ⴰⵢⵓⴱ ⵢⴰⵔⵏⵉ ⴷⵉ ⵜⴻⵎⵡⴰⵔⵔⵉⵜ ⵏⵏⴻⵙ ⵉ ⵉⵍⵉⴼⴰⵥ: ⵎⴰ ⵡⴰⵔ ⵉⴷⴷⴰⵔ ⴱⵏⴰⴷⴻⵎ ⵜⵓⴷⴰⵔⵜ ⵜⴻⵇⵙⴻⵃ?
7
1 ⵎⴰ ⵡⴰⵔ ⴷⵉⵏ ⵉⴵⵉ ⵓⵎⴻⵏⵖⵉ ⵉⵜⵜⵅⴻⵚⵚⴰⵏ ⴰⴷ ⵜ ⵉⵎⵏⴻⵖ ⴱⵏⴰⴷⴻⵎ ⵅ ⵜⴻⵎⵎⵓⵔⵜ, ⵓ ⵎⴰ ⵡⴰⵔ ⴵⵉⵏ ⵡⵓⵙⵙⴰⵏ ⵏⵏⴻⵙ ⴰⵎ ⵡⵓⵙⵙⴰⵏ ⵏ ⵓⵛⴻⵡⵡⴰⵍ?
2 ⴰⵎ ⵉⵜⵜⵎⴻⵥⵔⵉ ⵉⵎⵙⴻⵖ ⵖⴰⵔ ⵜⵉⵍⵉ,
ⴰⵎ ⵉⵜⵜⵔⴰⵊⴰⵏ ⵓⵛⴻⵡⵡⴰⵔ ⵍⵎⵓⵏⴻⵜ,
3 ⴰⵎⵎⵓ ⴷⴻⵡⵍⴻⵏ ⵉⵢⵓⵔⴻⵏ ⵛⵛⵓⵔⴻⵏ ⵙ ⵓⴱⴰⵔⵔⴻⵇ ⴷ ⵜⴰⵙⵖⴰⵔⵜ ⵉⵏⵓ,
ⵓ ⴵⵢⴰⵍⵉ ⵛⵛⵓⵔⴻⵏⵜ ⵙ ⵜⴰⵎⴰⵔⴰ ⴱⴹⴰⵏ ⴰⵢⵉ ⵜⴻⵏⵜ.
4 ⵅⵎⵉ ⵜⵜⴻⵥⵥⵍⴻⵖ ⵜⵜᵉⵟⵟⵚⴻⵖ, ⵇⵇⴰⵔⴻⵖ
‘ⵎⴻⵍⵎⵉ ⵥⴻⵎⵎⴰⵔⴻⵖ ⴰⴷ ⴽⴽⴰⵔⴻⵖ, ⵎⴻⵍⵎⵉ ⵉ ⵖⴰ ⵜⴻⵄⴷⵓ ⴵⵉⵍⴻⵜ?’
ⵊⵊⵉⵡⵏⴻⵖ ⵙ ⵍⴻⵀⵡⴻⵍ ⴰⵍ ⴷ ⵢⴻⴼⴼⵓ ⵍⵃⴰⵍ.
5 ⴰⵔⵔⵉⵎⴻⵜ ⵉⵏⵓ ⵜⵢⴰⵔⴹ ⴷⴻⴳ ⵉⴽⴻⵛⵛⴰⵡⴻⵏ ⵓ ⴷⵉ ⵜⴻⵇⵛⵓⵔⵉⵏ ⵏ ⵓⵛⴰⵍ,
ⵜⵉⵍⵎⴻⵛⵜ ⵉⵏⵓ ⵜⵇⴻⵟⵟⴰ ⵓ ⵜᵉⵜⵜⴳⴻⵢⵢⴻⵃ.
6 ⴷⴻⵖⵢⴰ ⵅ ⵓⵎⴻⴽⴽⵓⴽ ⵏ ⵓⵅⴻⵢⵢⴰⴹ ⵄⴻⴷⴷⵓⵏ ⵡⵓⵙⵙⴰⵏ ⵉⵏⵓ,
ⵄⴻⴷⴷⵓⵏ ⴱⵍⴰ ⴰⵙⵉⵜⴻⵎ.
7 ⵄⵇⴻⵍ, ⴰⵇⴰ ⵜⵓⴷⴰⵔⵜ ⵉⵏⵓ ⴷ ⴰⵚⵓⴹⵉ ⵏ ⵏⵏⴻⴼⵙ ⵡⴰⵀⴰ,
ⵓ ⵜⵉⵟⵟ ⵉⵏⵓ ⵡⴰⵔ ⵜⵥⴰⵔⵔ ⵄⴻⵎⵎⴰⵔⵚ ⵄⴰⴷ ⵎⵉⵏ ⵉⵚⴻⴱⵃⴻⵏ. ■
8 ⵜⵉⵟⵟ ⵏ ⵡⴻⵏⵏⵉ ⴷ ⴰⵢⵉ ⵉⵜⵜⵡⴰⵍⴰⵏ, ⵡⴰⵔ ⴷ ⴰⵢⵉ ⵜⵥⴰⵔⵔ ⵄⴰⴷ.
ⵜⵉⵟⵟⴰⵡⵉⵏ ⵏⵏⴻⴽ ⴰⴷ ⵅⴰⴼⵉ ⵉⵍⵉⵏⵜ, ⵎⴰⵛⴰ ⵏⵏⴻⵛ ⵡⴰⵔ ⴷⴰ ⵜⵜⵉⵍⵉⵖ ⵄⴰⴷ.
9 ⴰⵎ ⵎⴰⵎⵎⴻⵛ ⵉⵜⵜⴷⵓⵔⵔⵓⵇ ⵓⵙⴻⵢⵏⵓ, ⵉⵄⴻⴷⴷⵓ,
ⴰⵎⵎⵓ ⵉ ⵖⴰ ⵉⵀⵡⴰ ⴷⵉ ⵍⴰⵅⴰⵔⵜ, ⵡⴰⵔ ⵥⵥⴰⵢⴻⵙ ⴷⴷ-ⵉⵜⵜⴳⴻⵄⵄⵉⴷ ⵄⴰⴷ.
10 ⵄⴻⵎⵎⴰⵔⵚ ⵡⴰⵔ ⴷⴷ-ⵉⵜⵜⵄⵉⵇⵇⵉⴱ ⵖⴰⵔ ⵜⴰⴷⴷⴰⵔⵜ ⵏⵏⴻⵙ,
ⵄⴻⵎⵎⴰⵔⵚ ⵡⴰⵔ ⵅⴰⵙ ⵉⵜⵜⴻⵄⵇⵉⵍ ⵡⴻⵎⵛⴰⵏ ⵏⵏⴻⵙ.
11 ⴰⵎⵎⵓ ⵉ ⵡⴰⵔ ⵜⵜⴻⵇⵇⵏⴻⵖ ⴰⵇⴻⵎⵎⵓⵎ ⵉⵏⵓ,
ⴰⴷ ⵙⵙⵉⵡⵍⴻⵖ ⴷⵉ ⵍⴻⵃⵚⴰⵔⴻⵜ ⵏ ⴱⵓⵃⴱⴻⵍ ⵉⵏⵓ,
ⴰⴷ ⵛⴻⵜⵛⵉⵖ ⴷⵉ ⵜⴰⵔⵥⵓⴳⵉ ⵏ ⵍⴻⵄⵎⴰⵔ ⵉⵏⵓ.
12 ⵎⴰ ⵏⴻⵛⵛ ⴷ ⵍⴻⴱⵃⴰⵔ ⵏⵉⵖ ⴷ ⵍⵀⴰⵢⵛⴻⵜ,
ⴰⵇⴰ ⵛⴻⴽ ⵜⴻⵙⵙⴱⴻⴷⴷⴻⴷ ⵅⴰⴼⵉ ⴰⵄⴻⵙⵙⴰⵙ?
13 ⵎⴰⵍⴰ ⵏⵏⵉⵖ ⵏⴻⵛⵛ: ‘ⵜⴰⵙⵙⵓⵜ ⴰⴷ ⴰⵢⵉ ⵜⵄⴻⵥⵥⴰ,
ⵇⴰⵎⴰ ⵉⵏⵓ ⴰⴷ ⵅⴰⴼⵉ ⵜⴻⵙⵙⴻⵀⵡⴻⵏ ⴰⵛⴻⵜⵛⵉ ⵉⵏⵓ!’,
14 ⴰⵎⵎⵓ ⵉⴷ ⴰⵢⵉ ⵜᵉⵜⵜⵖⴻⵥⵥⵉⴷ ⵙ ⵜⵉⵔⵊⵉⵡⵉⵏ,
ⵓ ⵙ ⵜⵎⴻⵥⵔⵉⵡⵉⵏ ⵜⴻⵙⵙⴰⴳⴳⵯⴰⴷⴻⴷ ⴰⵢⵉ,
15 ⴰⵍⴰⵎⵉ ⵉⴷⵡⴻⵍ ⵍⴻⵄⵎⴰⵔ ⵉⵏⵓ ⵉⵜⵜⵉⵅⴹⴰⵔ ⴰⵊⴻⵢⵢⴻⴼ,
ⵉⵜⵜⵉⵅⴹⴰⵔ ⵍⵎⴻⵡⵜ ⵅ ⵢⴻⵢⵙⴰⵏ ⵉⵏⵓ.
16 ⵏⴻⵛⵛ ⵜⵜⵄⵉⴼⴼⵉⵖ ⵎⴰⵏ ⴰⵢⴰ, ⵡⴰⵔ ⴷⴷⴰⵔⴻⵖ ⵉ ⵍⴻⴱⴷⴰ.
ⴰⵔⵅⵓ ⵥⵥⴰⵢⵉ, ⵎⴰⵖⴰⵔ ⵓⵙⵙⴰⵏ ⵉⵏⵓ ⴰⵎ ⴰⵚⵓⴹⵉ ⵏ ⵏⵏⴻⴼⵙ ⵡⴰⵀⴰ.■
17 ⵎⵉⵏ ⵉⵄⵏⴰ ⴱⵏⴰⴷⴻⵎ ⴰⵇⴰ ⵛⴻⴽ ⵜⵃⴻⵙⵙⴱⴻⴷ ⵜ ⴷ ⴰⵎⴻⵇⵇⵔⴰⵏ ⴰⵎⵎⵓ,
ⵓ ⵜⴻⵍⵀⵉⴷ ⴰⴽⵉⴷⴻⵙ ⵙ ⵡⵓⵍ ⵏⵏⴻⴽ? ■
18 ⴰⵇⴰ ⵛⴻⴽ ⵜⴰⵔⴻⵥⵥⴼⴻⴷ ⵖⴰⵔⴻⵙ ⵇⴰⵄ ⴰⵜⴻⴼⴼⵓ,
ⵜⵇⴻⴵⴱⴻⴷ ⵉ-ⵜ ⵇⴰⵄ ⵜⴰⵥⴻⵃⵥⵉⵀⵜ?
19 ⵎⴻⵛⵃⴰⵍ ⵄⴰⴷ ⵡⴰⵔ ⵥⵥⴰⵢⵉ ⵜᵉⵜⵜⴻⴽⴽⵙⴻⴷ ⵜⵉⵟⵟⴰⵡⵉⵏ,
ⵡⴰⵔ ⴷ ⴰⵢⵉ ⵜⴰⵔⴻⵅⵅⵓⴷ ⵃⵉⵎⴰ ⴰⴷ ⵙⵙⵖⴻⵍⵢⴻⵖ ⵉⴽⵓⴼⴼⴰⵏ ⵉⵏⵓ?
20 ⵎⴰ ⵅⴹⵉⵖ? ⵎⵉⵏ ⴷ ⴰⵛ ⵉ ⵖⴰ ⴳⴳⴻⵖ ⵉ ⵛⴻⴽ,
ⵉ ⵛⴻⴽ ⴰ-ⵢ-ⴰⵄⴻⵙⵙⴰⵙ ⵏ ⴱⵏⴰⴷⴻⵎ?
ⵎⴰⵢⴻⵎⵎⵉ ⵉ ⴷ ⴰⵢⵉ ⵜⴻⵙⵙⴱⴻⴷⴷⴻⴷ ⴷ ⵜⴰⵃⵊⵓⵔⵜ ⵥⵥⴰⵜⴻⴽ,
ⵓ ⴷⴻⵡⵍⴻⵖ ⴷ ⴷⴷⵇⴻⵍ ⵉ ⵢⵉⵅⴻⴼ ⵉⵏⵓ?
21 ⵎⴰⵢⴻⵎⵎⵉ ⵡⴰⵔ ⴷ ⴰⵢⵉ ⵜⵖⴻⴼⴼⴰⵔⴻⴷ ⴰⵅⴻⵟⵟⵓ ⵉⵏⵓ,
ⵓ ⵡⴰⵔ ⵜⵄⴻⴷⴷⵓⴷ ⵅ ⵍⵎⵓⵄⵚⵉⵢⵢⴻⵜ ⵉⵏⵓ?
ⵎⴰⵖⴰⵔ ⵍⴻⵅⵅⵓ ⴰⴷ ⵥⵥⵍⴻⵖ ⴷⵉ ⵜⵄⴻⵊⵊⴰⵊⵜ ⵓ ⵛⴻⴽ ⴰⴷ ⵅⴰⴼⵉ ⵜⴰⵔⵥⵓⴷ,
ⵎⴰⵛⴰ ⵡⴰⵔ ⵜⵜⵉⵍⵉⵖ ⵄⴰⴷ.