ⴰⵢⵓⴱ ⵢⴰⵔⴻⵏⵏⵉ ⴷⴻⴳ ⵡⴰⵡⴰⵍ ⵏⵏⴻⵙ ⵉ ⵚⵓⴼⴰⵔ
13
1 ⵅⵥⴰⵔ, ⵇⴰⵄ ⵎⴰⵏ ⴰⵢⴰ ⵜⴻⵥⵔⴰ ⵉ-ⵜ ⵜⵉⵟⵟ ⵉⵏⵓ, ⵉⵙⵍⴰ ⵉ-ⵜ ⵓⵎⴻⵥⵥⵓⵖ ⵉⵏⵓ, ⵉⴼⵀⴻⵎ ⴰⵙ ⵎⵍⵉⵃ.
2 ⵎⵉⵏ ⵜⴻⵙⵙⵏⴻⵎ ⴽⴻⵏⵏⵉⵡ, ⵙⵙⵏⴻⵖ ⵜ ⵓⵍⴰ ⴷ ⵏⴻⵛⵛ,
ⵡⴰⵔ ⵡⴻⵟⵟⵉⵖ ⵛⴰ ⴷⴻⴳ ⵓⵙⴻⵎⵇⵓⴷⴷⵉ ⴰⴽⵉⴷⵡⴻⵎ.
3 ⵎⴰⵛⴰ ⵏⴻⵛⵛ ⵅⵙⴻⵖ ⴰⴷ ⵙⵙⵉⵡⵍⴻⵖ ⵖⴰⵔ ⵓⵎⵥⴻⵎⵎⴰⵔ ⵅ ⴽⵓⵍⵛⵉ,
ⵎⴻⵥⵔⴻⵖ ⴰⴷ ⵡⵜⴻⵖ ⵜⴰⵎⴻⵙⵍⴰⵛⵜ ⵉⵏⵓ ⵥⵥⴰⵜ ⵉ ⴰⵔⴻⴱⴱⵉ.
4 ⵎⴰⵛⴰ ⴽⴻⵏⵏⵉⵡ ⵜⴻⵙⵙⵓⴼⴼⵓⵖⴻⵎ ⵉⵅⴰⵔⵔⵉⵇⴻⵏ,
ⵎⴰⵔⵔⴰ ⴽⴻⵏⵏⵉⵡ ⴷ ⵉⴹⴱⵉⴱⴻⵏ ⵉⵅⵡⴰⵏ. ■
5 ⴰⵅ, ⵎⵍⵉ ⵜⴻⵙⵙⴻⵖⴷⴻⵎ ⴽⴻⵏⵏⵉⵡ ⵎⴰⵔⵔⴰ!
ⴰⵢⴰ ⴰⴷ ⵜⵉⵍⵉ ⴷ ⵜⵉⵖⵉⵜ ⵉ ⴽⴻⵏⵏⵉⵡ. ■
6 ⵙⵍⴻⵎ ⵅⴻⵏⵏⵉ ⵎⴰⵎⵎⴻⵛ ⵉ ⵖⴰ ⵡⵜⴻⵖ ⵅ ⵢⵉⵅⴻⴼ ⵉⵏⵓ,
ⵃⴻⴽⴽⴰⵔⴻⵎ ⵅ ⵓⵎⵛⴰⵔⵔⴰⵄ ⵏ ⵉⵢⴻⵏⵛⵉⵛⴻⵏ ⵉⵏⵓ!
7 ⵎⴰ ⵜⴻⵅⵙⴻⵎ ⴰⴷ ⵜⵉⵏⵉⵎ ⵍⵖⴻⵛⵛ ⵉ ⵍⴻⴼⴹⴻⵍ ⵏ ⴰⵔⴻⴱⴱⵉ,
ⵎⴰ ⵜⴻⵅⵙⴻⵎ ⴰⴷ ⵜⴻⵙⵙⵉⵡⵍⴻⵎ ⵉⵅⴰⵔⵔⵉⵇⴻⵏ ⴷⵉ ⵜⵉⵥⵉ ⵏⵏⴻⵙ? ■
8 ⵎⴰ ⵜⵥⴻⵎⵎⴰⵔⴻⵎ ⴰⴷ ⵜⴻⵡⵜⴻⵎ ⵜⴰⵎⴻⵙⵍⴰⵛⵜ ⴷⵉ ⵟⵟⵡⴻⵄ ⵏⵏⴻⵙ?
ⵎⴰ ⵜⴻⵅⵙⴻⵎ ⴰⴷ ⵜⵛⴰⵔⵔⵄⴻⵎ ⵉ ⴰⵔⴻⴱⴱⵉ?
9 ⵎⴰ ⵎⵍⵉⵃ ⵉ ⴽⴻⵏⵏⵉⵡ ⵎⴰⵍⴰ ⵏⴻⵜⵜⴰ ⴰⴷ ⴽⴻⵏⵏⵉⵡ ⵉⵇⴻⴵⴻⴱ?
ⵎⴰ ⵜⴻⵅⵙⴻⵎ ⴰⴷ ⵥⵥⴰⵢⴻⵙ ⵜⴻⵙⵜⴻⵀⵥⴰⵎ
ⴰⵎ ⵎⴰⵎⵎⴻⵛ ⵙⵜⴻⵀⴻⵥⵥⴰⵏ ⵉⵡⴷⴰⵏ ⵥⴻⴳ ⵉⵊⵊ ⵏ ⴱⵏⴰⴷⴻⵎ?
10 ⵏⴻⵜⵜⴰ ⴰⴷ ⴽⴻⵏⵏⵉⵡ ⵉⵡⴻⴱⴱⴻⵅ,
ⵎⴰⵍⴰ ⴽⴻⵏⵏⵉⵡ ⵜᵉⵜⵜⴻⴳⴳⴻⵎ ⵙ ⵡⵓⴷⵎⴰⵡⴻⵏ ⴷⵉ ⵜⵏⵓⴼⴼⵔⴰ.
11 ⵎⴰ ⵡⴰⵔ ⴽⴻⵏⵏⵉⵡ ⵉⵙⵙⵏⴻⵅⵍⵉⵄ ⵓⵄⵓⴵⵉ ⵏⵏⴻⵙ,
ⵎⴰ ⵡⴰⵔ ⴷⴷ ⵅⴰⵡⴻⵎ ⵜⵡⴻⵟⵟⵉ ⵜⵉⴳⴳⵯⵓⴷⵉ ⵥⵥⴰⵢⴻⵙ?
12 ⴰⵡⴰⵍⴻⵏ ⵏⵡⴻⵎ ⵉ ⵍⵉⴷⴰⵔⴻⵜ ⴰⵇⴰ ⴰⵜⴻⵏ ⴷ ⵍⴻⵎⵜⵓⵍ ⵥⵉ ⵜⵄⴻⵊⵊⴰⵛⵜ,
ⵍⴻⴳⵄⵓⴷⵉ ⵏⵡⴻⵎ ⴷ ⵍⴻⴳⵄⵓⴷⵉ ⵏ ⵓⴱⴻⴵⴰⵄ.
13 ⵙⴻⵖⴷⴻⵎ ⵥⵥⴰⵜⵉ, ⵎⴰⵃⴻⵏⴷ ⵏⴻⵛⵛ ⴰⴷ ⵙⵙⵉⵡⵍⴻⵖ,
ⴻⵊⵊ ⴰⴷ ⵅⴰⴼⵉ ⴷⴷ-ⵢⴰⵙ ⵎⵉⵏ ⵎⴰ ⴷⴷ ⵉ ⵖⴰ ⵢⴰⵙ.
14 ⵎⴰⵢⴻⵎⵎⵉ ⵉ ⵖⴰ ⵟⵟⴼⴻⵖ ⴰⵢⵙⵓⵎ ⵏ ⴰⵔⵔⵉⵎⴻⵜ ⵉⵏⵓ ⵊⴰⵔ ⵜⴻⵖⵎⴰⵙ ⵉⵏⵓ,
ⵎⴰⵢⴻⵎⵎⵉ ⵉ ⵖⴰ ⵟⵟⴼⴻⵖ ⵜⵓⴷⴰⵔⵜ ⵉⵏⵓ ⴷⴻⴳ ⵓⴼⵓⵙ ⵉⵏⵓ?
15 ⵅⵥⴰⵔ, ⵏⴻⵜⵜⴰ ⵉⵅⵙ ⴰⴷ ⴰⵢⵉ ⵉⵏⴻⵖ, ⵏⴻⵛⵛ ⴰⴷ ⵜ ⵔⴰⵊⵉⵖ,
ⵎⴰⵛⴰ ⴰⴷ ⵡⵜⴻⵖ ⵅ ⵉⴱⵔⵉⴷⴻⵏ ⵉⵏⵓ ⵥⵥⴰⵜⴻⵙ. ■
16 ⴷ ⵡⴰ ⵉ ⴷ ⴰⵢⵉ ⵖⴰ ⵉⴷⴻⵡⵍⴻⵏ ⴷ ⴰⵙⴻⵏⵊⴻⵎ,
ⵎⴰⵛⴰ ⴰⵎⵏⴰⴼⴻⵇ ⵡⴰⵔ ⴷⴷ-ⵉⵜⵜⵉⵙ ⵥⵥⴰⵜ ⵉ ⵓⵖⴻⵎⴱⵓⴱ ⵏⵏⴻⵙ. □
17 ⵙⵍⴻⵎ ⵎⵍⵉⵃ ⵖⴰⵔ ⵍⵀⴰⵔⴷ ⵉⵏⵓ,
ⵓ ⵙ ⵉⵎⴻⵥⵥⵓⵖⴻⵏ ⵢⴰⵔⴻⵥⵎⴻⵏ ⵖⴰⵔ ⵓⵛⴰⵔⵔⴻⵃ ⵉⵏⵓ.
18 ⵅⵥⴰⵔ, ⵏⴻⵛⵛ ⵉⵡⵢⴻⵖ ⴷⴷⴻⵄⵡⴻⵜ ⵙ ⵓⵙⴻⵜⵜⴻⴼ,
ⵙⵙⵏⴻⵖ ⴰⴷ ⵜⵜⵡⴰⵙⴻⴳⴳⴷⴻⵖ.
19 ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⴽⵉⴷⵉ ⵉⵎⵛⴰⵔⵔⵄⴻⵏ?
ⵅⴻⵏⵏⵉ ⴰⴷ ⵙⴻⵖⴷⴻⵖ ⴷⴻⵖⵢⴰ, ⴰⴷ ⵙⵙⵓⴼⴼⵖⴻⵖ ⴱⵓⵃⴱⴻⵍ.
20 ⵎⵖⵉⵔ ⵡⴰⵔ ⴷ ⴰⵢⵉ ⵜⵜⴻⴳⴳ ⵜⵏⴰⵢⴻⵏ ⵏ ⵍⴻⵃⵡⴰⵢⴻⵊ,
ⵅⴻⵏⵏⵉ ⵡⴰⵔ ⵥⵥⴰⵢⴻⴽ ⵜⵜⵏⵓⴼⴼⴰⵔⵉⵖ: ■
21 ⴰⴼⵓⵙ ⵏⵏⴻⴽ ⵙⵉⴳⴳⵯⴻⵊ ⵉ-ⵜ ⵅⴰⴼⵉ,
ⵡⴰⵔ ⴷ ⴰⵢⵉ ⵜⵜⴻⵙⵙⵏⴻⵅⵍⵉⵄ ⵙ ⵓⵀⵓⴷⴷⵉ ⵏⵏⴻⴽ!
22 ⵍⴰⵖⴰ ⵛⴻⴽ, ⵓ ⵏⴻⵛⵛ ⴰⴷ ⵅⴰⴽ ⴷⴷ-ⴰⵔⵔⴻⵖ,
ⵏⵉⵖ ⵏⴻⵛⵛ ⴰⴷ ⵙⵙⵉⵡⵍⴻⵖ ⵓ ⵛⴻⴽ ⴰⴷ ⵅⴰⴼⵉ ⴷⴷ-ⵜⴰⵔⵔⴻⴷ!
23 ⵎⴻⵛⵃⴰⵍ ⵅⴰⴼⵉ ⵏ ⵍⵎⵓⵄⵚⵉⵢⵢⴻⵜ ⴷ ⴷⴷⴻⵏⴱ?
ⵙⵛⴻⵏ ⴰⵢⵉ ⴰⵅⴻⵟⵟⵓ ⵉⵏⵓ ⴷ ⴷⴷⴻⵏⴱ ⵉⵏⵓ.
24 ⵎⴰⵢⴻⵎⵎⵉ ⵜⴻⵙⵙⵏⵓⴼⴼⴰⵔⴻⴷ ⴰⵖⴻⵎⴱⵓⴱ ⵏⵏⴻⴽ,
ⵓⵛⴰ ⵜⵃⴻⵙⵙⴱⴻⴷ ⴰⵢⵉ ⴷ ⵍⴻⵄⴷⵓ ⵏⵏⴻⴽ? ■
25 ⵎⴰ ⵜⴻⵅⵙⴻⴷ ⴰⴷ ⵜⴻⵙⵙⴻⵏⵅⴻⵍⵄⴻⴷ ⵉⵛⵜ ⵏ ⵜⴼⴰⵔⵛⵜ ⵉ ⵉⵄⴰⵔⵔⴻⵏ ⵓⵚⴻⵎⵎⵉⴹ ⵙⵙⴰ ⵖⴰⵔ ⴷⴰ,
ⵎⴰ ⵜⴻⵅⵙⴻⴷ ⴰⴷ ⵜⴻⴹⴼⴰⵔⴻⴷ ⵉⵖⴻⴵ ⵢⵓⵥⵖⴻⵏ?
26 ⵎⴰⵖⴰⵔ ⵜᵉⵜⵜⴰⵔⵉⴷ ⵅⴰⴼⵉ ⵜⵉⵎⴻⵙⵍⴰⵢⵉⵏ ⵜⵉⵎⴰⵔⵥⴰⴳⵉⵏ,
ⵓ ⵜⴱⴻⵟⵟⵉⴷ ⴰⵢⵉ ⴷⴷⵏⵓⴱ ⵏ ⵜⴻⵎⵥⵉ ⵉⵏⵓ. ■
27 ⵜⴻⵙⵙⵔⵓⵙⵉⴷ ⵉⴹⴰⵔⴻⵏ ⵉⵏⵓ ⴷⴻⴳ ⵓⴽⴻⵛⵛⵓⴹ,
ⵓⵛⴰ ⵜⵃⴻⵟⵟⵉⴷ ⵎⴰⵔⵔⴰ ⵉⵎⴻⵙⵔⴰⵇ ⵉⵏⵓ.
ⵜⵃⴻⵟⵟⵉⴷ ⵜⵉⵍⴻⵇⵇⴰ ⵏ ⵉⴹⴰⵔⴻⵏ ⵉⵏⵓ, ■
28 ⵏ ⵡⴻⵏⵏⵉ ⵉⴳⴳⵉⵏ ⴰⵎ ⵓⴽⴻⵛⵛⵓⴹ, ⵛⵛⵉⵏ ⵜ ⵉⴽⴻⵛⵛⴰⵡⴻⵏ, ⵅⴻⵏⵏⵉ ⵢⴰⵔⴻⵛⵛⴰ,
ⴰⵎ ⵡⴰⵔⵔⵓⴹ ⵉⵛⵛⴰ ⵉ-ⵜ ⵜⵛⵉⵏⴷⴰ.