ⴰⵢⵓⴱ ⵉⵙⵙⵉⵡⴻⵍ ⴰⴽ-ⴷ ⵚⵓⴼⴰⵔ ⵅ ⵍⵎⴻⵡⵜ
14
1 ⴱⵏⴰⴷⴻⵎ ⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵥⵉ ⵜⴻⵎⵖⴰⵔⵜ, ⴰⵇⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⵓⴷⵔⵓⵙⴻⵏ, ⵓ ⵏⴻⵜⵜⴰ ⵉⵛⵛⵓⵔ ⵙ ⵍⴻⵃⵡⴻⵍ. ■
2 ⵏⴻⵜⵜⴰ ⵉⵖⴻⵎⵎⵉ ⴰⵎ ⵜⵏⴻⵡⵡⴰⵛⵜ, ⵅⴻⵏⵏⵉ ⵉⵜⵜⵡⴰⵇⴹⴻⵄ.
ⵉⵜⵜⵔⴰⴽⴽⵡⴰⵍ ⴰⵎ ⵜⵉⵍⵉ, ⵡⴰⵔ ⵉⵜⵜⵖⵉⵎⵉ. ■
3 ⵡⴰⵅⵅⴰ ⴰⵎⴻⵏⵏⵉ ⵜⴰⵔⴻⵥⵎⴻⴷ ⵜⵉⵡⴰ ⵏⵏⴻⵙ ⵜⵉⵟⵟⴰⵡⵉⵏ ⵏⵏⴻⴽ,
ⵓⵛⴰ ⵜᵉⵜⵜⴰⵡⵢⴻⴷ ⴰⵢⵉ-ⴷⴷ ⴷⵉ ⴷⴷⴻⵄⵡⴻⵜ ⴰⴽⵉⴷⴻⴽ. ■
4 ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⵉⵙⵙⵓⴼⴼⴻⵖ ⵉⵊⵊ ⵏ ⵓⵎⴻⵥⴷⴰⴳ ⵥⴻⴳ ⵓⵎⴻⵅⵎⵓⵊ?
ⵓⵍⴰ ⴷ ⵉⵊⵊ! ■
5 ⵎⴰⵔⴰ ⵓⵙⵙⴰⵏ ⵏⵏⴻⵙ ⵓⵔⵉⵏ,
ⵍⵇⴻⴷⴷ ⵏ ⵉⵢⵓⵔⴻⵏ ⵏⵏⴻⵙ ⴰⵇⴰ ⵉⵜⵜⵡⴰⵙⵙⴻⵏ ⵖⴰⵔⴻⴽ,
ⵓⵛⴰ ⵜⴻⴳⴳⵉⴷ ⴰⵙ ⵍⴻⵃⴷⵓⴷ ⵏⵏⴻⵙ ⵏⵏⵉ ⵡⴰⵔ ⴷ ⴰⵙ ⵉⵄⴻⴷⴷⴻⵍ ⴰⴷ ⵜⴻⵏ ⵉⵄⴷⵓ, ■
6 ⵏⴻⵇⵍⴻⴱ ⵅⴻⵏⵏⵉ ⵅⴰⵙ ⵎⴰⵃⴻⵏⴷ ⴰⴷ ⵢⴰⵔⴻⵢⵢⴻⵃ,
ⵅⴻⵏⵏⵉ ⵉⵥⴻⵎⵎⴰⵔ ⴰⴷ ⵢⴰⵔⵔ ⵎⴻⵥⵔⵉ ⴰⵎ ⵉⵊⵊ ⵏ ⵓⵛⴻⵡⵡⴰⵍ ⴷⴻⴳ ⵡⴰⵙⵙ ⵏⵏⴻⵙ. ■
7 ⵎⴰⵖⴰⵔ ⵉ ⵜⵛⴻⵊⵊⴰⵔⵜ ⴰⵇⴰ ⴷⵉⵏ ⵄⴰⴷ ⴰⵙⵉⵜⴻⵎ!
ⵎⴰⵍⴰ ⵜᵉⵜⵜⵡⴰⵇⴻⵙⵙ, ⴰⴷ ⵜⴻⵙⵙⵓⴼⴼⴻⵖ ⵄⴰⵡⴻⴷ ⵍⴻⴼⵔⵓⵄ,
ⵓ ⵍⴻⴼⵔⵓⵄ ⵏⵏⴻⵙ ⵡⴰⵔ ⵜⵜⴱⴻⴷⴷⵉⵏ ⵥⴻⴳ ⵓⵖⴻⵎⵎⵉ.
8 ⵡⴰⵅⵅⴰ ⵉⵡⵙⴰⵔ ⵡⴻⵥⵡⴰⵔ ⵏⵏⴻⵙ ⴷⵉ ⵜⴻⵎⵎⵓⵔⵜ,
ⵉⵎⵎⵓⵜ ⵊⵊⴷⴻⵄ ⵏⵏⴻⵙ ⴷⴻⴳ ⵓⵛⴰⵍ,
9 ⴰⴷ ⵜⴻⵖⵎⵉ ⵜⵛⴻⵊⵊⴰⵔⵜ ⵄⴰⵡⴻⴷ ⵅⵎⵉ ⵉ ⵖⴰ ⵜⴰⵛⴰ ⴰⴽ-ⴷ ⵡⴰⵎⴰⵏ,
ⴰⴷ ⵜⴻⵙⵙⵓⴼⴼⴻⵖ ⵄⴰⵡⴻⴷ ⵍⴻⴼⵔⵓⵄ ⴰⵎⴻⵛⵏⴰⵡ ⵉⵛⵜ ⵏ ⵜⵛⴻⵊⵊⴰⵔⵜ ⵥⵥⵓⵏ ⵜⵜ ⴱⴻⵃⵍⴰ.
10 ⵎⴰⵛⴰ ⵎⴰⵍⴰ ⵉⵎⵎⵓⵜ ⵉⵊⵊ ⵏ ⵡⴻⵔⵢⴰⵥ ⵉⵊⵀⴻⴷ, ⵉⴼⴻⵏⵏⴰ,
ⵎⴰⵍⴰ ⵉⴼⴼⴻⵖ ⴰⵙ ⴱⵓⵃⴱⴻⵍ ⵉ ⴱⵏⴰⴷⴻⵎ, ⵎⴰⵏⵉ ⵉⴵⴰ ⵅⴻⵏⵏⵉ?
11 ⴰⵎⴰⵏ ⵜⵜⴻⴼⴼⵖⴻⵏ-ⴷⴷ ⵥⵉ ⵍⴻⴱⵃⴰⵔ,
ⵓ ⵉⵖⵥⴰⵔ ⵉⵜⵜⴰⵥⴻⵖ ⵓ ⵉⵅⴻⴽⴽⵡⴰ.
12 ⵉⵥⵥⴻⵍ ⴱⵏⴰⴷⴻⵎ ⴷⵉⵏ, ⵡⴰⵔ ⵉⵜⵜⴻⴽⴽⴰⵔ ⵄⴰⴷ.
ⴰⵍ ⵡⴰⵔ ⵜⵜⵉⵍⵉⵏ ⵄⴰⴷ ⵉⵊⴻⵏⵡⴰⵏ, ⵡⴰⵔ ⴷ ⵜⵜⴼⵉⵇⵉⵏ,
ⵡⴰⵔ ⵜⵜⵡⴰⵙⴻⴽⴽⴰⵔⴻⵏ ⵥⴻⴳ ⵉⴹⴻⵙ ⵏⵙⴻⵏ.
13 ⴰⵅ, ⵎⵍⵉ ⴷ ⴰⵢⵉ ⵖⴰ ⵜⴰⵔⵔⴻⴷ ⵖⴰⵔ ⵍⴰⵅⴰⵔⵜ,
ⴰⴷ ⴰⵢⵉ ⵜⴻⵙⵙⵏⵓⴼⴼⴰⵔⴻⴷ ⴰⵍ ⵖⴰ ⵉⵃⴻⵢⵢⴻⴷ ⵡⴻⵖⴹⴰⴱ ⵏⵏⴻⴽ,
ⵎⵍⵉ ⴷ ⴰⵢⵉ ⵜⵓⵔⵉⴷ ⵉⵊⵊ ⵏ ⵍⵎⵉⵊⴰⵍ ⵉⵎⵜⴻⵏ ⵓⵛⴰ ⵅⴻⵏⵏⵉ ⵉⴷⴰⵔ ⴰⵢⵉ!
14 ⵎⴰⵍⴰ ⵉⵊⵊ ⵏ ⵡⴻⵔⵢⴰⵥ ⵉⵎⵎⵓⵜ, ⵎⴰ ⴰⴷ ⴷⴷ-ⵉⴷⵡⴻⵍ ⵖⴰⵔ ⵜⵓⴷⴰⵔⵜ?
ⵅⴻⵏⵏⵉ ⴰⴷ ⵇⵇⵉⵎⴻⵖ ⵜⵜⵔⴰⵊⵉⵖ ⵎⴰⵔⵔⴰ ⵓⵙⵙⴰⵏ ⵏ ⵓⵎⴻⵏⵖⵉ ⵉⵏⵓ,
ⵖⴰⵔⴻⵙ ⴰⵍⴰⵎⵉ ⴷⴷ-ⵢⵓⵙⴰ ⵓⴼⴻⴽⴽⵉ ⵉⵏⵓ.
15 ⵎⴰⵍⴰ ⵅⴻⵏⵏⵉ ⵛⴻⴽ ⵜⵍⴰⵖⵉⴷ, ⵏⴻⵛⵛ ⴰⴷ ⵛⴻⴽ ⴷⴷ-ⴰⵔⵔⴻⵖ,
ⵓⵛⴰ ⵛⴻⴽ ⴰⴷ ⵜⴻⵎⵎⴻⵥⵍⴻⴷ ⵖⴰⵔ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⴽ.
16 ⵎⴰⵛⴰ ⵍⴻⵅⵅⵓ ⵜⵃⴻⵙⵙⴱⴻⴷ ⵉⵚⵓⵔⴰⴼ ⵉⵏⵓ,
ⵡⴰⵔ ⵜⵎⴻⵏⵏⵄⴻⴷ ⵍⵖⴰⴹⴰⴱ ⵏⵏⴻⴽ ⵅ ⴷⴷⵏⵓⴱ ⵉⵏⵓ. ■
17 ⴰⵅⴻⵟⵟⵓ ⵉⵏⵓ ⵉⵜⵜⵡⴰⵛⴻⵎⵎⴻⵄ ⴷⵉ ⵜⵛⴻⵎⵎⵓⵙⵜ,
ⵓ ⵖⴰⵔ ⵍⵎⵓⵄⵚⵉⵢⵢⴻⵜ ⵉⵏⵓ ⵜⴰⵔⵏⵉⴷ ⴷⴰⵢⴻⵙ ⴽⵜⴰⵔ.
18 ⵡⴰⵀ, ⴰⴷⵔⴰⵔ ⵉⵡⴻⵟⵟⴰⵏ, ⵉⴼⴻⵙⵙⵉ,
ⵓⵛⴰ ⵉⵃⵔⵓⴵⴻⴷ ⵊⵊⴰⵔⴼ ⵥⴻⴳ ⵡⴻⵎⵛⴰⵏ ⵏⵏⴻⵙ,
19 ⴰⵎⴰⵏ ⵜⵜⴻⴷⴷⵥⴻⵏ ⵉⵥⵔⴰ,
ⵉⵖⴻⵥⵔⴰⵏ ⵏⵏⴻⵙ ⵜⵜⴻⴽⴽⵙⴻⵏ ⴰⵛⴰⵍ ⵏ ⵜⴻⵎⵎⵓⵔⵜ,
ⴰⵎⵎⵓ ⵉ ⵜⴰⵔⴻⴷⴷⴵⴻⴷ ⴰⵙⵉⵜⴻⵎ ⵏ ⴱⵏⴰⴷⴻⵎ.
20 ⵛⴻⴽ ⵜⴰⵔⴻⵏⵏⵉⴷ ⴷⴰⵢⴻⵙ ⵉ ⵍⴻⴱⴷⴰ, ⵅⴻⵏⵏⵉ ⵢⵓⵢⵓⵔ.
ⵜᵉⵜⵜⴱⴻⴷⴷⴰⵍⴻⴷ ⵓⴷⴻⵎ ⵏⵏⴻⵙ ⵓⵛⴰ ⵜⴻⵙⵙⴻⴽⴽⴻⴷ ⵜ.
21 ⵎⴰⵍⴰ ⵉⵃⴻⵏⵊⵉⵔⴻⵏ ⵏⵏⴻⵙ ⵟⵟⴼⴻⵏ ⵛⵛⴰⵏ, ⵏⴻⵜⵜⴰ ⵡⴰⵔ ⵜ ⵉⵙⵙⵉⵏ,
ⵎⴰⵍⴰ ⵜⴻⵏ ⴷⴻⴵⴻⵏ, ⵡⴰⵔ ⴽⵉⴷⵙⴻⵏ ⵉⵜⵜⵉⵛⵉ.
22 ⵎⴰⵛⴰ ⴰⵔⵔⵉⵎⴻⵜ ⵏⵏⴻⵙ ⵜᵉⵜⵜⵏⴻⵥⴱⴰⵔ ⴷⵉ ⵟⵟⵡⴻⵄ ⵏ ⵢⵉⵅⴻⴼ ⵏⵏⴻⵙ ⵡⴰⵀⴰ,
ⵓ ⵍⴻⵄⵎⴰⵔ ⵏⵏⴻⵙ ⵉⵜⵜⴻⵛⴹⵉⵏ ⴷⵉ ⵟⵟⵡⴻⵄ ⵏⵏⴻⵙ.