ ⴷⴷ-ⵉⵄⵇⴻⴱ ⵥⵉ ⵜⴰⴵⴻⵙⵜ,
ⵎⴰⵛⴰ ⴰⵇⴰ ⵏⴻⵜⵜⴰ ⵉⵜⵜⵡⴰⴳⴳ ⵉ ⵙⵙⵉⴼ.
23 ⵏⴻⵜⵜⴰ ⵉⵜⵜⴻⵎⵀⴰⴼⴰ ⴷⴰ ⴷ ⴷⵉⵀⴰ ⵅ ⵡⴻⵖⵔⵓⵎ. ‘ⴰ, ⵎⴰⵏⵉ ⵉ ⵢⴻⴵⴰ?’
ⵏⴻⵜⵜⴰ ⵉⵙⵙⴻⵏ ⴰⵇⴰ ⵉⵜⵜⵔⴰⵊⴰ ⵉ-ⵜ ⵡⴰⵙⵙ ⴷ ⴰⴱⴰⵔⵛⴰⵏ ⴷⴻⵖⵢⴰ. ■
24 ⴹⴹⵉⵇⴻⵜ ⴷ ⵍⴻⵃⵚⴰⵔⴻⵜ ⵙⵙⴰⴳⴳⵯⴰⴷⴻⵏⵜ ⵏⴻⵜⵜⴰ,
ⴰⵔⵏⵉⵏ ⵏⵉⵜⵏⵉ ⴰⵎ ⵉⵊⵊ ⵏ ⵓⵊⴻⴵⵉⴷ ⵉⵡⵊⴻⴷ ⵉ ⵓⵎⴻⵏⵖⵉ.
25 ⵎⴰⵖⴰⵔ ⵖⴰⵔ ⴰⵔⴻⴱⴱⵉ ⵉⵙⵙⵡⵉⵥⵥⴰⴹ ⵏⴻⵜⵜⴰ ⴰⴼⵓⵙ ⵏⵏⴻⵙ,
ⵓ ⴰⴽ-ⴷ ⵓⵎⵥⴻⵎⵎⴰⵔ ⵅ ⴽⵓⵍⵛⵉ ⵉⵎⴻⵏⵏⴻⵄ ⵜⴰⵖⴻⵏⵏⴰⵏⵜ ⵜⴰⵎⴻⵇⵇⵔⴰⵏⵜ.
26 ⵙ ⵢⵉⵔⵉ ⵉⵎⴻⵃⴹⴻⵏ ⵉⵜⵜⴰⵥⵥⴻⵍ ⵖⴰⵔⴻⵙ,
ⵙ ⵉⴱⵓⵟⵓⵏⴻⵏ ⵉⴳⴷⴰⵔⴻⵏ ⵅ ⵜⵙⴻⴷⴷⴰⵔⵜ ⵏⵏⴻⵙ ⵏ ⵓⵄⴻⵙⴽⴰⵔⵉ.
27 ⵎⴰⵖⴰⵔ ⵉⵍⴻⵃⵃⴻⴼ ⵉ ⵓⵖⴻⵎⴱⵓⴱ ⵏⵏⴻⵙ ⵙ ⵜⴰⴷⵓⵏⵜ,
ⵉⴳⴳⴰ ⵜⴰⴷⵓⵏⵜ ⵉ ⵜⴻⵊⵄⵉⵏⵏⴰ ⵏⵏⴻⵙ.
28 ⵉⵥⴻⴷⴷⴻⵖ ⴷⵉ ⵜⵏⴻⴷⴷⴰⵎ ⵉⵜⵜⵡⴰⵀⴻⴷⵎⴻⵏ,
ⵓ ⴷⵉ ⵜⵓⴷⵔⵉⵏ ⵡⴰⵔ ⴷⴰⵢⵙⴻⵏⵜ ⵉⵥⴻⴷⴷⴻⵖ ⵄⴰⴷ ⵓⵍⴰ ⴷ ⵉⵊⵊⴻⵏ,
ⵜⵉⵏⵏⵉ ⵢⵓⵔⴰⵏ ⵎⴰⵃⴻⵏⴷ ⴰⴷ ⴷⴻⵡⵍⴻⵏⵜ ⴷ ⵍⵅⵉⵔⴱⴰⵜ.
29 ⵏⴻⵜⵜⴰ ⵡⴰⵔ ⵉⴷⴷⵉⴽⴽⵡⵉⵍ ⴷ ⴱⵓ-ⵡⴰⴳⵍⴰ ⵓ ⴰⴳⵍⴰ ⵏⵏⴻⵙ ⵡⴰⵔ ⵉⵜⵜⵖⵉⵎⵉ,
ⵎⴰⵍⴰ ⵎⵉⵏ ⴷⴷ-ⵉⴽⵙⴻⴱ ⵡⴰⵔ ⵢⴰⵔⴻⵏⵏⵉ ⵅ ⵜⴻⵎⵎⵓⵔⵜ.
30 ⵏⴻⵜⵜⴰ ⵡⴰⵔ ⵉⵏⴻⵊⵊⴻⵎ ⵉ ⵜⴰⴵⴻⵙⵜ,
ⴰⵛⴻⵄⵄⴰⵍ ⵏ ⵜⵎⴻⵙⵙⵉ ⴰⴷ ⵢⴻⵛⵛ ⵍⴻⴼⵔⵓⵄ ⵏⵏⴻⵙ,
ⴰⴷ ⵉⴼⵏⴰ ⵙ ⵍⴻⵄⵡⵉⵏ ⵏ ⵓⵇⴻⵎⵎⵓⵎ ⵏⵏⴻⵙ.
31 ⴻⵊⵊ ⵉ-ⵜ ⵡⴰⵔ ⵉⵜⵜⵛⵉⵍⵉ ⵅ ⵎⵉⵏ ⵉⴱⴻⴹⵍⴻⵏ,
ⵎⴰⵖⴰⵔ ⵅⴻⵏⵏⵉ ⵓⵍⴰ ⴷ ⵍⵎⵓⵏⴻⵜ ⵏⵏⴻⵙ ⴰⴷ ⵜⴻⴱⴹⴻⵍ.
32 ⵎⵉⵏⵜⵍⴰ ⵡⴰⵔ ⴷⴷ-ⵢⵓⵙⵉ ⵄⴰⴷ ⵡⴰⵙⵙ ⵏⵏⴻⵙ, ⴰⴷ ⵉⵜⵜⵡⴰⴽⴻⵎⵎⴻⵍ,
ⵎⴰⵖⴰⵔ ⵜⴰⵙⴻⵟⵟⴰ ⵏ ⵜⵉⵏⵉ ⵏⵏⴻⵙ ⵡⴰⵔ ⵜⵥⴻⵢⵥⵉⵡ. ■
33 ⴰⴷ ⵉⵙⵙⴻⵖⴹⴻⵍ ⴰⴹⵉⵍ ⵡⴰⵔ ⵉⵙⵙⵏⴻⴷⵢⴻⵏ ⵏⵏⴻⵙ ⴰⵎ ⵜⵥⴰⵢⴰⵔⵜ,
ⴰⴷ ⵉⵎⵎⴻⵏⴹⴰⵔ ⵏⵏⵓⵡⴰⵔ ⵏⵏⴻⵙ ⴰⵎ ⵜⵥⵉⵜⵓⵏⵜ. □
34 ⵎⴰⵖⴰⵔ ⴰⴱⴰⵔⵔⵓ ⵏ ⵉⵎⵏⴰⴼⵇⴻⵏ ⴰⵇⴰ-ⵜ ⴱⵍⴰ ⵍⵖⵉⴵⴻⵜ,
ⵓ ⵜⵉⵎⴻⵙⵙⵉ ⵜᵉⵜⵜⴻⵜⵜ ⵉⵇⵉⴹⴰⵏ ⵉ ⵉⵛⵛⵓⵔⴻⵏ ⵙ ⵍⵖⴻⵛⵛ. □
35 ⴰⵇⴰ ⴰⵜⴻⵏ ⵙ ⴷⴷⴻⵢⵙⴻⵜ ⵥⵉ ⵜⴰⵎⴰⵔⴰ, ⵜⵜⵓⵔⵡⴻⵏ ⵍⵖⴻⵛⵛ,
ⵓ ⵍⴻⵅⴷⴻⵄ ⴰⵇⴰ-ⵜ ⴷⴻⴳ ⵓⵄⴻⴷⴷⵉⵙ ⵏⵙⴻⵏ. ■