ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⵚⵓⴼⴰⵔ
12
1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ: 2 ⴷ ⵜⵉⴷⴻⵜⵜ, ⴽⴻⵏⵏⵉⵡ ⴷ ⵉⵊⵊ ⵏ ⴷⴷⴰⵔⴱ ⵏ ⵍⴳⴻⵏⵙ,
ⴰⵇⴰ ⵜⵉⵖⵉⵜ ⴰⴷ ⵜⴻⵎⵎⴻⵜ ⴰⴽⵉⴷⵡⴻⵎ!
3 ⵏⴻⵛⵛ ⵖⴰⵔⵉ ⵉⵊⵊ ⵏ ⵡⵓⵍ ⴰⵎ ⴽⴻⵏⵏⵉⵡ,
ⵏⴻⵛⵛ ⵡⴰⵔ ⵡⴻⵟⵟⵉⵖ ⴷⴻⴳ ⵓⵎⵇⵓⴷⴷⵉ ⴰⴽⵉⴷⵡⴻⵎ.
ⵡⵉ ⵡⴰⵔ ⵉⵙⵙⵉⵏⴻⵏ ⵎⴰⵔⵔⴰ ⵎⴰⵏ ⴰⵢⴰ?
4 ⵏⴻⵛⵛ ⴰⵎ ⵡⴻⵏⵏⵉ ⵉⴵⴰⵏ ⵉ ⵜⵙⴻⴹⵃⴰⵛ ⵉ ⵓⵎⴻⴷⴷⵓⴽⴽⴻⵍ ⵏⵏⴻⵙ,
ⵏⴻⵛⵛ ⴷ ⵡⴻⵏⵏⵉ ⵜⵓⵖⴰ ⵉⵜⵜⵍⴰⵖⴰⵏ ⵖⴰⵔ ⴰⵔⴻⴱⴱⵉ, ⵓⵛⴰ ⵅⴻⵏⵏⵉ ⵏⴻⵜⵜⴰ ⵉⵙⵍⴰ,
ⵏⴻⵛⵛ ⴷ ⴰⵎⵙⴻⴳⴳⴻⴷ ⴷ ⵡⴻⵏⵏⵉ ⵉⴽⴻⵎⵍⴻⵏ, ⴰⵇⴰ ⴷⴻⵡⵍⴻⵖ ⴷ ⵍⵇⴻⵛⵄⴻⵜ ⵏ ⵜⵙⴻⴹⵃⴰⵛⵜ. ■
5 ‘ⵍⵃⴻⴳⵔⴰ ⴷ ⵜⴰⵙⵖⴰⵔⵜ ⵏ ⵡⴻⵏⵏⵉ ⵉⵜⵜⵡⴰⵔⵥⴰⵏ!’,
ⴰⵎⵎⵓ ⵉ ⵉⵜⵜⵅⴰⵔⵔⴰⵚⴻⵏ ⵢⵉⵏⵏⵉ ⵓⵎⵉ ⵉⵜⵜⵖⵉⵍ ⴰⵇⴰ ⴰⵜⴻⵏ ⴷⵉ ⵍⴰⵎⴰⵏ,
ⵉⵜⵜⵖⵉⵍ ⴰⵙⴻⵏ ⴰⵢⴰ ⵉⵜⵜⵔⴰⵊⴰ ⵉⵏⵏⵉ ⵉⵜⵜⵏⴻⵇⵔⴰⴹⴻⵏ ⴷⴻⴳ ⵉⴹⴰⵔⴻⵏ ⵏⵙⴻⵏ.
6 ⵉⵇⵉⴹⴰⵏ ⵏ ⵉⵎⵜⴻⵃⵃⴰⵢⵢⴻⵏ ⴰⵔⵙⴰⵏ,
ⵓ ⵉⵏⵏⵉ ⵉⵙⴻⵄⵄⴰⵔⴻⵏ ⴰⵔⴻⴱⴱⵉ ⵖⴰⵔⵙⴻⵏ ⴰⵟⵟⴰⵙ ⵏ ⵍⴰⵎⴰⵏ.
ⵎⴰⵛⴰ ⵡⵉ ⵉⵥⴻⵎⵎⴰⵔⴻⵏ ⴰⴷ ⵢⴰⵡⵉ ⴰⵔⴻⴱⴱⵉ ⵙ ⵓⴼⵓⵙ ⵏⵏⴻⵙ? ■
7 ⵙⴻⵇⵙⴰ ⵅⴻⵏⵏⵉ ⵍⵎⴰⵍ, ⴰⴷ ⴰⵛ ⵜ ⵙⵙⵍⴻⵎⴷⴻⵏ,
ⵓ ⵉⵊⴹⴰⴹ ⵏ ⵓⵊⴻⵏⵏⴰ ⴰⴷ ⵛⴻⴽ ⵜ ⵃⴰⵊⴰⵏ.
8 ⵏⵉⵖ ⵅⴻⵥⵥⴰⵔⴻⵖ ⵎⵍⵉⵃ ⵖⴰⵔ ⵜⴻⵎⵎⵓⵔⵜ, ⵓ ⵏⴻⵜⵜⴰⵜ ⴰⴷ ⵛⴻⴽ ⵜⴻⵙⵙⵖⴰⵔ,
ⵓⵍⴰ ⴷ ⵉⵙⴻⵍⵎⴰⵏ ⵏ ⵍⴻⴱⵃⴰⵔ ⴰⴷ ⴰⵛ ⵜ ⵄⴰⵡⴷⴻⵏ.
9 ⵎⴰⵏ ⵡⴻⵏ ⵡⴰⵔ ⵉⵙⵙⵉⵏⴻⵏ ⵎⴰⵔⵔⴰ ⴰⵢⴰ,
ⴰⵇⴰ ⴰⴼⵓⵙ ⵏ ⵙⵉⴷⵉ ⵉ ⵜ ⵉⴳⴳⵉⵏ?
10 ⵏⴻⵜⵜⴰ ⴷ ⵡⴻⵏⵏⵉ ⴷⴻⴳ ⵓⴼⵓⵙ ⵏⵏⴻⵙ ⵉⴵⴰ ⵍⴻⵄⵎⴰⵔ ⵏ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ,
ⵓⵍⴰ ⴷ ⴱⵓⵃⴱⴻⵍ ⵏ ⴽⵓⵍ ⴰⵔⵔⵉⵎⴻⵜ ⵏ ⴱⵏⴰⴷⴻⵎ.
11 ⵎⴰ ⵡⴰⵔ ⵉⵜⵜⵇⴻⴵⵉⴱ ⵓⵎⴻⵥⵥⵓⵖ ⴰⵡⴰⵍⴻⵏ,
ⴰⵎ ⵉⵜⵜⵇⴰⵙⴰ ⵡⴰⵏⴻⵖ ⵎⴰⵛⵛⴰ? ■
12 ⵖⴰⵔ ⵉⵡⴻⵙⵙⵓⵔⴰ ⵉ ⵜⴻⴵⴰ ⵜⵉⵖⵉⵜ,
ⵓ ⴷⵉ ⵜⵓⴷⴰⵔⵜ ⵜⴰⵥⵉⵔⴰⵔⵜ ⵜⴻⴵⴰ ⵍⴻⴼⵀⴰⵎⴻⵜ.
13 ⵏⴻⵜⵜⴰ ⵖⴰⵔⴻⵙ ⵉ ⵜⴻⴵⴰ ⵜⵉⵖⵉⵜ ⴷ ⵊⵊⴻⵀⴷ,
ⵏⴻⵜⵜⴰ ⵖⴰⵔⴻⵙ ⵛⵛⵡⴰⵔ ⴷ ⵍⴻⴼⵀⴰⵎⴻⵜ.
14 ⵅⵥⴰⵔ, ⵎⴰⵍⴰ ⵏⴻⵜⵜⴰ ⵉⵀⴻⴷⴷⴻⵎ, ⵡⴰⵔ ⵉⴱⴻⵏⵏⵉ ⵓⵍⴰ ⴷ ⵉⵊⵊ ⵄⴰⵡⴻⴷ,
ⵎⴰⵍⴰ ⵏⴻⵜⵜⴰ ⵉⴱⴻⵍⵍⴻⵄ ⵅ ⵛⴰ ⵏ ⵢⵉⵊⵊⴻⵏ, ⵡⴰⵔ ⴷ ⴰⵙ ⵢⴰⵔⴻⵥⵥⴻⵎ ⵄⴰⴷ. ■
15 ⵅⵥⴰⵔ, ⵎⴰⵍⴰ ⵏⴻⵜⵜⴰ ⵉⵙⵙⴱⴻⴷⴷ ⴰⵎⴰⵏ, ⴰⴷ ⴰⵥⵖⴻⵏ ⵏⵉⵜⵏⵉ,
ⵎⴰⵍⴰ ⵢⴰⵔⵅⵓ ⴰⵙⴻⵏ, ⴰⴷ ⵙⵙⴻⵏⵇⴻⵍⴱⴻⵏ ⵜⴰⵎⵎⵓⵔⵜ.
16 ⵏⴻⵜⵜⴰ ⵖⴰⵔⴻⵙ ⵊⵊⴻⵀⴷ ⴷ ⵓⴼⴻⴽⴽⵉ,
ⵏⵏⴻⵙ ⴷ ⵡⴻⵏⵏⵉ ⵉⵡⴻⴷⴷⴰⵔⴻⵏ ⵓⵍⴰ ⴷ ⵡⴻⵏⵏⵉ ⵉⵙⵙⵡⴻⴷⴷⴰⵔⴻⵏ.
17 ⵏⴻⵜⵜⴰ ⵉⵜⵜⴻⵊⵊⴰ ⵉⵔⵢⴰⵥⴻⵏ ⵏ ⵛⵛⵡⴰⵔ ⴳⴳⵓⵔⴻⵏ ⵙ ⵍⴻⵃⴼⴰ,
ⵍⵇⵓⴹⴰⵜ ⵉⵜⵜⴰⵔⵔⴰ ⵉ-ⵜⴻⵏ ⴷ ⵉⴱⵓⵀⴰⵍⵉⵢⵢⴻⵏ. ■
18 ⴰⵥⵉⵢⵢⴰⵔ ⵏ ⵉⵊⴻⴵⵉⴷⴻⵏ ⵉⵙⵙⴱⴻⵟⵟⴻⵍ ⵉ-ⵜ,
ⵓ ⵅⴻⵏⵏⵉ ⵏⴻⵜⵜⴰ ⵉⵜⵜⵛⴻⴷⴷⴰ ⵉ-ⵜⴻⵏ ⵙ ⵉⵊⵊ ⵏ ⵡⴻⴱⵢⴰⵙ ⵥⵉ ⵜⴻⵊⵄⵉⵏⵏⴰ ⵏⵙⴻⵏ.
19 ⵏⴻⵜⵜⴰ ⵉⵏⴻⴷⴷⴻⵀ ⵉⴽⴻⵀⵀⴰⵏⴻⵏ ⵙ ⵍⴻⵃⴼⴰ,
ⴰⵢⵜ ⵏ ⵊⵊⴻⵀⴷ ⵉⵖⴻⵟⵟⴻⵔ ⵉ-ⵜⴻⵏ.
20 ⵉⵜⵜⴻⴽⴽⴻⵙ ⴰⵡⴰⵍ ⵉ ⵉⵔⵢⴰⵥⴻⵏ ⵉⵜⵜⵡⴰⵇⴻⴵⴱⴻⵏ,
ⵉ ⵉⵡⴻⵙⵙⵓⵔⴰ ⵉⵜⵜⴻⴽⴽⴻⵙ ⴰⵙⴻⵏ ⵍⴻⴼⵀⴰⵎⴻⵜ. ■
21 ⴰⵙⴻⵃⵇⴰⵔ ⵉⵜⵜⵥⴻⴵⴰⵄ ⵉ-ⵜ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ,
ⵉ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⵉⵙⵙⴰⵔⴻⵅⵅⵓ ⴰⵙⴻⵏ ⴰⴱⵢⴰⵙ. ■
22 ⵉⵎⵓⵛⴰⵏ ⵢⵓⴵⵖⴻⵏ ⵏ ⵜⴰⴵⴻⵙⵜ ⵉⵜⵜⵄⴰⵔⵔⴰ ⵅⴰⵙⴻⵏ,
ⴷ ⵜⵉⵍⵉ ⵏ ⵍⵎⴻⵡⵜ ⵉⵙⵙⵓⴼⴼⵓⵖ ⵉ-ⵜⵜ ⵖⴰⵔ ⵜⴼⴰⵡⵜ. ■
23 ⵍⴻⴳⵏⵓⵙ ⵉⵙⴻⴻⵎⵖⴰⵔ ⵉ-ⵜⴻⵏ ⵓⵛⴰ ⵉⵖⴻⵟⵟⴻⵔ ⵉ-ⵜⴻⵏ,
ⵏⴻⵜⵜⴰ ⵉⵜⵜⴱⴻⵥⵥⴰⵄ ⵍⴻⴳⵏⵓⵙ ⵓⵛⴰ ⵉⵏⴻⴷⴷⴻⵃ ⵉ-ⵜⴻⵏ.■
24 ⵉⵜⵜⴻⴽⴽⴻⵙ ⵓⵍ ⵉ ⵉⵥⴻⴵⵉⴼⴻⵏ ⵏ ⵍⴳⴻⵏⵙ ⵅ ⵜⴻⵎⵎⵓⵔⵜ,
ⵉⵙⵙⵡⴻⴷⴷⴰⵔ ⵉ-ⵜⴻⵏ ⴷⵉ ⵜⵏⴻⵥⵔⵓⴼⵜ ⵎⴰⵏⵉ ⵡⴰⵔ ⵉⴵⵉ ⵡⴻⴱⵔⵉⴷ. ■
25 ⵏⵉⵜⵏⵉ ⵜⴻⵎⵀⴰⴼⴰⵏ ⴷⴰ ⴷ ⴷⵉⵀⴰ ⴷⵉ ⵜⴰⴵⴻⵙⵜ, ⵎⴰⵏⵉ ⵡⴰⵔ ⵜⴻⴵⵉ ⵜⴼⴰⵡⵜ,
ⵏⴻⵜⵜⴰ ⵉⵜⵜⴻⵊⵊⴰ ⵉ-ⵜⴻⵏ ⴰⴷ ⵎⵀⴰⴼⴰⵏ ⴰⵎ ⵉⵎⴻⵙⵛⴰⵔⴻⵏ.