5
1 ⵍⴰⵖⴰ ⵎⴰⵛⴰ! ⵎⴰ ⴷⵉⵏ ⵛⴰ ⵏ ⵢⵉⵊⵊⴻⵏ ⵉ ⵅⴰⴽ ⴷⴷ ⵖⴰ ⵢⴰⵔⵔⴻⵏ? ⵖⴰⵔ ⵎⴰⵏ ⵥⴻⴳ ⵉⵎⵇⴻⴷⴷⴰⵙⴻⵏ ⵉ ⵖⴰ ⵜⵙⴻⵡⴹⴻⴷ?
2 ⵎⵉⵏⵥⵉ ⴰⵅⴻⵢⵢⴻⵇ ⵉⵏⴻⵇⵇ ⴰⴱⵓⵀⴰⵍⵉ,
ⵓ ⵜⵓⵙⵎⵉ ⵜⵏⴻⵇⵇ ⴰⵇⵓⴱⴱⴰⵏⵉ.
3 ⵥⵔⵉⵖ ⵉⵊⵊ ⵏ ⵓⴱⵓⵀⴰⵍⵉ ⵉⴹⵍⴻⵇ ⵉ ⵡⴻⵥⵡⴰⵔ,
ⵎⴰⵛⴰ ⵅ ⵉⵛⵜ ⵏ ⵍⵖⴻⴼⵍⴻⵜ ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵏⴻⵄⵍⴻⵖ ⵜⴰⵥⴻⴷⴷⵉⵖⵜ ⵏⵏⴻⵙ.
4 ⵉⴳⴳⵯⴻⵊⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵅ ⵓⵙⴻⵏⵊⴻⵎ,
ⵜⵜⵡⴰⴷⴷⵥⴻⵏ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ
ⵓⵛⴰ ⵡⴰⵔ ⵜⵓⵖⵉ ⴷⵉⵏ ⵡⵉ ⵜⴻⵏ ⵉ ⵖⴰ ⵉⵙⵙⵏⴻⵊⵎⴻⵏ,
5 ⵓⵎⵉ ⵉⵛⵛⴰ ⵓⵎⴻⵀⵢⵓⴼ ⵚⵚⴰⴱⴻⵜ ⵏⵏⴻⵙ,
- ⵉⵙⵙⵓⴼⴼⴻⵖ ⵉ-ⵜ-ⵉ-ⴷⴷ ⵄⴰⴷ ⵥⴻⴳ ⵉⵙⴻⵏⵏⴰⵏⴻⵏ -,
ⵓ ⵉⵚⴰⵔⴹ ⵓⵅⴻⵡⵡⴰⵏ ⴰⴳⵍⴰ ⵏⵙⴻⵏ.
6 ⵎⴰⵖⴰⵔ ⵡⴰⵔ ⵉⴵⵉ ⵥⵉ ⵜⵄⴻⵊⵊⴰⵊⵜ ⵉ ⵥⵉ ⴷⴷ-ⵉⵜⵜⴻⴽⴽ ⵍⵖⴰⵔ,
ⵓ ⵥⵉ ⵜⴻⵎⵎⵓⵔⵜ ⵡⴰⵔ ⴷⴷ-ⵜⵖⴻⵎⵎⵉ ⵜⴰⵎⴰⵔⴰ ⵡⴰⵔ ⵉⵏⴻⴼⴼⵄⴻⵏ,
7 ⵎⴰⵛⴰ ⴱⵏⴰⴷⴻⵎ ⵉⵜⵜⵡⴰⵅⵍⴻⵇ-ⴷⴷ ⵉ ⵜⴰⵎⴰⵔⴰ ⵡⴰⵔ ⵉⵏⴻⴼⴼⵄⴻⵏ,
ⴰⵎ ⵜⵛⴻⵄⵄⴰⵍⵉⵏ ⵏ ⵜⵎⴻⵙⵙⵉ ⵟⵟⴰⵡⴻⵏⵜ ⵖⴰⵔ ⵓⵊⴻⵏⵏⴰ.
8 ⵏⴻⵛⵛ ⵎⴰⵛⴰ ⵉⵍⵉ ⴰⵔⵥⵓⵖ ⴰⵔⴻⴱⴱⵉ,
ⴰⴷ ⵙⵙⵉⵡⴹⴻⵖ ⵜⴰⵎⴻⵙⵍⴰⵛⵜ ⵉⵏⵓ ⵖⴰⵔ ⴰⵔⴻⴱⴱⵉ,
9 ⵡⴻⵏⵏⵉ ⵉⵜⵜⴻⴳⴳⴻⵏ ⵜⵉⵎⴻⵙⵍⴰⵢⵉⵏ ⵜⵉⵎⴻⵇⵇⵔⴰⵏⵉⵏ,
ⵡⴰⵔ ⴷⵉⵏ ⵡⵉ ⵜⴻⵏⵜ ⵉ ⵖⴰ ⵉⴼⴻⵀⵎⴻⵏ,
ⵉⵜⵜⴻⴳⴳ ⵍⵎⵓⵄⵊⵉⵥⴰⵜ ⵉ ⵡⴰⵔ ⵉⵥⴻⵎⵎⴰⵔ ⴰⴷ ⵜⵜⵡⴰⵃⴻⵙⴱⴻⵏⵜ. ■
10 ⵉⵙⵙⴰⴽⴽⵯⴰⴹ-ⴷⴷ ⴰⵏⵥⴰⵔ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ,
ⵓⵛⴰ ⵉⵙⵙⴻⴽⴽⴰ ⴰⵎⴰⵏ ⵅ ⵡⵓⴷⴻⵎ ⵏ ⵉⵢⵢⴰⵔⴻⵏ,
11 ⵃⵉⵎⴰ ⴰⴷ ⵉⵙⵙⴳⴻⵄⵄⴻⴷ ⵉⵎⵡⴰⴹⵄⴻⵏ,
ⵓⵛⴰ ⵉⵏⵏⵉ ⵉⵛⴻⴹⵏⴻⵏ ⴰⴷ ⵜⴻⵏ ⵙⵙⵓⵄⵍⴰⵏ ⵖⴰⵔ ⵍⴰⵎⴰⵏ. ■
12 ⵏⴻⵜⵜⴰ ⵉⵙⵙⴱⴻⵟⵟⴻⵍ ⵉⵏⵡⴰⵢⴻⵏ ⵏ ⵉⵃⵔⴰⵢⵎⵉⵢⵢⴻⵏ,
ⴰⵍⴰⵎⵉ ⵉⴼⴰⵙⵙⴻⵏ ⵏⵙⴻⵏ ⵡⴰⵔ ⵥⴻⵎⵎⴰⵔⴻⵏ ⴰⴷ ⴳⴳⴻⵏ ⵡⴰⵍⵓ. ■
13 ⵉⵎⵉⵖⵉⵙⴻⵏ ⵉⵎⴻⵏⵏⴻⵄ ⵉ-ⵜⴻⵏ ⴷⵉ ⵜⴻⵃⵔⴰⵢⵎⴻⵛⵜ ⵏⵙⴻⵏ,
ⵓⵛⴰ ⵉⵜⵜⵡⴰⵙⴱⴻⵟⵟⴻⵍ ⵛⵛⵡⴰⵔ ⵏ ⵉⵃⵔⴰⵢⵎⵉⵢⵢⴻⵏ. ■
14 ⴷⴻⴳ ⵓⵥⵉⵍ ⵎⵎⵙⴰⴳⴰⵔⴻⵏ ⴰⴽ-ⴷ ⵜⴰⴵⴻⵙⵜ,
ⵓⵛⴰ ⴷⵉ ⵟⵟⵃⴰ ⵏ ⵓⵥⵉⵍ ⵜⵜⴼⴰⴼⴰⵏ ⴰⵎ ⵜⵜⴼⴰⴼⴰⵏ ⴷⵉ ⴵⵉⵍⴻⵜ. ■
15 ⵏⴻⵜⵜⴰ ⵉⵙⵙⴻⵏⵊⴰⵎ ⵥⵉ ⵙⵙⵉⴼ ⵉ ⴷⴷ-ⵉⵜⵜⴻⴼⴼⵖⴻⵏ ⵥⴻⴳ ⵓⵇⴻⵎⵎⵓⵎ ⵏⵙⴻⵏ,
ⵓⵍⴰ ⴷ ⴰⵎⴻⵥⵍⵓⴹ ⵥⴻⴳ ⵓⴼⵓⵙ ⵏ ⵡⴻⵏⵏⵉ ⵉⵊⴻⵀⴷⴻⵏ.
16 ⴰⵎⵎⵓ ⵉ ⵢⴻⴵⴰ ⵍⴰⵢⴰⵙ ⵉ ⵓⵎⴻⵥⵍⵓⴹ,
ⵓⵛⴰ ⴷⴷⴻⴵ ⴰⴷ ⵉⴱⴻⵍⵍⴻⵄ ⴰⵇⴻⵎⵎⵓⵎ ⵏⵏⴻⵙ. ■
17 ⵅⵥⴰⵔ, ⵙⵙⴻⵄⴷ ⵏ ⵡⴻⵔⵢⴰⵥ ⵡⴻⵏⵏⵉ ⵉⵙⴻⴳⴳⴻⵎ ⴰⵔⴻⴱⴱⵉ.
ⵙ ⵓⵢⴰ ⵡⴰⵔ ⵜⴻⵙⵙⴻⵃⵇⵉⵔⵉ ⵛⴰ ⵜⵜⴰⵔⴱⵉⵢⵢⴻⵜ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ! ■
18 ⵎⴰⵖⴰⵔ ⵏⴻⵜⵜⴰ ⵉⵙⵙⵢⴻⵥⵥⴻⵎ ⵓ ⵉⵜⵜⵛⴻⴷⴷⴰ,
ⵉⵛⵛⴰⵜ, ⵓⵛⴰ ⵅⴻⵏⵏⵉ ⵉⴼⴰⵙⵙⴻⵏ ⵏⵏⴻⵙ ⵙⵙⴳⴻⵏⴼⴰⵏ. ■
19 ⴷⵉ ⵙⴻⵜⵜⴰ ⵏ ⵍⴻⵃⵚⴰⵔⴰⵜ ⴰⴷ ⵛⴻⴽ ⵉⴼⴻⴽⴽ,
ⴷⵉ ⵜⴻⵏⵏⵉ ⵡⵉⵙⵙ ⵙⴻⴱⵄⴰ ⵡⴰⵔ ⴳⴳⵓⵔ ⴰⴷ ⵛⴻⴽ ⵉⵍⵇⴻⴼ ⵍⵖⴰⵔ. ■
20 ⴷⵉ ⵍⴰⵥ ⴰⴷ ⵛⴻⴽ ⴷⴷ-ⵉⵙⵙⴻⵏⵊⴻⵎ ⵥⵉ ⵍⵎⴻⵡⵜ,
ⴷⴻⴳ ⵓⵎⴻⵏⵖⵉ ⵥⵉ ⵜⵉⵢⵢⵉⵜⴰ ⵏ ⵙⵙⵉⴼ.
21 ⴰⴷ ⵜⵉⵍⵉⴷ ⴷⵉ ⵍⴰⵎⴰⵏ ⵥⵥⴰⵜ ⵉ ⵓⵔⴻⴽⴽⵓⴹ ⵏ ⵢⵉⵍⴻⵙ,
ⵡⴰⵔ ⵜᵉⵜⵜⴻⴳⴳⵯⴻⴷⴻⴷ ⵛⴰ ⵥⴻⴳ ⵡⴰⵔⴻⴷⴷⴻⴵ ⵎⴰⵍⴰ ⵢⵓⵙⴰ-ⴷⴷ.
22 ⵅ ⵡⴰⵔⴻⴷⴷⴻⴵ ⴷ ⵍⴰⵥ ⵜⵥⴻⵎⵎⴰⵔⴻⴷ ⴰⴷ ⵜⴹⴻⵃⵛⴻⴷ,
ⵥⵉ ⵍⴻⵡⵃⵓⵛ ⵏ ⵍⴻⵅⵍⴰ ⵏ ⵜⴻⵎⵎⵓⵔⵜ ⵡⴰⵔ ⵜᵉⵜⵜⴻⴳⴳⵯⴻⴷⴻⴷ.
23 ⵎⴰⵖⴰⵔ ⵜⵇⴻⴹⵄⴻⴷ ⵍⵄⴰⵀⴷ ⴰⴽ-ⴷ ⵉⵥⵔⴰ ⵏ ⵢⴻⵢⵢⴰⵔ,
ⵅⴻⵏⵏⵉ ⵍⴻⵡⵃⵓⵛ ⵏ ⵍⴻⵅⵍⴰ ⴰⴷ ⴽⵉⴷⴻⴽ ⴷⴷⴰⵔⴻⵏ ⴷⵉ ⵍⴻⵀⵏⴰ. ■
24 ⴰⴷ ⵜⴰⵔⴳⴱⴻⴷ ⴰⵇⴰ ⵍⴻⵀⵏⴰ ⴷ ⴰⵇⵉⴹⵓⵏ ⵏⵏⴻⴽ,
ⴰⴷ ⵜⴱⴻⵇⵇⵛⴻⴷ ⵜⴰⵥⴻⴷⴷⵉⵖⵜ ⵏⵏⴻⴽ, ⴰⴷ ⵜⴰⴼⴻⴷ ⵡⴰⵔ ⵛⴻⴽ ⵉⵜⵜⵅⴻⵚⵚⵉ ⵡⴰⵍⵓ.
25 ⵛⴻⴽ ⴰⴷ ⵜⴻⵙⵙⵏⴻⴷ ⴰⵇⴰ ⴰⵔⵔⴰⵡ ⵏⵏⴻⴽ ⴰⵟⵟⴰⵙ,
ⵓ ⴷⴷⵓⵔⵔⵢⴻⵜ ⵏⵏⴻⴽ ⴰⵎ ⵡⴻⴼⵙⵓ ⴰⵥⵉⵥⴰ ⵏ ⵜⴻⵎⵎⵓⵔⵜ.
26 ⴰⴷ ⵜⴰⴷⴼⴻⴷ ⵖⴰⵔ ⵡⴻⵏⴹⴻⵍ ⴷⵉ ⵜⴻⵡⵙⴰⵔ,
ⴰⵎ ⵎⴰⵎⵎⴻⵛ ⵙⵙⴳⴻⵄⵄⴷⴻⵏ ⵉⵊⵊ ⵏ ⵓⵄⵓⵔⵔⵉⵛ ⵏ ⵜⵇⴻⴱⴱⵉⴹⵉⵏ ⵏ ⵉⵎⴻⵏⴷⵉ
ⵖⴰⵔ ⵓⵏⴻⴷⵔⴰⵔ ⴷⵉ ⵍⵃⴰⵍ ⵏⵏⴻⵙ.
27 ⵅⵥⴰⵔ, ⵎⴰⵏ ⴰⵢⴰ, ⴰⵇⴰ ⵏⴻⵛⵛⵉⵏ ⵏⴰⵔⵥⵓ ⴷⴰⵢⴻⵙ, ⴰⵎⵎⵓ ⵉ ⵜⴻⴵⴰ!
ⵙⴻⵍ ⵖⴰⵔⴻⵙ ⵓⵛⴰ ⵙⵙⴻⵏ ⵉ-ⵜ ⴷⴻⴳ ⵢⵉⵅⴻⴼ ⵏⵏⴻⴽ!