ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⵉⵍⵉⴼⴰⵥ - ⴰⴼⴻⵇⵇⵓⵙ ⵏⵏⴻⵙ
6
1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ: 2 ⴰ, ⵎⵍⵉ ⵎⴰⵛⴰ ⵎⴻⵄⵍⵉⴽ ⵉⵜⵜⵡⴰⵡⵥⴻⵏ ⵍⵀⴻⵎⵎ ⵉⵏⵓ,
ⵎⵍⵉ ⵊⵊⵉⵏ ⴰⴷ ⵉⴳⴻⵄⵄⴻⴷ ⵅ ⵍⵎⵉⵥⴰⵏ ⵓⵍⴰ ⴷ ⵍⴻⵖⴱⴻⵏ ⵉⵏⵓ ⴰⴽⵉⴷⴻⵙ ⵉⵎⵓⵏ!
3 ⵎⴰⵖⴰⵔ ⵍⴻⵅⵅⵓ ⴰⵇⴰ-ⵜ ⵉⴷⵇⴻⵍ ⵅ ⵢⴻⵊⴷⵉ ⵏ ⵍⴻⴱⵃⵓⵔ,
ⵅ ⵓⵢⴰ ⵜⵜⴻⴼⴼⵖⴻⵏ ⵡⴰⵡⴰⵍⴻⵏ ⵉⵏⵓ ⵏⵀⵍⴰ ⴰⵅⴻⵎⵎⴻⵎ. ■
4 ⵎⴰⵖⴰⵔ ⵏⵏⵓⵖⴻⵏⵜ ⴷⴰⵢⵉ ⴼⵍⵉⵜⵛⴰⵜ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ,
ⴰⵍⴰⵎⵉ ⴱⵓⵃⴱⴻⵍ ⵉⵏⵓ ⵉⵙⴻⵙⵙ ⴰⵔⵔⵀⴰⵊ ⵏⵙⴻⵏⵜ.
ⵉⵏⴻⵅⵍⵉⵄⴻⵏ ⵥⵉ ⴰⵔⴻⴱⴱⵉ ⴽⴽⴰⵔⴻⵏ-ⴷⴷ ⴰⴽⵉⴷⵉ. ■
5 ⵎⴰ ⵉⵙⵙⵃⵓⵏⴷⵔⵓⵜ ⵡⴻⵖⵢⵓⵍ ⵏ ⵍⴻⵅⵍⴰ ⵖⴰⵔ ⴰⵔⵔⴱⵉⵄ ⴰⵥⵉⵥⴰ?
ⵏⵉⵖ ⵉⵙⵙⵎⵓⵀⵔⵓⵜ ⵓⴼⵓⵏⴰⵙ ⵖⴰⵔ ⵀⴻⴷⴷⵓ ⵏⵏⴻⵙ?
6 ⵎⴰⵛⵛⴰ ⴱⵍⴰ ⴰⵍⴻⴷⴷⵉ ⵎⴰ ⴰⴷ ⵜ ⵢⴻⵛⵛ ⴱⵏⴰⴷⴻⵎ ⴱⵍⴰ ⵜⴰⵎⴻⴵⴰⵃⵜ?
ⵏⵉⵖ ⴰⵇⴰ ⴷⵉⵏ ⴰⵍⴻⴷⴷⵉ ⴷⵉ ⵍⵎⴻⵃⵃ ⴰⵛⴻⵎⵍⴰⵍ ⵏ ⵜⵎⴻⴵⴰⵞ?
7 ⵎⵉⵏ ⵢⵓⴳⵉ ⵍⴻⵄⵎⴰⵔ ⵉⵏⵓ ⴰⴷ ⵜ ⵉⵃⴰⴷⴰ,
ⵍⴻⵅⵅⵓ ⴰⵢⴰ ⵎⴰⵔⵔⴰ ⵉ ⵏⴻⵛⵛ ⴰⵎ ⵎⴰⵛⵛⴰ ⵉⵖⵓⵎⵎⴻⵏ.
8 ⵎⵍⵉ ⴷⴷ ⵖⴰ ⵢⴰⵙ ⵎⵉⵏ ⴰⵔⴻⵥⵥⵓⵖ,
ⵉⵡⴰ, ⵉⵡⵛⴰ ⴰⵔⴻⴱⴱⵉ ⵎⵉⵏ ⵙⵉⵜⵜⵉⵎⴻⵖ.
9 ⵎⵍⵉ ⵜⵓⵖⴰ ⵉⵅⵙ ⵙⵉⴷⵉ ⵎⴰⵃⴻⵏⴷ ⴰⴷ ⴰⵢⵉ ⵉⵍⴱⴻⵥ,
ⵎⴰⵃⴻⵏⴷ ⴰⴷ ⵉⵙⵙⴰⵔⵅⵓ ⴰⴼⵓⵙ ⵏⵏⴻⵙ ⵓ ⵎⴰⵃⴻⵏⴷ ⴰⴷ ⴰⵢⵉ ⵉⵇⴻⵙⵙ.
10 ⵎⴰⵏ ⴰⵢⴰ ⴰⴷ ⴰⵢⵉ ⵢⵉⵍⵉ ⵄⴰⴷ ⴷ ⴰⴼⴻⵡⵡⴻⵊ,
ⴰⴷ ⴰⵢⵉ ⵉⵏⵄⴻⵛ ⴷⵉ ⵍⴻⵃⵔⵉⵇ ⵏⵏⵉ ⵡⴰⵔ ⵅⴰⴼⵉ ⵉⵙⵙⵄⵉⵥⵥⵉ ⵛⴰ,
ⵎⴰⵖⴰⵔ ⵡⴰⵔ ⵏⴽⴰⵔⴻⵖ ⵛⴰ ⴰⵡⴰⵍⴻⵏ ⵏ ⵓⵎⵇⴻⴷⴷⴰⵙ.
11 ⵎⵉⵏ ⵉⵄⵏⴰ ⵊⵊⴻⵀⴷ ⵉⵏⵓ, ⴰⵇⴰ ⵥⴻⵎⵎⴰⵔⴻⵖ ⴰⴷ ⵔⴰⵊⵉⵖ ⵄⴰⴷ?
ⵏⵉⵖ ⵎⵉⵏ ⵉⵄⵏⴰ ⵓⵏⴻⴳⴳⴰⵔⵓ ⵉⵏⵓ, ⴰⴷ ⵙⴻⴱⴱⴰⵍⴻⵖ ⵉⵅⴻⴼ ⵉⵏⵓ ⵄⴰⴷ?
12 ⵎⴰ ⵊⵊⴻⵀⴷ ⵉⵏⵓ ⴰⵎ ⵊⵊⴻⵀⴷ ⵏ ⵉⵥⵔⴰ?
ⵎⴰ ⴰⵔⵔⵉⵎⴻⵜ ⵉⵏⵓ ⴰⵎ ⵏⵏⵃⴰⵙ?
13 ⵎⴰ ⵡⴰⵔ ⴵⵉⵖ ⵇⴰⵄ ⴱⵍⴰ ⵜⵡⵉⵥⴰ ⵙ ⵢⵉⵅⴻⴼ ⵉⵏⵓ,
ⵎⴰ ⵡⴰⵔ ⵅⴰⴼⵉ ⵉⵜⵜⵡⴰⴽⴽⴻⵙ ⵓⴼⴻⴽⴽⵉ ⵇⴰⵄ?
14 ⵡⴻⵏⵏⵉ ⵓⵎⵉ ⵉⵇⴹⴻⵄ ⵍⴰⵢⴰⵙ ⵉⵜⵜⵅⴻⵚⵚⴰ ⴰⵙ ⵜⴰⵎⴻⵅⵙⵉⵡⵜ ⵉⵛⵓⵡⵡⴰⵔⴻⵏ ⵥⴻⴳ ⵓⵎⴻⴷⴷⵓⴽⴽⴻⵍ ⵏⵏⴻⵙ,
ⵎⴰⵍⴰ ⵍⵍⴰ ⵉⵥⴻⵎⵎⴰⵔ ⴰⴷ ⵢⴻⵊⵊ ⵜⵉⴳⴳⵯⵓⴷⵉ ⵥⴻⴳ ⵓⵎⵥⴻⵎⵎⴰⵔ ⵅ ⴽⵓⵍⵛⵉ.
15 ⴰⵢⵜⵎⴰ ⴱⴰⵏⴻⵏ-ⴷⴷ ⴷ ⵉⵖⴻⴷⴷⴰⵔⴻⵏ ⴰⵎ ⵜⵖⴻⵥⵔⵉⵏ ⴷⴻⴳ ⵉⴷⵓⵔⴰⵔ,
ⴰⵎ ⵜⴰⵙⵙⵓⵜ ⵏ ⵜⵖⴻⵥⵔⵉⵏ ⵏⵏⵉ ⵉⵄⴻⴷⴷⵓⵏ ⴷⴻⵖⵢⴰ,
16 ⵉⵏⵏⵉ ⵉⵜⵜⴱⴰⵔⵔⵛⵉⵏⴻⵏ ⵙ ⵡⴻⵊⵔⵉⵙ,
ⵓ ⵉⵏⵏⵉ ⴷⵉ ⵉⵙⵙⵏⵓⴼⴼⴰⵔ ⵡⴻⴷⴼⴻⵍ ⵉⵅⴻⴼ ⵏⵏⴻⵙ.
17 ⴷⴻⴳ ⵡⵓⵙⵙⴰⵏ ⵏⵏⵉ ⴷⵉ ⴷⴻⵡⵍⴻⵏⵜ ⵃⵚⴰⵔⴻⵏⵜ, ⴱⴻⴷⴷⴻⵏⵜ,
ⵅⵎⵉ ⵃⴻⵎⵎⴰⵏⵜ, ⵜⵜⴰⵥⵖⴻⵏⵜ, ⵉⵎⵃⴰ ⵡⴻⵎⵛⴰⵏ ⵏⵙⴻⵏⵜ.
18 ⵉⴱⵔⵉⴷⴻⵏ ⵏ ⵜⴻⵛⵍⵉ ⵏⵙⴻⵏ ⴼⴰⵔⵖⴻⵏ,
ⴳⴻⵄⵄⴷⴻⵏ ⴷⵉ ⵍⴻⵄⵡⵉⵏ ⵓⵛⴰ ⵡⴻⴷⴷⴰⵔⴻⵏ.
19 ⵉⵎⵙⴻⴱⵔⵉⴷⴻⵏ ⵥⵉ ⵜⴰⵢⵎⴰ ⵇⵇⵉⵎⴻⵏ ⵜⵜⵛⴻⵄⵄⴰⵢⴻⵏ,
ⵉⴽⴰⵔⴰⵡⴰⵏⴻⵏ ⵥⵉ ⵛⴰⴱⴰ ⵜⵜⵔⴰⵊⴰⵏ ⵜⴻⵏⵜ.
20 ⵏⵉⵜⵏⵉ ⵜⵜⵡⴰⵛⴻⵎⵜⴻⵏ ⴷⴻⴳ ⵓⵜⴻⵛⵍⵉ ⵏⵏⵉ ⵖⴰⵔⵙⴻⵏ.
ⵓⵙⵉⵏ-ⴷⴷ ⵖⴰⵔ ⵜⵖⴻⵥⵔⵉⵏ ⴷⴻⴳ ⵉⴷⵓⵔⴰⵔ ⵓⵛⴰ ⴱⴰⵔⵔⵇⴻⵏ.
21 ⵙ ⵜⵉⴷⴻⵜⵜ, ⵍⴻⵅⵅⵓ ⵜⴷⴻⵡⵍⴻⵏⵜ ⴽⴻⵏⵏⵉⵏⵜ ⴷ ⵡⴰⵍⵓ,
ⵜⴻⵥⵔⵉⵏⵜ ⴰⵔⵥⵉⵢⵢⴻⵜ ⵉⵏⵓ ⵓⵛⴰ ⵜᵉⴳⴳⵯⴻⴷⴻⵏⵜ.
22 ⵎⴰ ⵏⵏⵉⵖ: ‘ⴰⵡⵢⴻⵎ ⴰⵢⵉ-ⴷⴷ ⵛⴰ!’
ⵏⵉⵖ: ‘ⵡⵛⴻⵎ ⴰⵢⵉ ⵜⵉⵔⵥⵉⴼⵉⵏ ⵥⴻⴳ ⵡⴰⴳⵍⴰ ⵏⵡⴻⵎ!’
23 ⵏⵉⵖ: ‘ⴼⴻⴽⴽ ⴰⵢⵉ ⵥⴻⴳ ⵓⴼⵓⵙ ⵏ ⵡⴻⵏⵏⵉ ⵉⵃⴻⵚⵚⴰⵔⴻⵏ!’
ⵏⵉⵖ: ‘ⴼⴷⵉ ⴰⵢⵉ ⵥⴻⴳ ⵓⴼⵓⵙ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ!’
24 ⵙⵖⴰⵔ ⴰⵢⵉ, ⵅⴻⵏⵏⵉ ⴰⴷ ⵙⵙⴻⵖⴷⴻⵖ,
ⵙⵛⴻⵏ ⴰⵢⵉ ⵎⵉⵏ ⴷⵉ ⵡⴻⴷⴷⴰⵔⴻⵖ!
25 ⵎⴰⵎⵎⴻⵛ ⵊⴻⵀⵀⴷⴻⵏ ⵡⴰⵡⴰⵍⴻⵏ ⵢⴻⵛⵏⴰⵏ,
ⵎⴰⵛⴰ ⵎⵉⵏ ⵅⴻⴼ ⴰⵡⴻⴱⴱⴻⵅ ⵏⵡⴻⵎ?
26 ⵎⴰ ⵜᵉⵜⵜⵅⴰⵔⵔⵚⴻⵎ ⴷⴻⴳ ⵡⴰⵡⴰⵍⴻⵏ ⵎⴰⵃⴻⵏⴷ ⴰⴷ ⴰⵢⵉ ⵜⵡⴻⴱⴱⵅⴻⵎ?
ⵎⴰ ⵅⴻⵏⵏⵉ ⴰⵡⴰⵍⴻⵏ ⵏ ⵡⴻⵏⵏⵉ ⵓⵎⵉ ⵇⴻⴹⵄⴻⵏ ⵍⴰⵢⴰⵙ ⴰⵎ ⵍⴻⵄⵡⵉⵏ ⵉ ⴽⴻⵏⵏⵉⵡ?
27 ⵄⴰⴷ ⵅ ⵢⵉⵊⵊ ⵏ ⵓⵏⵉⴱⵓ ⴰⵢⵓⵊⵉⵍ ⴰⴷ ⵅⴰⵙ ⵜⴻⵏⴹⴰⵔⴻⵎ ⵜⴰⵇⴻⴷⴷⵓⵃⵜ,
ⵓ ⵄⴰⴷ ⵅ ⵢⵉⵊⵊ ⵏ ⵓⵎⴻⴷⴷⵓⴽⴽⴻⵍ ⵏⵡⴻⵎ ⴰⴷ ⵅⴰⵙ ⵜⴻⴳⴳⴻⵎ ⵜⴰⵎⴻⵄⵎⵓⵞ.
28 ⵅⴻⵏⵏⵉ ⵍⴻⵅⵅⵓ, ⵎⴰⵍⴰ ⵜⴻⵅⵙⴻⵎ, ⵃⴹⴰⵎ ⵅⴰⴼⵉ ⵎⵍⵉⵃ,
ⵏⴻⵛⵛ ⵡⴰⵔ ⵅⴰⵡⴻⵎ ⵙⵙⵅⴰⵔⵔⵉⵇⴻⵖ ⴷⴻⴳ ⵓⵖⴻⵎⴱⵓⴱ ⵏⵡⴻⵎ.
29 ⵇⴻⴵⴱⴻⵎ ⴰⵢⵉ, ⵡⴰⵔ ⵉⵄⴻⴷⴷⴻⵍ ⴰⴷ ⵢⵉⵍⵉ ⴷⴷⴻⴵ.
ⵇⴻⴵⴱⴻⵎ ⴰⵢⵉ ⵄⴰⵡⴻⴷ, ⵜⴰⵙⴻⴳⴷⴰ ⵉⵏⵓ ⵜⴱⴻⴷⴷ ⵄⴰⴷ ⵏⵉⵛⴰⵏ.
30 ⵎⴰ ⴰⵇⴰ ⴷⵉⵏ ⵍⵖⴻⵛⵛ ⵅ ⵢⵉⵍⴻⵙ ⵉⵏⵓ?
ⵎⴰ ⵡⴰⵔ ⵉⵜⵜⵍⴻⴷⴷⵉ ⵡⴰⵏⴻⵖ ⵉⵏⵓ ⵅ ⵎⵉⵏ ⵡⴰⵔ ⵉⵃⵍⵉⵏ?